Istꞌinhanil istrato Komam Dios yaqꞌ tet anma Israel bꞌey txꞌotxꞌ Moab
29
Haꞌ hunteqꞌan kuybꞌanile tiꞌ, haꞌ ton istꞌinhanil istrato Komam yal tet yaꞌ Moisés tato chiswatxꞌe yebꞌ konhobꞌ Israel yul ismajul txꞌotxꞌ Moab, haꞌ ton hunteqꞌanxa yetbꞌi kuybꞌanile yaqꞌ Komam Dios tet anma tuꞌ bꞌey witz Horeb.a 2 Iskutxbꞌaniko yaꞌ Moisés sunil anma Israel, yalni yaꞌ hakaꞌ tiꞌ:«Hex tiꞌ, heyil tzet iswatxꞌe Komam Dios Jahawil yinh naj Faraón bꞌey Egipto, yebꞌ yinh ebꞌnaj chimunla yinta naj, yebꞌpaxo yinh anma ay bꞌey tuꞌ. 3 Hex cheyaqꞌ hebꞌa yinh isyaꞌtajil heyila, yebꞌ yinh yechel yip Komam, yebꞌ yinh kꞌaybꞌalkꞌule isye Komam bꞌey tuꞌ. 4 Yaj hato tinanh, maxhto chiyaqꞌ Komam heyohtanheloj yul heyanma, yebꞌ isnachalo heyu yinh tzet chal yelapno hunteqꞌan kꞌaybꞌalkꞌule tuꞌ.b 5 Yulbꞌal 40 (kawinaj) habꞌil kexwijbꞌakꞌojan sat txꞌotxꞌ desierto; yulbꞌal hunteqꞌan habꞌil tuꞌ maxhtikꞌa xilbꞌilo xil heqꞌap, yebꞌ maxhtikꞌa lahwilo hexanhabꞌ yinh heyoj. 6 Machi ixim pan hewah, machi vino heyukꞌu, maka hunuxa vino kaw howkanoj heyukꞌu, yunhe heyohtanheni tato haꞌ Komam Dios Jahawil, kaw heDios yehi, chikolwa teyinh.
7 »Hayet jul bꞌey txꞌotxꞌ bꞌay ayonh tiꞌ, elti naj Sehón, yaqꞌaꞌko howal jinh, naj isreyal txꞌotxꞌ Hesbón, yebꞌpaxo xin naj Og, naj isreyal txꞌotxꞌ Basán, elti naj howal jinh, yaj xin aykꞌay ebꞌnaj ju. 8 Jinikanikꞌo istxꞌotxꞌ ebꞌnaj, jaqꞌnikano txꞌotxꞌ ismajulo ebꞌnaj Israel titna yinh yaꞌ Rubén, yebꞌ ebꞌnaj titna yinh yaꞌ Gad, yebꞌ tet yikta majan ebꞌnaj titna yinh yaꞌ Manasés. 9 Yuxin yijewe istzotiꞌal huneꞌ kuybꞌanile tiꞌ, kat hebꞌeybꞌalnheni; haxinwal kꞌul chexeliko yinh sunil tzet chewatxꞌe.
10 »Tinanh, kutxanexiko hesunil sata Komam Jahawil koDiosal; sunil ebꞌnaj yahawil yinh hunun majan anma Israel, yebꞌ ebꞌnaj ichamta winaj yahawil yul konhobꞌ, yebꞌ ebꞌnaj ay ismunil yijbꞌali, yebꞌ sunil ebꞌnaj jet Israelal, 11 yebꞌ heyuninal, yebꞌ ebꞌix heyixal, yebꞌ ebꞌnaj yebꞌ ebꞌix nan konhobꞌal chiꞌeyayo yul hecampamento; haꞌ xin chitzokꞌni hesiꞌ, haꞌ chiꞌinipaxahti heyaꞌ. 12 Kutxanonhikoj yu kochahnikano kuybꞌanile chaqꞌ Komam jet; chaqꞌ isbꞌi Komam Dios Jahawil yinh yu istꞌinhikano chejbꞌanile yul koqꞌabꞌ yu Komam. 13 Haꞌ chiyukano tinanh, to iskonhobꞌ Komam Dios jehi, haꞌ xin Komam haꞌ koDiosal, hakaꞌ yu yaltenkano tet yaꞌ Abraham, yaꞌ Isaac, yebꞌ yaꞌ Jacob, ebꞌyaꞌ komam jichmam. 14 Maxhnhetaj jet hanhonh ayonhiko sata Komam tiꞌ bꞌay chistꞌinhbꞌakano Komam chejbꞌanile, 15 to tetpaxo mak maxhto ayokꞌo kokꞌatanh.
