32
«Yabꞌehabꞌ satkanh tzotiꞌ chiwalan tiꞌ,kat xin yabꞌenpaxo txꞌo txꞌotxꞌ tzet chal intiꞌan.
2 Haꞌ kuybꞌanile chiwaqꞌan, lahan hakaꞌ haꞌ nhabꞌ chiꞌayi.
Wal intzotiꞌan, lahan hakaꞌ yal chew chiꞌayi, lahanpaxo hakaꞌ wexhnhabꞌ chiꞌay yibꞌanh teꞌ telaj,
yebꞌ hakaꞌ hunta tꞌuhan haꞌ nhabꞌ chiꞌay yibꞌanh tzꞌunubꞌ.
3 Chiwalilojan tzet yelapno ye Komam Dios Jahawil.
Aweko ismay Komam.
4 Haꞌ Komam ayko jenheloj, hakaꞌ hunu chꞌen niman chꞌen.
Tzꞌajan chiꞌeliko tzet chiswatxꞌe yebꞌ xin kaw tohol, yebꞌ kaw yel tzet chiyala.
Machi hunu istxꞌojal tiꞌ chiꞌilchalo yinh. Kaw kꞌul Komam yebꞌ kaw toholkanoj.
5 Mach istxꞌojal Komam. Haꞌ yuninal ebꞌnaj iskonhobꞌ kaw tzꞌil,
manhkꞌompaxoj, kaw kotxan.
6 ¿Tom xin hak tuꞌ chu heyaqꞌni ispaj tet Komam?
Wal xin kaw suk hexkanoj, yebꞌ kaw machi henabꞌal.
¿Tom maxhtaj Komam kexaqꞌni pitzkꞌahoj?
Wal xin haꞌ Komam kexwatxꞌeni, haꞌ anikto yip heyanma.
7 Naweti yettax payat, ekꞌojabꞌ henabꞌal yinh tzetaj iswatxꞌe Komam yinh habꞌil xaꞌekꞌtoj,
kam cheqꞌambꞌelo tet hemam yebꞌ tet ebꞌnaj ichamta winaj, yu yalni ebꞌnaj heyabꞌeꞌ.
8 Yet ispohlaxkanh anma yu Komam Dios,
Komam kaw aykano yelapnoj, yaqꞌnikano Komam ismajul hunun konhobꞌ.
Yanikanayo Komam ismohonal hunun konhobꞌ,
yajaꞌ yinh bꞌabꞌelal ekꞌ yinh isnabꞌal Komam hatatikꞌa hanta isbꞌisil anma Israel.
9 Yuto ismajul Komam Jahawil ye iskonhobꞌ,
haꞌ xin ebꞌnaj titna yinh yaꞌ Jacob sikꞌbꞌililo yu Komam.
10 Chahlo ebꞌnaj yu Komam sat txꞌotxꞌ desierto,
bꞌay kaw xiwkilal yekꞌi yu chitzꞌinhtzꞌoni, kaw islaqꞌayo Komam ebꞌnaj yu isqꞌabꞌ.
Yok Komam iskuyno ebꞌnaj.
Kꞌubꞌalax ebꞌnaj hakaꞌ isyaꞌilnhen ebꞌnaj istioxhal isbꞌaqꞌ sat.
11 Hakaꞌ noꞌ tꞌiw chisqꞌaytze noꞌ istennilo yunin yul yatut yunhe ispurwi.
Hakaꞌ chiyu islehbꞌanto noꞌ isxikꞌ yalanh yunin tuꞌ,
kat ischahnahto noꞌ yunin yibꞌanh xikꞌ, hak tuꞌ utelax ebꞌnaj yu Komam.
12 Hanhkꞌanhe Komam ijbꞌan ebꞌnaj,
machi hunuxa komon dios kolwa yinh.
13 Yinito Komam ebꞌnaj bꞌey chewal txꞌotxꞌ, islohni ebꞌnaj sat tzꞌunubꞌ yu Komam.
Yaqꞌni Komam eloti noꞌ kabꞌ yul iskꞌul chꞌen nime chꞌen yukꞌuꞌ ebꞌnaj,
yukꞌnipaxo ebꞌnaj aceite chꞌel yinh teꞌ olivo satla chꞌen chꞌen.
