3. KUYBꞌANILE YINH TZET YE TUꞌ SAJ YEBꞌ YINH TZET YE TUꞌ MACH SAJOJ
(11:1–16:34)
No noqꞌ saj yebꞌ no noqꞌ mach sajoj
11
Tzotel Komam Jahawil tet yaꞌ Moisés yebꞌ tet yaꞌ Aarón, yalni Komam: 2 «Halwe tet anma Israel hakaꞌ tiꞌ: Xol sunil ej no noqꞌ ay sat txꞌo txꞌotxꞌ tiꞌ, haꞌ hunteqꞌan noꞌ tiꞌ chu hekꞌuxni. 3 Noꞌ pohbꞌil yisqꞌaj yebꞌ chiskayenhe tzet chislo, haꞌ noꞌ chisje hekꞌuxni. 4 Yajaꞌ wal hunteqꞌanxa noꞌ tiꞌ xin, mach chu hekꞌuxni noꞌ, yuto waxanhka chiskayenhe noꞌ tzet chislo, yajaꞌ mach pohbꞌilo yisqꞌaj noꞌ. Noꞌ camello chiskayenhe noꞌ tzet chislo, yajaꞌ mach pohbꞌilo yisqꞌaj noꞌ, yilal heyohtanheni ta mach sajo noꞌ. 5 Yebꞌ noꞌ tejon, chiskayenhe noꞌ tzet chislo, yajaꞌ mach pohbꞌilo yisqꞌaj noꞌ, yuxin mach sajo noꞌ. 6 Yebꞌpaxo noꞌ xhik, chiskayenhe noꞌ tzet chislo, yajaꞌ mach pohbꞌilo yisqꞌaj noꞌ, yilal heyohtanheni ta mach sajo noꞌ. 7 Yebꞌpaxo noꞌ txitam, waxanhka pohbꞌil yisqꞌaj noꞌ, yajaꞌ mach chiskayenhe noꞌ tzet chislo, yilal heyohtanheni ta mach sajo noꞌ. 8 Hunteqꞌan no noqꞌ tuꞌ, mach chu hekꞌuxni ischibꞌehal noꞌ, nitam hetzabꞌni isnimanil noꞌ yet kamom noꞌ, yilal heyohtanheni ta mach sajo noꞌ.9 »Haxa no noqꞌ ay xol ha haꞌ, hakaꞌ noꞌ ay xol haꞌ mar maka noꞌ ay xol ha haꞌ chꞌel yojomal, hanhe noꞌ ay isxikꞌ yebꞌ ismelyaxhil yinh, hanhe noꞌ chisje hekꞌuxni. 10 Yajaꞌ wal noꞌ machi isxikꞌ yebꞌ machi ismelyaxhil yinh, yilal heyahni noꞌ, waxanhka xol haꞌ mar maka xol ha haꞌ chꞌel yojomal ay noꞌ. 11 Mach chu hekꞌuxni ischibꞌehal noꞌ, yilal heyahni noꞌ, kat heyahnipaxo isnimanil noꞌ yet kamomxa noꞌ. 12 Sunil no noqꞌ machi xikꞌ yebꞌ machi ismelyaxhil ay xol ha haꞌ, yahbꞌetahojabꞌ noꞌ yul hesat.
13 »Wal xol noꞌ chꞌik xin, haꞌ hunteqꞌan noꞌ tiꞌ cheyaha, mach chu hekꞌuxni: noꞌ tꞌiw, noꞌ xulem, yebꞌ noꞌ azor, 14 noꞌ milano yebꞌ sunil majan noꞌ alcon, 15 yebꞌ sunil ismajanil noꞌ hoh. 16 Yebꞌpaxo noꞌ avestruz, noꞌ lechuza, noꞌ gaviota yebꞌ sunil ismajanil noꞌ kꞌukꞌum 17 noꞌ pop, noꞌ somormujo, noꞌ ibis; 18 noꞌ calamón, noꞌ pelícano, noꞌ usmij, 19 noꞌ cigüeña, yebꞌ sunil ismajanil noꞌ garza, noꞌ abubilla yebꞌ noꞌ sotzꞌ.
