4 »Taka saj jilni istzꞌumal bꞌay ayko huneꞌ txꞌak tuꞌ, yaj mach nahat yehayto yich, yibꞌanhnhe istzꞌumal aykoj, mach sajopaxo xil istzꞌumal naj bꞌay aykoj, yinh hakaꞌ tuꞌ, chimajchelax naj hujebꞌ tzꞌayik yu naj sacerdote. 5 Haxa yet chiꞌapni yinh ishuj tzꞌayik tuꞌ xin, kat yil-laxpaxo naj yu naj sacerdote; taka huneꞌnhetikꞌa haꞌ jilni, mach chibꞌelwi chismajchepaxo naj sacerdote naj hunelxa yinh hujebꞌxa tzꞌayik. 6 Haxa yet chiꞌapnipaxo yinh hujebꞌxa tzꞌayik tuꞌ, kat yilni naj sacerdote naj hunelxa, yajaꞌ ta lanhan iskꞌayayo huneꞌ txꞌak yinh naj, machi xin chibꞌelwitoj, chalni naj sacerdote ta mach leprahoj, komon txꞌaknhe; kat yalni naj sacerdote ta mach yahbꞌeta chukano huneꞌ mak tuꞌ, kat xin istxꞌahni naj yaꞌay tuꞌ xil isqꞌap, sajxa xin chukano naj.

7 »Yajaꞌ ta tzujanxa kat isbꞌelwito huneꞌ yabꞌil yinh huneꞌ mak yet xaꞌil-lax yu naj sacerdote yet yalni naj ta mach leprahoj, yinh hakaꞌ tuꞌ, yilal isto naj tet sacerdote yu yilni naj naj hunelxa. 8 Ta hayet chiꞌil-lax naj yu naj sacerdote, chiyilni naj ta xabꞌelwito huneꞌ yabꞌil tuꞌ yinh ischibꞌehal naj, yinh hakaꞌ tuꞌ, chiyal naj sacerdote tato lepra ayko yinh naj, matxa sajo chiyukano naj. 9 Ta chiꞌelilo txꞌak yabꞌil yinh hunu mak hakaꞌ lepra jilni, huneꞌ mak tuꞌ, yilal yilaxti sata naj sacerdote. 10 Tato chil naj sacerdote ta chimali, yebꞌ ta sajxa jilni sat, sajxapaxo xil bꞌay ayko huneꞌ txꞌak tuꞌ, yebꞌ ta ixtanhxa ischibꞌehal, 11 yinh hakaꞌ tuꞌ, chal yelapnoj ta kaw how yeko lepra yinh naj, kat yalni naj sacerdote ta matxa sajo chukano naj, matxa xin chimajchelax naj, yuto matxa sajo ischibꞌehal naj.

12 »Taka xin kaw yinh anhe chibꞌelwi txꞌak tuꞌ, kat isnohilo yinh sunil isnimanil naj, chiꞌichiko yinh yoj naj masanta chiꞌahapno yinh iswiꞌ naj, hakaꞌ chiyu yilni naj sacerdote tuꞌ. 13 Hayet chilahwi yilni naj sacerdote naj, kat yilni naj tato nohnako txꞌak yinh sunil isnimanil naj yebꞌ sajxa jilni; yinh hakaꞌ tuꞌ chiyal naj sacerdote tato saj huneꞌ naj tuꞌ. 14 Yajaꞌ ta ay hunu tzꞌayik tiꞌ, chiꞌixtanhwipaxti huneꞌ txꞌak tuꞌ, ixtanhxa jilni ischibꞌehal naj, wal tuꞌ mach sajo chukano naj. 15 Yuxin yet chiyilni naj sacerdote ischibꞌehal bꞌay ayko txꞌak tuꞌ, chal naj tato lepra huneꞌ tuꞌ, matxa sajo chukano naj, yuto yet chiꞌixtanhwiti ischibꞌehal txꞌak tuꞌ, yahbꞌetaxa chukanoj huneꞌ mak tuꞌ.

16 »Yajaꞌ ta chisajbꞌilo ischibꞌehal istxꞌakil naj tuꞌ, yilal isto naj isyeno isbꞌa tet naj sacerdote, 17 kat yilni naj sacerdote naj; ta chil naj ta sajxa huneꞌ txꞌak tuꞌ, yinh hakaꞌ tuꞌ, chal naj ta matxa yahbꞌetajo chukano naj, wal xin sajxa chukano naj.

