3 »Haꞌ yinh yetkꞌulal bꞌay chiꞌahilo tzꞌayik, haꞌ tuꞌ chiꞌay iscampamento yebꞌ isbandera ebꞌnaj titna yinh yaꞌ Judá. Haꞌ naj Naasón, iskꞌahol naj Aminadab, ayko iswiꞌehal yinh ebꞌnaj. 4 Isbꞌisil ebꞌnaj winaj titna yinh yaꞌ Judá kꞌul isto yinh howal, ay 74,600 isbꞌisil ebꞌnaj. 5 Iskꞌatanh ebꞌnaj tuꞌ, chiꞌay iscampamento ebꞌnaj titna yinh yaꞌ Isacar. Naj Natanael iskꞌahol naj Zuar, haꞌ naj yahawil yinh ebꞌnaj. 6 Isbꞌisil ebꞌnaj winaj titna yinh yaꞌ Isacar kꞌul isto yinh howal, ay 54,400 isbꞌisil ebꞌnaj. 7 Iskꞌatanh ebꞌnaj tuꞌ, chiꞌaypaxo iscampamento ebꞌnaj titna yinh yaꞌ Zabulón. Naj Eliab iskꞌahol naj Helón, haꞌ naj tuꞌ yahaw yinh ebꞌnaj. 8 Isbꞌisil ebꞌnaj winaj titna yinh yaꞌ Zabulón kꞌul isto yinh howal, ay 57,400 isbꞌisil ebꞌnaj. 9 Yuxin ox majan ebꞌnaj yul iscampamento yaꞌ Judá, ay 186,400 isbꞌisil ebꞌnaj ox majan tuꞌ, haꞌ xin ebꞌnaj chibꞌabꞌi yinh isbꞌel sata konhobꞌ Israel.

10 »Haꞌ yinh yetkꞌulal sur, haꞌ tuꞌ chiꞌay iscampamento yebꞌ isbandera ebꞌnaj titna yinh yaꞌ Rubén. Haꞌ naj Elisur, iskꞌahol naj Sedeur, haꞌ naj iswiꞌehal yinh ebꞌnaj tuꞌ. 11 Isbꞌisil ebꞌnaj winaj titna yinh yaꞌ Rubén kꞌul isto yinh howal, ay 46,500 isbꞌisil ebꞌnaj. 12 Iskꞌatanh ebꞌnaj tuꞌ, chiꞌay iscampamento ebꞌnaj titna yinh yaꞌ Simeón. Haꞌ xin naj Selumiel iskꞌahol naj Zurisadai, haꞌ naj tuꞌ yahaw yinh ebꞌnaj. 13 Isbꞌisil ebꞌnaj winaj titna yinh yaꞌ Simeón kꞌul isto yinh howal, ay 59,300 isbꞌisil ebꞌnaj. 14 Iskꞌatanh ebꞌnaj tuꞌ, chiꞌaypaxo iscampamento ebꞌnaj titna yinh yaꞌ Gad. Haꞌ xin naj Eliasaf, iskꞌahol naj Reuel, haꞌ naj yahawil yinh ebꞌnaj tuꞌ. 15 Isbꞌisil ebꞌnaj winaj titna yinh yaꞌ Gad kꞌul isto yinh howal, ay 45,650 isbꞌisil ebꞌnaj. 16 Yuxin ox majan ebꞌnaj yul iscampamento yaꞌ Rubén, ay 151,450 isbꞌisil ox majan ebꞌnaj tuꞌ. Haꞌ ebꞌnaj tiꞌ chiꞌok yinh iskabꞌ majan yinta yaꞌ Judá.

17 »Chiꞌokpaxo ebꞌnaj levita xolbꞌal kanhebꞌ campamento, haꞌ ebꞌnaj chiꞌinito qꞌap qꞌap chiꞌok yinh watutan bꞌay chekutxbꞌa hebꞌa inkꞌatanhan. Haꞌ kanhebꞌ campamento tuꞌ, hakaꞌtikꞌa yehayoj, hak tuꞌ chu isto yinh istxolal, hunun majan yinta isbandera.

