Ishabꞌilalxa ekꞌ anma Israel sat txꞌotxꞌ desierto
2
»Lahwi tuꞌ, kotoh sat txꞌotxꞌ desierto yul bꞌeh chiꞌapni bꞌey haꞌ Kajinh Mar, hakaꞌtikꞌa yu yalni Komam jet. Kaw xin txꞌiꞌal tiempo konhbꞌelwikꞌo yinhla ishoyanil witz Seir. 2 Tzujan tuꞌ xin yalni Komam wetan hakaꞌ tiꞌ: 3 “Kaw mach isbꞌi hayelxa chexekꞌ hoyon yinhla iskꞌul hunteqꞌan witz tiꞌ, wal tinanh, asiꞌwe yinh yetkꞌulal norte. 4 Hal tet konhobꞌ Israel hakaꞌ tiꞌ: Hex tiꞌ, chexekꞌto sat istxꞌotxꞌ ebꞌnaj titna yinh naj Esaú, ebꞌnaj ay bꞌey Seir; ebꞌnaj ayto heyu hebꞌa yebꞌi. Chixiw ebꞌnaj teyet, yajaꞌ xin cheyil hebꞌa,a 5 mach cheyako howal yinh ebꞌnaj, machi nichꞌano istxꞌotxꞌ ebꞌnaj tuꞌ chiwaqꞌan teyet, machi hunu ojlenal; yuto sunil txꞌotxꞌ chewal txꞌotxꞌ yul Seir yet ebꞌnaj titna yinh naj Esaú ye txꞌotxꞌ, haninan waqꞌan txꞌotxꞌ tet ebꞌnaj. 6 Cheqꞌan tet ebꞌnaj tato chistxonh ebꞌnaj tzet cheloh, kat xin hetohlan tet ebꞌnaj, hakpax tuꞌ xin ha haꞌ cheyukꞌ sat istxꞌotxꞌ ebꞌnaj tuꞌ chetohla haꞌ,” xhi Komam.7 »Haꞌ Komam Jahawil koDiosal, xayayo iskꞌulal teyibꞌanh yinh sunil tzet xahewatxꞌe yulbꞌal 40 (kawinaj) habꞌil tiꞌ. Haꞌ Komam ayko heyetbꞌihoj, haꞌ Komam xin kextanhenpaxo yinh hebꞌel sat txꞌotxꞌ niman desierto, machi hunu tzet ye tuꞌ mach tzꞌajano yul heqꞌabꞌ.
8 »Hak tuꞌ yu kotoh istiꞌla istxꞌotxꞌ ebꞌnaj juxhtato kobꞌa yebꞌi, ebꞌnaj titna yinh naj Esaú ay bꞌey Seir, kotoh yul bꞌeh chito bꞌey Arabá, chitit bꞌey Elat yebꞌ bꞌey Ezión-geber, komeltzopaxto yul bꞌeh chiꞌekꞌ bꞌey txꞌotxꞌ desierto yul ismajul Moab. 9 Yalni Komam Jahawil wetan: “Mach chaxhpitwakoj, yebꞌ mach chawaqꞌle howal yebꞌ ebꞌnaj Moabita, wal xin yinh yaꞌ Lot titna ebꞌnaj. Machi nichꞌano istxꞌotxꞌ ebꞌnaj tuꞌ chiwaqꞌan tawet, haninan waqꞌan txꞌotxꞌ Ar tet ebꞌnaj.b 10 (Hayet payxa, haꞌ ebꞌnaj emita ayayo sat txꞌotxꞌ, kaw xin nimejalkano iskonhobꞌ ebꞌnaj, yebꞌ kaw tzetkꞌakano isbꞌisil ebꞌnaj, yebꞌ kaw nimej istel ebꞌnaj, lahan ebꞌnaj hakaꞌ iskꞌahol naj Anac. 11 Yinh kaw yeli chal anma tato gigante ebꞌnaj, hakaꞌ ebꞌnaj iskꞌahol naj Anac; wal ebꞌnaj moabita tuꞌ xin, emita chal ebꞌnaj yinh ebꞌnaj. 12 Wal txꞌotxꞌ Seir yet payxa, haꞌ ebꞌnaj horeo ayayo sat txꞌotxꞌ, yajaꞌ ebꞌnaj iskꞌahol naj Esaú tzumbꞌenilo ebꞌnaj, yelkanh ebꞌnaj horeo tuꞌ, yokkano ebꞌnaj iskꞌahol naj Esaú sat istxꞌotxꞌ ebꞌnaj; yehayo ebꞌnaj sat txꞌotxꞌ hakaꞌtikꞌa ju hanhonh Israelonh tiꞌ, yinh txꞌotxꞌ yaqꞌ Komam jet.) 13 Wal tinanh xin, okanhwe yinh hebꞌel, ekꞌanhweto yibꞌanh haꞌ Zered,” xhi Komam. Hak tuꞌ yu jekꞌto yibꞌanh haꞌ Zered.
