Ok ebꞌnaj Israel yiqꞌayo isbꞌa tet tioxh Baal-peor
25
Yet yehayo anma Israel bꞌey konhobꞌ Sitim, yiqꞌnikanh ebꞌnaj Israel tuꞌ ebꞌix iskutzꞌin ebꞌnaj Moab. 2 Ismontenpaxto ebꞌix ebꞌnaj yinta yaqꞌni isxahanbꞌal tet istioxh, iskꞌuxnipaxo anma Israel noꞌ chibꞌe chihaltelax yinh xahanbꞌal tet tioxh; yokpaxo yinoyo isbꞌa tet istioxh ebꞌix. 3 Hak tuꞌ yu yinayo isbꞌa anma Israel tet tioxh Baal-peor; yuxin tit ishowal Komam Jahawil yinh ebꞌnaj Israel tuꞌ. 4 Yalni Komam tet yaꞌ Moisés:«Kutxbꞌako sunil ebꞌnaj iswiꞌehal konhobꞌ yako ismul, kat hahojnikamo ebꞌnaj yalanh yoj tzꞌayik yinh insatan, yunhe chiꞌel isqꞌaqꞌal huneꞌ inhowalan yinh ebꞌnaj Israel tiꞌ,» xhi Komam tet yaꞌ Moisés.
5 Yuxin ischej yaꞌ Moisés ebꞌnaj juez Israel, yalni yaꞌ tet ebꞌnaj:
«Hunun hex yinh hunun majan ebꞌnaj Israel tiꞌ, chehojkamo ebꞌnaj yiyo isbꞌa tet tioxh Baal-peor,» xhi yaꞌ Moisés tet ebꞌnaj.
6 Yajaꞌ ay huneꞌ naj Israel tiꞌ, inito huneꞌ ix madianita yixaloj yul yatut yinh sat yaꞌ Moisés yebꞌ yinh sat sunil anma Israel kutxaniko oqꞌo istiꞌ Tabernáculo, bꞌay chiskutxbꞌa isbꞌa ebꞌnaj Israel iskꞌatanh Komam. 7 Hayet yilni naj Finees, naj iskꞌahol yaꞌ Eleazar, haꞌ ismam icham naj xin, haꞌ ton yaꞌ sacerdote Aarón; ishekꞌnilo isbꞌa naj xol anma kutxaniko tuꞌ, yiniti naj huneꞌ chꞌen lanza. 8 Yok tzujno naj Finees yinta huneꞌ naj Israel tuꞌ masanta yul ismantiado, isqꞌaxponikto naj chꞌen lanza tuꞌ yul iskꞌul naj Israel tuꞌ yebꞌ ix madianita. Hak tuꞌ yu islinhi iskam ebꞌnaj Israel yu isyaꞌtajil yati Komam Dios xol ebꞌnaj Israel. 9 Kaw xin 24 mil ebꞌnaj kam yu huneꞌ isyaꞌtajil yati Komam xol ebꞌnaj Israel tuꞌ.
10 Lahwi tuꞌ, istzotel Komam tet yaꞌ Moisés, yalni Komam hak tiꞌ:
11 «Naj Finees tiꞌ, iskꞌahol yaꞌ Eleazar, iskꞌahol yaꞌ sacerdote Aarón, yu mach ischah iswiꞌ naj tzet chute ebꞌnaj, yuxin matxa mantanhtzelojan ebꞌnaj Israel yu inhowalan. Yuto yaꞌ mayuko yinh yanma naj hakaꞌ intiꞌan. Ta mach mayu naj hakaꞌ tuꞌ, mach matanh isyaꞌil intzꞌeꞌalan yinh ebꞌnaj, ta mach xin matanhilo sunil konhobꞌ tiꞌ wuhan. 12 Yuxin hal tet naj ta chintꞌinhbꞌakano intratohan yet aqꞌankꞌulal tet naj. 13 Chiwaqꞌan ismunil naj yinh sacerdotehal yinh sunilbꞌal ej tiempo, yebꞌ tet ebꞌnaj chipohilto yinh naj yet bꞌaqꞌinh, yuto haꞌ hun naj tzꞌeꞌ yute isbꞌa wintajan yu istxꞌojal iswatxꞌe ebꞌnaj Israel. Hak tuꞌ xin yu waqꞌni nimankꞌulalan yinh ebꞌnaj Israel tiꞌ,» xhi Komam.
14 Haꞌ naj Israel hun yu isqꞌaxpolaxikꞌto chꞌen lanza yul iskꞌul yebꞌ ix madianita tuꞌ, Zimri isbꞌi naj, iskꞌahol naj Salu ye naj. Naj Salu tuꞌ, iswiꞌehal yeko naj xol anma Israel titna yinh yaꞌ Simeón. 15 Haxa ix ah Madián tuꞌ, Cozbi isbꞌi ix, iskutzꞌin naj Zur ye ix; naj Zur tuꞌ, iswiꞌehal yeko naj xol hunmajan ebꞌnaj Madianita.
16 Lahwi tuꞌ, istzotelpaxo Komam Jahawil tet yaꞌ Moisés, yalni Komam hakaꞌ tiꞌ:
17 «Aweko howal yinh ebꞌnaj Madianita tuꞌ, kat hetanhtzenilo ebꞌnaj, 18 hakaꞌ yu yaqꞌni ekꞌoyaꞌ ebꞌnaj heyanma, yet kexismontento ebꞌnaj heyinayo hebꞌa tet tioxh Baal-peor. Yebꞌ yu tzet iswatxꞌe ix Cozbi, iskutzꞌin naj iswiꞌehal xol ebꞌnaj Madián; ix kam yu chꞌen lanza yet ayayo isyaꞌtajil teyibꞌanh wuhan yu heyiyo hebꞌa tet tioxh Baal-peor,» xhi Komam tet yaꞌ Moisés.