14 Yukꞌni ebꞌnaj noꞌ lech, islohnipaxo ebꞌnaj noꞌ queso yaqꞌ iswakax ebꞌnaj yebꞌ noꞌ chiw.
Aypaxo noꞌ tzehla meꞌ kaw bꞌaqꞌich iskꞌux ebꞌnaj.
Iskꞌuxnipaxo noꞌ meꞌ yebꞌ noꞌ chiw ay bꞌey txꞌotxꞌ Basán.
Iswahnipaxo ebꞌnaj ixim trigo, ixim kaw kꞌul, yukꞌnipaxo ebꞌnaj vino, yal teꞌ uva.
15 Yajaꞌ haxa yet isbꞌaqꞌichbꞌilo Jesurún,a
isxanhwa hakaꞌ noꞌ cheh, ishekꞌnilo isbꞌa yinh Komam Dios watxꞌenhe,
isyahnikano istanhemal yebꞌ iskolomal.
16 Yok anma tuꞌ yanoko ishowal Komam yinh iskꞌul,
istit ishowal Komam yibꞌanh yet yinayo isbꞌa anma tuꞌ tet hunteqꞌan tioxh chisyah Komam.
17 Yaqꞌni isxahanbꞌal tet ischejabꞌ naj matzwalil, hunteqꞌan tioxh mach diosoj,
mach ohtabꞌilo yu yet yalanhtokanoj; komon dios tolto watxꞌi,
hunteqꞌan bꞌay machi yiyo isbꞌa ebꞌyaꞌ jichmam.
18 Konhobꞌ Israel isnahulnheto Komam watxꞌenhe, yebꞌ isKolomal,
isnahulnheto anma Komam aqꞌni iskawil.
19 Hayet yilni Komam huneꞌ tuꞌ istit lemna ishowal,
isyahnikanh Komam ebꞌnaj iskꞌahol yebꞌ ebꞌix iskutzꞌin.
20 Yalni Komam hakaꞌ tiꞌ: “Matxa chiwilan hunteqꞌan anma tiꞌ, wilaꞌan tzet chiꞌelikoj.
Yinh kaw yeli kaw txꞌojkanoj, mach chu iskawxi inkꞌulan yinh.
21 Chiyaqꞌ chíwaho inkꞌulan yet chiyinayo isbꞌa tet tioxh,
mach diosoj, kat yaqꞌnitij inhowalan yet chiyinayo isbꞌa tet yechel tzetaj ye tuꞌ.
Hakinpax tuꞌan chiwaqꞌ chíwahojan iskꞌul yet chiwalnihan hunteqꞌan nan konhobꞌal inkonhobꞌojan.
Chiwaqꞌnipaxotijan ishowal yet chiwanikojan anma mach isnabꞌal inkonhobꞌojan.
22 Chitit inhowalan hakaꞌ xaj qꞌa qꞌaꞌ,
kat xin istzuji qꞌa qꞌaꞌ wuhan yich yalanh txꞌotxꞌ bꞌay ay kamom,b
kat istzꞌato sunil sat tzꞌunubꞌ ay sat txꞌotxꞌ, kat istzꞌato yichla nime witz.
23 Chiwatijan sunilal ismajanil isyaꞌtajil yibꞌanh hunteqꞌan anma tuꞌ,
kat wanipaxtojan sunil isbꞌaqꞌ inlitꞌan yinh.
24 Kat iskam yu wahil yebꞌ yu qꞌaꞌ yabꞌil,
kat wanipaxtojan howla yabꞌil yinh, yunhe istanhtzenkaniloj,
kat wanipaxtojan noꞌ howla noqꞌ yebꞌ noꞌ howla labꞌa yinh.
25 Yulaj bꞌeh chipotxꞌlaxkamo yuninal yu chꞌen espada;
haxa yet ay yul yatut xin chiꞌok xiwkilal yinh,
kat iskam ebꞌnaj tzehtaj, yebꞌ ebꞌix qꞌopo, yebꞌ ebꞌnaj ichamta winaj,
yebꞌ nixhte neneꞌ chitotxutxwi yinh ismiꞌ.
26 Ok yinh innabꞌalan inpujbꞌantojan konhobꞌ Israel tiꞌ,
yunhe istanhkanilo sat yibꞌanhqꞌinal tiꞌ.
