Isqꞌan yaꞌ Moisés iskꞌulal yibꞌanh ebꞌnaj kabꞌlahonh majan Israel
33
Hayet yalanhto maxhto chikam yaꞌ Moisés, ischejabꞌ Komam Dios, isqꞌannikano yaꞌ iskꞌulal Komam yibꞌanh ebꞌnaj Israel, 2 yalni yaꞌ hakaꞌ tiꞌ:«Chitit Komam bꞌey witz Sinaí, chonhistzejnhen bꞌey Seir,
chijeplapaxti isqꞌaqꞌal bꞌey witz Parán.
Hayet chitit tuꞌ, ayko xolal ismilalxa ebꞌnaj ángel,
iqꞌbꞌil chejbꞌanile yu iswatxꞌqꞌabꞌ, chixin tzejtzon isqꞌaqꞌal.
3 Xahan ay iskonhobꞌ Komam yu, chiskolni Komam makta yetxa yehi.
Haꞌ mak yetxa ye tuꞌ chiꞌay jahno sata Komam, chisyijen chejbꞌanile chal Komam.
4 Haꞌ chejbꞌanile aqꞌbꞌil wuhan isqꞌalomal anma titna yinh yaꞌ Jacoba yehi.
5 Haꞌ Komam ayko reyalb bꞌey Jesurún yet chiskutxbꞌan isbꞌa ebꞌnaj yahaw konhobꞌ,
yet chiskutxbꞌan isbꞌa hunu majan ebꞌnaj Israel.
6 Isqꞌanni yaꞌ Moisés iskꞌulal yibꞌanh yaꞌ Rubén.c
Ayojabꞌ iskawil anma titna yinh yaꞌ Rubén, machojabꞌ chikꞌayiloj,» xhi yaꞌ Moisés.
7 Yalni yaꞌ Moisés yinh yaꞌ Judá hakaꞌ tiꞌ:
«Mamin, abꞌe tzet chisqꞌan anma titna yinh yaꞌ Judá, kutxbꞌako iskꞌatanh yet konhobꞌ.
Hanhehojabꞌ yu isqꞌabꞌ ebꞌnaj chiskol isbꞌa,
wal xin kolwahanh yinh ebꞌnaj yu hawip,
kolwahanh yinh ebꞌnaj yu isqꞌoji yinh anma chiꞌaniko howal yinh,» xhi yaꞌ.
8 Yalni yaꞌ yinh yaꞌ Leví hakaꞌ tiꞌ:
«Mamin, yelo tzet chawoche yinh Tumim yebꞌ yinh Urim
aqꞌbꞌiliko yul isqꞌabꞌ ebꞌnaj hachejabꞌ levita yijem tawet.
Ebꞌnaj hawako yinh ilwebꞌal bꞌey Masah,
ebꞌnaj bꞌay hakajle habꞌa yebꞌi bꞌey haꞌ Meriba.
9 Kaw ekꞌbꞌal kachyoche ebꞌnaj sata ismam, ismiꞌ, yuninal, yuxhtaj;
yu isyijen ebꞌnaj haTzotiꞌ, isyijenpaxo ebꞌnaj chejbꞌanile chawala.
10 Haꞌ ebꞌnaj xin chihalni chejbꞌanile hawal tet anma titna yinh yaꞌ Jacob;
haꞌ ton kuybꞌanile hawal tet anma Israel.
Chisnhusni ebꞌnaj pom yebꞌ no noqꞌ chiꞌahto yibꞌanh ismexhahil yet xahanbꞌal tasataj.
11 Mam Jahawil, ayo hakꞌulal yibꞌanh tzet chiswatxꞌe ebꞌnaj levita tiꞌ;
kat hachahni yinh tzalahilal tzet chiyalte ebꞌnaj tawet yinh hamunil.
Haꞌ mak chiꞌaniko ishowal yinh ebꞌnaj, maqꞌbꞌil haqꞌahnito ismotx;
matxahojabꞌ xin chissikꞌkanh isbꞌa,» xhi yaꞌ.
12 Yalni yaꞌ Moisés yinh yaꞌ Benjamín hakaꞌ tiꞌ:
«Kaw xahan ay yaꞌ Benjamín yu Komam Dios,
kaw aqꞌankꞌulalnhetikꞌa ye yaꞌ yuto ayko yaꞌ iskawilal Komam, yu Komam ayko yenhelo yaꞌ,
ayahto yaꞌ yibꞌanh iswixikꞌ Komam yu haꞌ chitanhen yaꞌ,» xhi yaꞌ.
13 Yalnipaxo yaꞌ Moisés yinh yaꞌ José hakaꞌ tiꞌ:
«Yaqꞌabꞌayo Komam Dios isyaxil yibꞌanh istxꞌotxꞌ yu nixhte haꞌ nhabꞌ chitit satkanh,
yebꞌpaxo xin isyaxil ha haꞌ ayayto yalanh txꞌotxꞌ.
14 Kꞌulojabꞌ chiyu isqꞌanbꞌilo sat istzꞌunubꞌ yu yoj tzꞌayik,
chiꞌojabꞌ chiꞌeliko sat tzꞌunubꞌ yu ixahaw.
15 Yaqꞌabꞌayo Komam iskꞌulal yibꞌanh sat istzꞌunubꞌ chiyako yinhla istzalanil witz yebꞌ yinhla wonhan;
hunteqꞌan witz ayxatikꞌa yettax kaw payat.
16 Nohojabꞌilo sat istxꞌotxꞌ yu sat tzꞌunubꞌ, yu isyaxilal Komam Dios,
Komam isye isbꞌa xol teꞌ txꞌix bꞌayah jopla qꞌaꞌ.