18 »Ta ay hunu mak ay hunu txꞌak chiꞌelilo yinh isnimanil, kat istaj huneꞌ txꞌak tuꞌ, 19 yajaꞌ ta bꞌay ekꞌlena txꞌak tuꞌ chimali, saj jilni, maka kaj sulsunhe, haꞌ huneꞌ mak tuꞌ yilal yul isyeno isbꞌa tet naj sacerdote. 20 Tato chil naj sacerdote, ta nahatxa yehayto yich huneꞌ txꞌak tuꞌ yalanh istzꞌumal isnimanil naj, yebꞌ xin ta sajxa isxil isnimanil naj bꞌay ayko huneꞌ txꞌak tuꞌ; yinh hakaꞌ tuꞌ, chal naj sacerdote ta yahbꞌil chukano huneꞌ naj tuꞌ, yuto yabꞌil lepra ayko yinh naj. 21 Yajaꞌ ta mach sajo xil isnimanil naj bꞌay ayko huneꞌ txꞌak tuꞌ, yebꞌ ta mach nahat yehayto yich, yebꞌ ta lanhan iskꞌaykanh, yinh hakaꞌ tuꞌ, chismajche naj sacerdote naj yinh hujebꞌ tzꞌayik. 22 Yajaꞌ tato xabꞌelwito yabꞌil yinh isnimanil huneꞌ mak tuꞌ, yinh hakaꞌ tuꞌ, chal naj sacerdote tato mach sajo chukano huneꞌ naj tuꞌ, yuto ayto txꞌak yinh naj. 23 Yajaꞌ tato mach chibꞌelwi txꞌak ayko yinh naj tuꞌ, chal yelapnoj ta yechelnhe huneꞌ yabꞌil tuꞌ aykano yinh naj, yinh hakaꞌ tuꞌ chal naj sacerdote ta saj huneꞌ naj tuꞌ.

24 »Ta ay hunu mak chitzꞌatoj yul qꞌaꞌ, ta xin ischibꞌehal huneꞌ tzꞌayil tuꞌ, kaj sulsunhe sat, maka saj jilni, 25 yilal yilni naj sacerdote huneꞌ mak tuꞌ. Ta sajxa jilni xil istzꞌumal bꞌay ayko huneꞌ tzꞌayil tuꞌ, yebꞌ ta nahatxa yehayto yich, wal tuꞌ lepra xapitzkꞌati yinh tzꞌayil tuꞌ, yinh hakaꞌ tuꞌ, chal naj sacerdote ta mach sajo chukano huneꞌ naj tuꞌ, yuto lepra ayko yinh naj. 26 Yajaꞌ ta hayet chilni naj sacerdote naj tuꞌ, mach xin sajo xil istzꞌumal bꞌay tzꞌanato tuꞌ, mach xin nahato yich, lanhan xin iskꞌayayoj, yinh hakaꞌ tuꞌ chismajche naj sacerdote naj yinh hujebꞌ tzꞌayik. 27 Haxa yinh ishuj tzꞌayik xin kat yilni naj sacerdote naj, ta xin xato lebꞌo huneꞌ tzꞌayil tuꞌ yinh ischibꞌehal naj, yinh hakaꞌ tuꞌ, chal naj sacerdote ta mach sajo chukano huneꞌ naj tuꞌ, yuto lepra ayko yinh naj. 28 Yajaꞌ ta huneꞌnhe haꞌ jilni huneꞌ tzꞌayil tuꞌ, mach chito lebꞌo yinh ischibꞌehal naj, yebꞌ xin lanhan iskꞌaykanh; chal yelapnoj ta yechel tzꞌayil tuꞌ aykano yinh naj. Yinh hakaꞌ tuꞌ, chal naj sacerdote ta saj chukano huneꞌ naj tuꞌ.

