3 Yalni yaꞌ Moisés tet ebꞌnaj Israel:

«Watxꞌewe hebꞌa hex Israel hex tiꞌ, yuto chexto heyaqꞌaꞌko howal yinh konhobꞌ Madián yinh isbꞌi Komam Jahawil, yu chepajtze tzet kexyute ebꞌnaj. 4 Xol hunun majan hex Israel hex tiꞌ, mil ebꞌnaj soldado chito yinh howal tuꞌ,» xhi yaꞌ Moisés.

5 Issikꞌlaxilo mil ebꞌnaj soldado xol hunun majan ebꞌnaj Israel, yuxin 12 mil isbꞌisil ebꞌnaj chito yinh howal tuꞌ yinh sunil, yiqꞌni ebꞌnaj ischꞌen yet howal. 6 Ischejnito yaꞌ Moisés ebꞌnaj Israel tuꞌ yinh howal, istopaxo naj Finees, iskꞌahol yaꞌ sacerdote Eleazar, yinito naj chꞌen vaso kaw ay yelapno chiꞌokniko yul isTabernáculo Komam, yebꞌ chꞌen trompeta yu yoqꞌtzelax chꞌen yet chiꞌichiko howal tuꞌ. 7 Yaniko ebꞌnaj Israel howal yinh konhobꞌ Madián, ispotxꞌnikamo ebꞌnaj sunil ebꞌnaj Madianita tuꞌ, hakaꞌtikꞌa yu yalni Komam Jahawil tet yaꞌ Moisés. 8 Ispotxꞌnikamo ebꞌnaj naj Evi, naj Requem, naj Zur, naj Hur, yebꞌ naj Reba, haꞌ ebꞌnaj tuꞌ yahawil yeko yinh konhobꞌ Madián; ispotxꞌnipaxo ebꞌnaj naj Balaam, iskꞌahol naj Beor. 9 Yinito ebꞌnaj Israel tuꞌ ebꞌix ix ah Madián yebꞌ nixhte yunin ischejabꞌoj; yinipaxto ebꞌnaj isnoqꞌ ebꞌnaj yebꞌ sunil tzetaj ay ebꞌnaj. 10 Isnhusnito ebꞌnaj sunil iskonhobꞌ ebꞌnaj, yebꞌ yaldeahil yebꞌ ismantiado ebꞌnaj bꞌay aya. 11 Sunil tzet ye tuꞌ yiti ebꞌnaj Israel, yiti ebꞌnaj anma, yinipaxti ebꞌnaj isnoqꞌ ebꞌnaj. 12 Sunil ebꞌnaj Madián yebꞌ ebꞌix ix, yebꞌ isnoqꞌ ebꞌnaj, yebꞌ sunil tzetaj aya yito ebꞌnaj soldado tet yaꞌ Moisés yebꞌ tet yaꞌ sacerdote Eleazar, yebꞌ tet sunil anma Israel ayayo bꞌey yakꞌalil txꞌotxꞌ Moab, istiꞌ haꞌ Jordán, satakꞌti konhobꞌ Jericó. 13 Yelto yaꞌ Moisés, yebꞌ yaꞌ Eleazar, yebꞌ ebꞌnaj iswiꞌehal konhobꞌ Israel ischahno ebꞌnaj soldado yintalti ismantiado ebꞌnaj Israel. 14 Yajaꞌ xin tit ishowal yaꞌ Moisés yinh ebꞌnaj yahawil ayko sata hunun mil yebꞌ yinh ebꞌnaj ayko sata hunun cien ebꞌnaj soldado Israel ispeto yinh howal tuꞌ. 15 Yalni yaꞌ Moisés tet ebꞌnaj hakaꞌ tiꞌ:

«¿Tzet yinh xin itzitzto sunil ebꞌix ix tiꞌ heyu? 16 ¿Tom mach heyohtajoj tato haꞌ ebꞌix ix tiꞌ ischej naj Balaam monteli yinh ebꞌnaj Israel yaqꞌaꞌko ismul tet Komam Jahawil yet yinayo isbꞌa ebꞌnaj tet tioxh Baal-peor, yuxin tit ishowal Komam yaniti huneꞌ isyaꞌtajil koxol? 17 Yuxin haꞌ tinanh, potxꞌwekamo sunil nixhte winaj unin tiꞌ, yebꞌ ebꞌix ix xayiqꞌle hunu winaj. 18 Wal ebꞌix qꞌopo xol ebꞌix tiꞌ maxhto winaj xayiqꞌle, matzet cheyute ebꞌix, kanojabꞌkano ebꞌix. 19 Sunil hex maxepotxꞌkamo hunu anma, maka hetzabꞌ isnimanil hunu kamom, kananhwekano yintalto hemantiado tiꞌ hujebꞌ tzꞌayik. Hex tiꞌ yebꞌ sunil ebꞌix maxeyiti tiꞌ, yilal hesajnhen hebꞌa yinh yox tzꞌayik yebꞌ yinh ishuj tzꞌayik. 20 Kat xin hesajnhen sunil xil heqꞌap, yebꞌ sunil noꞌ tzꞌum watxꞌebꞌil hakaꞌ xilqꞌape, yebꞌ xil noꞌ chiw watxꞌebꞌilayo hakaꞌ xilqꞌape, yebꞌ sunil munlabꞌal watxꞌebꞌil yinh te teꞌ,» xhi yaꞌ Moisés.^a

