Chejbꞌanile yinh mak chalte isbꞌa yok yinh nazareohal
6
Tzotel Komam Dios tet yaꞌ Moisés, yalni Komam: 2 «Hal tet ebꞌnaj Israel hakaꞌ tiꞌ: Tato ay hunu naj winaj, maka hunu ix ix, chispohilo isbꞌa yu yok yijemal wetan, kat yalten yaniko isbꞌa yinh nazareohal, 3 huneꞌ mak tuꞌ, machi yukꞌ vino, maka tzet ye tuꞌ qꞌuwinaxa; mach chu yukꞌnipaxo noꞌ vinagre sombꞌil isbꞌa yebꞌ yal teꞌ uva, maka vinagre sombꞌil isbꞌa yebꞌ tzet qꞌuwinaxa, machi xin chu yukꞌnipaxo yal teꞌ uva maka islohni sat teꞌ, nitam iskꞌuxni teꞌ tajinxa. 4 Yulbꞌal tiempo chisyije naj tzet yalte wetan tuꞌ, mach chu islohni naj hunu tzet ye tuꞌ chiwatxꞌelax yinh teꞌ uva, machi hunu tzet tuꞌ chislo naj.5 »Yinh sunilbꞌal istiempo bꞌay yalte isbꞌa naj nazareohal mach chiꞌok xhilet yinikanh xil iswiꞌ naj. Wal xin chiyaqꞌ chꞌibꞌo naj xil iswiꞌ masanto yet chiꞌapni istzꞌayikal tzet haltebꞌil yu naj wetan, yu wetnhehan chukaniko naj. 6 Yulbꞌal hunteqꞌan tiempo wetan chuko naj, mach chu ishitziko naj iskꞌatanh hunu kamom, 7 waxanhka ismam naj maka ismiꞌ naj chikami, maka yuxhtaj, maka hunu yanabꞌ naj, mach chu ishitziko naj iskꞌatanh, yunhe mach chistzꞌilnheto isbꞌa naj, yuto hanhkꞌanhe tzet ye tuꞌ wetan haꞌ chu naj.a 8 Yulbꞌal istiempohal ayko naj nazareohal, kaw yilal tzet ye tuꞌ wetnhetikꞌahan chu naj.
9 »Ta xin ay hunu mak ayko iskꞌatanh naj, kꞌuxan xin iskamayoj, haꞌ xin iswiꞌ naj wetan yeko tuꞌ, matxa sajo chukanoj hakaꞌ yalni chejbꞌanile, yuxin yilal yinilo naj xil iswiꞌ yet chilahwi yekꞌto hujebꞌ tzꞌayik bꞌay chissajnhe isbꞌa naj, hakaꞌ yalni chejbꞌanile. 10 Haxa yinh ishuj tzꞌayik xin chíti naj kakꞌonho noꞌ kuwis maka kakꞌonho noꞌ yunin kuwis tet naj sacerdote, sata ispultahil istiꞌ watutan bꞌay chekutxbꞌa hebꞌa insatajan. 11 Haxa xin naj sacerdote chihalten hunu noꞌ yinh xahanbꞌalil yinh mule, haxa hunxa noꞌ xin chinhuslax noꞌ yinh xahanbꞌalil. Hak tuꞌ chu yaqꞌlax nimankꞌulal yinh ismul naj yu ok naj iskꞌatanh isnimanil huneꞌ mak kam tuꞌ. Haꞌ yinh huneꞌ tzꞌayik tuꞌ chꞌok naj iswatxꞌeꞌ isbꞌa kat issajnhen iswiꞌ. 12 Iswatxꞌe isbꞌa naj yinh huneꞌ tzꞌayik tuꞌ yu yichiko naj yok nazareohal hunelxa. Haꞌ tiempo xaꞌekꞌto yet yalanhtokano tuꞌ, matxa chiꞌok istzꞌajo isbꞌisil yinh, yuto haꞌ xil iswiꞌ naj wetan yehi etaxtoj, kat yiniti naj huneꞌ noꞌ yunin meꞌ xahanbꞌalil yinh ismul wetan.