29 »Ta ay hunu naj winaj maka hunu ix ix chiꞌelilo txꞌak yinh iswiꞌ, maka yinh iskelem, 30 yilal yilni naj sacerdote huneꞌ txꞌak tuꞌ. Yaj tato nahat yehayto yich, yebꞌ ta qꞌan tzamtzonhe xil iswiꞌ maka xil iskelem, yebꞌ chihowayo xil, yinh hakaꞌ tuꞌ, chiyal naj sacerdote ta yahbꞌeta chukano huneꞌ mak tuꞌ, yuto ayko lepra yinh iswiꞌ maka yinh iskelem. 31 Yajaꞌ ta yet chiyilni naj sacerdote ta mach nahat yehayto yich txꞌak yinh iswiꞌ, maka yinh iskelem, yebꞌ ta matxa qꞌejo jilni xil iswiꞌ, maka xil iskelem; yinh hakaꞌ tuꞌ chismajche naj sacerdote huneꞌ mak tuꞌ yinh hujebꞌ tzꞌayik. 32 Haxa yinh ishuj tzꞌayik xin kat yilnipaxo naj sacerdote ta maxhto chito lebꞌo txꞌak tuꞌ yebꞌ ta maxhto qꞌano jilni xil, maxhto xin nahato yich, 33 yinh hakaꞌ tuꞌ, chiyal naj sacerdote ta chiꞌilaxilo xil iswiꞌ maka xil iskelem huneꞌ mak tuꞌ, yajaꞌ machi ilaxilo xil bꞌay ayko txꞌak tuꞌ, kat ismajchelaxpaxo naj hujebꞌxa tzꞌayik. 34 Haxa yet chiꞌapni yinh ishuj tzꞌayik tuꞌ, kat yilnipaxo naj sacerdote istxꞌakil iswiꞌ maka iskelem huneꞌ mak tuꞌ; yajaꞌ ta maxhto chito lebꞌo txꞌak tuꞌ, yebꞌ maxhto nahato chꞌayto yich; yinh hakaꞌ tuꞌ, chiyal naj sacerdote ta saj chiyukano huneꞌ naj tuꞌ, yilal xin istxꞌahnilo naj xil isqꞌap, kat issajbꞌikanoj. 35 Yajaꞌ tato yet tzujanxa issajbꞌikanoj, kat isbꞌelwito txꞌak yinh iswiꞌ naj maka iskelem naj, 36 yinh hakaꞌ tuꞌ, chil naj sacerdote naj hunelxa; ta xato lebꞌo txꞌak tuꞌ, matxa yilalo chil naj sacerdote tato qꞌan xil, yuto huneꞌ mak tuꞌ, yahbꞌeta chukanoj. 37 Yajaꞌ ta chil naj sacerdote ta mach chito lebꞌo txꞌak tuꞌ yebꞌ ta qꞌej xil bꞌay ayko txꞌak, yinh hakaꞌ tuꞌ kawxa huneꞌ mak tuꞌ, xaꞌanhcha yabꞌil ayko yinh naj, kat yalni naj sacerdote ta sajxa chukano naj.

38 »Tato ay hunu naj winaj maka hunu ix ix chiꞌelilo hunteqꞌan petkixhtanhe saj yinh isnimanil, 39 yilal yilni naj sacerdote huneꞌ mak tuꞌ, ta saj yebꞌ machi kaj sulsunhe; yinh hakaꞌ tuꞌ bꞌolobꞌ txꞌak elilo yinh, huneꞌ mak tuꞌ saj chukanoj.

40 »Tato ay hunu naj pechꞌan chukano iswiꞌ yu chihowilo xil iswiꞌ, matxa xin nino xil chikani, huneꞌ mak tuꞌ saj chukanoj. 41 Ta xin haꞌ xil ispalanh chihowiloj, matxa nino xil chikani, huneꞌ mak tuꞌ saj chukanoj. 42 Yajaꞌ ta ay hunu txꞌak chiꞌelilo bꞌay machi xil iswiꞌ tuꞌ yebꞌ ta saj, maka kaj sulsunhe jilni, haꞌ huneꞌ mak tuꞌ, ayko lepra yinh. 43 Yilal yilni naj sacerdote huneꞌ mak tuꞌ. Yajaꞌ ta haꞌ bꞌay chimali saj yilni, yebꞌ kaj sulsunhe, hakaꞌ lepra chiꞌelilo yinh istzꞌumal. 44 Haꞌ huneꞌ mak tuꞌ lepra chiꞌuteni, yuto ayko txꞌak lepra yinh iswiꞌ, yahbꞌeta chukanoj, kat xin yalni naj sacerdote ta mach sajo huneꞌ mak tuꞌ.

45 »Haꞌ mak ayko txꞌak lepra tuꞌ yinh, yilal tzilkixhtanhe xil isqꞌap chakoj, kat yinilo isqꞌuxil iswiꞌ, kat yaniko yenhel sat, kat yahwi yinh kaw ip yet chiꞌekꞌto xol anma chalni: “Elanhwej, mach sajo wehan, yahbꞌeta hinan,” xhi. 46 Yulbꞌal tiempo ayko lepra yinh, mach sajoj, yahbꞌeta chukanoj, kat yeh ischukil yintalto campamento.

