14
Istzotelpaxo Komam Dios tet yaꞌ Moisés, yalni Komam xin: 2 «Haꞌ hunteqꞌan tiꞌ chejbꞌanile yinh mak xaꞌel yabꞌil lepra yinh. Haꞌ mak tuꞌ, yilal isyelax tet naj sacerdote. 3 Yajaꞌ chiꞌelto naj sacerdote tuꞌ yintalto campamento, kat yilni naj huneꞌ mak tuꞌ. Tato chiyil naj tato kawxa huneꞌ mak tuꞌ, 4 chischej naj ilaxoti kakꞌonho noꞌ chꞌik itzitz, noꞌ saj hakaꞌ yalni ley, yebꞌ teꞌ cedro yebꞌ qꞌap qꞌap kaj yebꞌ teꞌ hisopo; hunteqꞌan tuꞌ chiꞌoknikoj yunhe issajbꞌikano naj. 5 Lahwi tuꞌ, kat ischejni naj sacerdote potxꞌlaxo hunu noꞌ chꞌik yibꞌanh hunu txꞌotxꞌ xi bꞌay ayayto ha haꞌ iqꞌbꞌilahti yul isnuqꞌ ha haꞌ. 6 Kat yinikanh naj huneꞌxa noꞌ chꞌik itzitzto, yebꞌ teꞌ cedro yebꞌ qꞌap qꞌap kaj yebꞌ teꞌ hisopo, kat islabꞌanayto naj hunteqꞌan tuꞌ xol ischikꞌil noꞌ chꞌik potxꞌlax yibꞌanh ha haꞌ iqꞌbꞌilahti yul isnuqꞌ haꞌ. 7 Lahwi tuꞌ, kat istxihniko naj sacerdote hujel el chikꞌ yinh naj chisajbꞌikano bꞌay chꞌel huneꞌ yabꞌil lepra tuꞌ, kat xin yalni naj ta saj chukano huneꞌ mak tuꞌ, kat isbꞌejtzon naj noꞌ chꞌik itzitz tuꞌ xol telaj.8 »Haꞌ mak chisajbꞌikano tuꞌ, yilal istxꞌahni xil isqꞌap kat yinilo sunil xil iswiꞌ, kat yaxhnhen isbꞌa, hak tuꞌ chu issajbꞌikanoj. Lahwi tuꞌ kat yokto yul campamento, yajaꞌ xin yulbꞌal hujebꞌ tzꞌayik mach chiꞌokto yul yatut. 9 Haxa yinh ishuj tzꞌayik, chinilo sunil xil iswiꞌ yebꞌ xil istiꞌ, yebꞌ istxowal isbꞌaqꞌ sat, yebꞌ sunil xil isnimanil, kat istxꞌahni xil isqꞌap, kat yaxhnhen isbꞌa, hak tuꞌ chu issajbꞌikanoj. 10 Haxa yinh iswaxajebꞌ tzꞌayik chiyiti huneꞌ mak tuꞌ kakꞌonh noꞌ winaj meꞌ, yebꞌ huneꞌ noꞌ meꞌ ix mach istzakaꞌil, yebꞌ hunu noꞌ nichꞌan ix meꞌ huneꞌ habꞌil, mach istzakaꞌil, yebꞌ howebꞌ libra ixim harina kaw kꞌul, sombꞌil yebꞌ aceite, yebꞌ huneꞌ vaso aceite chꞌaqꞌlax yebꞌalqꞌabꞌehal tet Komam. 11 Haꞌ xin naj sacerdote tuꞌ chiꞌaniko naj yebꞌ isyebꞌalqꞌabꞌ sata Komam istiꞌ yatut watxꞌebꞌil yinh qꞌap qꞌap bꞌay chiskutxbꞌa isbꞌa anma Israel yebꞌ Komam. 12 Lahwi tuꞌ, kat yiniti naj sacerdote noꞌ winaj meꞌ, kat yalten naj noꞌ yebꞌ teꞌ aceite tet Komam xahanbꞌalo yinh ismul huneꞌ mak tuꞌ, kat isbꞌatxni naj yebꞌalqꞌabꞌe sata Komam. 13 Noꞌ meꞌ tuꞌ, chipotxꞌlax noꞌ yul ehobꞌal yet Komam yehi, bꞌay chipotxꞌlax no noqꞌ chꞌaqꞌlax xahanbꞌalil yinh mule tet Komam, yebꞌ bꞌay chipotxꞌlax no noqꞌ chinhuslax xahanbꞌalil tet Komam. Noꞌ chꞌaqꞌlax xahanbꞌalil yinh mule tuꞌ, chiꞌokkano noꞌ yu naj sacerdote, hakpax tuꞌ noꞌ chꞌaqꞌlax xahanbꞌalil yu istohlan mule chiꞌokpaxkano noꞌ yu naj sacerdote; hunteqꞌan xahanbꞌal tuꞌ yet Komam yehi.
