Chejbꞌanile yinh tzet chu yalaxiko qꞌaꞌ yinh chꞌen lámpara yu yaꞌ Aarón
8
Lahwi tuꞌ, istzotel Komam Dios tet yaꞌ Moisés, yalni Komam hakaꞌ tiꞌ: 2 «Hal tet yaꞌ Aarón tato hayet chistzujbꞌaniko yaꞌ qꞌaꞌ yinh hujebꞌ isnet aceite ayko yinh chꞌen candelabro, haꞌ isqꞌaqꞌal tuꞌ ismujlilti sataj,» xhi Komam. 3 Isyijen yaꞌ Aarón huneꞌ tuꞌ, yahnico yaꞌ qꞌaꞌ yinh isnetal aceite yinh chꞌen candelabro istꞌanhxilti sataj, hakaꞌ yalni Komam Dios tet yaꞌ Moisés. 4 Huneꞌ candelabro tuꞌ nabꞌa oronhe, chakꞌbꞌil yu martillo chiꞌichiti yich masanta yinh iswiꞌ, bꞌay ok xumak yelawilo iswiꞌ. Watxꞌi huneꞌ candelabro tuꞌ hakaꞌtikꞌa yechel isye Komam Dios tet yaꞌ Moisés.Yet yalaxiko ebꞌnaj levita yinh ismunil Komam Dios
5 Istzotelpaxo Komam Dios tet yaꞌ Moisés, yalni Komam hakaꞌ tiꞌ: 6 «Chapohilo sunil ebꞌnaj levita xol ebꞌnaj Israel, kat hasajnhenkano ebꞌnaj hakaꞌ yalni chejbꞌanile. 7 Hak tiꞌ chu hasajnhenkano ebꞌnaj: Chatxihayo ha haꞌ yibꞌanh ebꞌnaj, haꞌ chiꞌokniko issajnhen anma Israel, lahwi tuꞌ kat yel xil ebꞌnaj yu chꞌen xhilet yinh sunil isnimanil, kat istxꞌahni ebꞌnaj xil isqꞌap, hak tuꞌ chu issajbꞌikano ebꞌnaj. 8 Lahwi tuꞌ, kat yiniti ebꞌnaj hunu noꞌ tzehla wakax yebꞌ hanikꞌo ixim harina kaw kꞌul, sombꞌil yebꞌ aceite yebꞌalqꞌabꞌehal, kat yinipaxti ebꞌnaj hunuxa noꞌ tzehla wakax xahanbꞌalil yu istoholo ismul ebꞌnaj. 9 Kat hawalni ta chihitziko ebꞌnaj levita tuꞌ iskꞌatanh watutan watxꞌebꞌilkanh yinh qꞌap cortina, kat hakutxbꞌanpaxiko sunil ebꞌnaj Israel. 10 Kat yok ebꞌnaj levita tuꞌ insatajan, kat yanayo ebꞌnaj Israel isqꞌabꞌ yibꞌanh iswiꞌ ebꞌnaj. 11 Lahwi tuꞌ xin chꞌalaxiko ebꞌnaj levita insatajan yu yaꞌ Aarón hakaꞌ hunu xahanbꞌal chaqꞌ ebꞌnaj Israel wetan. Hak tuꞌ xin chu yok ebꞌnaj levita tuꞌ yinh inmunilan. 12 Lahwi tuꞌ, kat yanayo ebꞌnaj levita isqꞌabꞌ yibꞌanh iswiꞌ noꞌ tzehla wakax. Huneꞌ noꞌ chihaltelax xahanbꞌalil yu istohlan mule, huneꞌxa noꞌ xin chinhuslax xahanbꞌalil wetan, hanin Yahawilintiꞌan, yu issajnhelaxkano ebꞌnaj levita. 13 Lahwi tuꞌ, kat hawaniko ebꞌnaj sata yaꞌ Aarón yebꞌ sata ebꞌnaj iskꞌahol yaꞌ. Kat hawaniko ebꞌnaj yebꞌalqꞌabꞌehal wetan. 14 Hak tuꞌ chu hapohnikanilo ebꞌnaj levita tuꞌ xol ebꞌnaj Israel yunhe yokkano ebꞌnaj wetojan. 