27 Yajaꞌ mach chiwochehan wabꞌehan isbꞌuchwa ebꞌnaj ayko ishowal winhan.
Mach chiwochehan chiyikanh isbꞌa ebꞌnaj tuꞌ, chiyalni:
‘Hanhonh majaqꞌ aykꞌayo anma Israel tiꞌ yu jip,
maxhtaj Komam Dios maꞌaqꞌni aykꞌayoj,’” xhim ebꞌnaj.
28 Haꞌ anma Israel tiꞌ, kaw matzet chitxumchalo yu,
kaw machi isnabꞌal.
29 Hantam saqꞌal ta ay isnabꞌal chimtxumchalo yu yinh tzet chꞌelkanikoj.
30 ¿Tzet yinh yuxin huneꞌnhe mak chixibꞌtento huneꞌ mil ebꞌnaj Israel?
¿Tzet yinh yuxin kawanhnhe mak chixibꞌtento 10 (lahonhebꞌ) mil ebꞌnaj Israel?
Wal xin haꞌ Komam, yet yalanhto iskolomal anma Israel ye Komam,
yaj tzujanxa xin Komam aniko ebꞌnaj Israel yul isqꞌabꞌ ebꞌnaj ayko ishowal yinh.
31 Kaw yohtaj ebꞌnaj ayko ishowal yinh ebꞌnaj Israel tato haꞌ istioxh ebꞌnaj machi yip,
mach hakaꞌo isDios ebꞌnaj Israel.
32 Haꞌ ebꞌnaj ayko ishowal yinh ebꞌnaj Israel kaw txꞌojkanoj,
yuto haꞌ ebꞌnaj konhobꞌ Sodoma yebꞌ konhobꞌ Gomorra,
bꞌay titna ebꞌnaj. Lahan xin ebꞌnaj hakaꞌ teꞌ uva kaw kꞌah, kaw how chonhkam yu.
33 Haꞌ isvino ebꞌnaj tuꞌ,
lahan yebꞌ ishowal yeh noꞌ labꞌa.
34 Yalnipaxo Komam hakaꞌ tiꞌ: “Sunil istxꞌojal ebꞌnaj ayko ishowal yinh Israel tiꞌ,
kaw kꞌuwan wuhan, hakaꞌ kokꞌubꞌan hunu qꞌalomal.
35 Hanintiꞌan chiwitijan inhowalan yinh mak chiwatxꞌen istxꞌojal,
chiwaqꞌan ispaj selel tet yu istxꞌojal chiswatxꞌe, yinh istzꞌayikal bꞌay chiꞌaykꞌayi.
Lanhanxa yul istzꞌayikal bꞌay chiꞌay isyaꞌtajil yibꞌanh mak ayko ishowal yinh Israel,
kawilxa yeti tzet watxꞌebꞌilxa yilal istit yibꞌanh,” xhi Komam.c
36 Haꞌ Komam chꞌelti kolwal yinh iskonhobꞌ yet chiyilni ta matxa yip iskolni isbꞌa,
kat istzꞌay iskꞌul Komam yinh ebꞌnaj ischejabꞌ yet chiyilni ta matxa yip,
machpaxo mak chikolwa yinh yuto matxa hunu maka;
matxa ebꞌnaj kꞌamteꞌ, matxa ebꞌnaj yet isbꞌa ischukil.
37 Chisqꞌambꞌen Komam tet ebꞌnaj Israel hakaꞌ tiꞌ:
“¿Bꞌaytuꞌwal ay hunteqꞌan cheyaliko hediosaloj,
hekolomal hakaꞌ chꞌen chꞌen bꞌay chekol hebꞌa?
38 ¿Bꞌaytuꞌwal ay hediosal tuꞌ?
Hunteqꞌan cheyal hediosaloj lonayto ismantecahil xahanbꞌal heyalte tet,
yukꞌnipaxayto vino heyaqꞌ heyebꞌalqꞌabꞌo tet.
¡Tijabꞌ kolwal teyinh kat kexiskolni!
39 Txumwekꞌanabꞌi. Ilwekꞌanabꞌ tinanh tato hanin Dios hinan,
matxa hunuxa Dios hakaꞌ intiꞌan. Haninan chiwatijan kamikal yibꞌanh anma,
haninan xin chiwaqꞌan itzitzbꞌokanh.
