4 Hak tuꞌ yu ischejni yaꞌ Moisés tet konhobꞌ Israel ta chꞌekꞌtzelax qꞌinh Pascua. 5 Yekꞌtzen anma Israel qꞌinh Pascua tuꞌ sat txꞌotxꞌ desierto Sinaí, yinh tzꞌayik 14 (kanhlahonhebꞌ) yinh huneꞌ ixahaw tuꞌ, ichiko qꞌinh tuꞌ yinh qꞌejbꞌiyalil. Isyijen anma Israel tuꞌ hakaꞌtikꞌa yu yalni Komam tet yaꞌ Moisés.

6 Yajaꞌ xin ay hunteqꞌan ebꞌnaj Israel mach sajo yehi hakaꞌ yalni chejbꞌanile, yuto istzabꞌ ebꞌnaj isnimanil kamom, yuxin mach yekꞌtze ebꞌnaj qꞌinh Pascua yinh huneꞌ tzꞌayik tuꞌ. Hul ebꞌnaj iskꞌatanh yaꞌ Moisés yebꞌ yaꞌ Aarón. 7 Yalni ebꞌnaj:

—Hanhonhtiꞌanh kotzabꞌanh isnimanil kamom yuxin mach sajo jehanh hakaꞌ yalni chejbꞌanile; ¿tom xin yu huneꞌ tuꞌ yuxin mach chu jaqꞌni koyebꞌalqꞌabꞌanh tet Komam Dios yinh istzꞌayikal bꞌay chiyaqꞌ jet Israelanh isyebꞌalqꞌabꞌ? xhi ebꞌnaj. 8 Istaqꞌwi yaꞌ Moisés tet ebꞌnaj:

—Echmawej, chiwabꞌehan tzet chu yalni Komam teyinh, xhi yaꞌ.

9 Istzotel Komam Dios tet yaꞌ Moisés, yalni Komam: 10 «Hak tiꞌ chawute hawalni tet ebꞌnaj Israel hakaꞌ tiꞌ: Sunil hex Israel hex tiꞌ, yebꞌ anma chipoh yinh heyuninal bꞌaqꞌinh, yilal yekꞌtzen qꞌinh Pascua yu heyaniko inmayan. Sunil ebꞌnaj mach sajo yehi yu xaꞌistzabꞌ ebꞌnaj hunu kamom anma, maka yu ayko ebꞌnaj yinh isbꞌel nahat, 11 chiyekꞌtze ebꞌnaj qꞌinh Pascua tiꞌ yinh 14 (iskanhlanhebꞌ) tzꞌayik yet qꞌejbꞌiyalil yinh iskabꞌ ixahaw; kat iskꞌuxni ebꞌnaj ischibꞌehal noꞌ meꞌ, kat islohnipaxo ebꞌnaj teꞌ kꞌahla itah yebꞌ ixim pan machi yanhal aykoj. 12 Matxa xin ischibꞌehal noꞌ ok yinh xahanbꞌal tuꞌ cheyakanoj yinh hunxa tzꞌayik, yebꞌ mach cheqꞌahto hunu isbꞌajil noꞌ, yet cheyekꞌtze qꞌinh Pascua tiꞌ, hakaꞌtikꞌa yalni chejbꞌanile wakanojan teyet.^b 13 Yajaꞌ wal mak saj yehi, yebꞌ mach ayoto yinh isbꞌel nahat, yajaꞌ ta mach chekꞌtze qꞌinh Pascua, haꞌ huneꞌ mak tuꞌ maqꞌbꞌil yilaxilo xol yet konhobꞌ yuto mach yaqꞌ isyebꞌalqꞌabꞌ wetan yinh istzꞌayikal bꞌay halbꞌilkanoj, haꞌ huneꞌ mak tuꞌ chikankano yalanh ismul.