18 »Haxa bꞌay yinh yetkꞌulal bꞌay chito tzꞌayik, haꞌ tuꞌ chiꞌay iscampamento yebꞌ isbandera ebꞌnaj titna yinh yaꞌ Efraín. Haꞌ naj Elisama, iskꞌahol naj Amiud, haꞌ naj tuꞌ iswiꞌehal yinh ebꞌnaj. 19 Isbꞌisil ebꞌnaj winaj titna yinh yaꞌ Efraín kꞌul isto yinh howal 40,500 isbꞌisil ebꞌnaj. 20 Iskꞌatanh ebꞌnaj tuꞌ, chiꞌay iscampamento ebꞌnaj titna yinh yaꞌ Manasés. Haꞌ naj Gamaliel, iskꞌahol naj Pedasur, haꞌ naj yahaw yinh ebꞌnaj. 21 Isbꞌisil ebꞌnaj winaj titna yinh yaꞌ Manasés, kꞌul isto yinh howal, ay 32,200 isbꞌisil ebꞌnaj. 22 Iskꞌatanh ebꞌnaj tuꞌ, chiꞌaypaxo iscampamento ebꞌnaj titna yinh yaꞌ Benjamín. Haꞌ xin naj Abidán, iskꞌahol naj Gedeoni, haꞌ naj yahawil yinh ebꞌnaj. 23 Isbꞌisil ebꞌnaj winaj titna yinh yaꞌ Benjamín, kꞌul isto yinh howal, ay 35,400 isbꞌisil ebꞌnaj. 24 Yuxin ox majan ebꞌnaj yul iscampamento yaꞌ Efraín, ay 108,100 isbꞌisil ebꞌnaj yinh yox majan tuꞌ. Haꞌ ebꞌnaj tuꞌ, chiꞌok yinh yet yox majan yinh isbꞌel yinta yaꞌ Rubén.

25 »Haxa bꞌay yinh yetkꞌulal norte, haꞌ tuꞌ chiꞌay iscampamento yebꞌ isbandera ebꞌnaj titna yinh yaꞌ Dan. Haꞌ xin naj Ahiezer, iskꞌahol naj Amisadai, haꞌ naj yahaw yinh ebꞌnaj. 26 Isbꞌisil ebꞌnaj winaj tuꞌ kꞌul isto yinh howal, ay 62,700 isbꞌisil ebꞌnaj. 27 Iskꞌatanh ebꞌnaj tuꞌ, chiꞌay iscampamento ebꞌnaj titna yinh yaꞌ Aser. Haꞌ xin naj Pagiel, iskꞌahol naj Ocrán, haꞌ naj iswiꞌehal yinh ebꞌnaj. 28 Isbꞌisil ebꞌnaj winaj titna yinh yaꞌ Aser, kꞌul isto yinh howal, ay 41,500 isbꞌisil ebꞌnaj. 29 Iskꞌatanh ebꞌnaj tuꞌ, chiꞌaypaxo iscampamento ebꞌnaj titna yinh yaꞌ Neftalí, haꞌ xin naj Ahira, iskꞌahol naj Enán, haꞌ naj xin yahawil yinh ebꞌnaj. 30 Isbꞌisil ebꞌnaj winaj titna yinh yaꞌ Neftalí kꞌul isto yinh howal, ay 53,400 isbꞌisil ebꞌnaj. 31 Yuxin ox majan ebꞌnaj yul iscampamento naj Dan, ay 157,600 isbꞌisil ebꞌnaj yinh yox majan. Haꞌ xin ebꞌnaj tuꞌ chꞌok yinh islahobꞌal yinh istxolal yinh isbꞌel. Wal xin iqꞌbꞌil isbandera ebꞌnaj yu,» xhi Komam.

32 Haꞌ isbꞌisil sunil ebꞌnaj winaj Israel kꞌul isto yinh howal, eliko yinh 603,550 ebꞌnaj. 33 Yajaꞌ wal ebꞌnaj levita machi ok ebꞌnaj istzꞌajoj isbꞌisil ebꞌnaj Israel, hakaꞌtikꞌa yu yalni Komam Dios tet yaꞌ Moisés.

34 Isyijen ebꞌnaj Israel hakaꞌ yu yalni Komam tet yaꞌ Moisés, yehayo ebꞌnaj yinh hunun majan yul iscampamento yalanh isbandera, isto ebꞌnaj yinh istxolal, yebꞌ yinh hunun majan yuninal.