Sunil iskꞌulal tiꞌ ayojabꞌ yibꞌanh anma titna yinh yaꞌ José, yaꞌ sikꞌbꞌililo xol yuxhtaj.
17 Kaw xin saqꞌal jilni yaꞌ, hakaꞌ hunu noꞌ tzehla wakax bꞌabꞌel pitzkꞌahi; kaw xin ay yip hakaꞌ noꞌ búfalo,
kat istejwa yinh sunil ej konhobꞌ masanta islahobꞌal txꞌo txꞌotxꞌ. Haꞌ ebꞌnaj kaw ay yip,
haꞌ ton ebꞌnaj 10 (lahonhebꞌ) mil isbꞌisil anma titna yinh yaꞌ Efraín;
yebꞌpaxo yinh ebꞌnaj titna yinh yaꞌ Manasés, txꞌiꞌal mil isbꞌisil,» xhi yaꞌ Moisés.
18 Yalni yaꞌ Moisés yinh yaꞌ Zabulón yebꞌ yinh yaꞌ Isacar hakaꞌ tiꞌ:
«Hex titna yinh yaꞌ Zabulón, tzalahanhwej bꞌayejtuꞌwal chexekꞌi.
Haxa hex titna yinh yaꞌ Isacar tzalahanhwe yul hemantiado.
19 Cheyawte sunil nime konhobꞌ bꞌey iswiꞌ witz,
kat heyaqꞌni hexahanbꞌal hakaꞌ chal iskꞌul Komam Dios,
mach chexqꞌoji heloni no noqꞌ chiꞌahti xol haꞌ mar;
kat heloni isyaxil ay istiꞌla ha haꞌ,» xhi yaꞌ.
20 Yalnipaxo yaꞌ Moisés yinh anma titna yinh yaꞌ Gad hakaꞌ tiꞌ:
«Alaxojabꞌiko ismay Komam aqꞌnikano niman istxꞌotxꞌ.
Hakaꞌ yay pajno hunu noꞌ bꞌalam ismajwahi,
hak tuꞌ ye ebꞌnaj titna yinh yaꞌ Gad,
chistzilnikanto isqꞌabꞌ anma yebꞌ iswiꞌ anma ayko ishowal yinh.
21 Haꞌ iqꞌnhe txꞌo txꞌotxꞌ kaw kꞌul, haꞌ huneꞌ txꞌotxꞌ tuꞌ hakaꞌta yet ebꞌnaj capitán ye txꞌotxꞌ.
Ok yaꞌ yahawo xol anma Israel isyijen sunil tzet chal Komam,
iswatxꞌenpaxo istoholal xol yet konhobꞌ Israel,» xhi yaꞌ.
22 Yalnipaxo yaꞌ Moisés yinh anma titna yinh yaꞌ Dan hakaꞌ tiꞌ:
«Yaꞌ Dan, lahan yaꞌ hakaꞌ hunu yunin noꞌ bꞌalam chitit tꞌujla bꞌey txꞌotxꞌ Basán,» xhi yaꞌ.
23 Yalni yaꞌ yinh yaꞌ Neftalí hakaꞌ tiꞌ:
«Haꞌ anma titna yinh yaꞌ Neftalí, kaw kꞌul yekano yu Komam Dios Jahawil,
kaw txꞌiꞌal iskꞌulal Komam aykanayo yibꞌanh.
Yet ebꞌnaj ye txꞌotxꞌ istiꞌ haꞌ lago masanta yinh yetkꞌulal sur,» xhi yaꞌ.
24 Yalnipaxo yaꞌ Moisés yinh yaꞌ Aser hakaꞌ tiꞌ:
«Yaqꞌabꞌayo Komam iskꞌulal yibꞌanh yaꞌ Aser sata ebꞌyaꞌ yuxhta yaꞌ, iskꞌahol yaꞌ Jacob.
Kaw xahanojabꞌ ay yaꞌ yu ebꞌyaꞌ yuxhtaj, kat istxꞌahni yoj yu aceite.
25 Kꞌulojabꞌnhetikꞌa chu ismajchenkano ispultahil iskonhobꞌ yu chꞌen hierro yebꞌ bronce.
Aynhetikꞌa yip sunilbꞌal tzꞌayik.
26 Machi hunu mak hakaꞌ isDiosal konhobꞌ Jerusún,
chiꞌekꞌ Komam yibꞌanh ej moyan yu isqꞌaqꞌal yip, kat yul kolwal teyinh.
27 Haꞌ Komam Dios, Komam aynhetikꞌa yinh sunilbꞌal tiempo,
haꞌ chexkolni; haꞌ isqꞌabꞌ Komam kaw aykano yip chikolwa teyinh.
Haꞌ Komam tzumbꞌenilo anma ayko ishowal teyinh yinh hesat,
yalni Komam teyet ta chetanhtzekaniloj.
28 Hex Israel hex tiꞌ, hesunil chexeh sat hetxꞌotxꞌ yinh aqꞌankꞌulal.
Heyuninal chipohcha teyinh kaw ay ixim trigo yebꞌ teꞌ uva sat istxꞌotxꞌ;
chꞌaypaxo txihnhabꞌ yibꞌanh hetzꞌunubꞌ.
29 ¡Saqꞌal heyet hex Israel hex tiꞌ,d machi hunu konhobꞌ hakaꞌ hex tiꞌ!
Haꞌ Komam Jahawil kexkolnikanoj, haꞌ chexilni, kat iskolwa teyinh.
Hakaꞌ heyespada yeko Komam, yuxin chexqꞌoji yinh ebꞌnaj ayko ishowal teyinh,
kat yaykꞌay ebꞌnaj yul heqꞌabꞌ,
kat hexanhnikanayo ebꞌnaj,» xhi yaꞌ Moisés.