Yebꞌalqꞌabꞌe ilaxti yu yekꞌtzelax isqꞌinhal Yatut Komam
7
Hayet islahwi iswatxꞌenkanokanh yaꞌ Moisés Tabernáculo, haꞌ Yatut Komam Dios, istxihniko yaꞌ aceite yinh Yatut Komam tuꞌ, yebꞌ yinh sunil munlabꞌal chiꞌokniko yul. Istxihnipaxiko yaꞌ aceite yibꞌanh ismexhahil xahanbꞌal yebꞌ sunil ismunlabꞌal Yatut Komam Dios tuꞌ. 2 Wal ebꞌnaj yahaw ye yinh hunun majan ebꞌnaj Israel, yebꞌ ebꞌnaj mame yebꞌ yuninal; ebꞌnaj kolwa yinikanh isbꞌisil ebꞌnaj Israel, hul ebꞌnaj 3 yaqꞌni ebꞌnaj wajebꞌ carruaje ayko yenhel yibꞌanh, yebꞌ 12 (kabꞌlahonhkꞌonh) noꞌ wakax yebꞌalqꞌabꞌehal tet Komam. Chal yelapnoj, hunun carruaje yinh katawanh ebꞌnaj, hunun xin noꞌ wakax yinh hunun ebꞌnaj. Sunil tiꞌ yalte ebꞌnaj sata istiꞌ Tabernáculo, haꞌ Yatut Komam.4 Yalni Komam Dios tet yaꞌ Moisés hakaꞌ tiꞌ: 5 «Chaloh hunteqꞌan carruaje yebꞌ noꞌ wakax tiꞌ tet ebꞌnaj, kat hawaqꞌni tet ebꞌnaj levita, yunhe yokniko yinh munil yul watutan watxꞌebꞌil yinh qꞌap cortina bꞌay chinchah hinbꞌahan yebꞌ hex, chawaqꞌa hatatikꞌa munil chiswatxꞌe hunun ebꞌnaj,» xhi Komam tet yaꞌ.
6 Ischahnilo yaꞌ Moisés hunteqꞌan carruaje yebꞌ noꞌ wakax, ispohnikanh yaꞌ xol ebꞌnaj levita. 7 Yaqꞌni yaꞌ kabꞌebꞌ carruaje yebꞌ kanhkꞌonh noꞌ wakax tet ebꞌnaj titna yinh naj Gersón, yu yokniko yu ebꞌnaj yinh ismunil Komam iswatxꞌe ebꞌnaj. 8 Yaqꞌnipaxo yaꞌ kanhebꞌ carruaje yebꞌ waxajkꞌonh noꞌ wakax tet ebꞌnaj titna yinh naj Merari, chiꞌokniko yu ebꞌnaj yinh ismunil Komam. Haꞌ xin naj Itamar, iskꞌahol yaꞌ sacerdote Aarón chiꞌijbꞌan ebꞌnaj yinh ismunil tuꞌ. 9 Walpaxo ebꞌnaj titna yinh yuninal naj Coat, mach yaqꞌ yaꞌ Moisés carruaje yebꞌ noꞌ wakax tet ebꞌnaj, yuto haꞌ ebꞌnaj chiꞌinito yibꞌanh iswixikꞌ munlabꞌal, hunteqꞌan kaw ay yelapnoj, chiꞌokniko yul Yatut Komam.
10 Hayet istzꞌayikal yalaxiko ismexhahil yet xahanbꞌal yinh ismunil, yiniti ebꞌnaj iswiꞌehal yinh hunun majan ebꞌnaj Israel isyebꞌalqꞌabꞌ, yanayo ebꞌnaj sataj.
11 Yalni Komam Dios tet yaꞌ Moisés: «Haꞌ yinh hunun tzꞌayik, nananta ebꞌnaj iswiꞌehal yinh hunun majan ebꞌnaj Israel chiꞌiniti isyebꞌalqꞌabꞌ chiꞌokniko yinh yet chiꞌalaxiko ismexhahil xahanbꞌal yinh inmunilan,» xhi Komam.
