Isbꞌisil ebꞌnaj levita yebꞌ ismunil ebꞌnaj aqꞌlaxi
3
Yet istzotel Komam Dios tet yaꞌ Moisés yinh iswiꞌ witz Sinaí, haꞌ ebꞌnaj tiꞌ yuninal yaꞌ Aarón yebꞌ yuninal yaꞌ Moisés, hak tiꞌ ye hakaꞌ tiꞌ: 2 Haꞌ iskꞌahol yaꞌ Aarón haꞌ ton ebꞌnaj tiꞌ: naj Nadab, haꞌ naj bꞌabꞌel winaj, lahwi tuꞌ naj Abiú, yaꞌ Eleazar, yebꞌ naj Itamar. 3 Ebꞌnaj kanhwanh iskꞌahol yaꞌ Aarón tiꞌ, sikꞌlaxiko ebꞌnaj, yalaxiko ebꞌnaj sacerdotehal yinh ismunil Komam Dios. 4 Yajaꞌ wal naj Nadab yebꞌ naj Abiú, kam ebꞌnaj sata Komam bꞌey txꞌotxꞌ desierto Sinaí, yuto yalte ebꞌnaj qꞌa qꞌaꞌ tet Komam, huneꞌ qꞌaꞌ mach hakaꞌo yalni Komam. Machi xin hunu yuninal ebꞌnaj yet iskam ebꞌnaj tuꞌ, yuxin hanhechꞌan yaꞌ Eleazar yebꞌ naj Itamar munla yinh sacerdotehal yalanh ischejbꞌanil yaꞌ Aarón, ismam ebꞌnaj.5 Lahwi tuꞌ, istzotel Komam Dios tet yaꞌ Moisés, yalni Komam hakaꞌ tiꞌ: 6 «Awte ebꞌnaj Israel titna yinh yuninal yaꞌ Leví, yunhe iskolwa ebꞌnaj yinta yaꞌ Aarón, kat isyijen ebꞌnaj tzet chiyal yaꞌ. 7 Haꞌ ebꞌnaj tuꞌ chiwatxꞌen tzet chiyal yaꞌ Aarón yebꞌ konhobꞌ Israel bꞌey wehobꞌalan, haꞌ ton Tabernáculo bꞌay chekutxbꞌa hebꞌa inkꞌatanhan, haꞌ ebꞌnaj tuꞌ chiꞌilni munil yul watutan. 8 Chistanhe ebꞌnaj sunil munlabꞌal ayikto yul watutan bꞌay chekutxbꞌa hebꞌa inkꞌatanhan. Hak tuꞌ chu yilni ebꞌnaj sunil inmunilan yul watutan xol ebꞌnaj Israel. 9 Kaw nantikꞌa chapohilo ebꞌnaj levita xol ebꞌnaj Israel, yunhe yokkano ebꞌnaj munil yinta yaꞌ Aarón yebꞌ yinta iskꞌahol yaꞌ chipoh yet bꞌaqꞌinh. 10 Haꞌ yul isqꞌabꞌ yaꞌ Aarón yebꞌ iskꞌahol chipoh yinh, chawakaniko munil yet sacerdotehal. Tato ay hunu komon mak chimunla yinh sacerdotehal, haꞌ huneꞌ mak tuꞌ, chikami,» xhi Komam.
11 Istzotelpaxo Komam Dios tet yaꞌ Moisés, yalni Komam: 12 «Xaꞌinsikꞌilojan ebꞌnaj levita selelo ebꞌnaj isbꞌabꞌel kꞌahol ebꞌnaj Israel, yu wetan ye ebꞌnaj levita tuꞌ.a 13 Yuto wetan ye sunil ebꞌnaj bꞌabꞌel kꞌahole; hayet inchejnihan potxꞌlaxo ebꞌnaj bꞌabꞌel kꞌahole xol ebꞌnaj Egipto, matzet wutehan ebꞌnaj bꞌabꞌel kꞌahole texol, hex Israel hex tiꞌ, yunhe yokkano ebꞌnaj wetojan. Haktikꞌapax tuꞌ noꞌ bꞌabꞌel yunin henoqꞌ, wetan ye noꞌ. Hanin Yahawintiꞌan, chiwalan huneꞌ tiꞌ,» xhi Komam.
