Sunil mak mach sajo yehi chiꞌilaxilto yintalto campamento
5
Yalni Komam Dios tet yaꞌ Moisés hakaꞌ tiꞌ: 2 «Hal tet ebꞌnaj Israel tato chalto ebꞌnaj yintalto campamento sunil mak ayko yabꞌil lepra yinh, yebꞌ mak ay tzet chiꞌel yinh isnimanil, yebꞌ mak mach sajoj yu xaꞌistzabꞌ isnimanil hunu kamom. 3 Chiꞌilaxilto yintalto campamento, walka ix maka winaj; hak tuꞌ xin mach chꞌetaxto campamento, bꞌay chinehikꞌojan texol,» xhi Komam.
4 Hak tuꞌ xin yute ebꞌnaj Israel hakaꞌtikꞌa chejbꞌanil yaqꞌ Komam tet yaꞌ Moisés tuꞌ, yanilto ebꞌnaj sunil hunteqꞌan mak tuꞌ yintalto campamento.
Chejbꞌanile yibꞌanhilo yaqꞌlax iskꞌulal selelo istxꞌojal
5 Tzotel Komam Dios tet yaꞌ Moisés, yalni Komam: 6 «Hal tet ebꞌnaj Israel hakaꞌ tiꞌ: Tato ay hunu naj winaj maka hunu ix ix mach chiyijen tzet chiwalan, kat iswatxꞌen istxꞌojal yinh hunuxa maka, chako ismul huneꞌ mak tuꞌ, 7 yilal xin yohtanhenilo huneꞌ mak tuꞌ istxꞌojal iswatxꞌe; kat yaqꞌni isselel tzet yetato tuꞌ, kat xin yaqꞌni howebꞌ majan yibꞌanhilo isselel. 8 Ta huneꞌ mak bꞌay iswatxꞌe naj istxꞌojal tuꞌ xakami, matxapaxo xin hunu mak ayto yu isbꞌa yebꞌi chichahni selel chaqꞌ naj tuꞌ; yinh hakaꞌ tuꞌ, haꞌ selel chaqꞌ naj chiꞌok wetojan, yul isqꞌabꞌ ebꞌnaj sacerdote chikankanoj, nan xin yepaxo hunu noꞌ icham meꞌ chihaltelax xahanbꞌalil yu yaqꞌlax tanho ismul naj.
9 »Sunil yebꞌalqꞌabꞌ chiyaqꞌ ebꞌnaj Israel wetan, chꞌaqꞌlax sata naj sacerdote, yet naj chukanikoj. 10 Sunil tzet chaqꞌ ebꞌnaj Israel wetan, kat xin yilaxto sata hunu naj sacerdote, yet naj chukanikoj,» xhi Komam.
Chejbꞌanil yinh ix ix chisnako yichamil yinh ta ay ismul
11 Tzotel Komam Dios tet yaꞌ Moisés, yalni Komam: 12 «Hal tet ebꞌnaj Israel hakaꞌ tiꞌ: Kꞌuxanta ay hunu ix ix chako ismul yul isqꞌabꞌ yichamil, 13 kat isway ix yebꞌ hunuxa winaj, machi xin mak chalni tet yichamil ix tuꞌ ta xayaqꞌ tzꞌilbꞌoto isbꞌa ix yinh ewantajil, mach xin ohtabꞌiloj, yuto machi mak ilnhe ix yinh ismul. 14 Kat istzꞌeꞌbꞌikanh yichamil ix; maka xin tonhe chitzꞌeꞌbꞌikanh naj yinh ix, machi xin ismul ix. 15 Yinh hakaꞌ tuꞌ, chíti naj ichamile tuꞌ yixal sata naj sacerdote, kat yaqꞌni naj kanhebꞌ libra ixim harina cebada yebꞌalqꞌabꞌehal yinh ix; yajaꞌ xin mach chayo naj aceite yebꞌ teꞌ pom yibꞌanh ixim harina tuꞌ, yuto huneꞌ tuꞌ, yebꞌalqꞌabꞌe yinh mak tzꞌeꞌ chute isbꞌa yinh yixal, yebꞌ chꞌaqꞌni ohtanhelaxo hunu mule.