21 Lahwi tuꞌ, yalni yaꞌ sacerdote Eleazar tet sunil ebꞌnaj soldado bꞌeykꞌo yinh howal tuꞌ hakaꞌ tiꞌ:

«Huneꞌ chiwaltiꞌan, chejbꞌanile yakano Komam Jahawil tet yaꞌ Moisés: 22 Wal chꞌen oro, chꞌen plata, chꞌen bronce, chꞌen hierro, chꞌen estaño yebꞌ chꞌen plomo, 23 sunil chꞌen tuꞌ mach chitzꞌato yu qꞌa qꞌaꞌ yilal chesajnhe chꞌen yu qꞌa qꞌaꞌ, chetxꞌahni chꞌen xol ha haꞌ chiꞌokniko issajnhe tzetaj ye tuꞌ; walpaxo tzet ye tuꞌ chitzꞌato yu qꞌa qꞌaꞌ, ha haꞌ chisajnhenkanoj. 24 Wal hexpaxo xin, yinh ishuj tzꞌayik chetxꞌahni xil heqꞌap, katto hesajbꞌikanoj, lahwi tuꞌ kat heyokto yul hemantiado,» xhi yaꞌ sacerdote Eleazar.

25 Lahwi tuꞌ, istzotel Komam Jahawil tet yaꞌ Moisés: 26 «Ikanh isbꞌisil anma Madián ilaxti yu ebꞌnaj soldado, kat xin habꞌisnipaxo sunil no noqꞌ yiti ebꞌnaj, kat habꞌisnipaxo sunil tzet ye tuꞌ yiti ebꞌnaj. Kolwahojabꞌ yaꞌ sacerdote Eleazar yebꞌ ebꞌnaj iswiꞌehal konhobꞌ isbꞌisni tawintaj. 27 Kabꞌ majan cheyuteyoj, lahan chiyu isbꞌisil hunun majan. Huneꞌ majan chepohkanh yinh ebꞌnaj Israel bꞌeykꞌo yinh howal tuꞌ, haxa hunxa majan xin chepohkanh yinh konhobꞌ Israel. 28 Haꞌ yinh huneꞌ majan chiyiqꞌ ebꞌnaj soldado tuꞌ, hunun wetan cheyilo yinh hunun 500 anma; hakpax tuꞌ yinh hunun 500 noꞌ wakax, noꞌ burro yebꞌ noꞌ meꞌ, hunun wetan cheyikaniloj. 29 Cheyaqꞌni tet yaꞌ sacerdote Eleazar yebꞌalqꞌabꞌe wetan. 30 Haxa yinh hunxa majan yet konhobꞌ Israel tuꞌ, hunun wetan cheyilo yinh hunun 50 (lahonh yoxkꞌal) anma Madián; hakpax tuꞌ yinh hunun 50 (lahonh yoxkꞌal) noꞌ wakax, noꞌ burro yebꞌ noꞌ meꞌ, hunun wetan cheyikaniloj; kat heyaniko tet ebꞌnaj levita, ebꞌnaj chimunla yul inTabernáculohan,» xhi Komam Jahawil tet yaꞌ Moisés.

