2 Hayet yilni naj Balac isreyal konhobꞌ Moab, naj iskꞌahol naj Zipor, tzet utelax anma amorreo yu ebꞌnaj Israel, 3 isxiwkanh naj yebꞌ anma ay bꞌey Moab tuꞌ yet yilni ta kaw hantanhe isbꞌisil anma Israel tuꞌ. 4 Yuxin yal anma Moab tet ebꞌnaj ichamta winaj ay bꞌey Madián hakaꞌ tiꞌ: «Hunteqꞌan anma chihul tiꞌ chistanhtzelo kotxꞌotxꞌ tiꞌ, hakaꞌ istanhtzenilo noꞌ wakax teꞌ telaj,» xhi anma.

Yinh hunteqꞌan tzꞌayik tuꞌ, haꞌ naj Balac tuꞌ ayko reyal yinh txꞌotxꞌ Moab. 5 Ischejni naj rey Balac ilaxoti naj Balaam, iskꞌahol naj Beor, ay bꞌey konhobꞌ Petor, ayko istiꞌ ha haꞌ,^a ayko yul ismajul txꞌotxꞌ Amav. Yalni naj Balac tuꞌ ta chiyal ebꞌnaj chejabꞌ to inoti naj Balaam hakaꞌ tiꞌ: «Ay huneꞌ niman konhobꞌ anma el sat txꞌotxꞌ Egipto, lanhan xin isnohilo sat kotxꞌotxꞌ yu hunteqꞌan anma tuꞌ; tinanh xin, ayayo ebꞌnaj kosatajanh. 6 Yuxin titanh yinh anhe kat hawul hatzꞌaktiꞌnheno hunteqꞌan anma tiꞌ, yuto kaw ekꞌbꞌal yip kosatajanh; yuto ta chaxhhul hatzꞌaktiꞌnhe chiyu koqꞌojihanh yinh, kat kotzꞌumbꞌenilojanh ebꞌnaj sat kotxꞌotxꞌ tiꞌanh. Yuto wohtajan tato haꞌ mak chaqꞌan iskꞌulal yibꞌanh chischah iskꞌulal, haxa mak chaqꞌan tzꞌaktiꞌ yibꞌanh chiꞌay isyaꞌtajil yibꞌanh,» xhito naj.

7 Isto ebꞌnaj ichamta winaj Moab yebꞌ ebꞌnaj Madián yilno naj Balaam, iqꞌbꞌil xin istohol istzꞌaktiꞌ naj Balaam yibꞌanh konhobꞌ Israel tuꞌ yu ebꞌnaj. Hayet yapni ebꞌnaj iskꞌatanh naj Balaam tuꞌ, yalni ebꞌnaj ischejbꞌanil naj rey Balac. 8 Hayet yabꞌen naj Balaam ischejbꞌanil ebꞌnaj, yalni naj tet ebꞌnaj:

—Kananhwekano huneꞌ aqꞌbꞌal tiꞌ, chito wabꞌehan tzet chiyute yalni Komam Dios Jahawil, katto waqꞌnihan ispaj hetzotiꞌ tiꞌ, xhi naj.

Yuxin kankano ebꞌnaj huneꞌ aqꞌbꞌal tuꞌ, iskꞌatanh naj Balaam. 9 Istzotel Komam Dios tet naj Balaam huneꞌ aqꞌbꞌal tuꞌ, isqꞌambꞌen Komam tet naj hakaꞌ tiꞌ:

—¿Mak anmahil hunteqꞌan ebꞌnaj aykꞌo takꞌatanh tiꞌ? xhi Komam.

10 Istaqꞌwi naj Balaam:

—Naj Balac iskꞌahol naj Zipor, isreyal txꞌotxꞌ Moab chejnhe ebꞌnaj yalno wetan hakaꞌ tiꞌ: 11 “Ay huneꞌ konhobꞌ anma el sat txꞌotxꞌ Egipto, lanhan xin ismajnilo anma tuꞌ intxꞌotxꞌan, yuxin chiwochehan chaxhto hatzꞌaktiꞌnhe hunteqꞌan anma tuꞌ, kꞌuxantaxka inqꞌojihan yinh, kat winilojan ebꞌnaj sat intxꞌotxꞌan,” xhi ebꞌnaj, xhi naj Balaam tet Komam.

12 Istaqꞌwi Komam tet naj Balaam, yalni Komam:

—Mach chaxhto yinta ebꞌnaj, mach xin chatzꞌaktiꞌnhe huneꞌ konhobꞌ tuꞌ, yuto ayayo inkꞌulalan yibꞌanh, xhi Komam tet naj Balaam.

13 Haxa yet hunxa tzꞌayik yet yahwano naj Balaam, yalni naj tet ebꞌnaj ischejabꞌ naj Balac hakaꞌ tiꞌ:

—Meltzanhweto hekonhobꞌ, mach chisje Komam ta chintohan teyintaj, xhi naj.

