3 »Hal tet ebꞌnaj Israel: Mach chenahulnheto henhusni noꞌ xahanbꞌal hunun tzꞌayik yu heyaniko ismay Komam Jahawil: Machi ekꞌto yet heyalten kakꞌonh noꞌ yunin meꞌ, noꞌ huneꞌ habꞌil, noꞌ machi istzakaꞌil. 4 Huneꞌ noꞌ cheyalte xahanbꞌalil yet sakꞌayal, huneꞌxa noꞌ xin yinh qꞌejbꞌiyal. 5 Haxapaxo yinh tzet yebꞌalqꞌabꞌe yinh ixim harina cheyaqꞌ kanhebꞌ libra ixim, ixim kaw kꞌul, sombꞌiliko huneꞌ litro aceite chiꞌel yinh teꞌ olivo chakꞌbꞌil. 6 Hunteqꞌan yebꞌalqꞌabꞌ tiꞌ, haꞌ nhuslax hunun tzꞌayik tet Komam bꞌey witz Sinaí, yebꞌalqꞌabꞌe kaw xuqꞌ sam yul sat Komam. 7 Kat heyaqꞌnipaxo huneꞌ litro vino yebꞌalqꞌabꞌehal yinta hunun noꞌ meꞌ chinhuslax xahanbꞌalil tuꞌ; haꞌ vino, chijobꞌlaxayo yul Yatut Komam yunhe yalaxiko ismay Komam. 8 Haꞌ noꞌ iskabꞌ yunin meꞌ tuꞌ chihaltelax noꞌ xahanbꞌalil yinh qꞌejbꞌiyalil, kat heyaqꞌnipaxo ixim trigo yebꞌ vino yinta noꞌ, hakaꞌ yet sakꞌayalil. Hayet chinhuslax xahanbꞌal tuꞌ, kaw xuqꞌ chiꞌapni sam sata Komam Jahawil.

9 »Haxa yinh istzꞌayikal xewilal, cheyaqꞌ kakꞌonh noꞌ yunin meꞌ huneꞌ habꞌil xahanbꞌaloj, machi xin istzakaꞌil; yebꞌ waxajebꞌ libra ixim harina, ixim kaw kꞌul, sombꞌiliko aceite xol yebꞌalqꞌabꞌe yinh tzet chilolaxi, kat heyaqꞌnipaxo vino yintaj. 10 Haꞌ hunteqꞌan yebꞌalqꞌabꞌe tuꞌ, chinhuslax yinh tzꞌayikal xewilal kat yaqꞌlaxpaxo vino yintaj, nanyepaxo xahanbꞌal chinhuslax yinh hunun tzꞌayik.

11 »Haꞌ yinh bꞌabꞌel tzꞌayik yinh hunun ixahaw, cheyaqꞌ kakꞌonho noꞌ tzehla wakax xahanbꞌalil tet Komam, yebꞌ huneꞌ noꞌ winaj meꞌ, yebꞌ hujkꞌonh noꞌ yunin meꞌ huneꞌ habꞌil, machi xin istzakaꞌil. 12 Kat heyaqꞌnipaxo kabꞌlahonhebꞌ libra ixim harina, ixim kaw kꞌul, sombꞌiliko aceite xol yebꞌalqꞌabꞌe yinta hunun noꞌ winaj meꞌ chinhuslax xahanbꞌalil tuꞌ; 13 kat heyaqꞌnipaxo kabꞌ libra ixim harina yinta hunun noꞌ yunin meꞌ tuꞌ. Hunteqꞌan yebꞌalqꞌabꞌe chinhuslax tuꞌ, kaw xuqꞌ sam yul insatan, hanin Yahawilintiꞌan. 14 Haxa yebꞌalqꞌabꞌe yinh vino, cheyaqꞌ kabꞌkabꞌ litro vino tuꞌ yinta hunun noꞌ tzehla wakax tuꞌ, yok kabꞌ litro vino tuꞌ yinta hunun noꞌ winaj meꞌ, yok huneꞌ litro yinta hunun noꞌ yunin meꞌ. Haꞌ tiꞌ xahanbꞌal chinhuslax cheyaqꞌ tet Komam yinh hunun ixahaw yul hunun habꞌil. 15 Yinta hexahanbꞌal chinhuslax hunun ixahaw tuꞌ, cheyaqꞌpaxo hunu noꞌ winaj chiw xahanbꞌalil yinh mule, kat heyaqꞌnipaxo vino yebꞌalqꞌabꞌe yintaj.

