Issajnhen isbꞌa ebꞌix ix yet chilahwi iswatxꞌi iskꞌul
12
Istzotelpaxo Komam Dios Jahawil tet yaꞌ Moisés, yalni Komam: 2 «Hal hunteqꞌan chejbꞌanile tiꞌ tet anma Israel: Hayet chiwatxꞌi iskꞌul hunu ix ix, ta xin winaj nichꞌan yunin ix chipitzkꞌa tuꞌ, hujebꞌ tzꞌayik mach sajo chukano ix, hakaꞌtikꞌa chukano ix yet chiyilni ix istxꞌawobꞌal. 3 Waxajebꞌxa tzꞌayik ispitzkꞌa nichꞌan unin tuꞌ, kat yaqꞌlax circuncidar.a 4 Wal ix miꞌe tuꞌ, yulbꞌal 33 (oxlahonhebꞌ iskawinaj) tzꞌayik chissajnhe isbꞌa ix. Yulbꞌal hunteqꞌan tzꞌayik tuꞌ, mach chu istzabꞌni ix hunu tzet ye tuꞌ yet Komam Dios yehi, yebꞌ xin mach chu yapni ix iskꞌatanh Yatut Komam, wal xin masanto yet chitzꞌajna istzꞌayikal bꞌay chisajbꞌikano ix. 5 Yajaꞌ ta ix yunin ix chipitzkꞌahi, mach sajo chukano ix yulbꞌal kabꞌ semana, hakaꞌtikꞌa chukano ix yet chiyilni ix istxꞌawobꞌal, yajaꞌ yulbꞌal 66 (wajebꞌ iskanhwinaj) tzꞌayik chito issajnhe isbꞌa ix.6 »Hayet chitzꞌajna istzꞌayikal issajnhen isbꞌa ix miꞌe tuꞌ, waxanhka winaj maka ix yunin ix tuꞌ, yilal yinito ix hunu noꞌ nichꞌan meꞌ huneꞌ habꞌil, sata istiꞌ ispultahil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa anma Israel yebꞌ Komam, yu isnhuslax noꞌ yinh xahanbꞌalil, kat yinipaxti ix hunu noꞌ palamuch maka hunu noꞌ yunin kuwis xahanbꞌal yinh ismul, kat yaqꞌlax tet naj sacerdote. 7 Haꞌ xin naj sacerdote tuꞌ, chihalten noꞌ xahanbꞌalil tet Komam Jahawil, yunhe yaqꞌni Komam nimankꞌulal yinh ismul ix, hak tuꞌ xin chu issajbꞌikano ix.
»Haꞌ hunteqꞌan tuꞌ chejbꞌanile yinh yet chipitzkꞌa nixhte unin winaj maka ix. 8 Taka mach chiloqꞌcha hunu noꞌ nichꞌan meꞌ yu ix, yilal yiniti ix kakꞌonho noꞌ palamuch maka kakꞌonho noꞌ kuwis. Huneꞌ noꞌ chinhuslax xahanbꞌalil, hunxa noꞌ xin chihaltelax yinh ismul ix. Haꞌ xin naj sacerdote tuꞌ chiꞌaqꞌni noꞌ xahanbꞌalil yinh ismul ix, hak tuꞌ xin chu yaqꞌni Komam nimankꞌulal yinh ix, kat issajbꞌikano ix, kachi,» xhi Komam.