16 »Kat xin yalni naj sacerdote tet ix tato chihitzti ix, kat yok ix sata Komam. 17 Lahwi tuꞌ, kat yiniti naj hanikꞌo ha haꞌ yet Komam yehi, yul hunu txꞌotxꞌ xhalu, kat yinikanh naj hanikꞌo pojoj yul Yatut Komam tuꞌ, kat yanayto naj xol haꞌ. 18 Kat yok linhno ix sata Komam yu naj sacerdote, kat yinilo ix yenhel iswiꞌ, kat yaniko naj sacerdote yul isqꞌabꞌ ix huneꞌ yebꞌalqꞌabꞌe yet mak tzꞌeꞌ yinh yixal, huneꞌ chiꞌaqꞌni ohtanhelaxo mule. Wal naj sacerdote tuꞌ xin, ayko ha haꞌ kꞌah yul isqꞌabꞌ naj, chiqꞌanniti tzꞌaktiꞌ ta ay ismul huneꞌ maka. 19 Chalni naj yinh kaw isyelal tet ix hakaꞌ tiꞌ: “Tato yeli mach kaxhway yebꞌ hunu winaj, yebꞌ tato mach hawako hamul yul isqꞌabꞌ hawichamil tiꞌ, yebꞌ mach hatzꞌilnheto habꞌa yebꞌ hunuxa winaj, machojabꞌ tzet chawu yet chawukꞌni ha haꞌ kꞌah chiꞌiniti tzꞌaktiꞌ. 20 Yajaꞌ tato hawako hamul yul isqꞌabꞌ hawichamil, yu kaxhway yebꞌ hunu winaj, hatzꞌilnhento habꞌa,” xhi naj sacerdote. 21 Lahwi tuꞌ, kat istzotel naj sacerdote yibꞌanhilo tzꞌaktiꞌ tet ix hakaꞌ tiꞌ: “Haꞌ Komam Jahawil chaxhtzꞌaktiꞌnheni, yebꞌ yahbꞌeta chawukanoj, kat xin isbꞌajbꞌayo habꞌul, kat ismalkanh yul hakꞌul. 22 Haꞌ huneꞌ isyaꞌtajil tuꞌ chihul tawibꞌanh yet chawukꞌni ha haꞌ chiꞌiniti tzꞌaktiꞌ, chimalkanh yul hakꞌul, kat isbꞌajbꞌilo yinh habꞌul,” xhihojabꞌ naj sacerdote tuꞌ, kat yalni ix: Yubꞌojabꞌi, xhi ix.
23 »Chistzꞌibꞌnhekano naj sacerdote hunteqꞌan tzꞌaktiꞌ yul teꞌ hum, tzujan tuꞌ kat ishonikanh naj yu haꞌ kꞌahla haꞌ tuꞌ. 24 Lahwi tuꞌ, kat yaqꞌni naj haꞌ kꞌahla haꞌ yukꞌuꞌ ix, yunhe iskꞌahbꞌilo yul iskꞌul ix yu haꞌ. 25 Kat yinilo naj sacerdote tuꞌ huneꞌ yebꞌalqꞌabꞌe ayko yul isqꞌabꞌ ix, ixim harina chꞌaqꞌlax yebꞌalqꞌabꞌehal, yu mak tzꞌeꞌ yinh yixal, kat xin isbꞌatxbꞌanahto naj huneꞌ yebꞌalqꞌabꞌe tuꞌ sat ismexhahil xahanbꞌal sata Komam. 26 Haꞌ naj sacerdote tuꞌ chiyikanh naj hun pul ixim harina, kat isnhusni naj yibꞌanh ismexhahil xahanbꞌal, yinh yebꞌalqꞌabꞌe chinaniti mule, yet chilahwi yukꞌni ix haꞌ kꞌahla haꞌ tuꞌ yu naj sacerdote. 27 Tato yako ismul ix yul isqꞌabꞌ yichamil tuꞌ, ha haꞌ chiꞌiniti tzꞌaktiꞌ, chikꞌahbꞌilo yul iskꞌul ix yu haꞌ, kat xin ismalkanh iskꞌul ix, kat isbꞌajbꞌayo yinh isbꞌul ix. Tzꞌaktiꞌ xin chukano ix sata yet konhobꞌ. 28 Yaj ta machi ismul ix xin, matzet chu ix, wal xin chu yuninwi ix.
29 »Haꞌ ton hunteqꞌan tiꞌ chejbꞌanile yinh ix ix chako ismul yul isqꞌabꞌ yichamil, chistzꞌilnheto isbꞌa. 30 Maka tonhe tzꞌeꞌ chute isbꞌa yichamil ix yinh, naj ichamile tuꞌ, yilal yiniti naj yixal sata Komam, kat xin iswatxꞌen naj sacerdote yinh ix sunil tzet hakaꞌ yalni chejbꞌanile. 31 Haꞌ naj ichamile tuꞌ matzet chititkano yibꞌanh naj, yajaꞌ ta ay ismul ix tuꞌ, yibꞌanh ix chititkano ismul tuꞌ,» xhi Komam tet yaꞌ Moisés.