4 Isyijen yaꞌ Moisés tzet yal Komam Jahawil tuꞌ. Iskutxbꞌan isbꞌa anma Israel istiꞌ ispultahil Yatut Komam. 5 Lahwi tuꞌ, yalni yaꞌ Moisés tet anma Israel: «Haꞌ hunteqꞌan tiꞌ, yal Komam Dios ta chikowatxꞌe,» xhi yaꞌ.

6 Ischejni yaꞌ Moisés ta chihitziko yaꞌ Aarón yebꞌ ebꞌnaj iskꞌahol iskꞌatanh yu istxꞌahni yaꞌ ebꞌnaj yu ha haꞌ.^a 7 Lahwi tuꞌ, yaniko yaꞌ Moisés xil isqꞌap yaꞌ Aarón tuꞌ qꞌap túnika, iswatxꞌeniko yaꞌ iskꞌalil yikta yaꞌ;^c ishukbꞌaniko yaꞌ qꞌap xilqꞌape hojan ye istel yinh yaꞌ, yanipaxiko yaꞌ qꞌap chaleko yibꞌanh xil isqꞌap yaꞌ tuꞌ; iskꞌalniko yaꞌ qꞌap chaleko tuꞌ yu istxꞌanhal qꞌap.^b 8 Lahwi tuꞌ, yanipaxiko yaꞌ qꞌap yet istxam iskꞌul yibꞌanh qꞌap xilqꞌape tuꞌ, yanipaxiko yaꞌ chꞌen Urim yebꞌ chꞌen Tumim yinh qꞌap yet istxam iskꞌul tuꞌ.^d 9 Yanahto yaꞌ Moisés tuꞌ qꞌap chiꞌahto yinh iswiꞌ yaꞌ Aarón, haxa sat qꞌap yako yaꞌ chꞌen placa nabꞌa oro. Haꞌ chꞌen placa tuꞌ, chiyeniloj ta sikꞌbꞌiliko yaꞌ yok yinh ismunil Komam Dios Jahawil, hakaꞌtikꞌa yu yalni Komam.

10 Lahwi tuꞌ, yinikanh yaꞌ Moisés teꞌ aceite chijobꞌlaxayo yibꞌanh tzet chiꞌokkano yeto Komam. Isjobꞌnayo yaꞌ teꞌ yibꞌanh Yatut Komam, yebꞌ yibꞌanh sunil tzet ayikto yul, hak tuꞌ yu yokkano yeto Komam. 11 Istxihnayo yaꞌ hujel teꞌ aceite tuꞌ yibꞌanh yet xahanbꞌal. Isjobꞌnipaxayo yaꞌ aceite tuꞌ yibꞌanh yet xahanbꞌal tuꞌ, yebꞌ yibꞌanh sunil tzet chiꞌokniko yinh xahanbꞌal, yebꞌ yibꞌanh chꞌen niman pechꞌan, yebꞌ yibꞌanh yojbꞌal chꞌen, yu yokkano sunil tuꞌ yeto Komam yinh ismunil. 12 Lahwi tuꞌ, isjobꞌnayo yaꞌ teꞌ aceite yibꞌanh iswiꞌ yaꞌ Aarón, yu yokkano yaꞌ munil yinh sacerdotehal.^e 13 Yalni yaꞌ Moisés ta chihitziko ebꞌnaj iskꞌahol yaꞌ Aarón, yaniko yaꞌ xil isqꞌap ebꞌnaj, qꞌap túnika, iswatxꞌeniko yaꞌ iskꞌalil yikta ebꞌnaj, yanahto yaꞌ qꞌap chiꞌahto yinh iswiꞌ ebꞌnaj, hakaꞌtikꞌa yu yalni Komam Dios Jahawil tet yaꞌ Moisés tuꞌ.

14 Lahwi tuꞌ, ischejni yaꞌ Moisés yilaxoti noꞌ tzehla wakax, noꞌ chihaltelax xahanbꞌalil yinh mule. Yanayo yaꞌ Aarón yebꞌ ebꞌnaj iskꞌahol isqꞌabꞌ yibꞌanh iswiꞌ noꞌ, 15 ispotxꞌnikamo yaꞌ Moisés noꞌ, yinikanh yaꞌ hanikꞌ ischikꞌil noꞌ yu yiximal isqꞌabꞌ, ismasniko yaꞌ yinh yukꞌaꞌ ismexhahil xahanbꞌal ayko yinh hunun istxikin, yu issajnhenkano yaꞌ mexha yet xahanbꞌal tuꞌ. Haxa yaqꞌbꞌilxa ischikꞌil noꞌ, istixhayo yaꞌ yich yet xahanbꞌal. Hak tuꞌ yokkano huneꞌ yet xahanbꞌal tuꞌ yeto Komam, yuto haꞌ tuꞌ chꞌaqꞌlax nimankꞌulal yinh mule.

