4 »Haꞌ ismunil ebꞌnaj titna yinh naj Coat chiwaqꞌan yul watutan bꞌay chekutxbꞌa hebꞌa inkꞌatanhan, bꞌay kaw txahul, haꞌ ton tiꞌ ismunil ebꞌnaj. 5 Hayet chiꞌel konhobꞌ Israel bꞌay aya, kat isto yinh isbꞌel, haꞌ yaꞌ Aarón yebꞌ ebꞌnaj iskꞌahol chilo ebꞌnaj qꞌap velo, qꞌap litxꞌankanh yul watutan, kat yaniko ebꞌnaj qꞌap ispichilo isKaxhahil intratohan. 6 Kat yanipaxiko ebꞌnaj noꞌ tzꞌum kaw kꞌul yibꞌanh yenheloj.^a Lahwi tuꞌ, kat islehbꞌanpaxayo ebꞌnaj qꞌap qꞌap yaxtzꞌantzꞌonhe yibꞌanh, kat isqꞌatbꞌaniko ebꞌnaj te teꞌ yinh iskꞌul teꞌ kaxha, yu isbꞌatxlaxkanh yet chiꞌilaxtoj. 7 Chislebꞌanpaxayo ebꞌnaj qꞌap qꞌap yaxtzꞌantzꞌonhe yibꞌanh mexha ayayo insatajan, kat yanayo ebꞌnaj chꞌen sekꞌ yibꞌanh, yebꞌ chꞌen cucharón yebꞌ chꞌen vaso yebꞌ chꞌen xhalu bꞌay chiꞌayto vino chꞌaqꞌlax yebꞌalqꞌabꞌehal wetan, kat yanayo ebꞌnaj ixim pan, ixim chitikꞌa alaxayo insatajan hunun tzꞌayik. 8 Chislebꞌanto ebꞌnaj qꞌap qꞌap kaj yibꞌanh sunil tuꞌ, kat yanipaxayo ebꞌnaj noꞌ tzꞌum kaw kꞌul yibꞌanh yenheloj, kat yaniko ebꞌnaj te teꞌ yinh mexha tuꞌ yu isbꞌatxlaxkanh yet chiꞌilaxtoj. 9 Lahwi tuꞌ, kat yinipaxti ebꞌnaj qꞌap qꞌap yaxtzꞌantzꞌonhe, kat islebꞌanto ebꞌnaj qꞌap yibꞌanh candelero, yebꞌ yibꞌanh chꞌen cantil, yebꞌ chꞌen tenaza chiꞌinilo istanhil qꞌap mecha, yebꞌ platillo, yebꞌ isnet chiꞌokniko bꞌay chiꞌayto aceite. 10 Chiyanipaxayo ebꞌnaj noꞌ tzꞌum kaw kꞌul yibꞌanh yenhelo sunil hunteqꞌan tuꞌ, kat yanayo ebꞌnaj yibꞌanh hunteqꞌan te teꞌ chibꞌatxnikanh.