14 »Yettax jel bꞌey Cades-barnea masanto yet istzꞌayikal yet koqꞌaxponikꞌto haꞌ Zered, yulbꞌal hunteqꞌan habꞌil tuꞌ, ekꞌto 38 (waxajebꞌ iskawinaj) habꞌil. Yinh hunteqꞌan habꞌil tuꞌ, xakamnalo sunil ebꞌnaj winaj jet konhobꞌ ayko yinh ishabꞌilal isto yinh howal yet jel bꞌey Egipto, hakaꞌtikꞌa yu yalni Komam. 15 Yayo Komam isqꞌabꞌ yibꞌanh ebꞌnaj, yuxin tanhilo ebꞌnaj manhkꞌon tzet yal Komam, matxa xin hunu ebꞌnaj kani.
16 »Haxa yet matxa hunu ebꞌnaj ayko yinh ishabꞌilal isto yinh howal tuꞌ itzitz, 17 istzotel Komam Jahawil wetan, yalni hakaꞌ tiꞌ: 18 “Tinanh xin, ekꞌanhweto yul ismohon ebꞌnaj Moab kat heto bꞌey Ar. 19 Yajaꞌ yet chechahni hebꞌa yebꞌ ebꞌnaj yebꞌ ebꞌnaj amonita ebꞌnaj titna yinh yaꞌ Lot, mach chepit ebꞌnaj yebꞌ mach cheyako howal yinh ebꞌnaj; machi nino txꞌotxꞌ chiwaqꞌan teyet yinh istxꞌotxꞌ ebꞌnaj, wal xin hanan waqꞌan txꞌotxꞌ oko yu. 20 (Yebꞌ xin hal-laxpaxoj tato yet ebꞌnaj gigante ye txꞌotxꞌ, yuto yet payxa, haꞌ ebꞌnaj gigante tuꞌ ayayo sat txꞌotxꞌ, wal ebꞌnaj amonita xin zomzomeo chal ebꞌnaj yinh ebꞌnaj. 21 Kaw nimajalkano iskonhobꞌ ebꞌnaj yebꞌ kaw tzetkꞌa ebꞌnaj, kaw xin nimej istel ebꞌnaj, lahan ebꞌnaj hakaꞌ ebꞌnaj titna yinh naj Anac, yajaꞌ tanhtzelaxilo ebꞌnaj yu Komam, yuxin haꞌ ebꞌnaj amonita, kankano ebꞌnaj yinh hunelnhe sat txꞌotxꞌ tuꞌ. 22 Lahan yu tuꞌ, hakaꞌ yute ebꞌnaj titna yinh naj Esaú, ebꞌnaj ayayo sat txꞌotxꞌ Seir; haꞌ Komam Jahawil tanhtzenilo ebꞌnaj horeo, yehayo ebꞌnaj titna yinh naj Esaú sat istxꞌotxꞌ ebꞌnaj seleloj. 23 Hak tuꞌ yupaxo ebꞌnaj heveo ay yulaj aldea iskawilal Gaza, tanhtzelaxilo ebꞌnaj yu ebꞌnaj filisteo tit bꞌey Creta, yulkano ebꞌnaj ehoyo bꞌey tuꞌ.) 24 Asiꞌwe xin, qꞌaxponanhwekꞌto yibꞌanh haꞌ Arnón, haninan chiwaqꞌ aykꞌayojan ebꞌnaj amorreo yul heqꞌabꞌ, yebꞌ naj Sehón, isreyal ebꞌnaj ay bꞌey Hesbón. Okanhwe sat istxꞌotxꞌ ebꞌnaj kat heyaniko howal yinh ebꞌnaj, kat yokkano istxꞌotxꞌ ebꞌnaj heyu. 25 Wal tinanh xin, sunil ej konhobꞌ ay yul sat yibꞌanhqꞌinal tiꞌ, chixiwokanh teyet wuhan. Yet chabꞌen ebꞌnaj heqꞌumal, kat isluylunkanh ebꞌnaj kat yok xiwkilal yinh ebꞌnaj,” xhi Komam.