16 Lahwi tuꞌ, yinilo yaꞌ Moisés ismantecahil yul iskꞌul noꞌ tzehla wakax tuꞌ, yebꞌ ismantecahil isqꞌejtxꞌotxꞌ noꞌ, yinipaxilo yaꞌ kabꞌebꞌ yubꞌal noꞌ yebꞌ ismantecahil, isnhusni yaꞌ sunil tuꞌ yibꞌanh yet xahanbꞌal. 17 Yajaꞌ wal yaqꞌbꞌilxa noꞌ xin, noꞌ istzꞌumal, noꞌ ischibꞌehal yebꞌ istzaꞌ noꞌ, nhuslaxto yintalto campamento, hakaꞌtikꞌa yu yalni Komam Jahawil tet yaꞌ Moisés.

18 Ischejni yaꞌ Moisés yilaxoti noꞌ winaj meꞌ, noꞌ chinhuslaxto xahanbꞌalil. Yanayo yaꞌ Aarón yebꞌ ebꞌnaj iskꞌahol yaꞌ isqꞌabꞌ yibꞌanh iswiꞌ noꞌ. 19 Ispotxꞌni yaꞌ Moisés noꞌ, istxinayo yaꞌ ischikꞌil noꞌ yinhla kanhebꞌ iskꞌul yet xahanbꞌal. 20 Istzokꞌnayo yaꞌ ischibꞌehal noꞌ, isnhusni yaꞌ iswiꞌ noꞌ, yebꞌ noꞌ ischibꞌehal istzokꞌayoj, yebꞌ ismantecahil noꞌ. 21 Istxꞌahni yaꞌ noꞌ yul iskꞌul, yebꞌ noꞌ yoj, isnhusni yaꞌ sunil noꞌ yibꞌanh mexha yet xahanbꞌalil tet Komam. Haꞌ huneꞌ tuꞌ yebꞌalqꞌabꞌe kaw xuqꞌ chꞌapni sam sata Komam Jahawil; hakaꞌtikꞌa yu yalnikano Komam tet yaꞌ Moisés.

22 Lahwi tuꞌ, ischejni yaꞌ Moisés yilaxoti hunxa noꞌ winaj meꞌ, noꞌ chihaltelax yet chiꞌok hunu mak yinh ismunil Komam Dios. Yanayo yaꞌ Aarón yebꞌ ebꞌnaj iskꞌahol isqꞌabꞌ yibꞌanh iswiꞌ noꞌ, 23 ispotxꞌnikamo yaꞌ Moisés noꞌ, yinikanh yaꞌ hanikꞌ ischikꞌil noꞌ, ismasniko yaꞌ yinh iswiꞌ istxikin yaꞌ Aarón yinh iswatxꞌqꞌabꞌ, yebꞌ yinh huneꞌ niman yiximal isqꞌabꞌ yaꞌ yinh iswatxꞌ, yebꞌpaxo yinh huneꞌ niman yiximal yoj yinh iswatxꞌqꞌabꞌ. 24 Lahwi tuꞌ, yalnipaxo yaꞌ Moisés ta chihitzpaxiko ebꞌnaj iskꞌahol yaꞌ Aarón, ismasnipaxiko yaꞌ Moisés tuꞌ ischikꞌil noꞌ yinh iswiꞌ istxikin ebꞌnaj yinh iswatxꞌqꞌabꞌ, yebꞌ yinh huneꞌ niman yiximal isqꞌabꞌ ebꞌnaj yinh iswatxꞌqꞌabꞌ, yebꞌ yinh huneꞌ niman yiximal yoj ebꞌnaj yinh iswatxꞌqꞌabꞌ; haxa yaqꞌbꞌilxa ischikꞌil noꞌ, istxihayo yaꞌ yinhla yet xahanbꞌal yinh iskanhebꞌ iskꞌul.

25 Lahwi tuꞌ yinikanh yaꞌ Moisés ismantecahil isnhe noꞌ yebꞌ ismantecahil yul iskꞌul noꞌ, yebꞌ ismantecahil isqꞌejtxꞌotxꞌ noꞌ, yebꞌ kabꞌebꞌ yubꞌal noꞌ yebꞌ ismantecahil, yebꞌ isbꞌul noꞌ yinh iswatxꞌqꞌabꞌ. 26 Yinipaxokanh yaꞌ huneꞌ ixim pan machi yanhal aykoj, yul teꞌ nichꞌan motx, ixim chiꞌalaxayo sata Komam. Yinipaxokanh yaꞌ ixim niman pan sombꞌiliko aceite xol, yebꞌ ixim wonhkꞌox pan. Hun xin yute yaꞌ ixim yebꞌ ismantecahil noꞌ winaj meꞌ tuꞌ, yebꞌ isbꞌul noꞌ yinh iswatxꞌqꞌabꞌ. 27 Yaniko yaꞌ Moisés, sunil tuꞌ yul isqꞌabꞌ yaꞌ Aarón yebꞌ ebꞌnaj iskꞌahol, yu isbꞌatxnikanh ebꞌnaj yinh tzet chalte sata Komam. 28 Lahwi tuꞌ, ischahnilo yaꞌ Moisés sunil tuꞌ yul isqꞌabꞌ ebꞌnaj, isnhusni yaꞌ yibꞌanh xahanbꞌal bꞌay lanhan istzꞌay sata Komam. Haꞌ huneꞌ tuꞌ, isyebꞌalqꞌabꞌ ebꞌnaj yu yokkano ebꞌnaj yinh ismunil yinh sacerdotehal hakaꞌtikꞌa yu yalnikano Komam. Huneꞌ xahanbꞌal tuꞌ, kaw xuqꞌkano sam yul sat Komam Jahawil.

