Kuybꞌanile yinh tzet ye tuꞌ mach sajoj
15
Istzotelpaxo Komam Dios tet yaꞌ Moisés yebꞌ tet yaꞌ Aarón, yalni Komam: 2 «Halwe hunteqꞌan tiꞌ tet ebꞌnaj heyet Israelal: Tato ay hunu naj winaj ay hunu isyaꞌil yinh, ay xin tzet chiꞌel yinh iswinajil naj, haꞌ huneꞌ naj tuꞌ mach sajo chukano naj. 3 Waxanhka chiꞌel hunteqꞌan tuꞌ yinh, maka chimajikanh hayebꞌo tzꞌayikal, kat istitpaxoj, mach sajo chukano huneꞌ naj tuꞌ yinh hakaꞌ tuꞌ. 4 Tzijxanhe waybꞌal bꞌay chiꞌay hilno naj, maka tzijxanhe chemal bꞌay chiꞌay tzꞌonhno naj mach sajo chiyukanoj. 5 Maknhetikꞌa chitzabꞌni iswaybꞌal naj, yilal istxꞌahni xil isqꞌap, kat yaxhnhen isbꞌa, mach sajo xin chiyukanoj masanto yet chiqꞌejbꞌayoj. 6 Makxanhetikꞌa chiꞌay tzꞌonhno yibꞌanh chem bꞌay ay tzꞌonhno naj, yilal istxꞌahni xil isqꞌap kat yaxhnhen isbꞌa; mach xin sajo chukanoj masanta yet chiqꞌejbꞌayoj. 7 Hakpax tuꞌ, xin makxanhetikꞌa chitzabꞌni huneꞌ naj tuꞌ, yilal istxꞌahni xil isqꞌap kat yaxhnhen isbꞌa, mach xin sajo chukanoj masanta yet chiqꞌejbꞌayoj.8 »Ta haꞌ naj chiꞌel hunteqꞌan tuꞌ yinh iswinajil chitzubꞌliko yinh hunu mak saj yehi, haꞌ huneꞌ mak tuꞌ, yilal istxꞌahni xil isqꞌap kat yaxhnhen isbꞌa, mach xin sajo chukanoj masanta yet chiqꞌejbꞌayoj. 9 Tzijxanhe isxhilahil noꞌ cheh bꞌay chiꞌahto naj mach sajo chukanoj. 10 Makxanhetikꞌa chitzabꞌni hunu tzet ye tuꞌ, bꞌay chiꞌay tzꞌonhno naj, mach sajo chukanoj masanto yet chiqꞌejbꞌayoj. Makxanhetikꞌa xin chiꞌinito hunu tzet ye tuꞌ bꞌay chitzꞌonhi naj tuꞌ, yilal istxꞌahni xil isqꞌap huneꞌ mak tuꞌ, kat yaxhnhen isbꞌa, mach xin sajo chukanoj masanta yet chiqꞌejbꞌayoj. 11 Ta haꞌ naj chiꞌel hunteqꞌan tuꞌ yinh mach chistxꞌah isqꞌabꞌ, kat istzabꞌni naj hunu maka, haꞌ mak chistzabꞌ naj tuꞌ, yilal istxꞌahni xil isqꞌap, kat yaxhnhen isbꞌa; mach xin sajo chukanoj masanta yet chiqꞌejbꞌayoj. 12 Tato chistzabꞌ naj hunu txꞌotxꞌ xi, yilal ispohlaxkanto txꞌotxꞌ, maka xin hunu munlabꞌal watxꞌebꞌil yinh te teꞌ chistzabꞌ naj xin, yilal kam chitxꞌahlax huneꞌ tuꞌ yu ha haꞌ.
13 »Tato chiꞌanhcha naj tuꞌ, matxa tzet chiꞌel yinh iswinajil, yilal isbꞌisni naj hujebꞌ tzꞌayik bꞌay chissajnhe isbꞌa, yilal xin istxꞌahni naj xil isqꞌap kat yaxhnhen isbꞌa yinh ha haꞌ chiꞌilaxti bꞌey isnuqꞌ ha haꞌ. Hak tuꞌ chu issajbꞌikano naj. 14 Haxa yinh iswaxajebꞌ tzꞌayik, chiyiti naj kakꞌonho noꞌ palamuch maka kakꞌonho noꞌ yunin kuwis, kat yul naj istiꞌ ispultahil Yatut Komam watxꞌebꞌil yinh qꞌap qꞌap bꞌay chischah isbꞌa yebꞌ anma Israel, kat ischahnilo naj sacerdote noꞌ tet naj sata Komam. 15 Huneꞌ noꞌ chiyaqꞌ naj sacerdote xahanbꞌalo yu yaqꞌlax tanho ismul naj, haxa hunxa noꞌ xin chisnhus naj yinh xahanbꞌalil. Haꞌ naj sacerdote tuꞌ chihalten hunteqꞌan xahanbꞌal tuꞌ sata Komam, yunhe issajbꞌikano naj yu tzet chiꞌel yinh iswinajil tuꞌ.
