«Hanintiꞌan 120 inhabꞌilalan, kaw icham inxahan, matxa wipan kexwijbꞌanikꞌojan, yebꞌpaxo xin xayal Komam wetan tato mach chinqꞌaxponikꞌtojan yibꞌanh haꞌ Jordán teyintaj. 3 Yajaꞌ haꞌ Komam Dios Jahawil chibꞌabꞌi tesataj, kat istanhtzenilo Komam sunil nimeta konhobꞌ ayayo sat txꞌo txꞌotxꞌ chiyaqꞌ teyet tuꞌ, yu heyehayoj. Haxa yaꞌ Josué chiꞌok tesataj, kat kexyijbꞌanikꞌo yaꞌ hakaꞌtikꞌa yu yalnikano Komam. 4 Haꞌ Komam chitanhtzenilo sunil nime konhobꞌ hakaꞌ yu istanhtzenilo Komam isreyal anma amorreo, haꞌ ton naj Sehón yebꞌ naj Og; istanhtzenpaxilo Komam sunil iskonhobꞌ ebꞌnaj tuꞌ ayko sat istxꞌotxꞌ. 5 Hayet chiyaqꞌni aykꞌayo Komam Jahawil hunteqꞌan konhobꞌ tuꞌ yul heqꞌabꞌ, yilal hetanhtzenkaniloj, hakaꞌ yu walnikanojan teyet. 6 Linhbꞌawe hebꞌa, aweko yip heyanma. Mach chexxiwi yet cheyilni hunteqꞌan konhobꞌ tuꞌ yuto haꞌ Komam Dios Jahawil chiꞌok heyetbꞌihoj, mach chexisbꞌejkano hechukil, mach chexisnahulnhetoj,» xhi yaꞌ Moisés.

7 Lahwi tuꞌ, yawten yaꞌ Moisés yaꞌ Josué, yalni yaꞌ tet yaꞌ yinh sat sunil anma Israel hakaꞌ tiꞌ:

«Ako yip hawanma, linhbꞌa habꞌa, yuto hach chawikto konhobꞌ tiꞌ sat txꞌo txꞌotxꞌ yaltekano Komam Dios Jahawil tet ebꞌnaj jichmam ta chiyaqꞌ teyet; hach xin chapohkanh txꞌotxꞌ yinh konhobꞌ tiꞌ. 8 Haꞌ Komam chibꞌabꞌi tasataj, kat xin yok hawetbꞌihoj, mach chaxhisnahulnhetoj, machi xin chexisbꞌejkano hechukil, yuxin mach chaxhxiwi, machi xin chaxhmeltzo tawintaj,» xhi yaꞌ tet yaꞌ Josué.

9 Istzꞌibꞌnhenkano yaꞌ Moisés hunteqꞌan chejbꞌanile tuꞌ, yanikaniko yaꞌ yul isqꞌabꞌ ebꞌnaj sacerdote titna yinh yaꞌ Leví, ebꞌnaj aqꞌbꞌil ismunil yinito teꞌ Kaxha yet istrato Komam Dios Jahawil, yebꞌpaxo tet sunil ebꞌnaj ichamta winaj Israel. 10 Yalnikano yaꞌ Moisés tet ebꞌnaj hakaꞌ tiꞌ:

