Yal yaꞌ Moisés tet anma Israel tato yijem chute isbꞌa
4
»Tinanh xin hex wet konhobꞌ Israel, abꞌewe kuybꞌanile yebꞌ chejbꞌanile chiwalan teyet, cheyijewe yunhe heyehikꞌoj, yebꞌ chexoktoj kat heyehayo sat txꞌo txꞌotxꞌ chaqꞌ Komam Jahawil teyet, isDiosal ebꞌnaj jichmam. 2 Mach cheyako yaqꞌbꞌil maka heyinilo yaqꞌbꞌil chejbꞌanile chiwalkanojan teyet, wal xin bꞌeybꞌalnhewe chejbꞌanile chal Komam Jahawil koDiosal, hakaꞌ walnikanojan teyet tiꞌ. 3 Hex tiꞌ heyil tzet eliko sunil ebꞌnaj yiyo isbꞌa tet tioxh Baal-peor yu Komam, istanhtzelo Komam ebꞌnaj texol. 4 Wal hex kexok tzujno yinta tzet chal Komam Jahawil, koDiosal, itzitz hexto tinanh. 5 Ilwekꞌanabꞌi, kaw xawalkanojan kuybꞌanile yebꞌ chejbꞌanile teyet, hakaꞌtikꞌa yu ischejni Komam Jahawil koDiosal walaꞌan teyet, yunhe hebꞌeybꞌalnheni yet ayexxa sat txꞌo txꞌotxꞌ bꞌay chexapni. 6 Yijewe xin, kat hebꞌeybꞌalnhen hunteqꞌan chejbꞌanile tiꞌ, yuto haꞌ chiꞌaqꞌni henabꞌal yebꞌ hehelanil sata sunil ej konhobꞌ, yuto hayet chabꞌen anma sunil chejbꞌanile tiꞌ, chal anma hakaꞌ tiꞌ: “Yinh kaw yeli kaw helan yebꞌ kaw ay isnabꞌal yebꞌ kaw nime konhobꞌkanoj,” xhi. 7 Yuto ¿bꞌaytet taxka hunu konhobꞌ kaw nimajalkanoj ayko isdiosal iskawilal hakaꞌ yeko Komam Jahawil koDiosal koxol tiꞌ? Wal xin haꞌ Komam chikolwa jinh yet chikoqꞌanni tet. 8 Yebꞌ xin ¿bꞌaytet hunu konhobꞌ kaw toholkano iskuybꞌanil yebꞌ ischejbꞌanil, hakaꞌ hunteqꞌan chejbꞌanile chiwalkanojan teyet tinanh? 9 Yuxin nannhe heyu, mach chenahulnheto tzet ye tuꞌ xaheyila, mach cheyilo yinh henabꞌal yulbꞌal itzitz hex, wal xin chekuy tet heyuninal yebꞌ tet yuninal heyuninal.Kuybꞌanile yabꞌe ebꞌnaj Israel bꞌey witz Horeb
10 »Yinh istzꞌayikal yet ayonhiko sata Komam Jahawil koDiosal bꞌey witz Horeb, yalni Komam wetan hakaꞌ tiꞌ: “Kutxbꞌako sunil konhobꞌ tiꞌ yunhe waqꞌnihan chejbꞌanile yohtanheloj kat iskuyni, yunhe ay welapnojan yul sat ebꞌnaj yulbꞌal yet itzitz ebꞌnaj, kat xin iskuynipaxkano ebꞌnaj yuninal,” xhi Komam. 11 Hehitziko yich witz. Yinhla witz tuꞌ xin kaw nahat ah xaj qꞌa qꞌaꞌ, ah topton isnhubꞌal satkanh, qꞌejxanhe jilni satkanh yu. 12 Istzotelilti Komam jet xol qꞌa qꞌaꞌ; yet jabꞌen yul isnuqꞌ Komam yet istzotel tuꞌ, machi heyiliko yinh Komam. 13 Yaqꞌnikano Komam istꞌinhanil istrato teyet, haꞌ ton 10 (lahonhebꞌ) chejbꞌanile istzꞌibꞌnheko yinh kabꞌebꞌ chꞌen chꞌen paqꞌpaqꞌ yehi, yalni Komam tato kaw yilal koyijeni. 14 Yalnipaxo Komam wetan, tato chexinkuyan yinh kuybꞌanile yebꞌ yinh chejbꞌanile, yunhe hebꞌeybꞌalnhen yet ayexxa sat txꞌo txꞌotxꞌ bꞌay chexapnikanoj kat heyehayoj.
