Yet chiꞌok yaꞌ Aarón yebꞌ iskꞌahol yinh ismunil Komam
29
Yalnipaxo Komam Dios tet yaꞌ Moisés: «Hayet chischahni yaꞌ Aarón ismunil yinh sacerdotehal yebꞌ iskꞌahol, chixeklaxti hunu noꞌ tzehla wakax yebꞌ kakꞌonho noꞌ meꞌ, noꞌ machi istzakaꞌil. 2 Kat iswatxꞌelax ixim nixhte pan yebꞌ ixim nime pan yinh ixim harina kaw kꞌul, machi xin yanhal ixim chiꞌoki; ixim harina tuꞌ chisomlaxiko aceite xol ixim; kat iswatxꞌelaxpaxo ixim wonhkꞌox pan yinh ixim, yajaꞌ machi yanhal ixim chiꞌokpaxoj. 3 Chawanayto pan yul huneꞌ motx, yet chawinito huneꞌ motx tuꞌ wetan, kat hawiniti huneꞌ noꞌ tzeh wakax yebꞌ kakꞌonh noꞌ meꞌ chawalte wetan. 4 Tzujan tuꞌ xin, kat hawiniti yaꞌ Aarón yebꞌ ebꞌnaj iskꞌahol istiꞌ ispultahil watutan, bꞌay chinchah hinbꞌahan yebꞌ hex; kat xin yaxhni ebꞌnaj bꞌey tuꞌ. 5 Kat hawiniti qꞌap xilqꞌape watxꞌebꞌilxa chiꞌok yinh yaꞌ sacerdote Aarón tuꞌ, kat hawaniko xil isqꞌap yaꞌ tuꞌ yinh; qꞌap túnika, qꞌap capa, qꞌap chaleko, qꞌap yet istxam iskꞌul, kat hakꞌalniko istxꞌambꞌalil qꞌap chaleko yinh yikta yaꞌ. 6 Kat hawanahto qꞌap chꞌahto yinh iswiꞌ yaꞌ, haꞌ yinh qꞌap tuꞌ xin chawako chꞌen placa; haꞌ chꞌen placa tuꞌ chiyeniloj ta insacerdotehan ye yaꞌ. 7 Kat hawinikanh teꞌ aceite olivo chiꞌalaxiko yinh mak chiꞌok yinh inmunilan, kat hajobꞌnayo teꞌ yibꞌanh iswiꞌ yaꞌ.a 8 Kat ishitzpaxiko ebꞌnaj iskꞌahol yaꞌ Aarón tuꞌ, kat hawanipaxiko qꞌap túnika yinh ebꞌnaj; 9 kat hawaniko istxꞌambꞌal yaꞌ Aarón tuꞌ yebꞌ ebꞌnaj kꞌahole, kat hawaniko qꞌap chiꞌahto yinh iswiꞌ ebꞌnaj, hak tuꞌ chu yaqꞌlaxkano yip ebꞌnaj yinh ismunil, kat yok ebꞌnaj insacerdotehojan, huneꞌ tiꞌ chejbꞌanile chiwaqꞌan yinh sunilbꞌal tiempo.10 »Lahwi tuꞌ, kat hawinito noꞌ tzeh wakax bꞌey watuttuꞌan, bꞌay chinchah hinbꞌahan yebꞌ hex, yunhe yanayo isqꞌabꞌ yaꞌ Aarón yebꞌ ebꞌnaj kꞌahole yibꞌanh iswiꞌ noꞌ, 11 kat hapotxꞌni noꞌ yinh insatan, haninan heYahawil, sata istiꞌ watutan bꞌay chonhoknapnoj, bꞌay chinchah hinbꞌahan yebꞌ hex. 12 Kat hamasnikanh hanikꞌo ischikꞌil noꞌ yu yiximal haqꞌabꞌ, kat hamasniko chikꞌ tuꞌ yinh yukꞌaꞌil ismexhahil xahanbꞌal, haxa sunil ischikꞌil noꞌ xin chajobꞌayo yich yet xahanbꞌal tuꞌ. 13 Haxa ismantecahil istxꞌanhal istzaꞌ noꞌ, yebꞌ ismantecahil issasibꞌ noꞌ, yebꞌ ismantecahil yubꞌal noꞌ, chanhusto yibꞌanh yet xahanbꞌal tuꞌ. 14 Yajaꞌ wal ischibꞌehal noꞌ, yebꞌ istzꞌumal noꞌ yebꞌ istzaꞌ noꞌ, yintalto konhobꞌ chinhuslaxto, yuto xahanbꞌal ye yinh ismul anma Israel.