14 »Lahwi tuꞌ, kat yinikanh naj sacerdote hanikꞌ ischikꞌil noꞌ meꞌ chꞌaqꞌlax yinh xahanbꞌalil yu istohlan mule, kat ismasniko naj hanikꞌ ischikꞌil noꞌ yinh istxikin naj, yinh isxaxohal yalanh, yinh iswatxꞌqꞌabꞌ naj chisajbꞌikano tuꞌ, kat ismasnipaxiko naj chikꞌ yinh ismiꞌehal yiximal isqꞌap naj, yebꞌ yinh ismiꞌehal yiximal yoj naj yinh iswatxꞌqꞌabꞌ. 15 Kat yinipaxokanh naj sacerdote hanikꞌ aceite, kat isjobꞌnayo naj yul yoqꞌanil isqꞌabꞌ yinh ismekqꞌabꞌ, 16 kat islabꞌanayto naj huneꞌ yiximal isqꞌabꞌ yinh iswatxꞌqꞌabꞌ xol teꞌ aceite ayko yul huneꞌxa isqꞌabꞌ, kat istxihniko naj hujel yu yiximal isqꞌabꞌ sata Komam Jahawil. 17 Haxa yaqꞌbꞌil teꞌ aceite ayiko yul isqꞌabꞌ naj, chismasiko naj teꞌ yinh istxikin naj chisajnhelax tuꞌ, yinh isxaxohal yalanh, yinh istxikin naj yinh iswatxꞌqꞌabꞌ, yebꞌpaxo yinh ismiꞌehal yiximal isqꞌabꞌ naj yinh iswatxꞌqꞌabꞌ yebꞌpaxo yinh ismiꞌehal yiximal yoj naj yinh iswatxꞌqꞌabꞌ, yibꞌanh bꞌay maslaxiko ischikꞌil noꞌ meꞌ potxꞌlax yu istohlan mule. 18 Haxa hanikꞌxa teꞌ aceite xin, chismasiko naj sacerdote teꞌ yinh iswiꞌ naj, hak tuꞌ xin chu issajnhelax naj sata Komam.
19 »Lahwi tuꞌ, kat yalten naj sacerdote noꞌ meꞌ chꞌaqꞌlax xahanbꞌal yinh mule, hak tuꞌ chu yaqꞌni tanho Komam Dios ismul mak chisajbꞌikano tuꞌ, kat ispotxꞌni naj sacerdote noꞌ meꞌ chinhuslax yinh xahanbꞌalil tet Komam. 20 Chiyalten naj sacerdote noꞌ yibꞌanh ismexhahil xahanbꞌal yetbꞌi isbꞌa yebꞌ yebꞌalqꞌabꞌe yinh ixim harina chiꞌaqꞌlax tet Komam, hak tuꞌ chu yaqꞌnikano nimankꞌulal Komam yinh ismul mak chisajbꞌikanoj.