16 »Hex tiꞌ heyohtaj yinh tzet yu jehikꞌo bꞌey Egipto, yebꞌpaxo yinh tzet yu heyekꞌto xolaj txꞌotxꞌ konhobꞌ yet ayonhiko yinh kobꞌel, 17 bꞌay heyil hunteqꞌan kaw yahbꞌetaj; te teꞌ watxꞌebꞌil yu anma isdiosaloj, chꞌen chꞌen istioxh ebꞌnaj, yebꞌ chꞌen plata yebꞌ chꞌen oro bꞌay chiyiyo isbꞌa anma tet. 18 Yuxin texol hex tiꞌ, machojabꞌ hunu ebꞌnaj winaj maka hunu ebꞌix ix, maka hunu nhahil anma, maka hunu majan ebꞌnaj Israel chibꞌejnikano Komam Dios Jahawil, kat isto yinoyo isbꞌa tet isdiosal hunteqꞌan anma tuꞌ. Machojabꞌ hunujex tiꞌ lahan hakaꞌ hunu xeꞌ te teꞌ kaw kꞌah, kaw how, chonhkam yu.
19 »Yaj tato lahwi heyabꞌen istzotiꞌal huneꞌ ischejbꞌanil Komam tiꞌ, ay xin hunujex tiꞌ chetxumu tato kaw kꞌulkano yet, chalni hakaꞌ tiꞌ: “Kaw kꞌul chinelikojan yinh sunil tzet chinwatxꞌehan, waxanhka xin chinwatxꞌehan tzet chal inkꞌulan,” xhi. Yu huneꞌ mak tuꞌ yuxin chextanhtzelaxkaniloj. 20 Yu huneꞌ tuꞌ xin matxa chaqꞌ nimankꞌulal Komam yinh, wal xin chayo Komam ishowal yibꞌanh huneꞌ mak tuꞌ. Haꞌ xin sunil ishowal Komam halbꞌilkano yul hum tiꞌ, chiꞌalaxayo yibꞌanh, kat xin istanhtzenilo Komam yuninal chipohcha yinh sat txꞌo txꞌotxꞌ tiꞌ.c 21 Texol hunun majan hex Israel hex tiꞌ, chispohilo Komam Jahawil huneꞌ mak tuꞌ, kat yul isyaꞌtajil yibꞌanh, hakaꞌtikꞌa yalni istzotiꞌal chejbꞌanile yu Komam, hunteqꞌan tzꞌaktiꞌ tzꞌibꞌnhebꞌilkano yul yum yet chejbꞌanile tiꞌ.
22 »Haꞌ anma chitohuli, heyuninal chipohchati teyinh yebꞌ hunteqꞌanxa anma nan konhobꞌal nahat chitita; chiyil isyaꞌtajil yebꞌ ej yabꞌil chati Komam sat txꞌo txꞌotxꞌ tiꞌ. 23 Chilaꞌ ebꞌnaj tato sat txꞌo txꞌotxꞌ tiꞌ haxanhe azufre yebꞌ atzꞌam atzꞌam ay sat txꞌotxꞌ yebꞌ txꞌo txꞌotxꞌ tzꞌayil. Matxa hunu tzet chiyu istzꞌunlax sat txꞌotxꞌ, matxa chaqꞌ sat tzꞌunubꞌ, nitam hunu teꞌ itah chichꞌibꞌi, hakaꞌ yu istanhtzelaxkanilo konhobꞌ Sodoma yebꞌ konhobꞌ Gomorra, yebꞌ konhobꞌ Adma yebꞌ konhobꞌ Zeboim; hunteqꞌan konhobꞌ tuꞌ istanhtzelo Komam yu ishowal. 24 Kat xin isqꞌambꞌen ej txꞌotxꞌ konhobꞌ hakaꞌ tiꞌ: “¿Tzet yinh xin hak tuꞌ yute Komam yinh huneꞌ konhobꞌ tiꞌ? ¿Tzet yinh yuxin yiti Komam ishowal yinh?” xhi. 25 Kat ispajtzelax huneꞌ tuꞌ hakaꞌ tiꞌ: “Yuto ebꞌnaj iskonhobꞌ Komam, isbꞌejkano ebꞌnaj istzotiꞌ Komam Dios Jahawil yaqꞌ tet ebꞌnaj yet yinilti Komam ebꞌnaj bꞌey Egipto, Komam isDiosal yichmam ebꞌnaj. 26 Isto ebꞌnaj isyijeno tet hunteqꞌan tzet chihal-lax diosal, yinayo isbꞌa ebꞌnaj tet hunteqꞌan dios mach ohtabꞌilo yu ebꞌnaj, maxhtikꞌa xin tzet ischah ebꞌnaj tet hunteqꞌan dios tuꞌ. 27 Yiti Komam ishowal yibꞌanh txꞌo txꞌotxꞌ tiꞌ, yaniti Komam sunil tzꞌaktiꞌ tzꞌibꞌnhebꞌilkano yul hum tiꞌ. 28 Istzumbꞌelo Komam anma sat istxꞌotxꞌ yu sunil ishowal; istokano xol hunteqꞌanxa txꞌotxꞌ konhobꞌ, hakaꞌ jilni tzet lanhan yuni tinanh,” xhi.
29 »Ay tzet ye tuꞌ mach johtajoj, hunteqꞌan tuꞌ yet Komam yehi, yaj xin, ay tzet ye tuꞌ tiꞌ yaqꞌ Komam johtanheloj, yebꞌ yohtanhen juninal, yu koyijen yinh sunilbꞌal ej tiempo, haꞌ ton sunil chejbꞌanile tiꞌ yebꞌ kuybꞌanile.