15 »Hak tuꞌ xin chu hawiniti huneꞌ noꞌ winaj meꞌ, kat yanayo yaꞌ Aarón yebꞌ ebꞌnaj iskꞌahol isqꞌabꞌ yibꞌanh iswiꞌ noꞌ. 16 Tzujan tuꞌ kat hepotxꞌni noꞌ, kat hatixhnayo ischikꞌil noꞌ yibꞌanh yet xahanbꞌal yebꞌ sunil yinhla iskꞌul yet xahanbꞌal. 17 Kat hatzokꞌnayo noꞌ, kat hatxꞌahnilo istxꞌanhal yul iskꞌul noꞌ yebꞌ isbꞌul noꞌ, kat hahunbꞌanayo ischibꞌehal noꞌ tzokꞌbꞌilayo tuꞌ yebꞌ iswiꞌ noꞌ. 18 Lahwi tuꞌ, kat hanhusni noꞌ yibꞌanh ismexhahil yet xahanbꞌal wetan hanin Yahawilintiꞌan, huneꞌ xahanbꞌal chinhuslax tuꞌ kaw xuqꞌ sam yul insatan.
19 »Kat hawinipaxti hunxa noꞌ winaj meꞌ, kat yanipaxayo isqꞌabꞌ yaꞌ Aarón yebꞌ ebꞌnaj iskꞌahol yaꞌ yibꞌanh iswiꞌ noꞌ. 20 Lahwi tuꞌ kat hapotxꞌni noꞌ, kat hamasnikanh hanikꞌ ischikꞌil noꞌ yu yiximal haqꞌabꞌ, kat hamasnipaxiko yinh iswiꞌ istxikin yaꞌ Aarón yebꞌ ebꞌnaj iskꞌahol, yinh iswatxꞌqꞌabꞌ; kat hamasnipaxiko chikꞌ yinh ismiꞌehal yiximal isqꞌabꞌ ebꞌnaj yinh iswatxꞌqꞌabꞌ, yebꞌ xin ismiꞌehal yiximal yoj ebꞌnaj yinh iswatxꞌqꞌabꞌ; kat hatixhnipaxayo ischikꞌil noꞌ yibꞌanh yet xahanbꞌal yebꞌ sunil yinhla iskꞌul yet xahanbꞌal. 21 Haxa ischikꞌil noꞌ ay yibꞌanh yet xahanbꞌal, chasom yebꞌ teꞌ aceite chiꞌokniko yet chiꞌalaxiko hunu mak yinh inmunilan, kat hatxihnayo yibꞌanh yaꞌ Aarón yebꞌ yinh xil isqꞌap yaꞌ; kat hatxihnipaxayo yibꞌanh ebꞌyaꞌ iskꞌahol yaꞌ yebꞌ yinh xil isqꞌap ebꞌyaꞌ.
22 »Lahwi tuꞌ kat hawiniti ismantecahil noꞌ winaj meꞌ tuꞌ, isnhe noꞌ, yebꞌ ismantecahil yul iskꞌul noꞌ, yebꞌ ismantecahil issasibꞌ noꞌ, yebꞌ kabꞌebꞌ yubꞌal noꞌ, yebꞌ ismantecahil isbꞌul noꞌ yinh iswatxꞌ; yuto haꞌ noꞌ chꞌaqꞌlax xahanbꞌalil yet chꞌok ebꞌnaj yinh ismunil. 23 Kat hawinikanh hunu ixim pan nimejal, yebꞌ hunu ixim pan ayko yaceitehal, yebꞌ xin hunxa ixim pan machi yanhal ayko yul nichꞌan motx chꞌay yinh insatan; 24 kat hawaniko noꞌ yebꞌ ixim pan yul isqꞌabꞌ yaꞌ Aarón yebꞌ yul isqꞌabꞌ ebꞌnaj iskꞌahol yaꞌ, kat isbꞌatxnikanh ebꞌnaj, kat yalten ebꞌnaj noꞌ wetan, hanin Yahawilintiꞌan. 25 Lahwi tuꞌ kat hawinilo noꞌ yul isqꞌabꞌ ebꞌnaj, kat hanhusnito noꞌ yibꞌanh ismexhahil yet xahanbꞌal yebꞌ noꞌ chibꞌe chitzꞌato yinh xahanbꞌalil wetan, huneꞌ xahanbꞌal tuꞌ kaw xuqꞌ yul sam yinh insatan.