14 Istzotelpaxo Komam Dios tet yaꞌ Moisés bꞌey txꞌotxꞌ desierto Sinaí, yalni Komam tet yaꞌ: 15 «Ikanh isbꞌisil ebꞌnaj levita yinh istxolal, yinh hunun majan ebꞌnaj mame yebꞌ iskꞌahol. Sunil ebꞌnaj winaj xol ebꞌnaj levita chiꞌah isbꞌisil, chiꞌichiko yinh ebꞌnaj hunxa ixahaw ispitzkꞌahi,» xhi Komam. 16 Yinikanh yaꞌ Moisés isbꞌisil ebꞌnaj levita tuꞌ, hakaꞌ yu yalni Komam.
17 Haꞌ ebꞌnaj iskꞌahol yaꞌ Leví, haꞌ ton ebꞌnaj tiꞌ: naj Gersón, naj Coat yebꞌ naj Merari.
18 Haxa ebꞌnaj iskꞌahol yaꞌ Gersón xin, haꞌ ton ebꞌnaj tiꞌ: naj Libni yebꞌ naj Simei. Haꞌ ebꞌnaj tiꞌ aqꞌlax bꞌinaho ebꞌnaj yu ebꞌnaj titna yinh, yet tzujanilxa.
19 Haxa ebꞌnaj iskꞌahol naj Coat, haꞌ ton ebꞌnaj tiꞌ: naj Amram, naj Izhar, naj Hebrón yebꞌ naj Uziel. Haꞌ ebꞌnaj xin chibꞌina yu ebꞌnaj titna yinh ebꞌnaj.
20 Haxa ebꞌnaj iskꞌahol naj Merari, haꞌ ton ebꞌnaj tiꞌ: naj Mahli yebꞌ naj Musi, haꞌ ebꞌnaj xin chibꞌina yu ebꞌnaj titna yinh ebꞌnaj. Sunil ebꞌnaj tuꞌ, iswiꞌehal yinh ebꞌnaj pohchakanh yinh yaꞌ Leví.
21 Haꞌ anma titna yinh yaꞌ Gersón kabꞌ majan yehi, huneꞌ majan titna yinh naj Libni, huneꞌxa majan titna yinh naj Simei. 22 Haꞌ isbꞌisil ebꞌnaj winaj yinh sunil, ichiti yinh ebꞌnaj huneꞌ ixahaw ispitzkꞌahi, ay 7,500 ebꞌnaj. 23 Sunil ebꞌnaj tuꞌ, ehayo ebꞌnaj yul iscampamento yintalto Yatut Komam yetkꞌulal bꞌay chito tzꞌayik. 24 Haꞌ naj Eliasaf, iskꞌahol naj Lael, haꞌ naj iswiꞌehal yinh ebꞌnaj titna yinh yaꞌ Gersón tuꞌ. 25 Haꞌ ebꞌnaj tuꞌ, chiꞌilni qꞌap leyanto yenhel yibꞌanh tabernáculo, Yatut Komam bꞌay chiskutxbꞌa isbꞌa anma Israel iskꞌatanh, yebꞌ qꞌap cortina issataltij, hakaꞌ ispultahil Yatut Komam. 26 Chilnipaxo ebꞌnaj iscortinahil yamaqꞌil Yatut Komam, yebꞌ isqꞌapil iscortinahil istiꞌ ispultahil yamaqꞌil tuꞌ, qꞌapil cortina hojaniko yinh yatut bꞌay ayikto ismexhahil yet xahanbꞌal. Chilnipaxo ebꞌnaj txꞌanh txꞌanh chikꞌalni qꞌap tuꞌ.
