Xahanbꞌal yaqꞌ yaꞌ Aarón
9
Haxa yinh iswaxajebꞌ tzꞌayik, yawten yaꞌ Moisés yaꞌ Aarón yebꞌ ebꞌnaj iskꞌahol, yebꞌ ebꞌnaj ichamta winaj Israel. 2 Yalni yaꞌ tet yaꞌ Aarón tuꞌ: «Iti hunu noꞌ tzehla wakax chiꞌok xahanbꞌalil, yu yaqꞌlax tanho mule. Kat hawinipaxti hunu noꞌ winaj meꞌ machi istzakaꞌil, kat hanhusni noꞌ yinh xahanbꞌalil, kat hawalten noꞌ sata Komam. 3 Chawal tet ebꞌnaj Israel hakaꞌ tiꞌ: “Iweti hunu noꞌ tzehla chiw chꞌaqꞌlax xahanbꞌalo yu yaqꞌlax tanho mule; kat heyinipaxti hunu noꞌ tzehla wakax, yebꞌ hunu noꞌ tzehla meꞌ huneꞌ habꞌil, noꞌ tuꞌ machi nino istzakaꞌil, yu isnhuslax noꞌ sata Komam. 4 Kat heyinipaxti hunuxa noꞌ tzehla wakax yebꞌ hunuxa noꞌ winaj meꞌ, yunhe ispotxꞌlax noꞌ sata Komam yinh xahanbꞌalil yet aqꞌankꞌulal; kat heyinipaxti sat tzꞌunubꞌ sombꞌil yebꞌ aceite heyebꞌalqꞌabꞌo tet Komam, yuto haꞌ tinanh chisyelo isbꞌa Komam jet,” kachi,» xhi yaꞌ Moisés.5 Yinito ebꞌnaj Israel tzet isqꞌan yaꞌ Moisés tuꞌ istiꞌ Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa ebꞌnaj Israel iskꞌatanh Komam. Ishitziko sunil anma Israel bꞌey tuꞌ, yok linhno sata Komam Jahawil. 6 Yalni yaꞌ Moisés hakaꞌ tiꞌ: «Haꞌ hunteqꞌan tiꞌ yal Komam hewatxꞌeꞌ, yijewej, haxinwal chisyelo isbꞌa Komam teyet yebꞌ sunil isqꞌaqꞌal yip,» xhi yaꞌ Moisés.
7 Lahwi tuꞌ, yalni yaꞌ Moisés tet yaꞌ Aarón: «Hitzanhiko iskꞌatanh mexha, kat hawalten haxahanbꞌal yinh hamul, kat hanhusni no noqꞌ xahanbꞌalil yu yaqꞌlax nimankꞌulal yinh hamul yebꞌ ismul anma Israel, kat hawaltenpaxo xahanbꞌal yet anma Israel yunhe yaqꞌlaxpaxo nimankꞌulal yinh ismul anma, hakaꞌtikꞌa yu yalni Komam Dios Jahawil,» xhi yaꞌ Moisés.
8 Ishitziko yaꞌ Aarón yinh ismexhahil xahanbꞌal, ispotxꞌni yaꞌ noꞌ tzehla wakax, yalten yaꞌ noꞌ xahanbꞌalil yu istohlan ismul. 9 Yiniti ebꞌnaj iskꞌahol yaꞌ ischikꞌil noꞌ, islabꞌanayto yaꞌ yiximal isqꞌabꞌ xol ischikꞌil noꞌ, ismasniko yaꞌ yinh yukꞌaꞌ yet xahanbꞌal. Haxa yaqꞌbꞌilxa ischikꞌil noꞌ, istixhayo yaꞌ yich ismexhahil xahanbꞌal tuꞌ. 10 Lahwi tuꞌ, isnhusni yaꞌ ismantecahil noꞌ yebꞌ yubꞌal noꞌ, yebꞌ ismantecahil isqꞌejtxꞌotxꞌ noꞌ wakax haltelax xahanbꞌalil yinh mule tuꞌ, hakaꞌtikꞌa yu yalni Komam Jahawil tet yaꞌ Moisés. 11 Yajaꞌ wal ischibꞌehal noꞌ yebꞌ istzꞌumal noꞌ xin, yintalto campamento nhuslaxtoj.