26 »Hayet chischahnikano yaꞌ Aarón ismunil yinh sacerdotehal tuꞌ, chawinipaxokanh istxam iskꞌul noꞌ meꞌ, kat habꞌatxnikanh yinh insatan, kat hawalten noꞌ wetan, hanin Yahawilintiꞌan; haꞌ noꞌ istxam iskꞌul tuꞌ, hawet ye noꞌ. 27 Kat hapohnilo noꞌ istxam iskꞌul hawalte wettuꞌan yebꞌ noꞌ isbꞌul, yuto haꞌ noꞌ chihaltelax yet chꞌok ebꞌnaj sacerdotehal yinh ismunil; noꞌ chibꞌe tuꞌ chikꞌubꞌalaxkanh noꞌ, yuto yet yaꞌ Aarón ye noꞌ yebꞌ ebꞌnaj iskꞌahol. 28 Noꞌ chibꞌe tuꞌ, yet yaꞌ Aarón ye noꞌ yebꞌ iskꞌahol. Huneꞌ tiꞌ chejbꞌanile chukano xol ebꞌnaj Israel yinh sunilbꞌal ej tiempo. Haꞌ noꞌ kabꞌ majan chibꞌe tuꞌ chiyaqꞌ anma Israel xahanbꞌal yet aqꞌankꞌulal wetan, hanin Yahawilintiꞌan.
29 »Wal xil isqꞌap yaꞌ Aarón kaw ay yelapno yehi, qꞌap chiyako yaꞌ yinh ismunil yinh sacerdotehal, chikankano qꞌap tet yuninal yaꞌ chipohchakanh yet bꞌaqꞌinh. Qꞌap chako ebꞌnaj yet chischahnikano ebꞌnaj ismunil, yet chꞌalaxkaniko ebꞌnaj yinh sacerdotehal. 30 Haꞌ naj iskꞌahol yaꞌ Aarón chꞌok sacerdotehal selelo yaꞌ tuꞌ yet bꞌaqꞌinh, yet chꞌok naj yinh ismunil Komam yulbꞌal hujebꞌ tzꞌayik, kat yaniko naj qꞌap yet sacerdote yinh yet chibꞌeykꞌo naj watuttuꞌan, yebꞌ bꞌay chiwilayo hinbꞌahan yebꞌ naj. 31 Kat hawiniti noꞌ meꞌ chꞌaqꞌlax yinh yet chꞌalaxiko ebꞌnaj yinh sacerdotehal; haꞌ yul ehobꞌal txahul, haꞌ tuꞌ chatxik ischibꞌehal noꞌ. 32 Wal yaꞌ Aarón yebꞌ ebꞌnaj iskꞌahol chiskꞌux ebꞌnaj ischibꞌehal noꞌ meꞌ yebꞌ iswahni ebꞌnaj ixim pan ayayto yul teꞌ nichꞌan motx. Chiwaꞌ ebꞌnaj sata ispultahil watutan bꞌay chinchah hinbꞌahan yebꞌ ebꞌnaj. 33 Chiskꞌux ebꞌnaj chiꞌok sacerdotehal tuꞌ noꞌ, yuto xaꞌaqꞌlax noꞌ xahanbꞌalil wetan, yu waqꞌni nimankꞌulalan yinh ismul ebꞌnaj yet chꞌalaxkaniko ebꞌnaj yinh inmunilan; yajaꞌ wal komon anma mach chu iskꞌuxni noꞌ, yuto wetan ye noꞌ. 34 Yaj ta xin ayto noꞌ chibꞌe xaꞌok yinh xahanbꞌalil tuꞌ yebꞌ ixim pan matxa chilahwi yu ebꞌnaj, mach chu iskꞌuxlax noꞌ yinh hunxa tzꞌayik, wal xin yilal isnhuslaxto noꞌ, yunhe machi hunu komon anma chikꞌuxni noꞌ, yuto wetan ye noꞌ.