12 Yinh bꞌabꞌel tzꞌayik, yiti naj Naasón, iskꞌahol naj Aminadab isyebꞌalqꞌabꞌ, naj iswiꞌehal yeko yinh ebꞌnaj titna yinh yaꞌ Judá. 13 Haꞌ isyebꞌalqꞌabꞌ naj yiti tuꞌ, haꞌ ton huneꞌ chꞌen sekꞌ plata, 130 siclo yalil; yebꞌ huneꞌ chꞌen xhalu plata, 70 (lahonhebꞌ iskanhwinaj) siclo yalil, hakaꞌ ismalil malbꞌal chiꞌokniko yul Yatut Komam. Chꞌen sekꞌ yebꞌ chꞌen xhalu tuꞌ, nohna chꞌen iskabꞌil yu ixim harina kaw kꞌul, sombꞌil yebꞌ aceite, yu yaqꞌlax yebꞌalqꞌabꞌehal yinh tzet chilolaxi. 14 Yaqꞌnipaxo naj huneꞌ chꞌen niman cuchara oro isyebꞌalqꞌabꞌoj, 10 (lahonhebꞌ) siclo yalil, nohnayto teꞌ pom yul. 15 Yebꞌpaxo huneꞌ noꞌ tzehla wakax yebꞌ huneꞌ noꞌ winaj meꞌ yebꞌ huneꞌ noꞌ nichꞌan meꞌ huneꞌ habꞌil, yu yaqꞌlax yinh xahanbꞌalil chinhuslax tet Komam. 16 Yaqꞌnipaxo naj huneꞌ noꞌ chiw xahanbꞌalil chitohlan mule. 17 Yaqꞌnipaxo naj kakꞌonh noꞌ tzehla wakax, yebꞌ hokꞌonh noꞌ winaj meꞌ yebꞌ hokꞌonh noꞌ chiw, yebꞌ hokꞌonh noꞌ yunin meꞌ huneꞌ habꞌil, yu yaltelax noꞌ yinh xahanbꞌalil yet aqꞌankꞌulal. Haꞌ tuꞌ isyebꞌalqꞌabꞌ naj Naasón iskꞌahol naj Aminadab yaqꞌ tet Komam.
18 Haxa yinh iskabꞌ tzꞌayik, yaqꞌni naj Natanael, iskꞌahol naj Zuar isyebꞌalqꞌabꞌ, naj iswiꞌehal yinh ebꞌnaj titna yinh yaꞌ Isacar. 19-23 Lahan xin isyebꞌalqꞌabꞌ naj yaqꞌ hakaꞌtikꞌa naj Naasón.
24 Haxa yinh yox tzꞌayik yaqꞌni naj Eliab, iskꞌahol naj Helón isyebꞌalqꞌabꞌ, naj iswiꞌehal yinh ebꞌnaj titna yinh yaꞌ Zabulón. 25-29 Lahan xin isyebꞌalqꞌabꞌ naj Eliab tuꞌ yaqꞌ hakaꞌtikꞌa naj Naasón.
30 Haxa yinh iskanh tzꞌayik, yaqꞌ naj Elisur, iskꞌahol naj Sedeur isyebꞌalqꞌabꞌ, naj iswiꞌehal yinh ebꞌnaj titna yinh yaꞌ Rubén. 31-35 Lahan xin isyebꞌalqꞌabꞌ naj yaqꞌ hakaꞌtikꞌa isyebꞌalqꞌabꞌ naj Naasón.
36 Haxa yinh ishoꞌ tzꞌayik, yaqꞌ naj Selumiel iskꞌahol naj Zurisadai isyebꞌalqꞌabꞌ, naj iswiꞌehal ebꞌnaj titna yinh yaꞌ Simeón. 37-41 Lahan xin isyebꞌalqꞌabꞌ naj yaqꞌa hakaꞌtikꞌa isyebꞌalqꞌabꞌ naj Naasón.
42 Haxa yinh iswaj tzꞌayik, yaqꞌni naj Eliasaf, iskꞌahol naj Deuel isyebꞌalqꞌabꞌ, naj iswiꞌehal xol ebꞌnaj titna yinh yaꞌ Gad. 43-47 Lahan xin isyebꞌalqꞌabꞌ naj hakaꞌtikꞌa isyebꞌalqꞌabꞌ naj Naasón.
48 Haxa yinh ishuj tzꞌayik, yaqꞌni naj Elisama iskꞌahol naj Amiud isyebꞌalqꞌabꞌ, naj iswiꞌehal xol ebꞌnaj titna yinh yaꞌ Efraín. 49-53 Lahan xin isyebꞌalqꞌabꞌ naj hakaꞌtikꞌa isyebꞌalqꞌabꞌ ebꞌnaj bꞌabꞌel.
54 Haxa yinh iswaxajebꞌ tzꞌayik yaqꞌni naj Gamaliel, iskꞌahol naj Pedasur isyebꞌalqꞌabꞌ, naj iswiꞌehal xol ebꞌnaj titna yinh yaꞌ Manasés. 55-59 Lahan xin isyebꞌalqꞌabꞌ naj yaqꞌ hakaꞌ ebꞌnaj bꞌabꞌel.
60 Haxa yinh isbꞌalonhebꞌ tzꞌayik yaqꞌni naj Abidán iskꞌahol naj Gedeoni isyebꞌalqꞌabꞌ, naj iswiꞌehal ye xol ebꞌnaj titna yinh yaꞌ Benjamín. 61-65 Lahan xin isyebꞌalqꞌabꞌ naj yaqꞌ hakaꞌ yaqꞌ ebꞌnaj bꞌabꞌel.
