Yebꞌalqꞌabꞌe chꞌaqꞌlax yet chꞌoqꞌtzelax chꞌen trompeta
29
»Haꞌ yinh bꞌabꞌel tzꞌayik yinh ishuj ixahaw chekutxbꞌaweko hebꞌa tet Komam. Machi hunu mak tiꞌ chimunlahi; cheyoqꞌtze chꞌen trompeta yinh huneꞌ tzꞌayik tuꞌ. 2 Kat xin heyaqꞌni hunu noꞌ tzehla wakax chinhuslax xahanbꞌalil tet Komam Jahawil, yebꞌ hunu noꞌ winaj meꞌ yebꞌ hujkꞌonh noꞌ yunin meꞌ huneꞌ habꞌil, noꞌ machi istzakaꞌil. Hayet cheyalten noꞌ xahanbꞌalil tuꞌ, kaw xuqꞌ sam huneꞌ yebꞌalqꞌabꞌe tuꞌ chiyabꞌe Komam. 3 Kat xin heyaqꞌnipaxo kabꞌlahonhebꞌ libra ixim harina sombꞌiliko aceite xol, yinta noꞌ tzehla wakax tuꞌ, yok waxajebꞌ libra ixim yinta noꞌ winaj meꞌ. 4 Yok kanhebꞌ libra ixim yebꞌalqꞌabꞌe yinta hunun noꞌ yunin meꞌ. 5 Kat xin heyaltepaxo hunu noꞌ winaj chiw yu yaqꞌlax noꞌ xahanbꞌalil yu istohlan hemul. 6 Kat yaqꞌlaxpaxo xahanbꞌal chꞌaqꞌlax hunun ixahaw yebꞌpaxo xahanbꞌal chꞌaqꞌlax hunun tzꞌayik, yebꞌ ixim harina yebꞌ vino yebꞌalqꞌabꞌe yintaj, hakaꞌ yu walnikanojan. Hunteqꞌan xahanbꞌal tuꞌ, kaw xuqꞌ sam chiyabꞌe Komam yet chinhuslaxi.Yebꞌalqꞌabꞌe yinh istzꞌayikal nimankꞌulal
7 »Yinh 10 (islahonhebꞌ) tzꞌayik yinh ishuj ixahaw, chekutxbꞌaweko hebꞌa yu heyinayo hebꞌa tet Komam; machi xin hunu mak chimunla yinh huneꞌ tzꞌayik tuꞌ. 8 Kat heyaqꞌni hunu noꞌ tzehla wakax yinh xahanbꞌalil tet Komam Jahawil, yebꞌ hunu noꞌ meꞌ winaj, yok hujkꞌonho noꞌ yunin meꞌ huneꞌ habꞌil, noꞌ machi istzakaꞌil. 9 Kat xin heyaqꞌni kabꞌlahonhebꞌ libra ixim harina sombꞌiliko aceite xol, yebꞌalqꞌabꞌehal yinta noꞌ tzehla wakax tuꞌ, yebꞌ waxajebꞌ libra ixim yinta noꞌ meꞌ. 10 Yebꞌ kanhebꞌ libra ixim harina yinta hunun noꞌ yunin meꞌ. 11 Kat heyaltenpaxo hunu noꞌ winaj chiw yinh xahanbꞌalil yu istohlan mule. Nan xin yepaxo noꞌ cheyalte yu hemul yinh istzꞌayikal bꞌay chiyaqꞌ Komam nimankꞌulal teyinh; nan xin yepaxo noꞌ cheyaqꞌ xahanbꞌal hunun tzꞌayik, yebꞌ ixim harina yebꞌ vino cheyaqꞌ yebꞌalqꞌabꞌe yinta noꞌ,» xhi yaꞌ Moisés.
Yebꞌalqꞌabꞌe chꞌaqꞌlax yinh qꞌinh Lexhpat
12 Yalnipaxo Komam Dios tet yaꞌ Moisés: «Yinh 15 (isholanhebꞌ) tzꞌayik yinh ishuj ixahaw, chekutxbꞌaweko hebꞌa yu heyinayo hebꞌa wetan. Yinh huneꞌ tzꞌayik tuꞌ, machi hunu mak chimunlahi; hujebꞌ tzꞌayik xin cheyekꞌtze qꞌinh wetan, yu heyaniko inmayan. 13 Yinh bꞌabꞌel tzꞌayik cheyalte 13 (oxlahonhkꞌonh) noꞌ tzehla wakax xahanbꞌalil wetan, yok kakꞌonh noꞌ winaj meꞌ, yok 14 (kanhlahonhkꞌonh) noꞌ yunin meꞌ huneꞌ habꞌil, noꞌ machi istzakaꞌil. Hayet chinhuslax noꞌ xahanbꞌalil wetan xuqꞌ sam huneꞌ yebꞌalqꞌabꞌe tuꞌ chiwabꞌehan. 14 Kat heyaqꞌnipaxo ixim harina sombꞌil aceite xol yinta hunun noꞌ. Hak tiꞌ ismalil ixim cheyaqꞌa; cheyaqꞌ kabꞌlahonhebꞌ libra ixim yinta hunun noꞌ tzehla wakax, yok waxajebꞌ libra ixim yinta hunun noꞌ winaj meꞌ. 15 Yok kanhebꞌ libra ixim yinta hunun noꞌ yunin meꞌ tuꞌ. 16 Kat heyaltenpaxo hunu noꞌ chiw xahanbꞌalil yu istohlan mule. Nan xin yepaxo xahanbꞌal chinhuslax hunun tzꞌayik yebꞌ ixim trigo, yebꞌ vino chꞌaqꞌlax yebꞌalqꞌabꞌehal yintaj.