13 »Hayet istzꞌayikal yet chilahwi yok hunu naj tuꞌ nazareohal, kat yapni naj istiꞌ ispultahil watutan bꞌay chiskutxbꞌa isbꞌa ebꞌnaj Israel inkꞌatanhan. 14 Kat yalten naj hunu noꞌ yunin meꞌ huneꞌ habꞌil, machi istzakaꞌil wetan, yebꞌ hunu noꞌ ix meꞌ huneꞌ habꞌil machi istzakaꞌil, yu yaltelax noꞌ xahanbꞌalil yinh mule, kat yalten naj hunu noꞌ winaj meꞌ machi istzakaꞌil chu yok xahanbꞌalil yet aqꞌankꞌulal. 15 Kat yaltenpaxo naj hunu nichꞌan motx ixim pan watxꞌebꞌil yinh ixim harina kaw kꞌul, sombꞌiliko aceite xol, machi yanhal aykoj, kat yaqꞌlaxpaxo ixim wonhkꞌox pan machi yanhal, sombꞌilpaxiko aceite xol, yebꞌpaxo ixim trigo yebꞌ vino yebꞌalqꞌabꞌehal. 16 Haꞌ xin naj sacerdote chihalten huneꞌ xahanbꞌal yet mule tuꞌ insatajan, yebꞌpaxo xahanbꞌal chinhuslaxi. 17 Kat yaltenpaxo naj noꞌ winaj meꞌ xahanbꞌalil yet aqꞌankꞌulal, hun chu yaltelax yebꞌ huneꞌ nichꞌan motx ixim pan machi yanhal aykoj, kat yaltenpaxo naj ixim trigo yebꞌ vino yebꞌalqꞌabꞌehal wetan. 18 Bꞌey ispultahil watutan bꞌay chiskutxbꞌa isbꞌa ebꞌnaj Israel, haꞌ naj chꞌok nazareohal chiyilo xil iswiꞌ naj, yaj kaw pechꞌan chukanoj, kat yanikto naj xil iswiꞌ tuꞌ xol qꞌa qꞌaꞌ ayko yalanh xahanbꞌal yet aqꞌankꞌulal. 19 Chiniti naj sacerdote isbꞌul noꞌ winaj meꞌ tahnaxa, yebꞌ pan machi yanhal aykoj ayayto yul huneꞌ nichꞌan motx, yebꞌ huneꞌ ixim wonhkꞌox pan machipaxo yanhal, chaniko naj sunil yul isqꞌabꞌ naj ok nazareohal tuꞌ. 20 Lahwi tuꞌ, kat isbꞌatxnikanh naj sacerdote hunteqꞌan tuꞌ yebꞌalqꞌabꞌe insatajan. Haꞌ noꞌ istxam iskꞌul chibꞌatxlaxkanh insatajan, yebꞌ noꞌ isbꞌul tuꞌ, kaw aykano yelapno noꞌ, yuto haꞌ noꞌ chꞌaqꞌlax tet ebꞌnaj sacerdote yu iskꞌuxni. Haxa yet xalahwi sunil hunteqꞌan tuꞌ xin, xaꞌisje yukꞌni naj ok nazareohal tuꞌ teꞌ vino.
21 »Haꞌ ton hunteqꞌan tuꞌ chejbꞌanile yinh mak chiyalte isbꞌa yok wetojan yinh nazareohal. Haꞌpaxo hunteqꞌan yebꞌalqꞌabꞌe tuꞌ, yilal yalten wetan, yajaꞌ ta ay hunuxa yebꞌalqꞌabꞌe chiyoche chiyaqꞌa, chisje yaqꞌni. Haꞌ tzet chiyalte naj, yilal isyijen naj hakaꞌ yalni chejbꞌanile yinh ebꞌnaj chiꞌok nazareohal,» xhi Komam, xhi yaꞌ Moisés.
Kꞌul-la tzotiꞌ chiyal ebꞌnaj sacerdote
22 Istzotel Komam Dios tet yaꞌ Moisés, yalni Komam hakaꞌ tiꞌ: 23 «Hal tet yaꞌ Aarón yebꞌ tet ebꞌnaj iskꞌahol, hayet chisqꞌanni ebꞌnaj iskꞌulal yibꞌanh anma Israel, hak tiꞌ chiyute yalni ebꞌnaj hakaꞌ tiꞌ:
24 “Yaqꞌabꞌayo Komam Dios iskꞌulal teyibꞌanh,
kat kexistanheni.
25 Haꞌojabꞌ Komam chexilni yinh tzalahilal,
kat isyenilo hanta chitzꞌay iskꞌul teyinh.
26 Yaqꞌabꞌayo Komam iskꞌulal teyibꞌanh,
kat yaqꞌni aqꞌankꞌulal teyet,” kexchi.
27 »Hak tuꞌ chu yaqꞌni bꞌinaho ebꞌnaj inbꞌihan yet chisqꞌanni ebꞌnaj iskꞌulal yibꞌanh anma Israel, kat wanayojan inkꞌulalan yibꞌanh,» xhi Komam.