16 »Tato ay hunu naj winaj tonhe chiꞌel yinhatil yinh, yilal istxꞌahni naj sunil isnimanil, mach xin sajo chukanoj masanto yet chiqꞌejbꞌayoj. 17 Tzijxanhe qꞌapil maka noꞌ tzꞌum bꞌay chiꞌay yinhatil tuꞌ, yilal istxꞌahlaxi, mach xin sajo chukanoj masanta yet chiqꞌejbꞌayoj. 18 Tato ay hunu naj winaj chiway yebꞌ hunu ix ix, yilal yaxhni iskawanhil, mach xin sajo chukanoj masanta yet chiqꞌejbꞌayoj.
Kuybꞌanile yinh ebꞌix ix chil istxꞌawobꞌal
19 »Hayet ayko hunu ix ix yinh istiempohal yilni istxꞌawobꞌal, mach sajo chukano ix yulbꞌal hujebꞌ tzꞌayik. Maknhetikꞌa chitzabꞌni ix, mach sajo chukanoj masanto yet chiqꞌejbꞌayoj. 20 Tzijxanhe tzet ye tuꞌ bꞌay chiꞌay hilno ix yulbꞌal istzꞌayikal chiyil ix istxꞌawobꞌal tuꞌ mach sajo chukanoj, yebꞌpaxo tzijxanhe tzet ye tuꞌ bꞌay chiꞌay tzꞌonhno ix mach sajo chukanoj. 21 Makxanhetikꞌa chitzabꞌni bꞌay chiway ix, yilal istxꞌahni xil isqꞌap kat yaxhnhen isbꞌa, mach xin sajo chukanoj masanto yet chiqꞌejbꞌayoj. 22 Makxanhetikꞌa chitzabꞌni tzijxanhe chemal bꞌay chiꞌay tzꞌonhno ix, yilal istxꞌahni xil isqꞌap kat yaxhnhen isbꞌa, mach xin sajo chukanoj masanto yet chiꞌah aqꞌbꞌal. 23 Haꞌ mak chitzabꞌni tzet ayayo yibꞌanh bꞌay ay hilno ix, maka bꞌay ay tzꞌonhno ix, mach sajo chukanoj masanto yet chiꞌah aqꞌbꞌal. 24 Tato ay hunu naj chiway yebꞌ ix, yinh hakaꞌ tuꞌ, chibꞌakchato naj, mach xin sajo chukano naj yulbꞌal hujebꞌ tzꞌayik; hakpax tuꞌ chukano bꞌay chiway naj.
25 »Tato ay hunu ix ix tonhetikꞌa chiyil istxꞌawobꞌal, waxanhka mach istiempohaloj, maka xin txꞌiꞌal tzꞌayik chiyilah; huneꞌ ix tuꞌ, mach sajo chukano ix yulbꞌal istzꞌayik chiyil ix istxꞌawobꞌal. 26 Tzijxanhe tzet bꞌay chiꞌay hilno ix, maka chem bꞌay chiꞌay tzꞌonhno ix, yulbꞌal chiꞌay yinh ix; mach sajo chukanoj hakaꞌtikꞌa yet chiyilni ix istxꞌawobꞌal. 27 Maknhetikꞌa chitzabꞌni bꞌay chiꞌay hilno ix maka bꞌay chiꞌay tzꞌonhno ix, yilal istxꞌahni xil isqꞌap, kat yaxhnhen isbꞌa, mach xin sajo chukanoj masanto yet chiꞌah aqꞌbꞌal.
28 »Hayet chilinhi yay yinh ix xin, yilal isbꞌisni ix hujebꞌ tzꞌayik, tzujan tuꞌ kat issajbꞌikano ix. 29 Haxa yinh iswaxajebꞌ tzꞌayik, chiyiti ix kakꞌonho noꞌ palamuch maka kakꞌonho noꞌ yunin kuwis, kat yaqꞌni ix noꞌ tet naj sacerdote sata istiꞌ Yatut Komam Dios watxꞌebꞌil yinh qꞌap qꞌap bꞌay chischah isbꞌa yebꞌ anma Israel. 30 Huneꞌ noꞌ, chiyalte naj sacerdote xahanbꞌal yu yaqꞌni tanho mule, hunxa noꞌ xin chisnhus naj xahanbꞌalo tet Komam. Hak tuꞌ chu issajbꞌikano sata Komam yu tzet chiꞌel yinh tuꞌ, yu xahanbꞌal chiyaqꞌ naj sacerdote.
31 »Hak tuꞌ, chu kosajnhen kobꞌa hanhonh Israelonh tiꞌ, yinh tzet mach sajoj, yunhe mach chonhkami chijetanto Yatut Komam ayko koxol.
32 »Haꞌ hunteqꞌan tuꞌ chejbꞌanile yinh ebꞌnaj winaj ay tzet chiꞌel yinh iswinajil, maka ebꞌnaj tonhe chiꞌel yinhatil yinh, yuxin mach sajo chukanoj, 33 yebꞌ chejbꞌanile yinh ebꞌix ix yet chiyilni ebꞌix istxꞌawobꞌal, yebꞌ yinh sunil mak yaꞌay yu hunteqꞌan tuꞌ, winaj maka ix. Yebꞌ yinh ebꞌnaj winaj chiway yebꞌ hunu ix ix lanhan yilni istxꞌawobꞌal, hakaꞌ tuꞌ mach sajoj, kachi,» xhi Komam.