Haninan chiwakojan islahwilal, haninpaxojan xin chiwaqꞌ kawxojan.
Machi hunu mak chu iskolnilo isbꞌa yul inqꞌabꞌan.
40 Chiwakanhan inqꞌabꞌan satkanh,
chiwaqꞌni bꞌinahojan tato hanintiꞌan ay inkawilan yinh sunilbꞌal ej tiempo,
41 hayet chinnhijnatijan ye wespadahan xanhe chijeplahi.
Inqꞌabꞌan xin chinkꞌolbꞌahan,
kat wilnihan tzet chiꞌeliko ebꞌnaj ayko ishowal winhan,
kat waqꞌnihan ispaj selel tet ebꞌnaj chinyahnihan.
42 Chibꞌakchakanto inlitꞌan tuꞌ yu ischikꞌil ebꞌnaj.
Haxa wespadahan xin chitzokꞌnikanto isnimanil ebꞌnaj;
ay ischikꞌil islahwilal ebꞌnaj chiꞌilaxto preso,
ay ischikꞌil iswiꞌ ebꞌnaj iswiꞌehal yinh ebꞌnaj aqꞌom howal tuꞌ,” xhi Komam.
43 Hex nime konhobꞌlaj tzalahanhwed yinta iskonhobꞌ Komam,
yuto chispajtze Komam iskamikal ebꞌnaj ischejabꞌ,
kat istanhtzenkanilo Komam ebꞌnaj ayko ishowal yinh,
kat yaqꞌni nimankꞌulal Komam yinh iskonhobꞌ,» xhi yaꞌ Moisés.e
44 Apni yaꞌ Moisés sata sunil konhobꞌ Israel, yok yaꞌ yalno istzotiꞌal huneꞌ isbꞌit tet anma Israel; wal yaꞌ Josué, iskꞌahol yaꞌ Nun yetbꞌinhe isbꞌa yaꞌ yebꞌ yaꞌ Moisés. 45 Hayet lahwi yaꞌ Moisés yalni tzotiꞌ ayko yinh huneꞌ bꞌit tet sunil anma Israel, 46 yalni yaꞌ tet anma Israel hakaꞌ tiꞌ: «Sunil tzet mawalan teyet tiꞌ, txumchahojabꞌilo heyu kat heyalni tet heyuninal ta chiyako yinh iskꞌul isyijen chejbꞌanile tiꞌ. 47 Yuto mach komono hunteqꞌan chejbꞌanile tiꞌ, wal xin haꞌ chiꞌaqꞌni hekawil. Tato cheyije haꞌ chiꞌaqꞌni chꞌibꞌo yoj hekawil yet ay hex sat txꞌo txꞌotxꞌ chiꞌaqꞌlax teyet yet chexqꞌaxponikꞌto bꞌey haꞌ Jordán,» xhi yaꞌ Moisés.
Tonhe yilkaniko yaꞌ Moisés txꞌotxꞌ Canaán
48 Yinhtikꞌa huneꞌ tzꞌayik tuꞌ, tzotel Komam Dios Jahawil tet yaꞌ Moisés, yalni Komam:
49 «Asiꞌ bꞌey witzla Abarim, kat hawahto iswiꞌ witz Nebo ayko yul ismajul txꞌotxꞌ Moab, satakꞌti konhobꞌ Jericó. Haꞌ bꞌey tuꞌ xin chawilkanto txꞌotxꞌ Canaán, txꞌotxꞌ chiwaqꞌan tet anma Israel tiꞌ. 50 Haꞌ xin yinh iswiꞌ huneꞌ witz bꞌay chaxhahto tuꞌ, haꞌ tuꞌ chaxhkami, hakaꞌ yu iskam ebꞌyaꞌ hawichmam, yebꞌ hakaꞌ yu iskam hawuxhta Aarón yinh iswiꞌ witz Hor. 51 Yuto hekawanhil mach heyije tzet walan, mach heyeloj ta kaw ay welapnojan sata anma Israel yet ay hex bꞌey haꞌ Meriba-cades, bꞌey txꞌotxꞌ desierto Zin. 52 Wal xin haꞌ bꞌey tiꞌ chawilkanto txꞌotxꞌ chiwaqꞌan tet konhobꞌ Israel, mach chachapni sat txꞌotxꞌ,» xhi Komam.f