Ebꞌix iskutzꞌin naj Zelofehad
27
Xol ebꞌnaj iskꞌahol yaꞌ Manasés ay huneꞌ naj chiyij Zelofehad, naj tiꞌ, ay howanh iskutzꞌin naj, haꞌ ton ix Maala, ix Noa, ix Hogla, ix Milca, yebꞌ ix Tirsa. Hak tiꞌ xin isbꞌi istxolal yichmam naj Zelofehad hakaꞌ tiꞌ: naj Hefer, naj Galaad, naj Maquir, yaꞌ Manasés, yaꞌ José. 2 Ebꞌix howanh isnohnhe isbꞌa tiꞌ, to ebꞌix yamaqꞌil istiꞌ isTabernáculo Komam iskꞌatanh yaꞌ Moisés yebꞌ yaꞌ sacerdote Eleazar yebꞌ ebꞌnaj iswiꞌehal konhobꞌ Israel yu istzotel ebꞌix tet ebꞌyaꞌ, yalni ebꞌix hakaꞌ tiꞌ: 3 «Komamanh hanhonhtiꞌanh kam sat txꞌotxꞌ desierto, yaj maxhtaj hun yaꞌ xol ebꞌnaj aniko howal yinh Komam Dios yinta naj Coré, machoj; wal xin kam komam tuꞌanh yu ismul yako ischukil; yajaꞌ xin machi hunu iskꞌahol komam tuꞌanh, wal xin ixonhnhehanh. 4 Yuxin mach kꞌuloj tato matxa chibꞌina isbꞌi komam tuꞌanh yu machi hunu iskꞌahol. Yuxin chikoqꞌananh tato cheyaqꞌ komajulanh yinta ebꞌnaj yuxhta komamanh,» xhi ebꞌix.5 Isqꞌambꞌen yaꞌ Moisés tet Komam Dios yinh tzet chiyute yalni Komam yinh ebꞌix. 6 Istaqꞌwi Komam tet yaꞌ hakaꞌ tiꞌ: 7 «Ebꞌix iskutzꞌin naj Zelofehad tiꞌ, haꞌ ye yu ebꞌix, yuxin aqꞌwe istxꞌotxꞌ ebꞌix tuꞌ yinta ebꞌnaj yuxhta ismam. Haꞌ xin ebꞌix chimajnilo ismajul ismam tuꞌ. 8 Kat hawalnipaxo tet ebꞌnaj Israel; tato ay hunu naj Israel chikami, machi xin hunu iskꞌahol naj winaj, haꞌ istxꞌotxꞌ naj tuꞌ chikankano tet ebꞌix kutzꞌine. 9 Yajaꞌ ta machi hunu iskutzꞌin naj xin, chikankano istxꞌotxꞌ naj tuꞌ tet yuxhtaj. 10 Taka machi hunu yuxhta naj xin, chikankano txꞌotxꞌ tet ebꞌnaj yuxhta ismam. 11 Yajaꞌ ta machi yuxhta ismam, haꞌ tet mak ayto yu isbꞌa yebꞌi, haꞌ tet chikankano istxꞌotxꞌ tuꞌ. Huneꞌ tiꞌ, chejbꞌanile chukaniko texol hex Israelex tiꞌ, hakaꞌ chu walnikanojan tawet,» xhi Komam tet yaꞌ Moisés.
Alaxiko yaꞌ Josué selelo yaꞌ Moisés
12 Lahwi tuꞌ, istzotel Komam Dios Jahawil tet yaꞌ Moisés, yalni Komam:
—Ahanhti iswiꞌ witz Abarim tiꞌ, kat hawilnito txꞌo txꞌotxꞌ chiwaqꞌan tet ebꞌnaj Israel. 13 Lahwi hawilnikano txꞌotxꞌ kat hakami, hakaꞌ yu iskamto ebꞌnaj hawichmam, yebꞌ hakaꞌ yu iskam hawuxhta Aarón. 14 Yuto hex kawanh hex tiꞌ, hemanhkꞌo tzet walan bꞌey txꞌotxꞌ desierto Zin, yet isbꞌuchwa anma Israel winhan, mach xin heyala ta kaw ay welapnojan sata anma tuꞌ, yet isqꞌanni ha haꞌ yukꞌuꞌ. Huneꞌ tiꞌ, yu bꞌey txꞌotxꞌ Meriba,a bꞌey txꞌotxꞌ Cades, yul ismajul txꞌotxꞌ desierto Zin, xhi Komam.
15 Hak tiꞌ xin yu ispajtzen yaꞌ Moisés tet Komam Jahawil:
16 —Mamin, hach tiꞌ, Dios hach, hach chawaqꞌ iskawil sunil anma, haꞌ tinanh xin sayiko hunu mak chiꞌok yahawo hakonhobꞌ tiꞌ, 17 yunhe yijbꞌanikꞌo bꞌay chiꞌekꞌi, haxinwal machi kꞌayikꞌoj, hakaꞌ noꞌ meꞌ machi istanhemal, xhi yaꞌ tet Komam.
18 Istaqꞌwi Komam tet yaꞌ:
—Sayilo yaꞌ Josué, iskꞌahol yaꞌ Nun, yuto ayko Wespírituhan yinh yaꞌ, kat hawanayo haqꞌabꞌ yibꞌanh iswiꞌ yaꞌ, 19 hayet ayko yaꞌ sata yaꞌ sacerdote Eleazar yebꞌ sata sunil konhobꞌ Israel kat ischahnikano yaꞌ yip. 20 Kat hawanayo hanikꞌo hahelanil yibꞌanh yaꞌ, haxinwal sunil anma Israel chiyijen tzet chiyal yaꞌ. 21 Yajaꞌ chawito yaꞌ Josué tuꞌ sata yaꞌ sacerdote Eleazar, haꞌ xin yaꞌ tuꞌ chitzotel yinh yaꞌ wetan, kat walnihan yinh chꞌen urim yinh tzet wal iswatxꞌen yaꞌ. Haꞌ yaꞌ Josué tuꞌ, chiꞌaqꞌni sunil chejbꞌanile tet anma Israel, kat isyijen tzet chiyal yaꞌ, xhi Komam tet yaꞌ Moisés.