35 »Sunil tzet chiwaltiꞌan, yilal hayijen yinh yaꞌ Aarón yebꞌ yinh ebꞌnaj iskꞌahol yaꞌ, hakaꞌtikꞌa chu walnihan tawet tiꞌ, hakojabꞌ tuꞌ chu hayijeni. Hujebꞌ tzꞌayik chito yet chꞌokkano ebꞌnaj yinh inmunilan yinh sacerdotehal tuꞌ. 36 Hunun tzꞌayik hawaqꞌni hunun noꞌ tzehla wakax yinh xahanbꞌalil yu waqꞌnihan nimankꞌulal yinh mule; kat hasajnhenpaxo ismexhahil yet xahanbꞌal. Chanhusni xahanbꞌal yibꞌanh ismexhahil yet xahanbꞌal tuꞌ yinh ismul anma, kat hajobꞌnayo aceite yibꞌanh ismexhahil yet xahanbꞌal tuꞌ yet chiꞌokkano yinh ismunil. 37 Yulbꞌal hujebꞌ tzꞌayik chawaqꞌ xahanbꞌal yibꞌanh ismexhahil yet xahanbꞌal tuꞌ, yu waqꞌni nimankꞌulalan yinh ismul anma, hak tuꞌ chu yokkano huneꞌ ismexhahil yet xahanbꞌal yinh ismunil, yebꞌ xin kaw txahul chukanoj. Sunil tzet ye tuꞌ chꞌok tzabꞌno yinh ismexhahil yet xahanbꞌal tuꞌ, chisajbꞌikanoj, yuto wetan yehi.
Xahanbꞌal chꞌaqꞌlax hunun tzꞌayik
38 »Yinh hunun tzꞌayik, yilal chꞌaqꞌlax kakꞌonh noꞌ meꞌ huneꞌ habꞌil yinh xahanbꞌalil yibꞌanh ismexhahil yet xahanbꞌal. 39 Huneꞌ noꞌ chawalte yinh sahabꞌ sakꞌayal, hunxa noꞌ xin chawalte yinh qꞌejbꞌiyal. 40 Haꞌ noꞌ bꞌabꞌel meꞌ chawaqꞌ xahanbꞌalil yinh yet sahabꞌ sakꞌayal, chawaqꞌnipaxo kanhebꞌ libra ixim harina kaw kꞌul sombꞌil huneꞌ litro teꞌ aceite chꞌel yinh teꞌ olivo xol, kat hajobꞌnayo hunu litro vino hayebꞌalqꞌabꞌ. 41 Haktikꞌapax tuꞌ chawute yinh hunxa noꞌ meꞌ chawaqꞌ xahanbꞌalil yinh qꞌejbꞌiyal, yebꞌpaxo ixim harina yebꞌ vino yinh yebꞌalqꞌabꞌehal. Haꞌ hunteqꞌan xahanbꞌal chinhuslax tuꞌ, kaw xuqꞌ yapni sam yinh insatan. 42 Hunteqꞌan xahanbꞌal chinhuslax yu yalaxiko inmayan, chinhuslaxpaxo yu heyuninal chipohchakanh texol, chenhus xahanbꞌal tuꞌ insatajan, hanin Yahawilintiꞌan bꞌay chonhoknapnoj yul watutan bꞌay chinchah hinbꞌahan yebꞌ ebꞌnaj Israel kat intzotelan tawet. 43 Haꞌ bꞌey tuꞌ chinchah hinbꞌahan yebꞌ yuninal yaꞌ Israel, bꞌey huneꞌ watuttuꞌan kaw ay yelapnoj yehi yuto haꞌ tuꞌ ayayo isqꞌaqꞌal wipan.
44 »Chinsikꞌkanilojan huneꞌ nha aykanh qꞌap qꞌap yibꞌanh tuꞌ wetojan, yebꞌpaxo ismexhahil yet xahanbꞌal; kat insikꞌnikanilojan yaꞌ Aarón yebꞌ ebꞌnaj iskꞌahol, kat ismunla yinh sacerdotehal, kaw xin wetan chukanikoj. 45 Hanintiꞌan chinehayojan xol anma Israel tiꞌ. Haninan xin chinokan isDiosaloj anma. 46 Hak tuꞌ xin chu yohtanhenilo anma tato hanintiꞌan Yahaw hinan, kat yohtanhelaxpaxoj tato Dios hinan, kat yohtanhelaxpaxoj tato haninan wilojan anma Israel sat txꞌotxꞌ Egipto yunhe wehayojan xol, hanintiꞌan Yahawil yebꞌ heDiosal wehan,» xhi Komam tet yaꞌ Moisés.