24
Yajaꞌ matxa ishekꞌilo isbꞌa naj Balaam bꞌey tuꞌ hakaꞌ yet bꞌabꞌelal yebꞌ yet iskayel yet isto naj yabꞌeno tzet chiyal Komam, yuto istxumilo naj tato chitzala Komam yet chisqꞌanni naj iskꞌulal yibꞌanh anma Israel. Istꞌanhxito naj yinh txꞌotxꞌ desierto; 2 haxa yet yilnito naj ebꞌnaj Israel yinh hunun majan yikꞌal ebꞌnaj, yok Yespíritu Komam Dios yinh naj. 3 Yichiko naj Balaam iskꞌahol naj Beor yalni tzotiꞌ kaw ay yelapno hakaꞌ tiꞌ:«Haꞌ tzet chiyil naj hajan sat, kaw ay yelapnoj.
4 Ay huneꞌ mak abꞌen huneꞌ tzet chal Komam Dios.
Ay huneꞌ mak ilni tzet ye tuꞌ maxhto chiwatxꞌi yet Komam ay yelapno yehi.
Aykꞌay huneꞌ naj tuꞌ, yaj hajan sat.
5 Kaw saqꞌal jilni hemantiado, hex yikꞌal yaꞌ Jacob, yebꞌ xin bꞌay ay hex hex Israel.a
6 Hakaꞌ isbꞌelwito yojomal ha haꞌ, hak tuꞌ heyehi. Hakaꞌ jilni tzꞌunubꞌ istiꞌla ha haꞌ,
hak tuꞌ kexjilni. Hakaꞌ teꞌ áloes tzꞌunbꞌil yu Komam Jahawil, hak tuꞌ heyehi.
Hakaꞌ teꞌ cedro ayayo istiꞌla haꞌ,
hak tuꞌ kexjilni.
7 Chitixhmolo ha haꞌ yul heqꞌabꞌ.
Haxa xol sunilal hetzꞌunubꞌ xin kaw ay haꞌ chiꞌoknikoj.
Haꞌ hereyal kaw ekꞌbꞌal aykano yip sata naj rey Agag.
Haxa bꞌay chexapni kaw nimajal yekoj.
8 Komam Dios kexinilo sat txꞌotxꞌ Egipto.
Kaw ay heyip hakaꞌ noꞌ wakax xolaj telajil.
Chetanhtzenilo konhobꞌ chiꞌaniko howal teyinh,
chewoqꞌni qꞌaho isbꞌajil ebꞌnaj,
kat xin isqꞌaxponikꞌto isbꞌaqꞌ teꞌ litꞌ yul iskꞌul ebꞌnaj heyu.
9 Lahan hex hakaꞌ noꞌ bꞌalam chiꞌok kotno yu iswayi,
machi hunu mak xin ay yip yanma yinilo iswayanh huneꞌ noꞌ miꞌe bꞌalam.
Saqꞌal yet mak chiqꞌanni iskꞌulal teyibꞌanh, haxa mak chextzꞌaktiꞌnheni,
chiꞌalaxpaxayo tzꞌaktiꞌ yibꞌanh,» xhi naj Balaam.
Chiyal naj Balaam tzet chito yuhi
10 Hayet yabꞌen naj Balac isqꞌanni naj Balaam iskꞌulal yibꞌanh anma Israel tuꞌ, istit ishowal naj yinh naj Balaam, chiswoqꞌni naj yiximal isqꞌabꞌ, yalni naj tet naj:
—Makaxhwawtehan yu hatzꞌaktiꞌnhen ebꞌnaj bꞌay ayko inhowalan, yajaꞌ wal hachpaxo xin, oxelxa chaqꞌan iskꞌulal yibꞌanh hunteqꞌan anma tuꞌ. 11 Yuxin wal tinanh, paxanhto hakonhobꞌ, nabꞌnhe walan tato kaw niman tzet chiwaqꞌan tawet kat wanikojan hawinajil. Yajaꞌ machi isje iskꞌul Komam Jahawil ta chꞌok hamay, xhi naj Balac.