17 »Haxa yinh iskabꞌ tzꞌayik chihaltelax 12 (kabꞌlahonhkꞌonh) noꞌ tzehla wakax yinh xahanbꞌalil yok kakꞌonh noꞌ winaj meꞌ, yok 14 (kanhlahonhkꞌonh) noꞌ yunin meꞌ huneꞌ habꞌil, machi xin nino istzakaꞌil. 18 Kat xin heyaqꞌnipaxo ixim harina yebꞌ vino yebꞌalqꞌabꞌehal yinta noꞌ, hakaꞌtikꞌa isbꞌisil noꞌ wakax, noꞌ meꞌ, yebꞌ noꞌ yunin meꞌ tuꞌ, hakaꞌtikꞌa yu walnikanojan. 19 Kat xin yaltelaxpaxo hunu noꞌ chiw yinh xahanbꞌalil yu istohlan mule. Nan xin yepaxo xahanbꞌal chinhuslax hunun tzꞌayik, yebꞌ ixim harina yebꞌ vino chꞌaqꞌlax yebꞌalqꞌabꞌe yintaj.
20 »Haxa yinh isyox tzꞌayik cheyaqꞌ 11 (hunlanhkꞌonh) noꞌ tzehla wakax xahanbꞌalil, yok kakꞌonh noꞌ winaj meꞌ, yok 14 (kanhlahonhkꞌonh) noꞌ yunin meꞌ huneꞌ habꞌil, machi xin nino istzakaꞌil. 21 Kat heyaqꞌnipaxo ixim harina yebꞌ vino yebꞌalqꞌabꞌehal yinta hunun noꞌ, hakaꞌtikꞌa isbꞌisil noꞌ tzehla wakax, noꞌ winaj meꞌ, yebꞌ noꞌ yunin meꞌ, hak tuꞌ chu yaqꞌlaxi, hakaꞌtikꞌa yu walnikanojan. 22 Kat xin heyaltenpaxo hunu noꞌ chiw xahanbꞌalil yu istohlan mule; nan xin yepaxo xahanbꞌal chinhuslax hunun tzꞌayik yebꞌ ixim harina, yebꞌ vino chꞌaqꞌlax yebꞌalqꞌabꞌehal yintaj.
23 »Haxa yinh iskanh tzꞌayik cheyaqꞌ 10 (lahonhkꞌonh) noꞌ tzehla wakax xahanbꞌalil yok kakꞌonh noꞌ winaj meꞌ, yok 14 (kanhlahonhkꞌonh) noꞌ yunin meꞌ huneꞌ habꞌil, noꞌ machi nino istzakaꞌil. 24 Kat xin heyaqꞌnipaxo ixim harina yebꞌ vino yebꞌalqꞌabꞌehal yinta hunun noꞌ, hakaꞌtikꞌa isbꞌisil noꞌ tzehla wakax yebꞌ noꞌ winaj meꞌ yebꞌ noꞌ yunin meꞌ, hak tuꞌ cheyaqꞌa, hakaꞌ yu walnikanojan. 25 Kat xin heyaltenpaxo hunu noꞌ chiw xahanbꞌalil yu istohlan mule. Nantikꞌa xin yepaxo xahanbꞌal chinhuslax hunun tzꞌayik yebꞌ ixim harina yebꞌ vino chꞌaqꞌlax yebꞌalqꞌabꞌehal yintaj.