Kachbꞌanile tet ebꞌnaj Israel ta mach chiyo isbꞌa ebꞌnaj sata tioxh
15 »Haꞌ yinh istzꞌayikal yet istzotel Komam jet xol qꞌa qꞌaꞌ yinh iswiꞌ witz Horeb, machi hunu tzet ye tuꞌ heyiliko yinh xol qꞌa qꞌaꞌ. Yuxin kaw nannhe heyu, 16 tajka cheyetato hebꞌa kat heyok hewatxꞌeno yechel hunu tzet ye tuꞌ hediosaloj. Yechel winaj maka yechel ix, 17 maka yechel no noqꞌ ay sat txꞌo txꞌotxꞌ tiꞌ, maka yechel ej noꞌ chꞌik chiꞌekꞌ xol jaqꞌeqꞌ. 18 Maka yechel ej no noqꞌ chishatxikꞌo iskꞌul sat txꞌotxꞌ, maka yechel noꞌ kay ay xol haꞌ mar. 19 Yebꞌ xin hayet chextꞌanhxikanh satkanh, kat heyilni tzꞌayik, yebꞌ ixahaw, yebꞌ ej txꞌumel, yebꞌ sunil tzetaj ay satkanh tuꞌ, tajka chiꞌok yinh henabꞌal heyinayo hebꞌa tet, yuto haꞌ Komam Jahawil koDiosal watxꞌenhe sunil tzet ay satkanh tuꞌ yunhe ismujli yinh ej konhobꞌ yul sat yibꞌanhqꞌinal tiꞌ.a 20 Yajaꞌ walonh tiꞌ, haꞌ Komam konhinilti yul huneꞌ konhobꞌ hakaꞌ hunu horno bꞌay chinhuslax chꞌen hierro, haꞌ ton Egipto, yunhe jokkano iskonhobꞌo Komam, hakaꞌ jeko tinanh.
21 »Yaj tit ishowal Komam Dios winhan heyu hex tiꞌ, yalni Komam tato mach chinekꞌtojan yibꞌanh haꞌ Jordán, yebꞌ mach chinoktojan sat txꞌo txꞌotxꞌ kaw kꞌul chaqꞌ Komam Jahawil koDiosal teyet yinh hunelnhe. 22 Yuxin haꞌ bꞌey tiꞌ chinkaman, matxa chinqꞌaxponikꞌtojan yibꞌanh haꞌ Jordán, wal hex tiꞌ xin chexqꞌaxponikꞌto yibꞌanh haꞌ, kat heyehayo sat txꞌo txꞌotxꞌ kaw kꞌulkanoj. 23 Yaj kaw nannhe heyu, mach chenahulnheto istrato Komam xayaqꞌ teyet. Machojabꞌ chexok hewatxꞌe yechel hunu tzet ye tuꞌ hediosaloj, hunteqꞌan txahul, bꞌay kachbꞌil hex yu Komam. 24 Yuto Komam Jahawil koDiosal, mach chischah iswiꞌ tato cheyiyo hebꞌa tet hunuxa tzet ye tuꞌ; lahan ishowal Komam hakaꞌ qꞌa qꞌaꞌ chitzꞌato sunil tzetaj ye tuꞌ yu.