11 »Chislebꞌanpaxto ebꞌnaj qꞌap qꞌap kaw yaxtzꞌantzꞌonhe yibꞌanh ismexhahil yet xahanbꞌal nabꞌa oro, kat yanipaxiko ebꞌnaj noꞌ tzꞌum kaw kꞌul yibꞌanh yenheloj, kat yanipaxiko ebꞌnaj te teꞌ yinh iskꞌul yu isbꞌatxlaxikꞌoj. 12 Chiskutxbꞌaniko ebꞌnaj sunil munlabꞌal chiꞌokniko yul watutan, kat ispichniko ebꞌnaj qꞌap qꞌap yaxtzꞌantzꞌonhe yinh, kat yanipaxiko ebꞌnaj noꞌ tzꞌum kaw kꞌul yinh, kat yaniko ebꞌnaj te teꞌ yalanh, yunhe isbꞌatxlaxtoj. 13 Chiyinilo ebꞌnaj tanh ayahto yibꞌanh ismexhahil yet xahanbꞌal, kat ispichni ebꞌnaj yu huneꞌ qꞌap qꞌap kajmutzꞌmunhe. 14 Chiyahnato ebꞌnaj sunil munlabꞌal chiꞌokniko yet chinhuslax xahanbꞌal yibꞌanh tuꞌ; haꞌ ton isnetal tzaqꞌaqꞌ, chꞌen tenedor, chꞌen pala, chꞌen nime sekꞌ yebꞌ sunil munlabꞌal chiꞌokniko yinh tuꞌ, kat ispichnipaxiko ebꞌnaj noꞌ tzꞌum kaw kꞌul yinh, kat yaniko ebꞌnaj te teꞌ yinh yunhe chiyu isbꞌatxlaxtoj. 15 Hayet xalahwi ispichnikanokanh yaꞌ Aarón yebꞌ ebꞌnaj iskꞌahol sunil hunteqꞌan tzet kaw ay yelapno ye tiꞌ, yebꞌ yet kꞌulxa yehi yu yilaxtoj, lahwi tuꞌ kat yul ebꞌnaj titna yinh iskꞌahol naj Coat, yu isbꞌatxnito ebꞌnaj hunteqꞌan tuꞌ. Yajaꞌ mach chako isqꞌabꞌ ebꞌnaj yinh hunu tzet ye tuꞌ wetan yehi kaw txahul, haxinwal mach chikam ebꞌnaj. Sunil munlabꞌal chiꞌokniko yul watutan bꞌay chekutxbꞌa hebꞌa inkꞌatanhan, ebꞌnaj titna yinh iskꞌahol naj Coat haꞌ ebꞌnaj chibꞌatxnitoj. 16 Wal yaꞌ Eleazar, iskꞌahol yaꞌ Aarón, haꞌ yaꞌ chiꞌilni teꞌ aceite chiꞌayto yul cantil, yebꞌ teꞌ pom kaw xuqꞌ sam. Haꞌ yaꞌ chiꞌilnipaxo yebꞌalqꞌabꞌe yinh ixim trigo kaw yilal chꞌaqꞌlax wetan, yebꞌpaxo teꞌ aceite chiꞌalaxayo yibꞌanh iswiꞌ mak chisikꞌlaxiko yinh inmunilan. Haꞌ yaꞌ chiꞌilnipaxo watutan, yebꞌ sunil tzet ayikto yul, yebꞌ sunil munlabꞌal wetan yehi, hunteqꞌan ay yelapnoj,» xhi Komam.

17 Istzotelpaxo Komam Dios tet yaꞌ Moisés yebꞌ tet yaꞌ Aarón, yalni Komam hakaꞌ tiꞌ: 18 «Mach chechah kꞌayoꞌkanh yikꞌal ebꞌnaj titna yinh naj Coat. Haꞌ ebꞌnaj tuꞌ kaw levita ebꞌnaj. 19 Wal xin yunhe mach chikam ebꞌnaj yet chihitziko ebꞌnaj iskꞌatanh tzet ye tuꞌ kaw txahul, haꞌ hunteqꞌan tiꞌ chawu: Hach Aarón hach tiꞌ, yebꞌ ebꞌnaj hakꞌahol, hex kaw hex chexhuli, kat heyalni tet ebꞌnaj bꞌaytet chiyito ebꞌnaj. 20 Mach chiꞌokto ebꞌnaj yilni hepichni munlabꞌal kaw txahul wetan yehi, yunhe mach chikam ebꞌnaj,» xhi Komam.

21 Istzotelpaxo Komam Dios tet yaꞌ Moisés, yalni Komam: 22 «Chawinipaxokanh isbꞌisil ebꞌnaj winaj titna yinh yaꞌ Gersón, yinh istxolal chawikanh isbꞌisil ebꞌnaj yinh hunun majan yikꞌal yebꞌ hunun mame yebꞌ yuninal. 23 Chabꞌis ebꞌnaj 30 (lahonhebꞌ iskawinaj) habꞌil masanta yinh ebꞌnaj 50 (lahonhebꞌ yoxkꞌal) habꞌil, ebꞌnaj chiyu ismunla yul watutan bꞌay chekutxbꞌa hebꞌa inkꞌatanhan.

