Chejbꞌanile yinh tzet chikotaqꞌweko jinh tet Komam
30
Lahwi tuꞌ, yalni yaꞌ Moisés tet ebꞌnaj iswiꞌehal xol anma Israel hakaꞌ tiꞌ: 2 «Haꞌ Komam Dios halnhekanoj, tato ay hunu mak chalte iswatxꞌen iskꞌulal sata Komam, maka chistaqꞌweko hunu tzet ye tuꞌ yibꞌanh yu isyijeni, kat yaqꞌni ekꞌoyaꞌ yanma yu, haꞌ huneꞌ mak tuꞌ, yilal isyijen tzet xayala maka tzet istaqꞌweko yibꞌanh.3 »Tato ay hunu ix qꞌopo ay iskꞌatanh ismam chalte iswatxꞌen iskꞌulal sata Komam Dios, maka chistaqꞌweko hunu tzet ye tuꞌ yinh yu isyijeni. 4 Tato hayet chiyohtanhelo ismam ix, ta ay tzet chiyalte ix tet Komam, maka ay tzet chistaqꞌwe ix yibꞌanh yu isyijeni; matzet xin chiyal naj mame tuꞌ yinh ix, chiyu isyijen ix tzet chiyalte tuꞌ maka tzet istaqꞌweko ix yibꞌanh tuꞌ. 5 Yajaꞌ tato mach chisje ismam ix, wal tuꞌ matxa yilalo chisyije ix tzet yalte tuꞌ, maka tzet istaqꞌweko yibꞌanh; chiyaqꞌ nimankꞌulal Komam yinh ix yinh hakaꞌ tuꞌ, yuto mach chisje ismam ix.
6 »Taka xin ay hunu ix ix chalte iswatxꞌen iskꞌulal sata Komam Dios, maka chistaqꞌweko hunu tzet ye tuꞌ yibꞌanh yinh anhe, lahwi tuꞌ kat yiqꞌni ix yichamil; 7 ta xin matzet chiyal naj yichamil ix yet chiyabꞌen naj, yinh hakaꞌ tuꞌ chu isyijen ix tzet yalte maka tzet istaqꞌweko ix yibꞌanh. 8 Yajaꞌ tato mach chisje naj yichamil ix tuꞌ, matxa yilalo chisyije ix tzet xayalte tuꞌ, maka tzet istaqꞌweko ix yibꞌanh yinh anhe; ay nimankꞌulal yinh ix yu Komam, yuto mach chisje yichamil ix.
9 »Ta ay hunu ix hunix maka hunu ix bꞌejbꞌilkano yu yichamil, chalte iswatxꞌen iskꞌulal sata Komam Dios, maka chistaqꞌweko hunu tzet ye tuꞌ yibꞌanh yu isyijeni; ebꞌix tuꞌ, yilal isyijen ebꞌix tzet yalte, maka tzet istaqꞌweko yibꞌanh.
10 »Tato ay hunu ix ixale chiyalte iswatxꞌen iskꞌulal sata Komam Dios, maka chistaqꞌweko ix hunu tzet ye tuꞌ yibꞌanh yu isyijeni; 11 tato matzet xin chiyal yichamil ix yet chiyohtanhenilo naj, yilal isyijen ix tzet yalte maka tzet istaqꞌweko yibꞌanh tuꞌ. 12 Yajaꞌ tato mach chisje naj, matxa yilalo chisyije ix tzet yalte tuꞌ maka tzet istaqꞌweko yibꞌanh, ay nimankꞌulal yinh ix yu Komam, yuto mach chisje yichamil ix.
13 »Haꞌ naj ichamile chisje yalni tato chisyije ebꞌix ixale tzet chiyalte tet Komam, maka tzet chistaqꞌweko ebꞌix yibꞌanh maka machoj; waxanhka chiyaqꞌ ekꞌoyaꞌ yanma isyijeni. 14 Tato ayxa hunkabꞌo tzꞌayik yabꞌen naj tato ay tzet haltebꞌil yu ix maka ta ay tzet istaqꞌweko ix yibꞌanh, matzet xin chiyal naj, yinh hakaꞌ tuꞌ, yilal isyijen ix tzet yalte tuꞌ, maka tzet istaqꞌweko ix yibꞌanh. 15 Yajaꞌ tato txꞌiꞌalxa tzꞌayik yabꞌen naj, katto yalni naj tato mach ischah iswiꞌ naj tato chisyije ix tzet yalte tuꞌ, maka tzet istaqꞌweko yibꞌanh, yinh hakaꞌ tuꞌ, yibꞌanh naj chitokano ismul ix yet matxa chisyije ix tzet yalte tuꞌ, maka tzet istaqꞌweko yibꞌanh,» xhi yaꞌ Moisés.
16 Haꞌ hunteqꞌan chejbꞌanile tiꞌ yalkano Komam Dios te yaꞌ Moisés yinh tzet chiyu yalni ebꞌnaj ichamile yinh yixal, yebꞌ tzet chiyu yalni ebꞌnaj mame yinh iskutzꞌin, yet aytoko ebꞌix iskꞌatanh ismam.