14 Hayet yabꞌen ebꞌnaj iswiꞌehal konhobꞌ Moab hakaꞌ tuꞌ, ismeltzo ebꞌnaj, yapni ebꞌnaj iskꞌatanh naj rey Balac, yalni ebꞌnaj tet naj:

—Mach isjeti naj Balaam tuꞌ jintajanh, xhi ebꞌnaj.

15 Yajaꞌ xin ischejpaxto naj Balac hunteqꞌanxa ebꞌnaj iswiꞌehal konhobꞌ Moab yiqꞌati naj Balaam tuꞌ; hunteqꞌanxa ebꞌnaj tuꞌ, ekꞌbꞌal niman ebꞌnaj yebꞌ ekꞌbꞌalto kaw ay yelapno ebꞌnaj sata ebꞌnaj ischejto naj yet bꞌabꞌelal. 16 Isto ebꞌnaj yilno naj Balaam. Hayet yapni ebꞌnaj iskꞌatanh naj Balaam tuꞌ, yalni ebꞌnaj tet naj hakaꞌ tiꞌ:

—Naj rey Balac iskꞌahol naj Zipor makonhchejnitijanh jalnojanh tawet hakaꞌ tiꞌ: “Kaw chinqꞌanan tawet, mach chamanhkꞌo hatita. 17 Ta chaxhtita kaw chiwakojan hawinajil, kat waqꞌnihan sunil tzet chaqꞌan wetan, yuxin titanh, kat hatzꞌaktiꞌnhen huneꞌ konhobꞌ tiꞌ,” xhiti naj tawet, xhi ebꞌnaj tet naj Balaam.

18 Yajaꞌ xin, taqꞌwi naj Balaam tet ebꞌnaj:

—Waxanhka chiyaqꞌ naj rey Balac yatut wetan nohna yu chꞌen oro yebꞌ chꞌen plata, mach chu inwatxꞌenan tzet ye tuꞌ; waxanhka kaw matzet chal yelapnoj, maka kaw ay chal yelapnoj, tato maxhtaj Komam inDiosalan chihalni wetan, maxhtikꞌa chu inwatxꞌenan, xhi naj Balaam. 19 Yalnipaxo naj:

—Kananhwekano huneꞌ aqꞌbꞌal tiꞌ, wabꞌehan tzet chiyute yalni Komam wetan, xhi naj. 20 Istzotel Komam tet naj Balaam yinh huneꞌ aqꞌbꞌal tuꞌ, yalni Komam:

«Tato mahulpaxo ebꞌnaj chejabꞌ tuꞌ iqꞌwal tawinh hunelxa, ahanhwanoj, asiꞌ yinta ebꞌnaj; yajaꞌ haꞌ tzet chiwalan tawet hanhechꞌan chawala,» xhi Komam tet naj.

21 Yahwano naj Balaam yinh sahabꞌ sakꞌayal, yanikanh naj isxhilahil isburro, isto naj yinta ebꞌnaj iswiꞌehal konhobꞌ Moab. 22 Ayahto naj Balaam yibꞌanh isburro tuꞌ, tzujan xin kawanh ischejabꞌ naj yintaj. Yajaꞌ tit ishowal Komam Dios yinh naj Balaam yuto to naj, yuxin hul yángel Komam Jahawil yunhe yok majno naj yul isbꞌeh naj Balaam tuꞌ.

23 Hayet yilni noꞌ burro tato linhankanh yángel Komam yul yiktabꞌanil bꞌeh, ayko xin huneꞌ espada ahnati yul yatut ayiko yul isqꞌabꞌ naj, ishekꞌnilo isbꞌa noꞌ, isto noꞌ xol telaj. Ismaqꞌni naj Balaam noꞌ yunhe ismeltzo noꞌ yul bꞌeh hunelxa. 24 Tzujan tuꞌ xin, yokpaxo linhno yángel Komam Jahawil hunelxa yul bꞌeh tuꞌ bꞌay kaw lotꞌan, chiꞌekꞌ xol teꞌ uva; ayko xin chꞌen kꞌubꞌ yinh iskabꞌil iskꞌul bꞌeh tuꞌ. 25 Hayet yilni noꞌ burro yángel Komam Jahawil, isnhijniko isbꞌa noꞌ yinhla chꞌen kꞌubꞌ, istenniko noꞌ yoj naj yinh chꞌen, ismaqꞌnipaxo naj noꞌ hunelxa. 26 Ishitzilo yángel Komam sata naj, yokpaxo linhno naj yul bꞌeh bꞌay kaw lotꞌan bꞌay mach chu ishekꞌobꞌtanhen isbꞌa noꞌ. 27 Hayet yilni noꞌ ta linhankanh yángel Komam yul bꞌeh tuꞌ, yay kotno noꞌ yalanh naj Balaam tuꞌ. Istit ishowal naj yinh noꞌ, ismaqꞌni naj noꞌ yu huneꞌ te teꞌ. 28 Hayet lanhan ismaqꞌni naj noꞌ tuꞌ, istzotelkanh noꞌ yu Komam Dios Jahawil, yalni noꞌ tet naj Balaam:

—¿Tzet chachwutehan, yuxin yoxelxa kinhamaqꞌnitiꞌan? xhi noꞌ tet naj.

