4. KUYBꞌANILE YIBꞌANHILO KOWATXꞌEN KOBꞌA SATA KOMAM
(17:1–25:55)
Anhe bꞌey Yatut Komam Dios chu yaltelax xahanbꞌal
17
Tzotelpaxo Komam Dios tet yaꞌ Moisés, yalni Komam: 2 «Tzotelanh tet yaꞌ Aarón yebꞌ tet ebꞌnaj iskꞌahol yaꞌ yebꞌ sunil anma Israel, kat hawalni tet hakaꞌ tiꞌ: Haꞌ hunteqꞌan chejbꞌanile tiꞌ chiyaqꞌ Komam:3 »Maknhetikꞌa hunu ebꞌnaj winaj Israel, chipotxꞌni hunu noꞌ wakax, maka hunu noꞌ meꞌ, maka hunu noꞌ chiw yul campamento maka yintalto campamento, 4 machi xin chiyiti naj noꞌ yamaqꞌil istiꞌ Watutan, bꞌay chiskutxbꞌa isbꞌa anma inkꞌatanhan yu yalten ebꞌnaj noꞌ xahanbꞌalil wetan. Haꞌ ischikꞌil noꞌ chimalto yu naj, chiꞌokkano ismulo naj, huneꞌ naj tuꞌ, maqꞌbꞌil iskꞌaytzelaxilo naj texol. 5 Hak tuꞌ chu walnihan teyet yunhe mach chepotxꞌkamo no noqꞌ yinh xahanbꞌalil yul campamento, maka yinta campamento. Wal xin cheyiti noꞌ tet naj sacerdote sata istiꞌ Watutan bꞌay chiskutxbꞌa isbꞌa anma Israel inkꞌatanhan, yunhe yalten naj noꞌ xahanbꞌalil yet aqꞌankꞌulal. 6 Chistxihniko naj sacerdote ischikꞌil noꞌ yinhla iskꞌul ismexhahil xahanbꞌal insatajan bꞌay chexoknapno bꞌey istiꞌ Watutan, kat isnhusni naj ismantecahil noꞌ insatajan; huneꞌ tuꞌ kaw xuqꞌ chꞌapni sam insatajan. 7 Matxa xin bꞌaqꞌinhal cheyaqꞌ hexahanbꞌal tet ischejabꞌ naj matzwalil, bꞌay heyiyo hebꞌa yu heyetaxtoj. Huneꞌ tiꞌ, chejbꞌanile chukano teyet yebꞌ tet heyuninal yinh sunilbꞌal tiempo.
8 »Chawalnipaxoj tato maknhetikꞌa anma Israel maka anma mach Israeloj ay texol chiyaqꞌ isxahanbꞌal chinhuslaxi maka hunuxa xahanbꞌal, 9 machi xin chiyiti noꞌ isxahanbꞌal tuꞌ istiꞌ Watutan, bꞌay chiskutxbꞌa isbꞌa anma Israel inkꞌatanhan, yu yalten isxahanbꞌal, haꞌ huneꞌ mak tuꞌ maqꞌbꞌil iskꞌaytzelaxilo xol yet konhobꞌ.
Txahul islolax ischikꞌil no noqꞌ
10 »Maknhetikꞌa hex Israel hex tiꞌ, maka hunu mak mach Israelo ay texol chiloni ischikꞌil hunu no noqꞌ, huneꞌ mak tuꞌ, chinkajwahan yinh, wiyom yilaxilo texol.a 11 Yuto sunil no noqꞌ yebꞌ sunil anma, yu ischikꞌil yuxin itzitz, yu tuꞌ yuxin walan ta chiꞌalaxiko ischikꞌil noꞌ yinh ej iskꞌul ismexhahil yet xahanbꞌal, hak tuꞌ xin chu yaqꞌnikano tanho mule, yuto haꞌ chikꞌ tuꞌ, chiyu yaqꞌni tanho ismul anma.
12 »Yuxin chiwalan tet ebꞌnaj Israel hakaꞌ tiꞌ: “Machi hunujex tiꞌ chu heloni ischikꞌil no noqꞌ, yebꞌpaxo xin anma mach Israeloj ay texol; mach chu islohni ischikꞌil no noqꞌ,” quinchihan. 13 Maknhetikꞌa anma Israel tiꞌ, maka hunu mak mach Israelo ayko xol ebꞌnaj chitzabꞌni hunu no noqꞌ, maka hunu noꞌ chꞌik chu iskꞌuxlaxi, yilal yinikanilo ischikꞌil noꞌ, kat yanikaniko txꞌotxꞌ yibꞌanh. 14 Yuto yu ischikꞌil no noqꞌ yuxin itzitz noꞌ, yuxin chiwalan tet ebꞌnaj Israel tato mach chu islolax ischikꞌil no noqꞌ. Yuto haꞌ ischikꞌil noꞌ chiꞌaqꞌni iskawil noꞌ. Haꞌ mak chiloni ischikꞌil hunu no noqꞌ, chiꞌilaxilo xol yet konhobꞌ yinh hunelnhe.
15 »Maknhetikꞌa anma Israel maka mak mach Israelo ay xol, chikꞌuxni ischibꞌehal hunu no noqꞌ kamnaxa maka hunu no noqꞌ chixitlaxkamoj yu hunu noꞌ howla noqꞌ, huneꞌ mak tuꞌ, yilal istxꞌahni xil isqꞌap, kat yaxhnhen isbꞌa, machi xin sajo chukanoj masanto yet chiqꞌejbꞌayoj; lahwi tuꞌ kat issajbꞌikano huneꞌ mak tuꞌ. 16 Yajaꞌ ta mach chistxꞌah xil isqꞌap, yebꞌ ta mach chiyaxhnhe isbꞌa, chitokano ismul tuꞌ yibꞌanh, kachi,» xhi Komam.