Ismul naj Nadab yebꞌ naj Abiú
10
Naj Nadab yebꞌ naj Abiú, iskꞌahol yaꞌ Aarón, yiti ebꞌnaj islesén yaniko ebꞌnaj tzaqꞌaqꞌ yul, yaniko ebꞌnaj pom yibꞌanh tzaqꞌaqꞌ, yalten ebꞌnaj qꞌaꞌ tuꞌ tet Komam, yaj maxhtaj Komam halni huneꞌ tuꞌ tet ebꞌnaj.a 2 Yelti huneꞌ qꞌaꞌ sata Komam, isnhuslaxto ebꞌnaj yu qꞌaꞌ, iskam ebꞌnaj sata Komam Jahawil. 3 Lahwi tuꞌ, yalni yaꞌ Moisés tet yaꞌ Aarón:«Haꞌ huneꞌ tiꞌ yal Komam yet yalni hakaꞌ tiꞌ:
“Haꞌ mak chihitziko inkꞌatanhan chinyelojan ta machi nino istxꞌojal ayko winhan,
kat inyenilojan isqꞌaqꞌal wipan tet anma Israel,” xhi Komam,» xhi yaꞌ Moisés.
Wal yaꞌ Aarón matxa tzet yal yaꞌ.
4 Yawten yaꞌ Moisés naj Misael yebꞌ naj Elzafán iskꞌahol naj Uziel, yuxhta ismam yaꞌ Aarón. Yalni yaꞌ Moisés tet ebꞌnaj:
«Katawej, kat heyinilti isnimanil heyuxhta tiꞌ yul Yatut Komam, kat heyinito yintalto campamento,» xhi yaꞌ Moisés tuꞌ.
5 Ishitziko ebꞌnaj, yok tzabꞌno ebꞌnaj yinh xil isqꞌabꞌ ebꞌnaj, yilaxilto isnimanil ebꞌnaj yintalto campamento, hakaꞌtikꞌa yu yalni yaꞌ Moisés.
6 Lahwi tuꞌ, yalni yaꞌ Moisés tet yaꞌ Aarón yebꞌ tet ebꞌnaj iskꞌahol yaꞌ, haꞌ ton yaꞌ Eleazar yebꞌ naj Itamar:
«Mach cheyilo qꞌap qꞌap ayahto yinh hewiꞌ, mach chetzilpaxto xil heqꞌap yu heyenilo bꞌiskꞌulal, yunhe mach chexkami, yebꞌ yunhe mach chitit ishowal Komam Dios yibꞌanh sunil anma Israel. Wal sunil heyet konhobꞌ Israel chisje yiqꞌni bꞌiskꞌulal yinh ebꞌnaj istanhtzelo Komam Jahawil yu qꞌa qꞌaꞌ. 7 Mach chexel istiꞌ ispultahil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa anma Israel yebꞌ Komam, ta mach xin chexkami, yuto hex tiꞌ, sikꞌbꞌil hexiko yinh ismunil Komam Jahawil, yet yalaxayo aceite yinh hewiꞌ,» xhi yaꞌ Moisés. Hakaꞌtikꞌa yu yalni yaꞌ Moisés, hak tuꞌ yu isyijen ebꞌnaj.
8 Istzotel Komam Dios tet yaꞌ Aarón, yalni Komam xin: 9 «Hayet chaxhokto yul watuttuꞌan, maka ebꞌnaj hakꞌahol, mach cheyukꞌ vino maka tzet qꞌuwinaxa, haxinwal mach chexkami. Huneꞌ tiꞌ, chejbꞌanile chukano tawet yebꞌ tet hawuninal yinh sunilbꞌal tiempo, 10 yunhe chu hetxumni, bꞌaytet yet Komam yehi, yebꞌ bꞌaytet txꞌoj, yebꞌ bꞌaytet saj yebꞌ bꞌaytet mach sajoj, 11 yebꞌ yunhe chu hekuyni anma Israel yinh chejbꞌanile xawalan teyet yu yaꞌ Moisés,» xhi Komam.