29 Istaqꞌwi naj Balaam tet noꞌ:

—¿Tzet yinh yuxin chachetli winhan? Tato ay hunu chꞌen espada iqꞌbꞌil wuhan, chimkach inpotxꞌkamojan tinanh, xhi naj tet noꞌ.

30 Istaqꞌwi noꞌ tet naj hakaꞌ tiꞌ:

—Wibꞌanhnhetikꞌahan chachekꞌi, kaw xin hawohtaj ta maxhto hunelo chiwuhan tawinh hakaꞌ tiꞌ, xhi noꞌ tet naj. Istaqꞌwi naj:

—Yel chawala, xhi naj. 31 Lahwi tuꞌ isyeni isbꞌa yángel Komam Dios tuꞌ tet naj Balaam, linhankanh yiktabꞌanil bꞌeh, ayko xin huneꞌ chꞌen espada ahnati yul yatut ayko yul isqꞌabꞌ naj. Hayet yilni naj Balaam yángel Komam tuꞌ, yay jahno naj, yay xulno naj sat txꞌotxꞌ. 32 Yalni yángel Komam Jahawil tet naj:

—¿Tzet yinh yuxin oxelxa chamaqꞌ haburro tiꞌ? Wal xin haninan chinok linhnojan tasataj, chinmajchenan habꞌeh tiꞌ, yuto haꞌ tzet chaxhto hawatxꞌeꞌ kaw txꞌoj yul insatan. 33 Ta xin mach ishekꞌilo isbꞌa noꞌ wetan xam kach kam wuhan tinanh, wal noꞌ xin matzet chu noꞌ wuhan, xhi naj yángel Komam tuꞌ.

34 Istaqꞌwi naj Balaam tet naj:

—Mamin, kaw mawako inmulan tawet, yuto mach wohtajojan tato linhan hachkanh yul bꞌeh tiꞌ yu hamajni inbꞌehan. Mamin, ta mach chisje hakꞌul chintohan yinta ebꞌnaj tiꞌ, chiyu inmeltzohan, xhi naj.

35 Istaqꞌwi yángel Komam Jahawil tuꞌ tet naj:

—Chisje hato yinta ebꞌnaj tiꞌ, yajaꞌ haꞌ tzet chiwalan tawet, haꞌ chawala, xhi yángel Komam tet naj Balaam tuꞌ.

Hak tuꞌ yu isto naj Balaam yinta ebꞌnaj yahawil konhobꞌ Moab ischejto naj rey Balac. 36 Hayet yabꞌen naj Balac tato lanhan yapni naj Balaam tuꞌ, isto naj ischahno naj bꞌey huneꞌ konhobꞌ ayayo istiꞌ haꞌ Arnón, sat ismohonal txꞌotxꞌ Moab. 37 Hayet ischahni naj Balac naj Balaam tuꞌ, yalni naj tet naj:

—¿Tzet yinh yuxin machi kaxhtita yet kach wawtentijan? ¿Ham hatxumni tato mach chu waqꞌnihan sunil tzet haltebꞌil wuhan tawet? xhi naj.

38 Istaqꞌwi naj Balaam hakaꞌ tiꞌ:

—Ayinan lah, makintitan kach wilaꞌan, yajaꞌ wal tinanh machi hunu tzet chiwalan yul wetan inchukilan, wal xin haꞌ tzotiꞌ chaqꞌaꞌko Komam Dios yul intiꞌan haꞌ chiwalaꞌan, xhi naj.

39 Lahwi tuꞌ, isto naj Balaam yinta naj Balac bꞌey txꞌotxꞌ Quiriat-huzot. 40 Ischejni naj Balac potxꞌlaxo noꞌ wakax yebꞌ noꞌ meꞌ, yalaxiko noꞌ tet naj Balaam yebꞌ tet ebꞌnaj iswiꞌehal konhobꞌ tzujan yinta ebꞌnaj.

41 Haxa yinh hunxa tzꞌayik, yilaxto naj Balaam yu naj Balac iswiꞌ witz Bamot-baal, yuto haꞌ bꞌey tuꞌ chiyu yilnito ebꞌnaj ismantiado ebꞌnaj Israel.