23
Lahwi tuꞌ xin, yalni naj Balaam tet naj rey Balac:—Watxꞌewe hujebꞌ ismexhahil xahanbꞌal bꞌey tiꞌ, kat hachejni potxꞌlaxo hujkꞌonh noꞌ winaj wakax yebꞌ hujkꞌonh noꞌ winaj meꞌ, xhi naj. 2 Iswatxꞌen naj Balac tzet yal naj Balaam tuꞌ, yalten ebꞌnaj iskawanhil huneꞌ noꞌ tzehla wakax yebꞌ huneꞌ noꞌ meꞌ xahanbꞌalil yibꞌanh hunun mexha.
3 Yalni naj Balaam tet naj Balac:
—Kananhkano iskꞌatanh xahanbꞌal tiꞌ, wal hinan chintohan. Kꞌuxantaxka chitzotel Komam Dios wetan, tzujan tuꞌ chiwalnojan tawet tzet chiyal Komam wetan, xhi naj.
Ishitzto naj Balaam, yahto naj iswiꞌ huneꞌ witz bꞌay machi teꞌ qꞌebꞌtaj. 4 Isyeni isbꞌa Komam Dios tet naj bꞌey tuꞌ, yalni naj tet Komam:
—Mamin, manlatzꞌbꞌakanhan hujebꞌ ismexhahil yet xahanbꞌal, mawanahtojan huneꞌ noꞌ wakax yebꞌ huneꞌ noꞌ meꞌ yibꞌanh hunun mexha tuꞌ, xhi naj.
5 Yanikto Komam tzet tzotiꞌal yul istiꞌ naj Balaam, lahwi tuꞌ yalni Komam hakaꞌ tiꞌ:
—Meltzanhto iskꞌatanh naj Balac kat hawalni tet naj tzet mawalan tawet tiꞌ, xhi Komam.
6 Ismeltzo naj Balaam. Wal naj Balac tuꞌ linhankanh naj yebꞌ ebꞌnaj iswiꞌehal konhobꞌ Moab iskꞌatanh xahanbꞌal tuꞌ yet yapni naj. 7 Yichiko naj Balaam istzoteli, yalni naj hunteqꞌan tzotiꞌ kaw ay yelapno hakaꞌ tiꞌ:
«Hata bꞌey istzalanil witzla ayko yinh yetkꞌulal bꞌay chiꞌahilo tzꞌayik yul ismajul txꞌotxꞌ Aram,
kinyitijan naj rey Balac, isreyal txꞌotxꞌ Moab. Yalni naj wetan xin:
“Kata kat hatzꞌaktiꞌnhen anma titna yinh yaꞌ Jacob,
kat haqꞌanni isyaꞌtajil yibꞌanh ebꞌnaj Israel,” xhito naj wetan.
8 Yajaꞌ, ¿tzet chu intzꞌaktiꞌnhenan mak mach istzꞌaktiꞌnhe Komam Dios?
¿Tzet chu inqꞌannihan isyaꞌtajil yibꞌanh tato mach choche Komam chitit isyaꞌtajil yibꞌanh?
9 Kaw saqꞌal wilnitojan konhobꞌ Israel tuꞌ yet ayinahtojan yibꞌanh iswiꞌ chꞌen chꞌen.
Kaw saqꞌal wilnitojan huneꞌ konhobꞌ tuꞌ yinh iswiꞌ huneꞌ witz tiꞌ.
Huneꞌ konhobꞌ tuꞌ, kaw nan yehayo ischukil, kaw xin nan yok xol ejla konhobꞌ.
10 Haꞌ isbꞌisil yikꞌal yaꞌ Jacob tuꞌ, lahan hakaꞌ isbꞌisil pojoj.
¿Maktaxka chiyu isbꞌisni yet iskanh majan ebꞌnaj Israel tiꞌ?
Machi hunu mak chiyu isbꞌisni. Majaltam chinkaman hakaꞌ chu iskamto hunteqꞌan anma kaw kꞌul isbꞌeybꞌal tuꞌ.
Ayxikꞌa hak tuꞌ chu inkaman hakaꞌ ebꞌnaj tuꞌ,» xhi naj Balaam sata ebꞌnaj.
11 Hayet yabꞌen naj Balac yalni naj Balaam hakaꞌ tuꞌ, ismayni naj naj, yalni naj Balac hakaꞌ tiꞌ:
—¿Tzet yinh xin hak tiꞌ chinhawutehan? Awtebꞌil hach wuhan yu hatzꞌaktiꞌnhen hunteqꞌan ebꞌnaj bꞌay ayko inhowaltiꞌan; wal xin toka haꞌ iskꞌulal maxaqꞌanayo yibꞌanh ebꞌnaj, xhi naj Balac.
12 Istaqꞌwi naj Balaam, yalni naj hakaꞌ tiꞌ:
—Yajaꞌ mawalan tawet tato hanhe tzotiꞌ chiyal Komam Dios wetan, haꞌ chiwalan, xhi naj.
—¿Tom chito nahul wuhan tzet chaqꞌ Komam Jahawil walaꞌan yu intiꞌan? xhi naj.
13 Yajaꞌ xin yalpaxo naj Balac tet naj Balaam tuꞌ:
—Tonh wintajan bꞌey hunuxa bꞌaya, bꞌay yetzan nichꞌano istiꞌla ismantiado ebꞌnaj chijila, kat hatzꞌaktiꞌnhen bꞌey tuꞌ, xhi naj.