47 »Tato chiꞌelilo hunteqꞌan petkixhtanhe hakaꞌ qꞌuxew yinh hunu xilqꞌape lana maka lino, 48 maka yinh hunu qꞌap qꞌap chembꞌil hakaꞌ txꞌal lino maka lana, maka yinh hunu noꞌ tzꞌum maka hunu tzet watxꞌebꞌil yinh noꞌ tzꞌum tuꞌ, 49 ta hunteqꞌan petkixhtanhe ayko yinh hunteqꞌan tuꞌ, yax jilni maka kaj sulsunhe, wal tuꞌ lepra ayko yinh, yilal yilaxti yelaxo tet naj sacerdote.^a 50 Hayet chiyilni naj sacerdote isqꞌuxewal tuꞌ, chismajche naj huneꞌ tzet tuꞌ yinh hujebꞌ tzꞌayik. 51 Haxa yinh ishuj tzꞌayik xin, chilni naj isqꞌuxewal huneꞌ tuꞌ, tato xabꞌelwito yinh huneꞌ xilqꞌape, maka yinh qꞌap chembꞌil maka yinh noꞌ tzꞌum maka tzet watxꞌebꞌil yinh noꞌ tzꞌum tuꞌ, chalilo chal tuꞌ, tato lepra kaw txꞌoj huneꞌ tuꞌ; yinh hakaꞌ tuꞌ, mach sajo chukanoj. 52 Yuxin tzijxanhe tzet yet tuꞌ, ayko hunteqꞌan qꞌuxew tuꞌ yinh, yilal isnhuslaxkantoj, yuto lepra kaw txꞌoj ayko yinh, chiyetato hunuxa tzet ye tuꞌ. 53 Yajaꞌ ta hayet chilni naj sacerdote ta maxhto chibꞌelwito huneꞌ qꞌuxew tuꞌ yinh xilqꞌape, maka yinh tzet watxꞌebꞌil yinh noꞌ tzꞌum, 54 yinh hakaꞌ tuꞌ, chal naj ta chitxꞌalax bꞌay ayko isqꞌuxewal, kat ismajchen naj huneꞌ tuꞌ yinh hujebꞌ tzꞌayik.

55 »Haxa yet xalahwi istxꞌalaxi kat yilni naj sacerdote hunelxa; tato yexnheto yeko ispetkixhtanhehal tuꞌ yinh, ta yintaj maka yul aykoj, yinh hakaꞌ tuꞌ, mach sajo chukanoj huneꞌ tuꞌ, yilal isnhuslaxkantoj. Huneꞌ tuꞌ kaw how, kaw ay ismay waxanhka matxa chibꞌelwi. 56 Yajaꞌ ta hayet chilni naj sacerdote, yet xalahwi istxꞌalaxi, ta lanhanxa iskꞌaykanh isqꞌuxewal, yinh hakaꞌ tuꞌ, chislotꞌilto naj isqꞌuxewal xilqꞌape tuꞌ, maka qꞌap qꞌap chembꞌil, maka noꞌ tzꞌum bꞌay aykoj. 57 Yajaꞌ tato chiꞌelpaxilo isqꞌuxewal tuꞌ kat isto lebꞌo hunelxa yinh xilqꞌape maka yinh qꞌap qꞌap chembꞌil, maka yinh hunu tzet watxꞌebꞌil yinh noꞌ tzꞌum, yinh hakaꞌ tuꞌ, yilal isnhuslaxkantoj. 58 Yajaꞌ tato lahwi istxꞌahlax hunu xilqꞌape, maka qꞌap qꞌap chembꞌil, maka hunu tzet ye tuꞌ watxꞌebꞌil yinh noꞌ tzꞌum, kat iskꞌaykanh isqꞌuxewal, yilal istxꞌahlaxpaxo hunelxa, yinh hakaꞌ tuꞌ saj chukano huneꞌ tuꞌ.

59 »Haꞌ hunteqꞌan tuꞌ, chejbꞌanile yinh qꞌuxew chiꞌelilo yinh xilqꞌape watxꞌebꞌil yinh qꞌap lino maka lana, yebꞌ yinh qꞌap chembꞌil, maka yinh tzet ye tuꞌ watxꞌebꞌil yinh noꞌ tzꞌum, yunhe yal-laxi ta saj maka mach sajoj,» xhi Komam.