20 »Yebꞌpaxo sunil noꞌ nixhte noqꞌ ay xikꞌ yebꞌ kanhebꞌ yoj, chiꞌekꞌ bꞌulbꞌon sat txꞌotxꞌ, yahbꞌetahojabꞌ noꞌ yul hesat. 21 Yajaꞌ wal hunteqꞌanxa noꞌ nixhte noqꞌ tiꞌ, chisje hekꞌuxni noꞌ, waxanhka ay xikꞌ noꞌ yebꞌ ay kanhebꞌ yoj noꞌ, noꞌ ayayo isbꞌul yibꞌanh yoj, yunhe yekꞌ litꞌla sat txꞌotxꞌ. 22 Xol noꞌ tuꞌ, haꞌ noꞌ tiꞌ chisje hekꞌuxni: sunil ismajanil noꞌ qꞌul, yebꞌ noꞌ langostín, noꞌ litꞌ, yebꞌ noꞌ saltamonte. 23 Wal hunteqꞌanxa noꞌ nixhte noqꞌ ay xikꞌ yebꞌ ay kanhebꞌ yoj, yahbꞌetahojabꞌ noꞌ yul hesat.
24 »Ta chetzabꞌ hunteqꞌan noꞌ tuꞌ yet kamom noꞌ, mach sajo cheyukanoj masanto yet chiqꞌejbꞌayoj.
25 »Maknhetikꞌa chiꞌinikanh hunu no noqꞌ tiꞌ yet kamom noꞌ, yilal istxꞌahni xil isqꞌap, machi xin sajo chukanoj masanto yet chiqꞌejbꞌayoj.
26 »Sunil no noqꞌ ay yisqꞌaj, mach xin pohbꞌil yisqꞌaj noꞌ tuꞌ, yebꞌ mach chiskayenhe noꞌ tzet chislo, hunteqꞌan noꞌ tuꞌ, mach sajo noꞌ. Maknhetikꞌa chitzabꞌni noꞌ, mach sajo chiyukanoj.
27 »Sunil no noqꞌ kanhebꞌ yoj yebꞌ yibꞌanh ispaqꞌanil isqꞌabꞌ yebꞌ yibꞌanh ispaqꞌanil yoj chibꞌelwi, noꞌ tuꞌ mach sajo noꞌ yul hesat, makxanhetikꞌa chitzabꞌni isnimanil noꞌ yet kamomxa noꞌ, mach sajo chiyukanoj masanto yet chiqꞌejbꞌayoj. 28 Makxanhetikꞌa chiꞌinikanh hunu noꞌ tiꞌ yet kamom noꞌ, yilal istxꞌahni xil isqꞌap, mach xin sajo chukanoj masanto yet chiqꞌejbꞌayoj. Hunteqꞌan noꞌ tuꞌ, mach sajo noꞌ yul hesat.
29 »Haxa noꞌ tiꞌ, noꞌ chishatxikꞌo iskꞌul sat txꞌotxꞌ, machojabꞌ sajo noꞌ yul hesat, hakaꞌ noꞌ sahbꞌen, noꞌ txꞌow, yebꞌ sunil noꞌ hakaꞌ noꞌ pahtzaꞌ, 30 noꞌ erizo, noꞌ lagarto, noꞌ salamanquesa, noꞌ txukaꞌ, noꞌ camaleón.
31 »Xol sunil no noqꞌ ay yul yibꞌanhqꞌinal tiꞌ haꞌ noꞌ tuꞌ mach sajo yul hesat. Maknhetikꞌa chitzabꞌni isnimanil noꞌ yet kamom noꞌ, mach sajo chukanoj masanto yet chiqꞌejbꞌayoj.
32 »Yebꞌpaxo xin tzijxanhe tzet ye tuꞌ, bꞌay chiꞌaykꞌay hunu noꞌ kamom noqꞌ tuꞌ, mach sajo chiyukanoj; hakaꞌ yibꞌanh tzet ye tuꞌ watxꞌebꞌil yinh teꞌ aqꞌinteꞌ, maka yibꞌanh xilqꞌape, maka yibꞌanh hunu tzet ye tuꞌ watxꞌebꞌil yinh istzꞌumal no noqꞌ, maka yibꞌanh hunu saco, maka yibꞌanh hunu chꞌen munlabꞌal. Sunil hunteqꞌan tuꞌ, yilal yalaxayto xol ha haꞌ, mach xin sajo chukanoj masanto yet chꞌah aqꞌbꞌal, kat issajbꞌi.