16 »Haꞌ yinh tzꞌayik 14 (kanhlahonhebꞌ) yinh bꞌabꞌel ixahaw yul tiempo, cheyekꞌtze qꞌinh Pascua tet Komam Jahawil yu heyaniko ismay Komam. 17 Haxa yinh 15 (isholanhebꞌ) tzꞌayik, qꞌinh kaw ay yelapnoj; yinh huneꞌ tzꞌayik tuꞌ, chiꞌichiko hewani ixim pan machi yanhal aykoj. Yulbꞌal hujebꞌ tzꞌayik chewah ixim tuꞌ. 18 Haꞌ yinh bꞌabꞌel tzꞌayik yulbꞌal hujebꞌ tzꞌayik tuꞌ, chekutxbꞌaweko hebꞌa yu heyinayo hebꞌa tet Komam; yinh huneꞌ tzꞌayik tuꞌ, machi hunu munil chewatxꞌe. 19 Kat heyaqꞌni kakꞌonh noꞌ tzehla wakax chinhuslax xahanbꞌalil tet Komam, yok huneꞌ noꞌ winaj meꞌ, yok hujkꞌonh noꞌ yunin meꞌ huneꞌ habꞌil iskawil, machi istzakaꞌil. 20 Kat xin heyaqꞌnipaxo ixim harina sombꞌiliko aceite xol yebꞌalqꞌabꞌe yinta noꞌ xahanbꞌal tuꞌ. Hak tiꞌ ismalil ixim cheyaqꞌa; kabꞌlahonhebꞌ libra ixim harina tuꞌ cheyaqꞌ yebꞌalqꞌabꞌe yinta hunun noꞌ tzehla wakax tuꞌ, yok waxajebꞌ libra ixim cheyaqꞌa yinta hunun noꞌ meꞌ. 21 Yok kanhebꞌ libra ixim cheyaqꞌ yinta hunun noꞌ yunin meꞌ tuꞌ. 22 Kat heyaqꞌni hunu noꞌ chiw yinh xahanbꞌalil yu yaqꞌlax nimankꞌulal yinh hemul. 23 Sunil hunteqꞌan tuꞌ cheyaqꞌ heyebꞌalqꞌabꞌoj, nan xin yepaxo xahanbꞌal chꞌaqꞌlax yinh hunun sakꞌayalil. 24 Hak tuꞌ chu heyaqꞌni yebꞌalqꞌabꞌe tuꞌ tet Komam Jahawil hunun tzꞌayik yulbꞌal hujebꞌ tzꞌayik yinh qꞌinh Pascua tuꞌ. Hunteqꞌan yebꞌalqꞌabꞌe chinhuslax tuꞌ, kaw xuqꞌ sam. Sunil hunteqꞌan noꞌ xahanbꞌal tuꞌ, cheyaqꞌpaxo vino yebꞌalqꞌabꞌe yintaj, nan xin yepaxo noꞌ chinhuslax yinh hunun tzꞌayik, kat yaqꞌlaxpaxo vino yebꞌalqꞌabꞌe yintaj. 25 Haxa yinh ishuj tzꞌayik chekutxbꞌapaxiko hebꞌa hunelxa yu heyinayo hebꞌa tet Komam; yinh huneꞌ tzꞌayik tuꞌ, machi hunu mak tiꞌ chimunlahi.

26 »Haxa yet xalahwi hujebꞌ semana yekꞌ qꞌinh Pascua, yet cheyaqꞌni bꞌabꞌel sat hetzꞌunubꞌ yebꞌalqꞌabꞌehal tet Komam Jahawil, yinh huneꞌ tzꞌayik tuꞌ chekutxbꞌawe hebꞌa yu heyinayo hebꞌa tet Komam, machi xin hunu mak chimunla yinh huneꞌ tzꞌayik tuꞌ. 27 Kat heyalten kakꞌonh noꞌ tzehla wakax xahanbꞌalil, yok huneꞌ noꞌ winaj meꞌ, yok hujkꞌonh noꞌ yunin meꞌ huneꞌ habꞌil iskawil; hunteqꞌan yebꞌalqꞌabꞌe tuꞌ, kaw xuqꞌ sam chiyabꞌe Komam. 28 Kat heyaqꞌnipaxo ixim harina sombꞌiliko aceite xol yebꞌalqꞌabꞌe, 12 (kabꞌlanhebꞌ) libra harina yinta hunun noꞌ tzehla wakax tuꞌ, yok waxajebꞌ libra ixim yinta noꞌ winaj meꞌ; 29 yok kanhebꞌ libra ixim yinta hunun noꞌ yunin meꞌ tuꞌ. 30 Kat heyaltenpaxo huneꞌ noꞌ winaj chiw xahanbꞌalil yu yaqꞌni tanho mule. 31 Cheyalte no noqꞌ tiꞌ xahanbꞌalil, yebꞌ ixim harina yebꞌ vino yebꞌalqꞌabꞌe yinta noꞌ. Nan xin yepaxo hexahanbꞌal cheyaqꞌ hunun tzꞌayik tet Komam. Haꞌ no noqꞌ cheyaqꞌ xahanbꞌalil tuꞌ, haꞌ ton noꞌ machi hunu istzakaꞌil.