21 »Tato mebꞌaꞌ huneꞌ mak bꞌay ekꞌlena lepra tuꞌ, machi ismelyu chiloqꞌni hunteqꞌan tuꞌ, yilal yiniti naj hunu noꞌ tzehla meꞌ xahanbꞌalo chitohlan mule, kat isbꞌatxlaxkanh sata Komam, kat yinipaxti naj kabꞌ libra harina, ixim kaw kꞌul, sombꞌil yebꞌ aceite, yebꞌ oxebꞌ octavo aceite yebꞌalqꞌabꞌehal tet Komam. 22 Chinipaxti naj kakꞌonho noꞌ palamuch maka kakꞌonho noꞌ yunin kuwis xahanbꞌalil, hantatikꞌa chiqꞌoji naj yaqꞌni. Huneꞌ noꞌ chihaltelax yinh xahanbꞌalil yinh mule, haxa hunxa noꞌ xin, chinhuslax xahanbꞌalil tet Komam. 23 Haxa yinh iswaxajebꞌ tzꞌayik, chiyiti naj hunteqꞌan tuꞌ tet naj sacerdote chiꞌokniko yu issajbꞌikanoj, kat yalaxayo sata Komam istiꞌ ispultahil yatut watxꞌebꞌil yinh qꞌap qꞌap bꞌay chiskutxbꞌa isbꞌa anma Israel. 24 Lahwi tuꞌ, kat yiniti naj sacerdote noꞌ meꞌ yebꞌ oxebꞌ octavo aceite, kat isbꞌatxnikanh naj sata Komam Jahawil xahanbꞌal chitohlan mule. 25 Kat ispotxꞌni naj noꞌ meꞌ chꞌaqꞌlax xahanbꞌalil yu istohlan mule tuꞌ, kat yinikanh naj hanikꞌ ischikꞌil noꞌ, kat ismasniko naj yinh iswiꞌ istxikin naj chisajbꞌikano tuꞌ, yebꞌ yinh ismiꞌehal yiximal isqꞌabꞌ naj, yinh iswatxꞌqꞌabꞌ, yebꞌ yinh ismiꞌehal yiximal yoj naj yinh iswatxꞌqꞌabꞌ. 26 Kat yaniko naj hanikꞌ teꞌ aceite yul yoqꞌanil isqꞌabꞌ yinh ismekqꞌabꞌ. 27 Teꞌ aceite ayko yul isqꞌabꞌ naj sacerdote tuꞌ, hujel chistxihiko naj teꞌ sata Komam yu yiximal isqꞌabꞌ yinh iswatxꞌqꞌabꞌ. 28 Kat ismasnipaxiko naj teꞌ aceite tuꞌ yinh iswiꞌ istxikin naj chisajbꞌikano tuꞌ, istxikin naj yinh iswatxꞌqꞌabꞌ, yebꞌ yinh ismiꞌehal yiximal isqꞌabꞌ naj yinh iswatxꞌqꞌabꞌ yebꞌ yinh ismiꞌehal yiximal yoj naj yinh iswatxꞌqꞌabꞌ, yibꞌanh bꞌay masbꞌiliko ischikꞌil noꞌ xahanbꞌal tuꞌ. 29 Wal hanikꞌxa teꞌ aceite aytoko yul isqꞌabꞌ naj xin chismasahto naj teꞌ yinh iswiꞌ mak chisajbꞌikano tuꞌ, hak tuꞌ chu yaqꞌlaxkano nimankꞌulal yinh yu Komam Jahawil. 30 Lahwi tuꞌ, kat ispotxꞌni naj sacerdote noꞌ kakꞌonh palamuch, maka kakꞌonh noꞌ yunin kuwis, hatatikꞌa tzet yito naj chisajbꞌikano tuꞌ. 31 Huneꞌ noꞌ chihaltelax xahanbꞌalil istohlan ismul naj, hunxa noꞌ xin chinhuslax xahanbꞌalil tet Komam yebꞌ isyebꞌalqꞌabꞌ yinh ixim harina. Hak tuꞌ chu yaqꞌnikano nimankꞌulal Komam Jahawil yinh ismul naj chisajbꞌikano tuꞌ.