33 »Ta ay hunu no noqꞌ tiꞌ chitokꞌay yul hunu txꞌotxꞌ xi, sunil tzet ayayto yul txꞌotxꞌ tuꞌ, mach sajo chukanoj, wiyom ispohlaxto huneꞌ txꞌotxꞌ xi tuꞌ. 34 Sunil tzet chilolaxi, ta chiꞌapni hanikꞌo yal tzet ayayto yul txꞌotxꞌ xi tuꞌ yibꞌanh, mach sajo chukanoj; hakpax tuꞌ tzet chiꞌukꞌlax ayayto yul txꞌotxꞌ xi tuꞌ, mach sajo chupaxkanoj. 35 Sunil yibꞌanh tzet ye tuꞌ bꞌay chiꞌaykꞌay no noqꞌ kamom tuꞌ, mach sajo chiyukanoj. Waxanhka yibꞌanh hunu horno, maka yet qꞌaꞌ bꞌay chiꞌaykꞌay noꞌ, yilal yuchkꞌalaxkantoj, yuto matxa sajo chiꞌelikoj, machojabꞌ sajo chukano yul hesat.
36 »Taka yul hunu isnuqꞌ ha haꞌ, maka yul hunu kꞌuh bꞌay chiꞌukꞌlax ha haꞌ, chiꞌaykꞌayto hunu noꞌ kamna noqꞌ tuꞌ, machi tzꞌilbꞌitoj haꞌ, hanhe mak chiꞌinahti noꞌ kamom noqꞌ yul haꞌ tuꞌ, mach sajo chukanoj.
37 »Ta ay hunu no noqꞌ tuꞌ, chikami kat yaykꞌay noꞌ yibꞌanh hunu majan hinhat chitzꞌunlaxi, haꞌ huneꞌ majan hinhat tuꞌ, mach chiꞌetaxtoj. 38 Yajaꞌ ta chakꞌan huneꞌ majan hinhat tuꞌ, kat yaykꞌay hunu noꞌ kamom noqꞌ tuꞌ yibꞌanh, wal tuꞌ, mach sajo chiꞌelikoj.
39 »Ta kꞌuxan iskam hunu no noqꞌ chikꞌuxlax heyu, haꞌ mak chitzabꞌni isnimanil noꞌ tuꞌ, mach sajo chiꞌelikoj masanta yet chiqꞌejbꞌayoj. 40 Haꞌ mak chikꞌuxni ischibꞌehal noꞌ kamom noqꞌ tuꞌ, yilal istxꞌahni xil isqꞌap, mach xin sajo chukanoj masanta yet chiqꞌejbꞌayoj. Haꞌ mak chiꞌinilti noꞌ kamom noqꞌ tuꞌ, mach sajo chukanoj masanto yet chiqꞌejbꞌayoj.
41 »Sunil no noqꞌ chishatxikꞌo isbꞌa sat txꞌotxꞌ yet chibꞌelwi, yahbꞌeta noꞌ, mach chu hekꞌuxni noꞌ.
42 »Sunil noꞌ chishatxikꞌo iskꞌul sat txꞌotxꞌ yet chibꞌelwi, noꞌ kanhebꞌ yoj maka ekꞌbꞌal kanhebꞌ yoj, sunil noꞌ chishatxikꞌo iskꞌul tuꞌ, mach chekꞌux noꞌ, yuto yahbꞌeta noꞌ. 43 Mach cheyetato hebꞌa yu hunteqꞌan no noqꞌ chishatxikꞌo iskꞌul tuꞌ, yuto mach sajo chexeliko yu noꞌ. 44 Yuto hanintiꞌan Yahawil hinan, heDiosal wehan, yuxin yilal hesajnhen hebꞌa yinh istxꞌojal, yuto hanintiꞌan machi nino istxꞌojal winhan; yuxin mach cheyetato hebꞌa yu hunu no noqꞌ chishatxikꞌo iskꞌul sat txꞌotxꞌ yet chibꞌelwi. 45 Hanin Yahawintiꞌan, kexwilojan sat txꞌotxꞌ Egipto yu wokan heDiosaloj, yuxin yilal hepohnilo hebꞌa yinh istxꞌojal; yuto hanintiꞌan machi istxꞌojal winhan, xhi Komam tet yaꞌ Moisés yebꞌ tet yaꞌ Aarón.