24 »Ismunil ebꞌnaj iskꞌahol yaꞌ Gersón yebꞌ tzet chiyu ebꞌnaj, yebꞌ tzet chisbꞌatxiko ebꞌnaj, haꞌ ton tiꞌ: 25 Chiyito ebꞌnaj qꞌap qꞌap chiꞌayti yibꞌanh watutan bꞌay chiskutxbꞌa isbꞌa anma Israel inkꞌatanhan, yebꞌ noꞌ tzꞌum kaw kꞌul chiꞌayti yibꞌanh watutan, yebꞌ qꞌap cortina litxꞌankanh yinh ispultahil istiꞌ watutan bꞌay chekutxbꞌa hebꞌa inkꞌatanhan. 26 Kat yinipaxto ebꞌnaj qꞌap cortina hoyaniko yinh yamaqꞌil watutan, yebꞌ hoyaniko yinh ismexhahil yet xahanbꞌal, yebꞌ qꞌap ayko yinh istiꞌ ispultahil yamaqꞌil tuꞌ; yebꞌ sunil tzet chiꞌokniko yinh qꞌap cortina tuꞌ, yebꞌ txꞌanh txꞌanh chikꞌalni. 27 Haꞌ yaꞌ Aarón yebꞌ iskꞌahol chiꞌijbꞌan ebꞌnaj titna yinh yaꞌ Gersón yinh tzet munil chu ebꞌnaj, yebꞌ tzet chiyito ebꞌnaj. Hex kaw hex cheyal tet ebꞌnaj tzet wal yuni ebꞌnaj. 28 Hak tuꞌ ismunil ebꞌnaj titna yinh yaꞌ Gersón yinh watutan bꞌay chekutxbꞌa hebꞌa inkꞌatanhan. Haꞌ xin naj Itamar, iskꞌahol yaꞌ sacerdote Aarón chiꞌijbꞌan ebꞌnaj yinh ismunil.

29 »Chawikanh isbꞌisil ebꞌnaj winaj titna yinh naj Merari, yinh istxolal chawikanh isbꞌisil ebꞌnaj yinh hunun majan yikꞌal yebꞌ hunun mame yebꞌ yuninal. 30 Chabꞌis ebꞌnaj 30 (lahonhebꞌ iskawinaj) habꞌil masanta yinh ebꞌnaj 50 (lahonh yoxkꞌal) habꞌil, ebꞌnaj chiyu ismunla yul watutan bꞌay chekutxbꞌa hebꞌa inkꞌatanhan. 31 Haꞌ ismunil ebꞌnaj tuꞌ yinh watutan, haꞌ ton yinito ebꞌnaj teꞌ aqꞌinteꞌ ayko yinh watutan, yebꞌ teꞌ regla bꞌay chiꞌok teꞌ aqꞌinteꞌ tuꞌ, yebꞌ teꞌ oy yebꞌ yoj teꞌ oy tuꞌ. 32 Yebꞌ yoyal yamaqꞌil hoyaniko yinh watutan, yebꞌ xeꞌ teꞌ oy, yebꞌ teꞌ estaca, yebꞌ txꞌanh txꞌanh kꞌalnhehayoj, yebꞌ sunil tzet chiꞌokniko yinh huneꞌ munil tuꞌ. Hach kaw hach chawal tet ebꞌnaj yinh tzetaj chito ebꞌnaj. 33 Haꞌ hunteqꞌan tuꞌ ismunil ebꞌnaj titna yinh naj Merari, yinh watutan bꞌay chekutxbꞌa hebꞌa inkꞌatanhan. Haꞌ xin naj Itamar iskꞌahol yaꞌ sacerdote Aarón, haꞌ naj chiꞌijbꞌan ebꞌnaj yinh huneꞌ munil tuꞌ,» xhi Komam.