32 »Haꞌ hunteqꞌan tiꞌ kuybꞌanile yinh mak ekꞌlena lepra yinh, machi xin chiqꞌoji isloqꞌni xahanbꞌal aykanh istohol, yunhe issajnhen isbꞌa,» xhi Komam.
33 Istzotelpaxo Komam Dios Jahawil tet yaꞌ Moisés yebꞌ tet yaꞌ Aarón, yalni Komam hakaꞌ tiꞌ: 34 «Hayet ayexxa sat txꞌotxꞌ Canaán, txꞌotxꞌ chiwaqꞌan teyet yu yokkano heyu; tato ay hunu mak chiwakojan lepra yinh yatut yet ay hexxa sat hetxꞌotxꞌ tuꞌ, 35 haꞌ naj yahaw nha chiꞌelilo qꞌuxew yinh yatut tuꞌ, chito naj yalaꞌ tet naj sacerdote, kat yalni naj tet naj: “Ay hunteqꞌan qꞌuxew yinh watutan chiꞌekꞌ lebꞌohi,” xhihojabꞌ naj.
36 »Yet maxhto chiꞌokto naj sacerdote yul teꞌ nha tuꞌ, chischej naj ilaxolti sunil qꞌuybꞌe ayikto yul teꞌ, yunhe mach yahbꞌilo chukanoj tzet ayikto yul teꞌ yet chilni naj sacerdote ta lepra ayko yinh teꞌ. Lahwi tuꞌ, kat yokto naj yilno huneꞌ qꞌuxew tuꞌ.
37 »Ta hayet chilni naj sacerdote qꞌuxew petkixhtanhe ayko yinh isbꞌitzꞌabꞌil teꞌ nha tuꞌ, kat yilni naj ta nahatxa yehikto yul iskꞌul bꞌitzꞌabꞌ tuꞌ, yebꞌ ta yax, yebꞌ kaj jilni. 38 Yinh hakaꞌ tuꞌ, chiꞌelti naj sacerdote yul huneꞌ nha, kat yalni naj tato chimajchelaxkano teꞌ yulbꞌal hujebꞌ tzꞌayik. 39 Haxa yinh ishuj tzꞌayik, kat istopaxo naj sacerdote yilaꞌ teꞌ nha tuꞌ hunelxa. Hayet chilni naj tato xato lebꞌo qꞌuxew tuꞌ yinh isbꞌitzꞌabꞌil teꞌ, 40 kat ischejni naj sacerdote tuꞌ yilaxolo chꞌen chꞌen bꞌay ayko qꞌuxew tuꞌ, kat isto tirlaxoto chꞌen bꞌay mach sajoj yintalto konhobꞌ. 41 Kat ischejnipaxo naj nhijlaxolti yul bꞌitzꞌabꞌ yul nha tuꞌ, haꞌ xin ispojojal chito tirlaxokanto bꞌay mach sajoj yintalto konhobꞌ. 42 Nanxa chꞌen chꞌen chiꞌokto selelo chꞌen chitirlaxto tuꞌ, yebꞌ xin nanxa txꞌo txꞌotxꞌ chiꞌok yinhla sat bꞌitzꞌabꞌ.
43 »Yajaꞌ tato lahwi yilaxilo chꞌen chꞌen yebꞌ lahwi isnhijlax bꞌitzꞌabꞌ tuꞌ yebꞌ yalaxiko selel, kat yelpaxilo qꞌuxew yinh teꞌ nha tuꞌ hunelxa, 44 lahwi tuꞌ xin, kat istopaxo naj sacerdote yilaꞌ teꞌ nha tuꞌ hunelxa. Tato chiyil naj ta xato lebꞌo huneꞌ qꞌuxew tuꞌ, chaliloj tato lepra kaw txꞌoj huneꞌ tuꞌ, yuxin matxa sajo chukano teꞌ. 45 Haꞌ huneꞌ teꞌ nha tuꞌ, yilal yuchkꞌalaxayo teꞌ; haꞌ xin sunil te teꞌ yebꞌ chꞌen chꞌen yebꞌ txꞌo txꞌotxꞌ ayko yinh teꞌ, chito tirlaxokano yintalto konhobꞌ bꞌay mach sajoj. 46 Haꞌ mak chiꞌokto yul huneꞌ teꞌ nha tuꞌ yulbꞌal hunteqꞌan tzꞌayik chiyal naj sacerdote tato chipebꞌalax teꞌ, huneꞌ mak tuꞌ, mach sajo chukanoj masanto yet chiqꞌejbꞌayoj. 47 Yebꞌ xin makxanhetikꞌa chiway yul teꞌ, maka chiwaꞌ yul teꞌ, yilal istxꞌahni xil isqꞌap, yunhe issajbꞌikanoj hakaꞌ yalni chejbꞌanile.
