Istzꞌayikal yet chꞌaqꞌlax nimankꞌulal yinh mule
16
Tzotel Komam Dios Jahawil tet yaꞌ Moisés yet lahwi iskamto ebꞌnaj kawanh iskꞌahol yaꞌ Aarón. Kam ebꞌnaj yu kaw hitziko ebꞌnaj sata Komam. 2 Yalni Komam tuꞌ tet yaꞌ Moisés: «Moisés, hal tet hawuxhta Aarón, yunhe machi kam yaꞌ, mach sunilbꞌalo tiempo chu yokto yaꞌ yul wehobꞌalan ekꞌna Txahul, yintakꞌti qꞌap velo, sata ismajil teꞌ kaxha, bꞌay chiwaqꞌ nimankꞌulalan. Chinye hinbꞌahan xol moyan yibꞌanh ismajil teꞌ kaxha tuꞌ.3 »Yet maxhto chꞌokto yaꞌ Aarón yul wehobꞌalan kaw txahul, yilal yiniti yaꞌ hunu noꞌ tzehla wakax xahanbꞌalil yinh ismul, yebꞌ hunu noꞌ winaj meꞌ chinhuslax xahanbꞌalil. 4 Yilal yaniko yaꞌ xil isqꞌap chiꞌokniko yinh ismunil, qꞌap túnika lino hojan yehi, kat yaniko yaꞌ qꞌap yul wexe lino, kat yaniko yaꞌ iskꞌalil yiktaj watxꞌebꞌilpaxo yinh qꞌap lino, kat yahnato yaꞌ qꞌap qꞌap yinh iswiꞌ watxꞌebꞌil yinh qꞌap lino. Hunteqꞌan xilqꞌape tuꞌ kaw txahul, yuxin yilal yaxhnhen isbꞌa yaꞌ bꞌabꞌel, kat yaniko yaꞌ xil isqꞌap tuꞌ. 5 Kat yaqꞌnipaxo konhobꞌ Israel kakꞌonh noꞌ winaj chiw xahanbꞌalil yinh ismul, yebꞌ hunu noꞌ winaj meꞌ chinhuslax xahanbꞌalil.
6 »Lahwi tuꞌ, kat yiniti yaꞌ Aarón noꞌ tzehla wakax chiyaqꞌ yinh xahanbꞌal wetan, huneꞌ xahanbꞌal tuꞌ yet yaꞌ yehi yunhe waqꞌnihan nimankꞌulal yinh ismul yaꞌ, yebꞌ yinh ismul makta ay yul yatut yaꞌ. 7 Lahwi tuꞌ, kat yiniti yaꞌ noꞌ kakꞌonh winaj chiw insatajan, sata istiꞌ watutan, bꞌay chiskutxbꞌa isbꞌa anma Israel inkꞌatanhan. 8 Chanayo yaꞌ Aarón suerte yibꞌanh noꞌ kakꞌonh chiw tuꞌ; huneꞌ noꞌ chihaltelax yinh xahanbꞌalil wetan, hunxa noꞌ xin chiꞌalaxto ismul anma yibꞌanh yu yalaxto tet naj Azazel.a 9 Chiyaqꞌnitij yaꞌ Aarón noꞌ bꞌay chiꞌaykꞌay suerte yok xahanbꞌal wetan, hanin Yahawilintiꞌan, chiyalte yaꞌ noꞌ xahanbꞌalil yinh mule. 10 Haxa hunxa noꞌ bꞌay chiꞌaykꞌay suerte tet naj Azazel, itzitz noꞌ kat yilaxti noꞌ insatajan, kat yalaxkanto mule yibꞌanh noꞌ, kat isbꞌejtzolaxto noꞌ sat txꞌotxꞌ desierto tet naj Azazel.
11 »Chaqꞌni tij yaꞌ Aarón noꞌ tzehla wakax, noꞌ yettikꞌa ay iskami xahanbꞌalil chiꞌaqꞌni tanho ismul yaꞌ yebꞌ sunil mak ay yul yatut. 12 Lahwi tuꞌ, kat yiniti yaꞌ lesen nohna yu tzaqꞌaqꞌ ayahto yibꞌanh ismexhahil yet xahanbꞌal ayko insatajan, kat yinikanh yaꞌ kabꞌ bꞌetx pom kaw xuqꞌ sam kokꞌtzebꞌil, kat yinikto yaꞌ yintakꞌto qꞌap velo aykanh yiktabꞌal Watutan. 13 Kat yanayo yaꞌ pom tuꞌ yibꞌanh tzaqꞌaqꞌ insatajan, hanin Yahawilintiꞌan, haxa xin isnhubꞌal tuꞌ chiꞌok hoyno yibꞌanh ismajil Kaxha bꞌay ayayto istꞌinhanil intratohan, bꞌay chaqꞌan nimankꞌulal yinh mule. Hak tuꞌ xin machi kam yaꞌ Aarón yet chiꞌokto yaꞌ bꞌey tuꞌ. 14 Lahwi tuꞌ, kat yiniti yaꞌ ischikꞌil noꞌ tzehla wakax, kat istxihniko yaꞌ yu yiximal isqꞌabꞌ sata ismajil kaxha yetkꞌulal bꞌay chiꞌahilo tzꞌayik, bꞌay chiwaqꞌan nimankꞌulal yinh mule. Hujel xin chistxihiko yaꞌ chikꞌ yu yiximal isqꞌabꞌ sata ismajil kaxha tuꞌ.