26 »Haxa yinh ishoꞌ tzꞌayik, cheyaqꞌ bꞌalonhkꞌonh noꞌ tzehla wakax xahanbꞌalil, yok kakꞌonh noꞌ winaj meꞌ yok 14 (kanhlahonhkꞌonh) noꞌ yunin meꞌ huneꞌ habꞌil, noꞌ machi nino istzakaꞌil. 27 Kat xin heyaqꞌni ixim harina yebꞌ vino yebꞌalqꞌabꞌehal yinta hunun noꞌ, hakaꞌtikꞌa isbꞌisil noꞌ tzehla wakax yebꞌ noꞌ winaj meꞌ yebꞌ noꞌ yunin meꞌ, hak tuꞌ chiꞌaqꞌlaxi hakaꞌ walnikanojan. 28 Kat xin heyaqꞌnipaxo hunu noꞌ chiw xahanbꞌalil chitohlan mule; nantikꞌa xin yepaxo xahanbꞌal chinhuslax hunun tzꞌayik yebꞌ ixim harina yebꞌ vino chꞌaqꞌlax yebꞌalqꞌabꞌe yintaj.
29 »Haxa yinh iswaj tzꞌayik, cheyaqꞌ waxajkꞌonh noꞌ tzehla wakax yinh xahanbꞌalil, yok kakꞌonh noꞌ winaj meꞌ, yok 14 (kanhlahonhkꞌonh) noꞌ yunin meꞌ huneꞌ habꞌil, noꞌ machi nino istzakaꞌil. 30 Kat xin heyaqꞌnipaxo ixim harina yebꞌ vino yebꞌalqꞌabꞌehal yinta hunun noꞌ, hakaꞌtikꞌa isbꞌisil noꞌ tzehla wakax, yebꞌ noꞌ winaj meꞌ, yebꞌ noꞌ yunin meꞌ, hak tuꞌ chiꞌaqꞌlaxi, hakaꞌtikꞌa yu walnikanojan. 31 Kat xin heyaqꞌni hunu noꞌ chiw xahanbꞌalil yu istohlan mule. Nantikꞌa xin yepaxo xahanbꞌal chinhuslax hunun tzꞌayik, yebꞌ ixim harina yebꞌ vino chꞌaqꞌlax yebꞌalqꞌabꞌehal yintaj.
32 »Haxa yinh ishuj tzꞌayik cheyaqꞌ hujkꞌonh noꞌ tzehla wakax yinh xahanbꞌalil yok kakꞌonh noꞌ winaj meꞌ yok kanhlanhkꞌonh noꞌ yunin meꞌ huneꞌ habꞌil, machi nino istzakaꞌil. 33 Kat xin heyaqꞌnipaxo ixim harina yebꞌ vino yebꞌalqꞌabꞌehal yinta hunun noꞌ, hakaꞌtikꞌa isbꞌisil noꞌ tzehla wakax, noꞌ winaj meꞌ yebꞌ noꞌ yunin meꞌ, hak tuꞌ cheyaqꞌa, hakaꞌ yu walnikanojan. 34 Kat xin heyaqꞌnipaxo hunu noꞌ chiw xahanbꞌalil chitohlan mule. Nantikꞌa xin, yepaxo xahanbꞌal chinhuslax hunun tzꞌayik yebꞌ ixim harina yebꞌ vino chꞌaqꞌlax yebꞌalqꞌabꞌehal yintaj.
35 »Haxa yinh ishuj tzꞌayik, chekutxbꞌaweko hebꞌa hesunil yu heyinayo hebꞌa wetan. Machi xin hunu mak chimunla yinh huneꞌ tzꞌayik tuꞌ. 36 Kat xin heyalten hunu noꞌ tzehla wakax xahanbꞌalil wetan yok hunu noꞌ winaj meꞌ yok hujkꞌonh noꞌ yunin meꞌ huneꞌ habꞌil, noꞌ machi istzakaꞌil. 37 Kat xin heyaqꞌnipaxo ixim harina yebꞌ vino yebꞌalqꞌabꞌehal yinta noꞌ, hakaꞌtikꞌa isbꞌisil noꞌ tzehla wakax yebꞌ noꞌ winaj meꞌ yebꞌ noꞌ yunin meꞌ, hak tuꞌ cheyaqꞌa, hakaꞌ yu walnikanojan. 38 Kat xin heyaqꞌnipaxo hunu noꞌ chiw xahanbꞌalil yu istohlan mule. Nantikꞌa xin yepaxo xahanbꞌal chinhuslax hunun tzꞌayik yebꞌ ixim harina yebꞌ vino chꞌaqꞌlax yebꞌalqꞌabꞌe yintaj.
39 »Haꞌ tuꞌ, xahanbꞌal cheyaqꞌ wetan yinh istzꞌayikal bꞌay walkanojan, kat xin heyaqꞌnipaxo yebꞌalqꞌabꞌe halbꞌil heyu ta cheyaqꞌ wetan, maka tonhe chitit yinh hekꞌul cheyaqꞌni. Chisje heyaqꞌni xahanbꞌal chinhuslaxi, maka yebꞌalqꞌabꞌe yinh ixim harina yebꞌ vino, maka xahanbꞌal yet aqꞌankꞌulal,» xhi Komam.
40 Yalni yaꞌ Moisés tet anma Israel yinh sunil tzet yal Komam tet yaꞌ.