12 Ispotxꞌni yaꞌ no noqꞌ chinhuslax xahanbꞌalil tet Komam, yiniti ebꞌnaj iskꞌahol yaꞌ ischikꞌil noꞌ, istxinayo yaꞌ ischikꞌil noꞌ yibꞌanh yebꞌ yinhla sunil iskꞌul ismexhahil xahanbꞌal. 13 Yinipaxti ebꞌnaj iskꞌahol yaꞌ Aarón tuꞌ noꞌ iswiꞌ yebꞌ noꞌ xahanbꞌal pohbꞌilayoj, isnhusni yaꞌ noꞌ yibꞌanh ismexhahil xahanbꞌal. 14 Istxꞌalaxpaxo noꞌ yul iskꞌul yebꞌ noꞌ yoj, isnhusni yaꞌ noꞌ yibꞌanh xahanbꞌal lanhan istzꞌayi.
15 Yaltenpaxo yaꞌ Aarón isxahanbꞌal anma Israel tet Komam Dios; yiniti yaꞌ noꞌ winaj chiw chꞌaqꞌlax xahanbꞌalil yinh ismul anma Israel. Ispotxꞌnikamo yaꞌ noꞌ, yaqꞌni yaꞌ noꞌ xahanbꞌalo yu istohlan ismul anma, hakaꞌtikꞌa yu yaqꞌni yaꞌ noꞌ bꞌabꞌel xahanbꞌal yinh ismul. 16 Yalten yaꞌ Aarón no noqꞌ chinhuslax yinh xahanbꞌalil hakaꞌtikꞌa yalni chejbꞌanile yinh xahanbꞌal tuꞌ. 17 Lahwi tuꞌ, yalten yaꞌ yebꞌalqꞌabꞌe watxꞌebꞌil yinh sat tzꞌunubꞌ, yinikanh yaꞌ huneꞌ bꞌetx ixim harina yul isqꞌabꞌ, isnhusni yaꞌ yibꞌanh ismexhahil xahanbꞌal sata Komam, yebꞌ xahanbꞌal chinhuslax yinh sakꞌayalil.
18 Ispotxꞌni yaꞌ noꞌ wakax yebꞌ noꞌ winaj meꞌ yiti anma Israel xahanbꞌalo yet aqꞌankꞌulal, yiniti ebꞌnaj iskꞌahol yaꞌ Aarón ischikꞌil noꞌ, istxinayo yaꞌ noꞌ yibꞌanh yebꞌ yinhla sunil iskꞌul mexha yet xahanbꞌal. 19 Yinipaxti ebꞌnaj iskꞌahol yaꞌ ismantecahil noꞌ wakax yebꞌ noꞌ meꞌ, yebꞌ ismantecahil isnhe noꞌ yebꞌ ismantecahil yul iskꞌul noꞌ, yebꞌ yubꞌal noꞌ, yebꞌ ismantecahil isqꞌejtxꞌotxꞌ noꞌ. 20 Hun xin yaqꞌ ebꞌnaj ismantecahil noꞌ yebꞌ noꞌ istxam iskꞌul; isnhusni yaꞌ Aarón ismantecahil noꞌ tuꞌ yibꞌanh ismexhahil xahanbꞌal. 21 Yajaꞌ wal noꞌ istxam iskꞌul yebꞌ noꞌ isbꞌul yinh iswatxꞌ isbꞌatxkanh yaꞌ noꞌ sata Komam, iskꞌuxni ebꞌnaj noꞌ hakaꞌtikꞌa yu yalni Komam tet yaꞌ Moisés.a
22 Lahwi tuꞌ, yanikanh yaꞌ Aarón isqꞌabꞌ, isqꞌanni yaꞌ iskꞌulal Komam Dios yibꞌanh anma Israel; lahwi tuꞌ yalten yaꞌ xahanbꞌal yinh ismul anma, yebꞌ xahanbꞌal chinhuslax tet Komam, yebꞌ xahanbꞌal yet aqꞌankꞌulal, yel yaꞌ iskꞌatanh mexha yet xahanbꞌal. 23 Lahwi tuꞌ, yokto yaꞌ Moisés yebꞌ yaꞌ Aarón yul Yatut Komam watxꞌebꞌil yinh qꞌap qꞌap, bꞌay chiskutxbꞌa isbꞌa anma Israel yebꞌ Komam. Haxa yet yelti ebꞌyaꞌ xin, isqꞌanni ebꞌyaꞌ iskꞌulal Komam Jahawil yibꞌanh anma Israel. Lahwi tuꞌ, isyeni Komam isqꞌaqꞌal yip tet anma Israel. 24 Yelti qꞌa qꞌaꞌ sata Komam, isnhusnito qꞌaꞌ noꞌ xahanbꞌal, yebꞌ ismantecahil no noqꞌ ayahto yibꞌanh yet xahanbꞌal. Hayet yilni anma Israel huneꞌ tuꞌ, yalni anma kꞌul-la tzotiꞌ yinh Komam, yay jahnoj, yay nhohno sat txꞌotxꞌ.