15 »Lahwi tuꞌ kat yelti yaꞌ, kat ispotxꞌnikamo yaꞌ noꞌ winaj chiw xahanbꞌalil yinh ismul konhobꞌ Israel, kat yinikto yaꞌ ischikꞌil noꞌ yintakꞌto qꞌap velo litxꞌankanh, kat istxihniko yaꞌ ischikꞌil noꞌ yibꞌanh ismajil kaxha yebꞌ sataj; hakaꞌtikꞌa yute yaꞌ ischikꞌil noꞌ tzehla wakax. 16 Hak tuꞌ chu issajnhelaxkano Wehobꞌalan kaw txahul tet istxꞌojal anma Israel, yebꞌ tet ismanhkꞌomal yebꞌ ismachiswalilal. Haktikꞌapax tuꞌ chiꞌutelax inTabernáculohan bꞌay chiskutxbꞌa isbꞌa ebꞌnaj Israel inkꞌatanhan, ayayoj xol anma chiwatxꞌen istxꞌojal.
17 »Haꞌ inTabernáculohan bꞌay chiskutxbꞌa isbꞌa anma inkꞌatanhan, machi hunu mak chu yokto yul yet chiꞌokto yaꞌ Aarón bꞌey Wehobꞌalan kaw ekꞌna txahul. Chiꞌokto yaꞌ yu yalten xahanbꞌal chiꞌaqꞌni nimankꞌulal yinh ismul yaꞌ, yebꞌ yinh ismul makta ay yul yatut yaꞌ, yebꞌ ismul anma Israel.
18 »Lahwi tuꞌ xin kat yelti yaꞌ, kat isto yaꞌ bꞌey ismexhahil xahanbꞌal ayko insatajan, yunhe issajnhenkano yaꞌ huneꞌ mexha tuꞌ. Chiyinikanh yaꞌ hanikꞌ ischikꞌil noꞌ tzehla wakax yebꞌ ischikꞌil noꞌ chiw, kat ismasniko yaꞌ yinh yukꞌaꞌil ismexhahil yet xahanbꞌal yebꞌ yinh sunil iskꞌul. 19 Chistxihniko yaꞌ yu yiximal isqꞌabꞌ hujel ischikꞌil no noqꞌ tuꞌ yibꞌanh ismexhahil xahanbꞌal. Hak tuꞌ chu issajnhenkano yaꞌ mexha tuꞌ yu istxꞌojal anma Israel.
20 »Hayet chilahwi issajnhenkano yaꞌ Wehobꞌalan kaw ekꞌna txahul ayko yul Watutan, yebꞌpaxo bꞌay chiskutxbꞌa isbꞌa anma inkꞌatanhan, yebꞌ ismexhahil xahanbꞌal, chischejni yaꞌ ilaxoti noꞌ chiw itzitz. 21 Chanayo yaꞌ iskabꞌil isqꞌabꞌ yibꞌanh iswiꞌ noꞌ, kat yalni yaꞌ istxꞌojal, yebꞌ ismanhkꞌomal yebꞌ ismachiswalilal anma Israel, hak tuꞌ chu yaykano sunil ismul anma Israel yibꞌanh iswiꞌ noꞌ chiw. Ay xin huneꞌ naj saybꞌilxalo isto yanokano noꞌ sat txꞌotxꞌ desierto. 22 Hak tuꞌ chu yinikanto noꞌ sunil ismul anma Israel yet chibꞌejtzolaxkanto noꞌ yul desierto bꞌay machi anma chꞌekꞌi.