25 »Hayet ayxa heyuninal yebꞌ yet ayxa yuninal heyuninal, yet kaw nimanxa tiempo heyehayo sat txꞌo txꞌotxꞌ tuꞌ, tato cheyetato hebꞌa, chewatxꞌen yechel tzijxanhe tzet ye tuꞌ hediosaloj, cheyiti ishowal Komam teyibꞌanh. 26 Tato hak tuꞌ cheyute, chiwakojan satkanh yebꞌ txꞌo txꞌotxꞌ yaqꞌni isbꞌa teyinh tato kaw yinh anhe chexkꞌaytzelaxilo sat txꞌotxꞌ bꞌay chexapni tuꞌ, isqꞌaxebꞌikꞌto haꞌ Jordán. Mach txꞌiꞌalo tiempo chexekꞌ sat txꞌotxꞌ, wal xin chextanhtzelaxkanilo yinh hunelnhe. 27 Chexpujnato yulaj ej konhobꞌ yu Komam, haywanhxanhe hex xin chexkankano sat txꞌo txꞌotxꞌ.b 28 Haꞌ bꞌey tuꞌ xin cheyiyo hebꞌa tet tioxh watxꞌebꞌil yu anma; hakaꞌ te teꞌ maka chꞌen chꞌen. Tioxh mach chu yilni, mach chu yabꞌeni, mach chiwaꞌpaxoj, mach chishiqꞌpaxo jaqꞌeqꞌ, mach chu isxuqꞌyenpaxo hunu tzet ye tuꞌ. 29 Yaj tato chesayilo Komam yet ay hex bꞌey tuꞌ xin, chiꞌok Komam heyetbꞌihoj, tato yinh sunil heyanma yebꞌ henabꞌal chesaya. 30 Haxa yinh islahobꞌal yet chexekꞌ yinh sunil hunteqꞌan isyaꞌtajil tuꞌ, tato chexmeltzoko yul isqꞌabꞌ Komam, cheyijen tzet chiyala, 31 mach chexisbꞌejkano Komam, yebꞌ mach chexistanhtzeloj, yebꞌ mach chisnahulnheto Komam istrato yaqꞌkano tet ebꞌnaj jichmam; yuto Komam Jahawil koDiosal, kaw kꞌulchꞌankano iskꞌul.
32 »Qꞌambꞌewe yinh hunteqꞌan tiempo xaꞌekꞌtoj, yichtax iswatxꞌen Komam anma sat txꞌo txꞌotxꞌ tiꞌ, kat heqꞌambꞌenpaxo sunil bꞌey yul sat yibꞌanhqꞌinal tiꞌ tato ayxa bꞌay xayuhi, maka xin abꞌelax hunu tzet ye tuꞌ kaw niman yelapnoj, hakaꞌ huneꞌ tzet xayu texol tiꞌ. 33 ¿Tom ay hunu konhobꞌ tiꞌ xaꞌabꞌen yul isnuqꞌ Komam yet istzotel xol qꞌa qꞌaꞌ, hakaꞌ yu heyabꞌen hex tiꞌ, mach xin chikami, hakaꞌ hex tiꞌ? Maxhto maka. 34 ¿Tom ay hunu dios tiꞌ xakolnilo hunu konhobꞌ xol hunuxa konhobꞌ, hakaꞌ yu kexyinilti Komam bꞌey Egipto? Hex kaw hex heyila tato isyelo Komam tato ayko kokꞌatanh, isyenipaxo kꞌaybꞌalkꞌule, yebꞌ yechel yip, yaqꞌni howal heseleloj, isyekanilo yip, lehanto xin isqꞌabꞌ iskolwa teyinh, isyeni nimeta xiwkilal yet kexyinilo bꞌey Egipto.
35 »Yelax hunteqꞌan tiꞌ teyet yunhe heyohtanheniloj tato Komam Jahawil, Dios yinh kaw isyelal, matxa xin hunuxa mak hakaꞌ Komam. 36 Jabꞌen istzotel Komam satkanh yu konhiskuyni, haxa sat txꞌo txꞌotxꞌ tiꞌ, isye nime qꞌaꞌ jilaꞌ, jabꞌen istzotel Komam xol qꞌa qꞌaꞌ tuꞌ. 37 Kaw xahan yil Komam ebꞌnaj jichmam, issikꞌnikanilo Komam anma chipohchakanh yinh ebꞌnaj konhiskolnilti Komam bꞌey Egipto yinh sunil isqꞌaqꞌal yip. 38 Yinilo Komam hunteqꞌan nime konhobꞌ kaw aykanh yip kosataj, yunhe jehayo sat istxꞌotxꞌ ebꞌnaj, yokkano txꞌotxꞌ ju, hakaꞌ lanhan yuni tinanh.