29 Yinipaxokanh yaꞌ Moisés istxam iskꞌul noꞌ meꞌ haltelax yu yokkano ebꞌnaj yinh ismunil tuꞌ, isbꞌatxnikanh yaꞌ noꞌ istxam iskꞌul tuꞌ sata Komam Jahawil, haꞌ noꞌ istxam iskꞌul tuꞌ okkano yu yaꞌ Moisés, hakaꞌtikꞌa yu yalnikano Komam.^f

30 Lahwi tuꞌ, yinipaxokanh yaꞌ Moisés hanikꞌ teꞌ aceite, teꞌ chijobꞌlaxayo yibꞌanh mak chiꞌokkano yinh ismunil Komam, yebꞌ ischikꞌil no noqꞌ ayayo yibꞌanh yet xahanbꞌal, istxihnayo yaꞌ yibꞌanh yaꞌ Aarón, yebꞌ yibꞌanh xil isqꞌap yaꞌ. Istxihnipaxayo yaꞌ yibꞌanh ebꞌnaj iskꞌahol yaꞌ, yebꞌ yibꞌanh xil isqꞌap ebꞌnaj. Hak tuꞌ yu yokkano yaꞌ Aarón yebꞌ ebꞌnaj iskꞌahol yebꞌ xil isqꞌap yinh ismunil Komam.

31 Lahwi tuꞌ, yalni yaꞌ Moisés tet yaꞌ Aarón yebꞌ tet ebꞌnaj iskꞌahol yaꞌ: «Txiklaxojabꞌ noꞌ chibꞌe istiꞌ Tabernáculo, Yatut Komam watxꞌebꞌil yinh qꞌap qꞌap, bꞌay chiskutxbꞌa isbꞌa anma Israel sata Komam, haꞌ bꞌey tuꞌ xin chekꞌux noꞌ, chewanipaxo ixim pan, ixim ayayto yul teꞌ nichꞌan motx, ixim haltelax yu heyokkano yinh hemunil, hakaꞌ yu yalnikano Komam wetan, yet yalni hakaꞌ tiꞌ: “Haꞌ yaꞌ Aarón yebꞌ ebꞌnaj iskꞌahol chikꞌuxni noꞌ chibꞌe tiꞌ, kachi,” xhi Komam wetan. 32 Haxa noꞌ chibꞌe yebꞌ ixim machi lahwi heyu, palan henhusnikantoj. 33 Haꞌ bꞌey istiꞌ Tabernáculo, Yatut Komam tuꞌ, bꞌay chikokutxbꞌa kobꞌa sata Komam, haꞌ tuꞌ chexeh yulbꞌal hujebꞌ tzꞌayik, mach chexhitzilo bꞌey tuꞌ masanto chitzꞌajna hujebꞌ tzꞌayik, hakaꞌ yu yalni Komam yet chexokkano yinh hemunil. 34 Haꞌ Komam halnikanoj ta yilal hewatxꞌen hakaꞌ mayu yinh huneꞌ tzꞌayik tiꞌ, yu yaqꞌni Komam nimankꞌulal yinh hemul cheyakoj. 35 Yuxin wal tinanh, yilal hekankano istiꞌ Yatut Komam watxꞌebꞌil yinh qꞌap qꞌap bꞌay chiskutxbꞌa kobꞌa yebꞌ Komam. Hujebꞌ tzꞌayik yebꞌ hujebꞌ aqꞌbꞌal chexkankanoj, kat heyijen hunteqꞌan chejbꞌanile yakano Komam tiꞌ, haxinwal mach chexkami, yuto hak tuꞌ yu yalnikano Komam wetan,» xhi yaꞌ Moisés tet ebꞌnaj.

36 Hak tuꞌ yu isyijen yaꞌ Aarón yebꞌ ebꞌnaj iskꞌahol yinh sunil tzet ischej Komam yalaꞌ yaꞌ Moisés.