12 Istaqꞌwi naj Balaam tet naj:
—¿Tom machi walan tet ebꞌnaj hachejabꞌ bꞌey iqꞌwal winhan, 13 tato waxanhka nohna yatut naj Balac yu chꞌen oro yebꞌ chꞌen plata, kat yaqꞌni naj chꞌen wetan, mach chu inmanhkꞌonan tzet chiyal Komam Dios? Mach chu inwatxꞌenpaxojan hunu tzet ye tuꞌ yul wetan inchukilan, waxanhka kaw machi yelapnoj maka kaw ay yelapnoj. Yuxin walan tato hanhe tzet chiyal Komam Dios wetan, haꞌ chiwalan. 14 Kꞌultikꞌa chinpaxtojan, yajaꞌ yet maxhto chintohan, chiwalkanojan tawet tzet chiꞌutelax hakonhobꞌ tiꞌ yu ebꞌnaj Israel yet bꞌaqꞌinh, xhi naj.
15 Yichiko naj Balaam yalni tzetaj ye tuꞌ chitohuli,
«yalni naj Balaam, iskꞌahol naj Beor,
chalni naj hajan sat,
16 yalni naj abꞌen tzet halbꞌilkano yu Komam Jahawil,
naj yohta kuybꞌanile yet Komam,
Komam kaw aykano yip. Aykꞌaynaj, yaj hajanpaxo sat.
17 Chiwiltojan, yaj maxhto taj tinanh, ay huneꞌ tzet chiwiltojan, yaj mach kawilo yetij.
Ay huneꞌ txꞌumel chiꞌel yinh yaꞌ Jacob. Huneꞌ naj tuꞌ chiꞌok yahawilo ebꞌnaj Israel,
haꞌ naj chiꞌaniko islahwilal ispalanh konhobꞌ Moab.
Haꞌ naj xin chitanhtzenpaxkanilo anma titna yinh naj Set.
18 Chiꞌaykꞌay konhobꞌ Edom yul isqꞌabꞌ,
chꞌaykꞌaypaxo txꞌotxꞌ Seir yul isqꞌabꞌ mak chichiwa iskꞌul yinh.
Ebꞌnaj Israel kaw chiyiqꞌkanokanh yip ebꞌnaj.
19 Yinh yaꞌ Jacob chiꞌel naj chiqꞌoji.
Haꞌ naj chitanhtzenilo hunteqꞌan mak chitokankano yul huneꞌ konhobꞌ tuꞌ,» xhi.
20 Lahwi tuꞌ, istꞌanhxito naj Balaam yinh konhobꞌ Amalec, yichiko naj yalni tzet chito hul yet bꞌaqꞌinh, yalni naj:
«Haꞌ konhobꞌ Amalec, haꞌ ayko iswiꞌehalo sunil ej konhobꞌ,
yajaꞌ xin chitanhtzelaxilo yet bꞌaqꞌinh,» xhi naj.
21 Lahwi tuꞌ, yilnipaxo naj Balaam konhobꞌ Ceneo, yichiko naj yalni tzet chiyu bꞌey tuꞌ yet bꞌaqꞌinh, yalni hakaꞌ tiꞌ:
«Waxanhka kaw ay yip hekonhobꞌ,
waxanhka yinh iskꞌul chꞌen chꞌen cheyako heyatut,
22 yajaꞌ chitanhtzelaxilo hekonhobꞌ hex Ceneo hex tiꞌ,
yet chexyinito ebꞌnaj Asiria ischejabꞌoj,» xhi naj Balaam.
23 Yalnipaxo naj hakaꞌ tiꞌ:
«¡Ay! ¿Aytom hunu mak chikan yinh itzitzal yet chaniti Komam Dios hunteqꞌan tiꞌ?
24 Chitit teꞌ barco ay istiꞌ haꞌ mar bꞌey konhobꞌ Quitim,
kat yul ebꞌnaj yaqꞌno ekꞌoyaꞌ yanma Asiria, kat yaqꞌlaxpaxo ekꞌoyaꞌ yanma konhobꞌ Heber.
Kat xin istanhtzelaxkaniloj,» xhi naj.b
25 Lahwi tuꞌ xin yahwano naj Balaam, ispaxto naj bꞌey iskonhobꞌ, ismeltzopaxkanto naj rey Balac yul bꞌeh bꞌaytikꞌa tita.