14 Yinito naj Balac naj Balaam tuꞌ bꞌey txꞌotxꞌ Zofim, yahto ebꞌnaj yinh iswiꞌ witz Pisga. Haꞌ bꞌey tuꞌ islatzꞌbꞌakanh naj hujebꞌ ismexhahil yet xahanbꞌal, yalten naj huneꞌ noꞌ tzehla wakax yebꞌ huneꞌ noꞌ tzehla meꞌ yibꞌanh hunun mexha tuꞌ. 15 Lahwi tuꞌ, yalni naj Balaam tet naj Balac:
«Kananhkano iskꞌatanh xahanbꞌal tiꞌ, wal hinan chintohan inchabꞌan Komam Dios bꞌey tuꞌ,» xhi naj.
16 Ischahnayo Komam Jahawil naj Balaam, yanikto Komam tzotiꞌ yul istiꞌ naj, yalni Komam xin:
«Meltzanhto iskꞌatanh naj Balac tuꞌ, kat hawalni hakaꞌ mawalan tawet,» xhi Komam tet naj.
17 Ismeltzo naj Balaam tuꞌ bꞌay ay naj Balac yebꞌ ebꞌnaj iswiꞌehal konhobꞌ Moab iskꞌatanh xahanbꞌal. Isqꞌambꞌen naj Balac tet naj Balaam:
«¿Tzet mayal Komam Jahawil tawet?» xhi naj.
18 Yichiko naj Balaam istzoteli, yalni naj hunteqꞌan tzotiꞌ kaw ay yelapno hakaꞌ tiꞌ:
«Mam Balac, iskꞌahol icham Zipor,
ahanhwanoj, abꞌe tzet chiwalan.
19 Haꞌ Komam Dios, mach lahano hakaꞌ ebꞌnaj winaj.
Mach chako Komam leqꞌtiꞌal; mach chishelpaxo isnabꞌal.
Hayet chalni hunu tzet ye tuꞌ, chiyij isbꞌa tzet chala; haꞌ tzet chiyalte, chiyaqꞌa.
20 Haꞌ Komam kinchejnihan walnojan iskꞌulal yibꞌanh huneꞌ konhobꞌ tiꞌ;
yuxin ta hak tuꞌ yalni Komam, mach chu inmanhkꞌonan huneꞌ tuꞌ.
21 Machi leqꞌtiꞌal chiyil Komam yinh yaꞌ Jacob, machipaxo istxꞌojal chiyil Komam yinh Israel.
Haꞌ Komam Dios Jahawil isDiosal ebꞌnaj, haꞌ ayko xol konhobꞌ tuꞌ,
kat yalnipaxo ebꞌnaj tuꞌ Komam isreyaloj.
22 Haꞌ Komam inilo ebꞌnaj tuꞌ sat txꞌotxꞌ Egipto,
kaw isye yip Komam tet ebꞌnaj, hakaꞌ yip noꞌ xoltelajil wakax.
23 Machi hunu nawal chiqꞌoji yinh yikꞌal yaꞌ Jacob,
matzet chalpaxilo ebꞌnaj ahbꞌelom yinh ebꞌnaj Israel.
Haꞌ tinah yilal yal-lax yinh ebꞌnaj Israel hakaꞌ tiꞌ:
“Kaw tzetkꞌa kꞌaybꞌalkꞌule xaꞌiswatxꞌe Komam Dios yinh,” xhihojabꞌi.
24 Huneꞌ konhobꞌ tiꞌ, hayet chiꞌahi kaw ay ismay hakaꞌ noꞌ bꞌalam;
maxhtikꞌa chꞌay kotno yalanhto maxhto chiskꞌuxayto no noqꞌ chistzabꞌa,
kat yukꞌnilo noꞌ ischikꞌil noꞌ,» xhi naj Balaam tuꞌ.
25 Hayet yabꞌen naj Balac hunteqꞌan tzotiꞌ tuꞌ, yalni naj tet naj Balaam:
—Tato mach chu hatzꞌaktiꞌnhen huneꞌ konhobꞌ tiꞌ, machojabꞌ xin chaqꞌan iskꞌulal yibꞌanh, xhi naj.
26 Istaqꞌwi naj Balaam, yalni naj tet naj Balac:
—¿Tom mach walan tawet tato hanhe tzet chiyal Komam Jahawil wetan, haꞌ yilal inwatxꞌenan? xhi naj.
27 Yalnipaxo naj Balac tet naj Balaam:
—Chiwalan tawet, chachwitojan hunuxa bꞌaya, kꞌuxantaxka chischah iswiꞌ Komam Dios chatzꞌaktiꞌnhen ebꞌnaj bꞌey tuꞌ, xhi naj.
28 Yinito naj Balac naj Balaam iswiꞌ witz Peor, bꞌay ixtanh yil-laxto txꞌotxꞌ desierto. 29 Hayet yapni ebꞌnaj bꞌey tuꞌ, yalni naj Balaam tet naj Balac:
—Watxꞌekanh hujebꞌ mexha yet xahanbꞌal bꞌey tiꞌ, kat hapotxꞌni hujkꞌonh noꞌ tzehla wakax, yok hujkꞌonh noꞌ tzehla meꞌ, xhi naj.
30 Iswatxꞌen naj Balac tzet yal naj Balaam tuꞌ, yalten naj Balaam huneꞌ noꞌ tzehla wakax yebꞌ huneꞌ noꞌ tzehla meꞌ yibꞌanh hunun mexha yet xahanbꞌal.