«Hayet chitzꞌajna hujuta habꞌil, yulbꞌal ishabꞌilal yet chiꞌaqꞌlax nimankꞌulal yinh kꞌas, yet chiskutxbꞌan isbꞌa sunil anma Israel sata Komam Dios Jahawil yulbꞌal istzꞌayikal qꞌinh Lexhpat; 11 yet chiꞌapni sunil anma Israel sata Komam Dios Jahawil, bꞌay chisikꞌlelo bꞌay chiꞌehikꞌoj, chawawte istzotiꞌal chejbꞌanile tiꞌ yabꞌeꞌ sunil konhobꞌ. 12 Yilal iskutxbꞌan isbꞌa sunil anma Israel; ebꞌnaj winaj, ebꞌix ix yebꞌ nixhte unin, yebꞌ anma mach Israelo ay texol, yunhe yabꞌen yawtelax hum yet chejbꞌanile, kat iskankano yinh isnabꞌal, haxinwal chixiw tet Komam Dios Jahawil, kat isyijen sunil chejbꞌanile tzꞌibꞌnhebꞌilkano yul hum tuꞌ. 13 Haxa xin nixhte heyuninal mach yohtajo chejbꞌanile tuꞌ, hayet chiyabꞌeni kat isyijen tzet chal Komam Dios Jahawil yulbꞌal tiempo ay iskawil sat txꞌo txꞌotxꞌ chiyaqꞌ Komam teyet yet chexqꞌaxponikꞌto yibꞌanh haꞌ Jordán,» xhi yaꞌ Moisés.

14 Istzotel Komam Dios Jahawil tet yaꞌ Moisés, yalni hakaꞌ tiꞌ:

«Wal tinanh maꞌapni istzꞌayikal bꞌay chaxhkami, yuxin awteti yaꞌ Josué, kat hato yebꞌ yaꞌ yul Tabernáculo bꞌay chekutxbꞌa hebꞌa inkꞌatanhan, kat walnikanojan chejbꞌanile tet yaꞌ,» xhi Komam.

Isto yaꞌ Moisés yebꞌ yaꞌ Josué yul isTabernáculo Komam bꞌay chiskutxbꞌa isbꞌa ebꞌnaj Israel. 15 Isyeni isbꞌa Komam Dios, Jahawil tet ebꞌyaꞌ bꞌey tuꞌ xol hun topan moyan ok yibꞌanh istiꞌ ispultahil isTabernáculo Komam. 16 Istzotel Komam tet yaꞌ Moisés, yalni hakaꞌ tiꞌ:

«Hach tiꞌ, kaw toxa chaxhkami; haꞌ konhobꞌ Israel tiꞌ, chiyetato isbꞌa, chiyinayo isbꞌa sata hunteqꞌan istioxh anma ay sat txꞌo txꞌotxꞌ bꞌay chiꞌapni, kat ispohnilo isbꞌa winhan, kat yetanto huneꞌ istrato intzotiꞌan aqꞌbꞌil tet wuhan.^a 17 Yajaꞌ xin, chitit inhowalan yinh, kat inbꞌejnikanojan, chiwebꞌato insatan tet ebꞌnaj, kat xin istit isyaꞌtajil yebꞌ bꞌiskꞌulal yibꞌanh, kat istxumni isbꞌa iskꞌul, chiyalni: “¿Tzet yinh yuxin kaw chiꞌay isyaꞌtajil tiꞌ jibꞌanh? Yumi kopohilo kobꞌa yinh Komam Dios, yuxin hak tiꞌ chijaqꞌle,” xhi anma tuꞌ. 18 Yajaꞌ yinh kaw isyelal chiwebꞌato insatan yinh huneꞌ tzꞌayik tuꞌ yu sunil istxꞌojal chiswatxꞌe ebꞌnaj yet chiꞌoktzujno yinta hunteqꞌan tioxh watxꞌebꞌil yu anma, hunteqꞌan tzet chihal-lax diosal.