14 »Sunil anma mach Israelo ay texol, chiyekꞌtze qꞌinh Pascua teyintaj yu yaniko inmayan, chiyekꞌtze hakaꞌ yalni chejbꞌanile walkanojan teyet. Haꞌ chejbꞌanile xawaqꞌan heyijeꞌ hex Israel hex tiꞌ, haꞌ chisyijepaxo anma mach Israelo ay texol,» xhi Komam.^c

15 Haꞌ yinh istzꞌayikal yet islahwi yahkano Yatut Komam Dios, watxꞌebꞌil yinh qꞌap cortina, bꞌay ayikto istꞌinhanil istrato Komam yebꞌ ebꞌnaj Israel, yok hoyno huneꞌ moyan yibꞌanh. Haxa yet qꞌejbꞌiyal xin huneꞌ hakaꞌ qꞌa qꞌaꞌ ok hoyno yibꞌanh; sunilbꞌal aqꞌbꞌal xin ayko huneꞌ qꞌaꞌ tuꞌ yibꞌanh masanto yet issajbꞌiloj. 16 Haknhetikꞌa tuꞌ xin yuhi. Yet tzꞌayikal, haꞌ moyan tuꞌ chiꞌok hoyno yibꞌanh Yatut Komam, haxa yet aqꞌbꞌalil xin, huneꞌ moyan tuꞌ yuteko isbꞌa hakaꞌ qꞌa qꞌaꞌ. 17 Yajaꞌ hayet chiꞌah bꞌatxbꞌon moyan yibꞌanh Yatut Komam tuꞌ, kat isto ebꞌnaj Israel yinh isbꞌel, haꞌ xin bꞌay chiꞌok linhno moyan tuꞌ, haꞌ tuꞌ chikan ebꞌnaj Israel. 18 Haꞌ Komam chihalni tet ebꞌnaj yet chito ebꞌnaj yinh isbꞌel, yebꞌ yet chiꞌok linhno ebꞌnaj yinh isbꞌel, kat iswatxꞌen ebꞌnaj iscampamento bꞌay chiꞌehi. Hatatikꞌa tzꞌayik chiꞌok linhno moyan yibꞌanh Yatut Komam, hak tuꞌ tzꞌayik chiꞌehayo ebꞌnaj. 19 Tato txꞌiꞌal tzꞌayik chiꞌok linhno moyan yibꞌanh Yatut Komam, kat yokpaxo linhno ebꞌnaj yinh isbꞌel, yu yok ebꞌnaj Israel iswatxꞌe tzet chal Komam. 20 Tato hayebꞌnhe tzꞌayik chikankano moyan tuꞌ xin, haktikꞌapax tuꞌ tzꞌayik chikankano ebꞌnaj, lahwi tuꞌ kat istopaxo ebꞌnaj yinh isbꞌel, hakaꞌtikꞌa yalni Komam. 21 Ay bꞌay huneꞌnhechꞌan aqꞌbꞌal chiꞌok linhno huneꞌ moyan tuꞌ, haxa yet sahabꞌ sakꞌayal kat istopaxo ebꞌnaj yinh isbꞌel. Ta hayet tzꞌayikal maka ta hayet aqꞌbꞌalil chibꞌelwito huneꞌ moyan tuꞌ, kat istopaxo ebꞌnaj yinh isbꞌel. 22 Yajaꞌ ta chiꞌok linhno moyan tuꞌ yibꞌanh Yatut Komam hayebꞌ tzꞌayik maka huneꞌ ixahaw maka huneꞌ habꞌil, hak tuꞌ tzꞌayik chikankano ebꞌnaj yul iscampamento, mach xin chito ebꞌnaj yinh isbꞌel. Haxa yet chibꞌelwi moyan tuꞌ, kat istopaxo ebꞌnaj yinh isbꞌel. 23 Masantotikꞌa Komam chihalni ta chikan ebꞌnaj yul iscampamento, haꞌ Komam chihalnipaxoj tato chito ebꞌnaj yinh isbꞌel, chixin isyijen ebꞌnaj tzet yalkano Komam iswatxꞌe ebꞌnaj, hakaꞌ yu yalni Komam tet yaꞌ Moisés.