12 Lahwi tuꞌ, yalni yaꞌ Moisés tet yaꞌ Aarón yebꞌ tet ebꞌnaj iskꞌahol yaꞌ, yaꞌ Eleazar yebꞌ naj Itamar, ebꞌnaj kawanh iskꞌahol yaꞌ itzitzto:
«Iweti ixim harina, ixim kankano yinh ixim nhuslax sata Komam, kat hewatxꞌen ixim pan yinh ixim, yajaꞌ machi yanhal ixim cheyakoj, kat hewanito ixim iskawilal mexha yet xahanbꞌal, yuto huneꞌ yebꞌalqꞌabꞌe tiꞌ yet Komam yehi. 13 Chewah ixim bꞌey ehobꞌal yet Komam yehi, haꞌ hunteqꞌan tuꞌ, haꞌ hemajul yinh yebꞌalqꞌabꞌe chinhuslax tet Komam, haꞌ hunteqꞌan tiꞌ yal Komam wetan ta chiwalan teyet. 14 Haxa noꞌ istxam iskꞌul, noꞌ chibꞌatxlaxkanh sata Komam yebꞌ noꞌ isbꞌul, noꞌ chꞌaqꞌlax oko heyu, chekꞌuxto noꞌ bꞌey ehobꞌal kaw saj yebꞌ ebꞌnaj hekꞌahol, yebꞌ ebꞌix hekutzꞌin; yuto haꞌ noꞌ hemajul yinh xahanbꞌal yet aqꞌankꞌulal, chiyaqꞌ anma Israel. 15 Haꞌ noꞌ isbꞌul, noꞌ chꞌaqꞌlax teyet yebꞌ noꞌ istxam iskꞌul, noꞌ chibꞌatxlaxkanh sata Komam, hun xin chu yaltelax noꞌ tet Komam yebꞌ noꞌ ismantecahil chinhuslaxi. Noꞌ istxam iskꞌul yebꞌ noꞌ isbꞌul, hawet ye noꞌ yebꞌ ebꞌnaj hakꞌahol yinh sunilbꞌal ej tiempo, hakaꞌtikꞌa yu yalnikano Komam,» xhi yaꞌ Moisés.
16 Isqꞌambꞌen yaꞌ Moisés yinh noꞌ chiw aqꞌlax yinh xahanbꞌalil yu istohlan mule, yalni ebꞌnaj ta isnhusto ebꞌnaj noꞌ, istit ishowal yaꞌ Moisés yinh yaꞌ Eleazar yebꞌ naj Itamar, ebꞌnaj kawanh iskꞌahol yaꞌ Aarón itzitzto. Yalni yaꞌ Moisés tet ebꞌnaj xin:
17 —¿Tzet yinh yuxin mach hekꞌuxto noꞌ xahanbꞌal tuꞌ bꞌey ehobꞌal yet Komam yehi? Huneꞌ xahanbꞌal tuꞌ, yet Komam, xayaqꞌ Komam teyet yunhe heyinito ismul anma; hak tuꞌ xin chu yaqꞌni nimankꞌulal Komam Dios yinh ismul anma. 18 Haꞌ ischikꞌil noꞌ xahanbꞌal tuꞌ, mach ilaxikto yul Yatut Komam Dios, yuxin estam hekꞌuxto noꞌ yul ehobꞌal yet Komam, hakaꞌ yu walnihan teyet, xhi yaꞌ Moisés.
19 Istaqꞌwi yaꞌ Aarón:
—Haꞌ tinanh mayaqꞌ anma Israel isxahanbꞌal yinh mule, yebꞌ xahanbꞌal chinhuslax sata Komam; yajaꞌ ilkꞌanabꞌ tzet mahul wibꞌanhan.
»Ta mankꞌuxan noꞌ xahanbꞌal chꞌaqꞌlax yinh mule tuꞌ, ¿chimtzala Komam yinh hakaꞌ tuꞌ? xhi yaꞌ.
20 Hayet yabꞌen yaꞌ Moisés hakaꞌ tuꞌ, matxa tzet yal yaꞌ tet yaꞌ.