27 Haxa ebꞌnaj titna yinh naj Coat, kanhebꞌ majan ebꞌnaj; ebꞌnaj titna yinh naj Amram, ebꞌnaj titna yinh naj Izhar, ebꞌnaj titna yinh naj Hebrón, yebꞌ ebꞌnaj pohchakanti yinh naj Uziel. 28 Isbꞌisil ebꞌnaj winaj yinh sunil, ichiti yinh ebꞌnaj huneꞌ ixahaw ispitzkꞌahi, ay 8,600 isbꞌisil ebꞌnaj. Haꞌ chiꞌok ilno tzet ayikto yul Yatut Komam. 29 Haꞌ ebꞌnaj chipohcha yinh iskꞌahol naj Coat tuꞌ, ayko iscampamento yinh iskꞌul Tabernáculo, haꞌ Yatut Komam, yinh yetkꞌulal sur. 30 Haꞌ naj Elizafán iskꞌahol naj Uziel, haꞌ naj iswiꞌehal yinh sunil ebꞌnaj titna yinh naj Coat. 31 Haꞌ ebꞌnaj tuꞌ chiꞌilni teꞌ Kaxha kaw txahul, yebꞌ teꞌ mexha, yebꞌ candelero isbꞌatxobꞌal chꞌen lámpara, yebꞌpaxo kabꞌebꞌ ismexhahil xahanbꞌal. Chiyilnipaxo ebꞌnaj sunil munlabꞌal chiꞌokniko yul Yatut Komam yebꞌpaxo qꞌap velo aykanh yul yatut bꞌay ayikto hunteqꞌan munlabꞌal tuꞌ.
32 Yaꞌ Eleazar, iskꞌahol yaꞌ sacerdote Aarón, yaꞌ yahawil ye xol sunil ebꞌnaj levita. Haꞌ yaꞌ Eleazar tuꞌ, chiꞌilni sunil ebꞌnaj chimunla yul Yatut Komam, haꞌ ton Tabernáculo.
33 Haꞌ ebꞌnaj titna yinh iskꞌahol naj Merari, kabꞌ majan ye ebꞌnaj, ebꞌnaj titna yinh naj Mahli yebꞌ ebꞌnaj titna yinh naj Musi. 34 Haꞌ isbꞌisil sunil ebꞌnaj winaj tuꞌ ichiti isbꞌisil yinh ebꞌnaj hun ixahawxa ispitzkꞌahi, ay 6,200 ebꞌnaj. 35 Haꞌ naj Zuriel, iskꞌahol naj Abihail, haꞌ naj iswiꞌehal yinh ebꞌnaj. Ebꞌnaj tuꞌ, ay iscampamento ebꞌnaj yinh iskꞌul Yatut Komam yinh yetkꞌulal norte. 36 Ebꞌnaj titna yinh naj Merari, haꞌ ebꞌnaj chiꞌilni teꞌ aqꞌinteꞌ ayko yinh Yatut Komam, yebꞌ teꞌ regla bꞌay chiꞌalaxiko teꞌ aqꞌinteꞌ tuꞌ, yebꞌ teꞌ oy, yebꞌ isbasehal yoj teꞌ oy tuꞌ, yebꞌ sunil tzet chiꞌokniko yinh teꞌ. 37 Haꞌ ebꞌnaj chiꞌilnipaxo teꞌ oy hoyaniko yinh yamaqꞌil Yatut Komam, yebꞌ isxeꞌal yoj teꞌ oy tuꞌ, yebꞌ teꞌ estaca yebꞌ txꞌanh txꞌanh kꞌalnhehayoj Tabernáculo tuꞌ.
38 Haxapaxo yinh yetkꞌulal bꞌay chiꞌahilo tzꞌayik, haꞌ tuꞌ chiꞌay iscampamento yaꞌ Moisés yebꞌ yaꞌ Aarón yebꞌ ebꞌnaj iskꞌahol. Haꞌ xin chiꞌilni Yatut Komam xol sunil ebꞌnaj Israel. Tato ay hunu ebꞌnaj chiꞌok yinh huneꞌ munil tuꞌ, mach xin levitahoj, haꞌ huneꞌ mak tuꞌ, chꞌaqꞌlaxkamoj.