23 »Lahwi tuꞌ, kat yokto yaꞌ Aarón yul Ehobꞌal txahul yul Watutan, bꞌay chiskutxbꞌa isbꞌa anma Israel inkꞌatanhan, kat yinilo yaꞌ xil isqꞌap watxꞌebꞌil yinh qꞌap lino yakoj yet yokto yul Wehobꞌalan kaw txahul, kat yanikano yaꞌ qꞌap bꞌey tuꞌ. 24 Haꞌ bꞌey tuꞌ, chiyaxhnhe isbꞌa yaꞌ, kat yaniko yaꞌ xil isqꞌap, lahwi tuꞌ kat yelti yaꞌ, kat isnhusni yaꞌ isxahanbꞌal Wetan, yebꞌ isxahanbꞌal anma Israel; hak tuꞌ chu waqꞌnihan nimankꞌulal yinh ismul yaꞌ yebꞌ yinh ismul anma Israel. 25 Lahwi tuꞌ, kat isnhusni yaꞌ ismantecahil noꞌ xahanbꞌal chꞌaqꞌlax yinh mule yibꞌanh ismexhahil xahanbꞌal.
26 »Haꞌ naj bꞌejtzonkanto noꞌ chiw, noꞌ inito ismul anma sat txꞌotxꞌ desierto tet naj Azazel, naj tuꞌ yilal istxꞌahni naj xil isqꞌap, kat yaxhnhen isbꞌa naj; lahwi tuꞌ kat yokto naj yul campamento.
27 »Haꞌ noꞌ tzehla wakax yebꞌ noꞌ winaj chiw aqꞌlax xahanbꞌalil yinh mule, noꞌ ilaxti ischikꞌil yul Wahobꞌalan kaw ekꞌna Txahul, chiꞌilaxilto isnimanil noꞌ yintalto campamento, haꞌ bꞌey tuꞌ xin chinhuslaxto ischibꞌehal noꞌ yebꞌ istzꞌumal noꞌ, yebꞌ istzaꞌ noꞌ. 28 Haꞌ mak chinhusnito noꞌ tuꞌ, yilal istxꞌahni xil isqꞌap kat yaxhnhen isbꞌa, lahwi tuꞌ kat yokto naj yul campamento hunelxa.
Huneꞌ Tzꞌayik bꞌay chꞌaqꞌlax Xahanbꞌal chitohlan mule
29 »Huneꞌ tiꞌ, chejbꞌanile chukaniko texol yinh sunilbꞌal ej tiempo: Yinh 10 (islahonhebꞌ) tzꞌayik yinh ixahaw yinh ishuj ixahaw yinh hunun habꞌil, mach chexwaꞌ yet cheyinayo hebꞌa wetan,b yebꞌ xin machi hunu mak chimunla yinh huneꞌ tzꞌayik tuꞌ. Huneꞌ tiꞌ yilal heyijen hex Israel hex tiꞌ yebꞌ anma mach Israelo ay texol. 30 Yuto yinh huneꞌ tzꞌayik tuꞌ chꞌaqꞌlax xahanbꞌal yu istohlan hemul; hak tuꞌ xin chu istanhkano hemul yul insatan. 31 Huneꞌ tzꞌayik tuꞌ, istzꞌayikal xewilal chiyukanoj, yebꞌ cheyinayo hebꞌa wetan yet mach chexwaꞌi. Chejbꞌanile chukano texol yinh sunilbꞌal tiempo. 32 Haꞌ naj sacerdote chiꞌokkano munil yinh yahawilo sacerdote selelo ismam yet chꞌalaxayo aceite yibꞌanh iswiꞌ, haꞌ naj tuꞌ chihalten xahanbꞌal chitohlan mule. Chako naj hunteqꞌan xil isqꞌap nabꞌa lino, kaw niman yelapnoj. 33 Haꞌ naj chiꞌaqꞌni xahanbꞌal yu issajbꞌikano wahobꞌalan kaw ekꞌna Txahul ayko yul Tabernáculo, yebꞌ sunil watutan watxꞌebꞌilkanh yinh qꞌap cortina, yebꞌ istiꞌ bꞌay chiskutxbꞌa isbꞌa anma Israel inkꞌatanhan, yebꞌ ismexhahil xahanbꞌal bꞌay chꞌaqꞌlax tanho ismul ebꞌnaj sacerdote yebꞌ sunil anma Israel.
34 »Huneꞌ tiꞌ, chejbꞌanile chukano teyet yinh sunilbꞌal ej tiempo. Hunel yul hunun habꞌil cheyije, cheyaqꞌni hexahanbꞌal yunhe yaqꞌlax nimankꞌulal yinh hemul hex Israel hex tiꞌ, kachi,» xhi Komam tet yaꞌ Moisés.
Hakaꞌtikꞌa yu yalni Komam Dios, hak tuꞌ yu isyijen yaꞌ Moisés.c