48 »Yajaꞌ ta hayet chiꞌokto naj sacerdote yul teꞌ nha tuꞌ, kat yilni naj tato mach chito lebꞌo qꞌuxew tuꞌ, yet lahwi ishel-lax sat bꞌitzꞌabꞌ; yinh hakaꞌ tuꞌ, chalni naj tato saj chukano huneꞌ teꞌ nha tuꞌ, yuto lanhan iskꞌaykanh qꞌuxew yinh teꞌ. 49 Lahwi tuꞌ, kat yilaxti kakꞌonh noꞌ chꞌik yebꞌ teꞌ cedro, yebꞌ qꞌap qꞌap kaj yebꞌ teꞌ hisopo, yu yokniko yinh issajnhelaxkano teꞌ nha tuꞌ. 50 Kat ispotxꞌlax huneꞌ noꞌ chꞌik tuꞌ yibꞌanh txꞌotxꞌ xi bꞌay ayayto ha haꞌ bꞌey iqꞌlaxo bꞌey isnuqꞌ ha haꞌ. 51 Lahwi tuꞌ, chiyinikanh naj sacerdote teꞌ cedro yebꞌ qꞌap qꞌap kaj yebꞌ teꞌ hisopo, yebꞌ noꞌ chꞌik itzitz, kat islabꞌanayto naj xol ischikꞌil noꞌ chꞌik potxꞌlax tuꞌ, soman ye yebꞌ ha haꞌ bꞌey ilaxoti bꞌey isnuqꞌ ha haꞌ, chistxihniko naj hujel yul teꞌ nha tuꞌ. 52 Hak tuꞌ chu issajnhelaxkano huneꞌ teꞌ nha tuꞌ yu ischikꞌil noꞌ chꞌik, yebꞌ yu ha haꞌ bꞌey ilaxoti bꞌey isnuqꞌ ha haꞌ, yebꞌpaxo yu noꞌ chꞌik itzitz, yebꞌ teꞌ cedro, yebꞌ qꞌap qꞌap kaj yebꞌ teꞌ hisopo. 53 Lahwi tuꞌ, kat isbꞌejtzonto naj noꞌ chꞌik itzitz tuꞌ yintalto konhobꞌ, hak tuꞌ chu isyijelax chejbꞌanile yinh hunu teꞌ nha chisajnhelaxkanoj.
54 »Haꞌ ton hunteqꞌan tuꞌ chejbꞌanile yinh sunil yabꞌil lepra, yebꞌ yinh hunteqꞌan chihowayo xil iswiꞌ anma yu. 55 Yebꞌ yinh qꞌuxew chiꞌelilo yinh xilqꞌape, maka yinh isbꞌitzꞌabꞌil hunu teꞌ nha, 56 yebꞌ yinh hunteqꞌan txꞌak chimalkanh yebꞌ bꞌolobꞌ txꞌak, yebꞌ hunteqꞌan saj petkixhtanhe, 57 yunhe heyohtanheniloj bꞌaytet tzet ye tuꞌ saj yebꞌ bꞌaytet mach sajoj. Haꞌ hunteqꞌan tiꞌ chejbꞌanile yinh yabꞌil lepra,» xhi Komam.