66 Haxa yinh 10 (islahonhebꞌ) tzꞌayik, yaqꞌ naj Ahiezer iskꞌahol naj Amisadai isyebꞌalqꞌabꞌ, haꞌ naj iswiꞌehal yinh ebꞌnaj titna yinh yaꞌ Dan. 67-71 Lahan xin isyebꞌalqꞌabꞌ naj yaqꞌ hakaꞌtikꞌa yaqꞌ ebꞌnaj bꞌabꞌel.
72 Haxa yinh 11 (ishunlahonhebꞌ) tzꞌayik yaqꞌni naj Pagiel, iskꞌahol naj Ocrán isyebꞌalqꞌabꞌ, naj iswiꞌehal yinh ebꞌnaj titna yinh yaꞌ Aser. 73-77 Lahan xin isyebꞌalqꞌabꞌ naj yaqꞌ hakaꞌtikꞌa yaqꞌ ebꞌnaj bꞌabꞌel.
78 Haxa yinh 12 (iskabꞌlahonhebꞌ) tzꞌayik yaqꞌ naj Ahira, iskꞌahol naj Enán isyebꞌalqꞌabꞌ, naj iswiꞌehal xol ebꞌnaj titna yinh yaꞌ Neftalí. 79-83 Lahan xin isyebꞌalqꞌabꞌ naj yaqꞌa hakaꞌtikꞌa yet ebꞌnaj bꞌabꞌel.
84 Yuxin hayet yalaxiko ismexhahil yet xahanbꞌal yinh ismunil kabꞌlahonhebꞌ chꞌen sekꞌ plata yaqꞌ ebꞌnaj iswiꞌehal xol ebꞌnaj Israel isyebꞌalqꞌabꞌoj, yaqꞌnipaxo ebꞌnaj kabꞌlahonhebꞌ chꞌen xhalu plata, yebꞌ kabꞌlahonhebꞌ chꞌen nime cuchara oro. 85 Hunun chꞌen sekꞌ tuꞌ, 130 siclo yalil hunun chꞌen, walpaxo chꞌen xhalu xin, 70 (lahonhebꞌ iskanhwinaj) siclo yalil hunun chꞌen; yuxin yinh sunil, 2,400 siclo yalil chꞌen hakaꞌtikꞌa ismalil malbꞌal chiꞌokniko yul watutan. 86 Yaqꞌnipaxo ebꞌnaj kabꞌlahonhebꞌ chꞌen nime cuchara oro, nohna yu teꞌ pom, 10 (lahonhebꞌ) siclo yalil hunun chꞌen hakaꞌtikꞌa malbꞌal chiꞌokniko yul Yatut Komam. 120 siclo yalil chꞌen cuchara tuꞌ yinh sunil.
87 Haxa isbꞌisil no noqꞌ nhuslax yinh xahanbꞌalil, haꞌ ton tiꞌ; 12 (kabꞌlahonhkꞌonh) noꞌ tzehla wakax, 12 (kabꞌlahonhkꞌonh) noꞌ tzehla meꞌ, 12 (kabꞌlahonhkꞌonh) noꞌ yunin meꞌ huneꞌ habꞌil; yaqꞌlaxpaxo ixim trigo yebꞌalqꞌabꞌe yinta noꞌ, yebꞌ 12 (kabꞌlahonhkꞌonh) noꞌ chiw nhuslax xahanbꞌalil yu istohlan mule. 88 Haxa no noqꞌ aqꞌlax xahanbꞌalil yet aqꞌankꞌulal, 24 (kanhebꞌ iskawinaj) isbꞌisil noꞌ tzehla wakax yinh sunil, 60 (oxkꞌal) noꞌ isbꞌisil noꞌ winaj meꞌ, 60 (oxkꞌal) isbꞌisil noꞌ chiw, yebꞌ xin 60 (oxkꞌal) isbꞌisil noꞌ yunin meꞌ huneꞌ habꞌil. Hunteqꞌan yebꞌalqꞌabꞌe tiꞌ yaqꞌ ebꞌnaj yet yalaxiko ismexhahil yet xahanbꞌal yinh ismunil, yet lahwi istxihlaxiko aceite yinh.
89 Hayet yokto yaꞌ Moisés yul Yatut Komam watxꞌebꞌilkanh yinh qꞌap cortina bꞌay chiskutxbꞌa isbꞌa ebꞌnaj Israel iskꞌatanh Komam, yu istzotel yaꞌ yebꞌ Komam, yabꞌen yaꞌ istzotel Komam yibꞌanh ismajil Kaxha bꞌay ayayto istrato Komam yaqꞌ tet ebꞌnaj Israel, xolbꞌal yechel kawanh ebꞌnaj querubín, bꞌay chꞌaqꞌlax tanho mule.