39 Hayet yinikanh yaꞌ Moisés yebꞌ yaꞌ Aarón isbꞌisil ebꞌnaj Levita yinh istxolal, hakaꞌ yu yalni Komam tet ebꞌyaꞌ, hak tiꞌ eliko isbꞌisil ebꞌnaj winaj, 22,000 ichiti isbꞌislax ebꞌnaj yinh ebꞌnaj hun ixahaw ispitzkꞌahi.
Isselel ebꞌnaj bꞌabꞌel kꞌahol chiꞌaqꞌlaxi
40 Istzotel Komam Dios tet yaꞌ Moisés, yalni Komam hakaꞌ tiꞌ:
«Ikanh isbꞌisil ebꞌnaj bꞌabꞌel kꞌahole xol ebꞌnaj Israel, kat hatzꞌunni isbꞌi ebꞌnaj, chiꞌichiti habꞌisni yinh ebꞌnaj huneꞌ ixahaw ispitzkꞌahi. 41 Haꞌ xin ebꞌnaj levita tiꞌ, chiꞌok wetojan selelo ebꞌnaj bꞌabꞌel kꞌahole xol ebꞌnaj Israel tiꞌ. Hakpax tuꞌ sunil noꞌ bꞌabꞌel yunin isnoqꞌ ebꞌnaj levita, haꞌ chiꞌok selelo noꞌ bꞌabꞌel yunin isnoqꞌ ebꞌnaj Israel. Hanin Yahawintiꞌan, chiwalan huneꞌ tiꞌ,» xhi Komam.
42 Yinikanh yaꞌ Moisés isbꞌisil ebꞌnaj bꞌabꞌel kꞌahole xol ebꞌnaj Israel, hakaꞌtikꞌa yu yalni Komam tet yaꞌ. 43 Haꞌ isbꞌisil sunil ebꞌnaj, ichiti yinh huneꞌ ixahawxa ispitzkꞌahi, ay 22,273 isbꞌisil ebꞌnaj.
44 Yalnipaxo Komam tet yaꞌ Moisés hakaꞌ tiꞌ: 45 «Akano ebꞌnaj levita tiꞌ wetojan selelo sunil ebꞌnaj isbꞌabꞌel kꞌahol ebꞌnaj Israel. Hakpax tuꞌ noꞌ bꞌabꞌel yunin isnoqꞌ ebꞌnaj levita, wetan ye noꞌ selelo noꞌ bꞌabꞌel yunin isnoqꞌ ebꞌnaj Israel, yuto wetan ye ebꞌnaj levita tuꞌ. Hanin Yahawintiꞌan, chiwalan huneꞌ tiꞌ. 46 Yajaꞌ ebꞌnaj bꞌabꞌel kꞌahole xol ebꞌnaj Israel tiꞌ, ekꞌbꞌal isbꞌisil ebꞌnaj yibꞌanh isbꞌisil ebꞌnaj levita, yuxin haꞌ tzet chu iskolcha ebꞌnaj 273 ekꞌbꞌal isbꞌisil tuꞌ, chistohla ebꞌnaj wetan. 47 Chaqꞌ ebꞌnaj howebꞌ chꞌen plata istoholo hunun ebꞌnaj, hakaꞌtikꞌa yalil chꞌen chiꞌokniko yul watutan, hunun 20 (hunkꞌal) geras yalil hunun chꞌen. 48 Kat yalaxiko chꞌen melyu tuꞌ tet yaꞌ Aarón yebꞌ tet ebꞌnaj iskꞌahol yaꞌ istoholo ebꞌnaj,» xhi Komam.
49 Iskutxbꞌan yaꞌ Moisés chꞌen melyu tuꞌ istohol ebꞌnaj bꞌabꞌel kꞌahole ekꞌbꞌal isbꞌisil xol ebꞌnaj Israel. 50 Haꞌ chꞌen melyu kutxbꞌalaxkanh tuꞌ, 1,365 chꞌen plata; hunun chꞌen plata tuꞌ hakaꞌ yalil chꞌen chiꞌokniko yul watutan.b 51 Yaniko yaꞌ Moisés chꞌen melyu tuꞌ tet yaꞌ Aarón yebꞌ tet ebꞌnaj iskꞌahol yaꞌ, hakaꞌtikꞌa yu yalni Komam tet yaꞌ Moisés.