15 Lahwi tuꞌ, kat yul ebꞌnaj munil yul watutan watxꞌebꞌilkanh yinh qꞌap cortina, bꞌay chekutxbꞌa hebꞌa inkꞌatanhan. Ebꞌnaj levita tuꞌ, yilal hasajnhenkano ebꞌnaj, kat hawanikaniko ebꞌnaj wetojan yinh yebꞌalqꞌabꞌehal kaw ay yelapnoj. 16 Yuto texol hesunil hex Israel hex tiꞌ, haꞌ ebꞌnaj chiꞌok munil yinh inmunilan; wetan chukaniko ebꞌnaj selelo isbꞌabꞌel kꞌahol ebꞌnaj Israel. 17 Yuto wetan ye sunil ebꞌnaj bꞌabꞌel iskꞌahol ebꞌnaj Israel; haktikꞌapax tuꞌ noꞌ bꞌabꞌel yunin isnoqꞌ ebꞌnaj, wetan ye noꞌ. Yet inpotxꞌnikamojan ebꞌnaj bꞌabꞌel iskꞌahol ebꞌnaj ah Egipto, matzet wutehan ebꞌnaj bꞌabꞌel iskꞌahol ebꞌnaj Israel, wal xin wakanikojan ebꞌnaj tuꞌ wetojan. 18 Yuxin haꞌ ebꞌnaj levita chinchahan selelo ebꞌnaj bꞌabꞌel iskꞌahol ebꞌnaj Israel. 19 Haninan sikꞌnhekanilo ebꞌnaj levita xol ebꞌnaj Israel yunhe yijbꞌan yaꞌ Aarón yebꞌ ebꞌnaj iskꞌahol yaꞌ ebꞌnaj yinh inmunilan yinh isbꞌi anma Israel yul Watutan watxꞌebꞌilkanh yinh qꞌap cortina; yunhe istzotel ebꞌnaj yinh anma Israel wetan, kat waqꞌni nimankꞌulalan yinh, yunhe machi hitziko anma Israel iskawilal Watutan, kat istit isyaꞌtajil yibꞌanh,» xhi Komam.
20 Isyijen yaꞌ Moisés yebꞌ yaꞌ Aarón yebꞌ sunil anma Israel yinh tzet yal Komam Dios tet yaꞌ Moisés yibꞌanhilo ebꞌnaj levita. 21 Issajnhen isbꞌa ebꞌnaj levita tuꞌ, istxꞌahni ebꞌnaj xil isqꞌap, yaniko yaꞌ Aarón ebꞌnaj tet Komam Dios hakaꞌ hunu yebꞌalqꞌabꞌe kaw ay yelapno sata Komam, yaqꞌnipaxo yaꞌ huneꞌ xahanbꞌal yunhe issajnhelaxkano ebꞌnaj yinh ismul sata Komam. 22 Isto ebꞌnaj levita bꞌey Yatut Komam watxꞌebꞌilkanh yinh qꞌap cortina bꞌay chiskutxbꞌa isbꞌa anma iskꞌatanh Komam. Haꞌ xin yaꞌ Aarón yebꞌ iskꞌahol chiꞌijbꞌan ebꞌnaj yinh munil tuꞌ. Hakaꞌtikꞌa yu yalnikano Komam Dios tet yaꞌ Moisés, hak tuꞌ yu isyijen ebꞌnaj levita.
23 Lahwi tuꞌ istzotel Komam Dios tet yaꞌ Moisés hakaꞌ tiꞌ: 24 «Ebꞌnaj levita tzꞌajanxa yinh 25 (howebꞌ iskawinaj) habꞌil chiꞌok ebꞌnaj munil yul watutan watxꞌebꞌilkanh yinh qꞌap cortina. 25 Haxa yet chitzꞌajna ebꞌnaj yinh 50 (lahonh yoxkꞌal) habꞌil, kat yel ebꞌnaj yinh inmunil tuꞌan. 26 Hayet tzꞌajanxa ebꞌnaj yinh 50 (lahonh yoxkꞌal) habꞌil tuꞌ, toxanhe chikolwa ebꞌnaj yinh ebꞌnaj chitanhen watutan; yajaꞌ matxa kaw chimunla ebꞌnaj hakaꞌ yet yalanhtokanoj. Hak tuꞌ xin chu hawaniko ebꞌnaj levita yinh istxolal yinh inmunilan,» xhi Komam.