19 »Haꞌ tinanh xin, tzꞌibꞌnhekano huneꞌ bꞌit chiwalan tawet, kat hawaqꞌni iskuyuꞌ anma Israel, kat isqꞌaytzen isbꞌa ebꞌnaj isbꞌitnheni, haꞌ xin huneꞌ bꞌit tuꞌ, chiꞌok yechelo wuhan yinh ebꞌnaj yu ismanhkꞌomal ebꞌnaj. 20 Hayet ayxa anma Israel sat txꞌo txꞌotxꞌ chiwaqꞌan tet, txꞌotxꞌ kaw kꞌul yebꞌ yax sat waltekanojan tet ebꞌyaꞌ ismam icham ebꞌnaj ta chiwaqꞌan tet. Haꞌ bꞌey tuꞌ, chiwaꞌi, kat kaw isnoh iskꞌul, kat isbꞌaqꞌichbꞌiloj, lahwi tuꞌ kat yok yinoyo isbꞌa sata tioxh mach yohtajoj, kat kinisyahnikanojan, kat yetanto ebꞌnaj tzet tꞌinhbꞌabꞌilkano wuhan tet ebꞌnaj. 21 Haxa yet chitit txꞌiꞌal isyaꞌtajil yibꞌanh yebꞌ bꞌiskꞌulal, haꞌ huneꞌ bꞌit tiꞌ chihalniko yinh sat ebꞌnaj, kat xin isnahlaxti yu yuninal ebꞌnaj bꞌaqꞌinh, kat xin isbꞌitnheni, yuto yalanhto maxhto chiꞌapni sat txꞌo txꞌotxꞌ walkanojan ta chiwaqꞌan tet, wohtaxahan tzet nabꞌil yu,» xhi Komam.

22 Yinhtikꞌa huneꞌ tzꞌayik tuꞌ, istzꞌibꞌnhekano yaꞌ Moisés huneꞌ bꞌit tuꞌ, yaqꞌni yaꞌ iskuyuꞌ anma Israel.

23 Yalni Komam tet yaꞌ Josué, yaꞌ iskꞌahol yaꞌ Nun hakaꞌ tiꞌ:

«Ako yip hawanma, linhbꞌa habꞌa, yuto hach chawito anma Israel tiꞌ sat txꞌo txꞌotxꞌ walan tato chiwaqꞌan tet, haninan xin chinokan hawetbꞌihoj,» xhi Komam tet yaꞌ.

24 Hayet lahwi istzꞌibꞌnhenkano yaꞌ Moisés sunil chejbꞌanile tiꞌ yul hum, 25 yalni yaꞌ tet ebꞌnaj sacerdote levita, ebꞌnaj chiꞌinito teꞌ Kaxha yet istrato Komam:

26 «Iweto huneꞌ hum tiꞌ, kat heyanayo iskꞌatanh isKaxhahil istrato Komam Dios Jahawil; haꞌ xin teꞌ hum tiꞌ chaqꞌ isbꞌa testigohal teyinh. 27 Yuto wohtajan tato kaw manhkꞌom hex yebꞌ kaw lutꞌkano heyanma. Ta manhkꞌomex tet Komam yet itzitz intotiꞌan, ¿hajxam yet xakinkaman, chal tuꞌ? 28 Chejweti ebꞌnaj ichamta winaj Israel yebꞌ ebꞌnaj iswiꞌehal yinh hunun majan hex Israel hex tiꞌ bꞌey tiꞌ, yu walnikanojan hunteqꞌan chejbꞌanile tiꞌ tet ebꞌnaj, chiwanikojan satkanh yebꞌ txꞌo txꞌotxꞌ yu yaqꞌni isbꞌa yinh istxꞌojal ebꞌnaj. 29 Yuto wohtajan tato yet lahwi inkaman, kat yetanto isbꞌa ebꞌnaj, kat ismanhkꞌon ebꞌnaj tzet halbꞌilkano wuhan. Wohtapaxojan tato chihul isyaꞌtajil yibꞌanh ebꞌnaj yet bꞌaqꞌinh, yu istxꞌojal chiswatxꞌe ebꞌnaj sata Komam, chiyiniti ebꞌnaj ishowal Komam Dios yibꞌanh yu istxꞌojal chiswatxꞌe,» xhikano yaꞌ Moisés.

30 Lahwi tuꞌ, yicheniko yaꞌ Moisés yalni istzotiꞌal huneꞌ bꞌit tiꞌ sata sunil anma Israel yet kutxanikoj. Yicheko yaꞌ masanta xin islah yaꞌ, yalni yaꞌ hakaꞌ tiꞌ: