Tzet yilal kowatxꞌeni kat kochahni iskꞌulal Komam hunelxa
30
»Hayet chihul sunil tzet xawaltiꞌan teyibꞌanh, iskꞌulal yebꞌ tzꞌaktiꞌ xawaqꞌan hesikꞌleꞌ; tato chenah hebꞌa yet ayexxa yul hunteqꞌan konhobꞌ bꞌay chexapnikano yu Komam tuꞌ; 2 kat hemeltzoko yul isqꞌabꞌ Komam Dios, yebꞌ yinh sunil hekꞌul yebꞌ yinh sunil heyanma cheyijen tzet chal Komam, chisyijenpaxo xin heyuninal, hakaꞌtikꞌa chu walnikanojan teyet tinanh. 3 Yinh hakaꞌ tuꞌ, chishel Komam Jahawil heyinhbꞌal, kat xin istzꞌay iskꞌul Komam teyinh, kat kexiskutxbꞌanikoj yet chexyinilo xolaj konhobꞌ bꞌay pujanextoj. 4 Waxanhka kexsajlemitoj heyapnikano bꞌay chikachnakano sat yibꞌanhqꞌinal tiꞌ, haꞌ bꞌey tuꞌ chexyiti Komam Dios Jahawil; hata bꞌey tuꞌ chito Komam kexyiqꞌatij. 5 Kat kexyaqꞌni meltzoho Komam sat txꞌo txꞌotxꞌ yaqꞌ tet hemam icham; kat yokkano txꞌotxꞌ heyu, kat yanayo isyaxilal teyibꞌanh; kaw xin chipohkanokanh heyuninal ekꞌbꞌalto sata yuninal hemam icham. 6 Chiyako Komam yechel istrato yinh heyanma, haꞌ xin chalnilo tato yetxa Komam heyehi, yebꞌ yinh yanma heyuninal chipohchakanokanh, yunhe hexahannhen Komam yinh sunil heyanma, yebꞌ yinh sunil hekꞌul, hak tuꞌ xin ay hekawil. 7 Chanikanto Komam Dios Jahawil sunil hunteqꞌan tzꞌaktiꞌ yibꞌanh ebꞌnaj ayko ishowal teyinh; ebꞌnaj chichiwa iskꞌul teyinh, kextzumbꞌeni. 8 Hex tiꞌ, chexmeltzoko yul isqꞌabꞌ Komam Dios Jahawil, kat xin heyok yijemal tet, kat xin hebꞌeybꞌalnhen sunil chejbꞌanile chiwaqꞌkanojan teyet tiꞌ. 9 Hak tuꞌ xin chayo Komam isyaxil yibꞌanh sunil tzet chewatxꞌe, chayo isyaxil yibꞌanh heyuninal, yebꞌ yibꞌanh yunin henoqꞌ, yebꞌ yibꞌanh sat hetzꞌunubꞌ. Kaw chitzala iskꞌul Komam yanayo iskꞌulal teyibꞌanh, hakaꞌ yu istzala iskꞌul yanayo iskꞌulal yibꞌanh hemam icham, 10 hak tuꞌ chu Komam tato cheyije yinh tzet chal Komam Dios Jahawil, kat xin hebꞌeybꞌalnhen chejbꞌanile yebꞌ kuybꞌanile tzꞌibꞌnhebꞌil yinh hum yet chejbꞌanile yaqꞌ Komam jet; ta chexmeltzoko yul isqꞌabꞌ Komam yinh sunil heyanma yebꞌ yinh sunil hekꞌul.11 »Haꞌ hunteqꞌan chejbꞌanile chiwaqꞌan teyet tiꞌ, mach yaꞌtajo heyijeni, mach nahato yehilo teyinh. 12 Mach satkanho aya yunhe heyalni hakaꞌ tiꞌ: “¿Mak hunu chisje yahto satkanh yunhe isto yinoyti chejbꞌanile tuꞌ, kat xin yaqꞌni johtanheloj, yunhe jok kobꞌeybꞌalnheni?” mach xhihoj. 13 Mach isqꞌaxebꞌikꞌto haꞌ mar aypaxoj yuxin cheyal hakaꞌ tiꞌ: “¿Mak chiqꞌaxponikꞌto yibꞌanh haꞌ mar tiꞌ, kat isto yinoti jet, kat xin yaqꞌni johtanheloj, kat xin koyijeni?” mach xhihoj. 14 Wal xin haꞌ chejbꞌanile tiꞌ kawil yeko kokꞌatanh, ayikto yul hetiꞌ yebꞌ ayko yinh henabꞌal yu hebꞌeybꞌalnheni.
15 »Haꞌ tinanh chiwaqꞌan hesikꞌleꞌ bꞌaytet cheyoche; ham hekawil yebꞌ iskꞌulal, mato istxꞌojal yebꞌ kamikal. 16 Tato cheyije sunil tzet chiwalkanojan teyet tiꞌ, kat xin heyochen Komam Dios Jahawil, kat heyok tzujno yinh isbꞌeybꞌal Komam, kat xin heyijen chejbꞌanile yebꞌ kuybꞌanile; yinh hakaꞌ tuꞌ ay hekawil yebꞌ kaw niman heyuninal, kat xin yanayo Komam Dios iskꞌulchꞌanil iskꞌul teyibꞌanh sat txꞌo txꞌotxꞌ bꞌay chexapni tuꞌ.
17 »Yaj tato heyanma chishekꞌilo isbꞌa yinh Komam, mach xin cheyabꞌeto tzet chala, cheyaqꞌni kꞌayoto hebꞌa, kat heto yinta hunteqꞌan komon dios, kat heyok heyijeno tet, kat heyay jahno sataj; 18 haꞌtikꞌa tinanh chiwalkanojan teyet tato mach chiꞌekꞌto yet hetanhtzelaxiloj, mach txꞌiꞌal tzꞌayik chexekꞌ sat txꞌo txꞌotxꞌ chiꞌok heyu yet chilahwi heqꞌaxponikꞌto yibꞌanh haꞌ Jordán.
19 »Yinh huneꞌ tzꞌayik tiꞌ, chiwakojan satkanh yebꞌ xin txꞌo txꞌotxꞌ yaqꞌni isbꞌa teyinh tato waqꞌan teyet yu hesikꞌleniloj bꞌaytet cheyoche; ta haꞌ hekawil, maka kamikal, ta haꞌ iskꞌulal, maka istxꞌojal. Yuxin saywelo hekawil yebꞌ iskawil heyuninal chipohchahi.a 20 Ochewe Komam Dios Jahawil, cheyabꞌento yul isnuqꞌ, okanhwe tzujno yinta Komam yuto yinh chitit hekawil, kaw xin chihitzto yoj hehabꞌilal sat txꞌo txꞌotxꞌ yaltekano tet komam icham; tet yaꞌ Abraham, yaꞌ Isaac, yebꞌ yaꞌ Jacob tato chiyaqꞌ jet,» xhi yaꞌ Moisés tet ebꞌnaj Israel.