39 »Yuxin johtanheweloj, kanojabꞌkano yinh konabꞌal tato Komam Jahawil, Dios yul satkanh yebꞌpaxo sat txꞌo txꞌotxꞌ tiꞌ, machi xin hunuxa mak Dios hakaꞌ Komam. 40 Yuxin yijewej sunil chejbꞌanile chiwaqꞌkanojan teyet yinh huneꞌ tzꞌayik tiꞌ, hak tuꞌ xin kꞌulnhetikꞌa chiꞌekꞌ heyilaꞌ yebꞌ heyuninal chihul yinh tzujanilxa. Hak tuꞌ xin chexnahatli sat txꞌo txꞌotxꞌ chaqꞌ Komam Jahawil koDiosal teyet yinh hunelnhe,» xhi yaꞌ Moisés tet konhobꞌ Israel.
Hunteqꞌan konhobꞌ bꞌay chiꞌapni anma Israel iskoloꞌ isbꞌa
41 Issaynikanilo yaꞌ Moisés oxebꞌ konhobꞌ isqꞌaxebꞌikꞌti haꞌ Jordán yinh yetkꞌulal bꞌay chiꞌahilo tzꞌayik. 42 Yu yapni hunu mak chipotxꞌwahi, mach nabꞌilo yu chiyaqꞌnikamo hunu yet anmahil, maxhtotikꞌa xin chaqꞌ howal yebꞌ yet yalanhtokanoj; haꞌ bꞌey tuꞌ chiꞌelkanh, kat iskolni isbꞌa yul hunu konhobꞌ tuꞌ. 43 Haꞌ hunteqꞌan konhobꞌ tuꞌ, haꞌ ton konhobꞌ Beser ayayo yul yakꞌalil txꞌotxꞌ desierto, haꞌ tuꞌ chiskol isbꞌa ebꞌnaj titna yinh yaꞌ Rubén. Yebꞌ konhobꞌ Ramot ay bꞌey Galaad, haꞌ bꞌey tuꞌ chiskol isbꞌa ebꞌnaj titna yinh yaꞌ Gad, yebꞌ konhobꞌ Golán ay bꞌey txꞌotxꞌ Basán, haꞌ tuꞌ chiskol isbꞌa ebꞌnaj titna yinh yaꞌ Manasés.
Yet yaqꞌlaxkano lahonhebꞌ kuybꞌanile tet ebꞌnaj Israel
44 Haꞌ hunteqꞌan chejbꞌanile tiꞌ yaqꞌkano yaꞌ Moisés tet ebꞌnaj Israel. 45 Yet yel ebꞌnaj Israel tuꞌ yul konhobꞌ Egipto iskuyni yaꞌ Moisés ebꞌnaj yinh hunteqꞌan kuybꞌanile yebꞌ chejbꞌanile. 46 Yal yaꞌ huneꞌ tuꞌ bꞌey isqꞌaxebꞌikꞌto haꞌ Jordán, bꞌey akꞌal ayayo sat konhobꞌ Bet-peor, bꞌey txꞌotxꞌ akꞌal yettikꞌa naj Sehón, isreyal ebꞌnaj amorreo yet yalanhtokanoj. Naj Sehón tuꞌ, bꞌey Hesbón ay naj, aykꞌay naj yu yaꞌ Moisés yebꞌ yu ebꞌnaj Israel yet yel ebꞌnaj bꞌey txꞌotxꞌ Egipto. 47 Hak tuꞌ yu yehayo ebꞌnaj Israel sat txꞌo txꞌotxꞌ majbꞌililo yu naj Sehón, yebꞌpaxo txꞌotxꞌ majbꞌililo yu naj Og, naj ayko reyalil yinh txꞌotxꞌ Basán. Ebꞌnaj kawanh rey tiꞌ, isreyal ebꞌnaj amorreo ye ebꞌnaj, ebꞌnaj ayayo isqꞌaxebꞌikꞌto haꞌ Jordán yinh yetkꞌulal bꞌay chiꞌahilo tzꞌayik. 48 Txꞌotxꞌ tuꞌ, chitaichiko txꞌotxꞌ bꞌey Aroer, ayayo istiꞌla haꞌ Arnón masanta bꞌey witz Sión, huneꞌ chihal-laxpaxo Hermón. 49 Kat yekꞌpaxo txꞌotxꞌ sunil yul ismajul yet Arabá, isqꞌaxebꞌikꞌti haꞌ Jordán masanta bꞌey haꞌ Mar Kamom, bꞌey yich witz Pisga.