31 Isyijen yaꞌ Moisés yebꞌ yaꞌ sacerdote Eleazar sunil tzet yal Komam Jahawil tet yaꞌ Moisés. 32 Haꞌ xin isbꞌisil sunil tzet yilo ebꞌnaj tet ebꞌnaj ah Madián tuꞌ, ay 675 mil isbꞌisil noꞌ meꞌ, nan xin yepaxo sunil tzetaj yito hunun ebꞌnaj soldado. 33 Haxa noꞌ wakax 72 mil isbꞌisil noꞌ. 34 Haxa noꞌ burro 61 mil isbꞌisil noꞌ. 35 Haxapaxo isbꞌisil ebꞌix qꞌopo, ebꞌix maxhto winaj chiqꞌle ay 32 mil. 36 Yuxin hayet ispohlaxayoj, 337,500 noꞌ meꞌ aqꞌlax tet ebꞌnaj Israel bꞌeykꞌo yinh howal tuꞌ. 37 Haꞌ yinh noꞌ meꞌ aqꞌlax tet ebꞌnaj bꞌeykꞌo yinh howal tuꞌ, ispohilo ebꞌnaj 675 noꞌ, yaqꞌni ebꞌnaj noꞌ isyebꞌalqꞌabꞌehal tet Komam Jahawil. 38 Haxa 36 mil noꞌ wakax aqꞌlax tet ebꞌnaj bꞌeykꞌo yinh howal, ispohilo ebꞌnaj 72 noꞌ, yaqꞌni ebꞌnaj noꞌ yebꞌalqꞌabꞌehal tet Komam Jahawil. 39 Haxa 30,500 noꞌ burro aqꞌlax tet ebꞌnaj, ispohilo ebꞌnaj 61 noꞌ, yaqꞌni ebꞌnaj noꞌ yebꞌalqꞌabꞌehal tet Komam. 40 Haxa yinh anma Madián iqꞌlax yinh howal, aqꞌlax 16 mil anma tet ebꞌnaj, ispohilo ebꞌnaj 32 anma tuꞌ yebꞌalqꞌabꞌehal tet Komam. 41 Yaniko yaꞌ Moisés sunil tuꞌ tet yaꞌ sacerdote Eleazar hakaꞌ yu yalnikano Komam Jahawil.

42 Hakaꞌtikꞌa isbꞌisil aqꞌlax tet ebꞌnaj Israel bꞌeykꞌo yinh howal, haktikꞌapax tuꞌ isbꞌisil yaqꞌ yaꞌ Moisés tet konhobꞌ Israel. 43 Haꞌ isbꞌisil noꞌ meꞌ aqꞌlax tet konhobꞌ tuꞌ, 337,500 noꞌ. 44 Haxa noꞌ wakax, 36 mil noꞌ. 45 Haxa noꞌ burro, 30,500 isbꞌisil noꞌ. 46 Haxapaxo isbꞌisil anma, ay 16 mil isbꞌisil. 47 Yinh sunil tzet aqꞌlax tet konhobꞌ Israel tuꞌ, yilo yaꞌ Moisés hunun yinh hunun 50 anma, yebꞌ xin hunun yinh hunun 50 no noqꞌ, yaqꞌni yaꞌ tet ebꞌnaj levita, ebꞌnaj chimunla yul isTabernáculo Komam Jahawil, hakaꞌtikꞌa yu yalnikano Komam tet yaꞌ Moisés.

48 Lahwi tuꞌ, isto ebꞌnaj iswiꞌehal yinh hunun mil, ebꞌnaj bꞌeykꞌo yinh howal, yebꞌ ebꞌnaj iswiꞌehal yeko yinh hunun 100 (hokꞌal), apni ebꞌnaj tuꞌ iskꞌatanh yaꞌ Moisés, 49 yalni ebꞌnaj tet yaꞌ: «Hanhonh konhhachejabꞌ honhtiꞌanh kobꞌisanh ebꞌnaj bꞌeykꞌo yinh howal ayko yalanh jipanh, kaw xin tzꞌajan ebꞌnaj, machi hunu ebꞌnaj tiꞌ kami. 50 Jitijanh sunil chꞌen oro ilcha juhanh yul konhobꞌ Madián yebꞌ chꞌen brazaletes, chꞌen pulsera, chꞌen jolqꞌabꞌe, chꞌen ome, yebꞌ hunteqꞌan chꞌen chꞌen chiꞌok yelawilo ebꞌix ix. Haꞌ sunil hunteqꞌan tiꞌ, chijaqꞌan yebꞌalqꞌabꞌehal tet Komam Jahawil, yuto haꞌ Komam kolwa jinhanh, yu tzꞌajan yu komeltzohanh,» xhi ebꞌnaj.

51 Ischahnilo yaꞌ Moisés yebꞌ yaꞌ sacerdote Eleazar sunil chꞌen oro yebꞌ hunteqꞌanxa yelawil tuꞌ tet ebꞌnaj. 52 Haꞌ xin yalil chꞌen oro yaqꞌ ebꞌnaj iswiꞌehal tuꞌ yebꞌalqꞌabꞌehal, ekꞌbꞌal 184 kilo yalil chꞌen yinh sunil. 53 Yuto hunun ebꞌnaj bꞌeykꞌo yinh howal initi tzet ilcha yu yet isqꞌoji ebꞌnaj yinh ebꞌnaj Madián. 54 Hayet lahwi ischahnilo yaꞌ Moisés yebꞌ yaꞌ sacerdote Eleazar chꞌen oro tet ebꞌnaj yahawil ebꞌnaj bꞌeykꞌo yinh howal, yinito ebꞌnaj chꞌen yul isTabernáculo Komam Jahawil bꞌay chiskutxbꞌa isbꞌa ebꞌnaj Israel iskꞌatanh Komam, yunhe isnahniti Komam anma Israel.