Yet isqꞌoji ebꞌnaj Israel yinh naj rey Sehón
26 »Yet ayonh bꞌey txꞌotxꞌ desierto Cademot, inchejnitojan haywanh ebꞌnaj chejabꞌ iskꞌatanh naj Sehón, naj isreyal txꞌotxꞌ Hesbón, walnitojan yinh aqꞌankꞌulal tet naj hakaꞌ tiꞌ: 27 “Chonhichikojanh jekꞌtojanh sat hetxꞌotxꞌ; yul niman bꞌeh chonhtohanh, machi xin chikohekꞌilo kobꞌahanh yul bꞌeh tuꞌ. 28 Chikotohlahanh tzet chikolohanh yebꞌ ha haꞌ chijukꞌanh sat hatxꞌotxꞌ, wal xin kachannhe chikoqꞌananh tawet tato chonhekꞌtojanh sat hatxꞌotxꞌ. 29 Hakaꞌ yu konhischahnikꞌtojanh ebꞌnaj titna yinh naj Esaú, ebꞌnaj ay bꞌey Seir, yebꞌ ebꞌnaj moabita ay bꞌey Ar; hak tuꞌ chijochehanh ta chonhekꞌtojanh, masanta chonhqꞌaxponikꞌtojanh yibꞌanh haꞌ Jordán kat japnikanojanh sat txꞌotxꞌ chaqꞌ Komam jetanh,” kinchitojan.
30 »Yajaꞌ naj Sehón isreyal Hesbón tuꞌ, mach isje naj tato chonhekꞌto sat istxꞌotxꞌ naj, yuto Komam Jahawil koDiosal aqꞌni kawbꞌolo yanma naj, yuxin mach isje naj; yunhe yokkano naj yul koqꞌabꞌ masanto tinanh.
31 »Lahwi tuꞌ, yalni Komam wetan hakaꞌ tiꞌ: “Wal tinanh xin, chiwakojan naj Sehón yul heqꞌabꞌ yebꞌ sunil istxꞌotxꞌ naj, okanhweto sat istxꞌotxꞌ naj, kat yokkano txꞌotxꞌ heyu,” xhi Komam.
32 »Istit naj Sehón tuꞌ yebꞌ sunil issoldado konhischahnoj, yu yaniko naj howal jinh bꞌey Jahaza. 33 Yajaꞌ Komam Dios Jahawil koDiosal aqꞌni aykꞌayo naj yul koqꞌabꞌ, koqꞌoji yinh naj yebꞌ yinh ej iskꞌahol naj yebꞌ yinh sunil iskonhobꞌ naj. 34 Sunil iskonhobꞌ naj aykꞌay yul koqꞌabꞌ, jetankanto sunil konhobꞌ tuꞌ, kopotxꞌni ebꞌnaj winaj yebꞌ ebꞌix ix yebꞌ nixhte unin, matxa hunu mak jakanoj. 35 Hanhe xin isnoqꞌ ebꞌnaj okkano ju, yebꞌ hunteqꞌan tzet ye tuꞌ kaw ay istohol ilcha ju yul konhobꞌ bꞌay konhqꞌoji tuꞌ. 36 Hata bꞌey konhobꞌ Aroer ayayo istiꞌ haꞌ nichꞌan Arnón, yebꞌ bꞌey konhobꞌ ayayo yul akꞌal tuꞌ, masanta bꞌey Galaad, machi hunu ej konhobꞌ tuꞌ qꞌoji jinh. Sunil hunteqꞌan konhobꞌ tuꞌ, yako Komam Jahawil koDiosal yul koqꞌabꞌ. 37 Kachannhe xin hunteqꞌan txꞌotxꞌ tiꞌ bꞌay mach jako howal; txꞌotxꞌ bꞌay ayayo ebꞌnaj amonita yebꞌ txꞌotxꞌ ayikꞌto isqꞌaxebꞌikꞌto haꞌ Jaboc, yebꞌ hunteqꞌanxa konhobꞌ bꞌey chewal txꞌotxꞌ yebꞌ hunteqꞌan konhobꞌ yal Komam Jahawil koDiosal jet, ta mach chijako howal yinh.