34 Haꞌ yaꞌ Moisés yebꞌ yaꞌ Aarón yebꞌ ebꞌnaj iswiꞌehal xol ebꞌnaj Israel, haꞌ ebꞌnaj inikanh isbꞌisil ebꞌnaj titna yinh naj Coat, yinh hunun majan yikꞌal, yebꞌ yinh hunun mame yebꞌ yuninal. 35 Isbꞌislax ebꞌnaj 30 (lahonhebꞌ iskawinaj) habꞌil masanta yinh ebꞌnaj 50 (lahonh yoxkꞌal) habꞌil, ebꞌnaj chiyu ismunla yinh Yatut Komam, haꞌ xin Tabernáculo, bꞌay chekutxbꞌa hebꞌa iskꞌatanh Komam. 36 Haꞌ xin isbꞌisil ebꞌnaj, 2,750 yinh sunil. 37 Isbꞌisil ebꞌnaj titna yinh naj Coat, ebꞌnaj chiyu ismunla yul Yatut Komam, haꞌ xin Tabernáculo bꞌay chiskutxbꞌa isbꞌa anma Israel, iskꞌatanh Komam. Haꞌ isbꞌisil ebꞌnaj tuꞌ, haꞌ yaꞌ Moisés yebꞌ yaꞌ Aarón inikanh, hakaꞌtikꞌa yu yalni Komam Dios tet yaꞌ Moisés.

38 Haxa ebꞌnaj bꞌislax yinh istxolal yinh hunun majan yikꞌal, yebꞌ hunun mame yebꞌ yuninal, ebꞌnaj titna yinh yaꞌ Gersón, 39 haꞌ ebꞌnaj 30 (lahonhebꞌ iskawinaj) habꞌil masanta yinh ebꞌnaj 50 (lahonhebꞌ yoxkꞌal) habꞌil, ebꞌnaj chiyu ismunla yinh Yatut Komam bꞌay chiskutxbꞌa isbꞌa yebꞌ anma Israel. 40 Haꞌ isbꞌisil ebꞌnaj yinh hunun majan yikꞌal, yebꞌ hunun mame yebꞌ yuninal, 2,630 isbꞌisil yinh sunil. 41 Hak tiꞌ isbꞌisil ebꞌnaj titna yinh yaꞌ Gersón, ebꞌnaj chu ismunla yinh Yatut Komam bꞌay chiskutxbꞌa isbꞌa anma Israel iskꞌatanh. Huneꞌ isbꞌisil ebꞌnaj tuꞌ, haꞌ yaꞌ Moisés yebꞌ yaꞌ Aarón inikanh hakaꞌtikꞌa yu yalni Komam.

42 Haxa isbꞌisil ebꞌnaj titna yinh naj Merari yinh istxolal yinh hunun majan yikꞌal, yebꞌ yinh hunun mame yebꞌ yuninal, 43 hanhkꞌanhe ebꞌnaj 30 (lahonhebꞌ iskawinaj) habꞌil masanta yinh ebꞌnaj 50 (lahonh yoxkꞌal) habꞌil, ebꞌnaj chiyu ismunla yinh Yatut Komam bꞌay chiskutxbꞌa isbꞌa anma Israel iskꞌatanh, 44 isbꞌisil ebꞌnaj tuꞌ, 3,200 isbꞌisil yinh sunil. 45 Hak tuꞌ isbꞌisil ebꞌnaj titna yinh naj Merari. Huneꞌ isbꞌisil ebꞌnaj tuꞌ, haꞌ yaꞌ Moisés yebꞌ yaꞌ Aarón inikanh hakaꞌtikꞌa yu yalni Komam Jahawil tet yaꞌ Moisés.

46 Haꞌ isbꞌisil sunil ebꞌnaj levita yikanh yaꞌ Moisés yebꞌ yaꞌ Aarón yebꞌ ebꞌnaj iswiꞌehal xol ebꞌnaj Israel, yinh hunun majan yikꞌal ebꞌnaj yebꞌ hunun mame yebꞌ yuninal. 47 Ebꞌnaj 30 (lahonhebꞌ iskawinaj) habꞌil masanta yinh 50 (lahonh yoxkꞌal) habꞌil, ebꞌnaj chiyu ismunla yul Yatut Komam bꞌay chiskutxbꞌa isbꞌa yebꞌ anma Israel. 48 Haꞌ isbꞌisil ebꞌnaj, 8,580 yinh sunil. 49 Haꞌ huneꞌ isbꞌisil ebꞌnaj ilaxkanh, hakaꞌtikꞌa yu yalni Komam Dios tet yaꞌ Moisés. Yal-laxpaxo tet hunun ebꞌnaj yinh tzet munilal chu ebꞌnaj, yebꞌ tzet chiyito ebꞌnaj, hakaꞌtikꞌa yu yalni Komam ischejbꞌanil yaꞌ Moisés.