3 »Mach chebꞌeybꞌalnhe isbꞌeybꞌal anma ay yul konhobꞌ Egipto bꞌay ekꞌlena hex.

»Mach cheyilto hewatxꞌen isbꞌeybꞌal anma ay bꞌey txꞌotxꞌ Canaán, txꞌotxꞌ bꞌay chexwijbꞌatojan. Mach chexoktzujno yinta kuybꞌanile bꞌay ayko anma tuꞌ.

4 »Wal xin, yijewe chejbꞌanil chiwalan teyet, kat xin hebꞌeybꞌalnhen tzet aqꞌbꞌilkano hekuyuꞌ wuhan, cheyijewe sunil hakaꞌ chiwalan. Hanin Yahawilintiꞌan yebꞌ heDiosal wehan.

5 »Bꞌeybꞌalnhewe chejbꞌanile, kat heyaniko yinh ismunil. Haꞌ mak chiyijeni, ay iskawil. Hanin Yahawintiꞌan chiwalan huneꞌ tiꞌ.

6 »Machi hunu naj winaj tiꞌ chihitziko iskꞌatanh hunu ix ix ayto yu isbꞌa yebꞌi, yu isway naj yebꞌ ix kat yilni naj istꞌilanil ix. Hanin Yahawilintiꞌan, chiwalan huneꞌ tiꞌ.

7 »Machawil istꞌilanil hamam, hamiꞌ, machawilo istxꞌixobꞌal.

8 »Haꞌ istꞌilanil yixal hamam, mach chayeloj, ta chayeloj chawilo istxꞌixobꞌal hamam.

9 »Machojabꞌ chayelo istꞌilanil hawanabꞌ, iskutzꞌin hamam maka yunin hamiꞌ, ix pitzkꞌana yul yatut maka bꞌayejtuꞌwal.^a

10 »Machojabꞌ chatꞌilbꞌa iskutzꞌin hakꞌahol yu hawinilo ispixan, maka yunin hakutzꞌin. Hachtikꞌa mame hach tuꞌ chatꞌilbꞌa habꞌa.

11 »Mach chawilo istxꞌixobꞌal ix yunin yixal hamam yet chatꞌilbꞌan ix, yuto kaw iskutzꞌin hamam ye ix, yebꞌ xin kaw hawanabꞌ ye ix.

12 »Mach chawilo istxꞌixobꞌal yanabꞌ hamam yu hatꞌilbꞌan ix, yuto kaw yanabꞌ hamam ye ix.

13 »Mach chatꞌilbꞌa ix isnoh hamiꞌ mach hawilo istxꞌixobꞌal, yuto kaw isnoh isbꞌa ix yebꞌ hamiꞌ.

14 »Mach chatꞌilbꞌan yixal yuxhta hamam yu hawinilo istxꞌixobꞌal.

15 »Mach chatꞌilbꞌan hawalibꞌ yuto hakaꞌ tuꞌ haꞌ hakꞌahol lanhan hawinilo ispixan, yebꞌ chawilo istxꞌixobꞌal.

16 »Mach chatꞌilbꞌan yixal hawuxhta yuto hakaꞌ tuꞌ chawilo istxꞌixobꞌal naj.

17 »Ta chawiqꞌkanh habꞌa yebꞌ hunu ix, mach chu hatꞌilbꞌan yunin ix. Maxhtikꞌa chu yokniko iskutzꞌin yunin ix hawu yu hatꞌilbꞌani, yebꞌ xin ix yunin yunin ix mach chu hatꞌilbꞌan ix. Huneꞌ tuꞌ kaw txꞌojkanoj, yuto huneꞌnhe ischikꞌil ix yebꞌi.

18 »Machojabꞌ chawiqꞌkanh isnoh hawixal; yet itzitzto hawixal, yunhe mach chꞌokle ishowal ebꞌix yinh hunun.

19 »Machojabꞌ chiꞌokniko hawixal hawu yet lanhan yilni ix istxꞌawobꞌal.

20 »Machojabꞌ chaxhway yebꞌ yixal hunu hawet anmahil, hakaꞌ tuꞌ txꞌoj chacheliko yebꞌ ix.

21 »Mach cheyaqꞌ heyuninal nhuslaxo xahanbꞌalil tet tioxh Moloc, yunhe mach cheyaqꞌ tako inkꞌulan. Hanin Yahawintiꞌan, chiwalan huneꞌ tiꞌ.^b

22 »Machojabꞌ hunu hawet winajil chawet wayi, chꞌokniko hawu hakaꞌ haweh yebꞌ hawixal, yahbꞌeta huneꞌ tuꞌ yul insatan.

23 »Machojabꞌ chaweta habꞌa yebꞌ hunu no noqꞌ, hak tuꞌ txꞌoj chaxhelikoj. Machojabꞌpaxo hunu ix ix chiyeta isbꞌa yebꞌ hunu no noqꞌ. Huneꞌ tuꞌ, kaw txꞌojkano yul insatan.

24 »Machojabꞌ cheyetato hebꞌa yu hunteqꞌan istxꞌojal tiꞌ, yuto haꞌ yinh hunteqꞌan tiꞌ yetato isbꞌa ej konhobꞌ chiwilojan tesataj. 25 Etaxpaxkanto istxꞌotxꞌ ebꞌnaj yu istxꞌojal, yuxin wilan istxꞌojal hunteqꞌan anma tuꞌ; haꞌ xin istxꞌotxꞌ ebꞌnaj chixayeniloj. 26 Yuxin hex Israel hex tiꞌ, yebꞌ anma mach Israelo ay texol, yijewe inchejbꞌanilan yebꞌ inleyan, machi xin chewatxꞌe hunteqꞌan yahbꞌeta tuꞌ. 27 Haꞌ hunteqꞌan isyahbꞌetajil tuꞌ iswatxꞌe anma ay sat txꞌo txꞌotxꞌ bꞌay maxhto chexapni, etaxto txꞌotxꞌ yu ebꞌnaj. 28 Ta cheyetato txꞌotxꞌ yu istxꞌojal, ay ismay kexisxayenilo txꞌotxꞌ, hakaꞌ yu isxayenilo txꞌotxꞌ anma ayayo sat txꞌotxꞌ yet yalanhto maxhto chexapni sat txꞌotxꞌ.

29 »Haꞌ mak chiwatxꞌen hunteqꞌan isyahbꞌetajil tuꞌ, wiyom yilaxilo texol. 30 Yuxin yijewe chejbꞌanil chiwalan, yebꞌ xin mach chebꞌeybꞌalnhe hunteqꞌan isyahbꞌetajil iswatxꞌe anma ayayo sat txꞌotxꞌ yet maxhto chexapni; mach xin cheyetato hebꞌa yu hunteqꞌan tuꞌ. Hanin Yahawilintiꞌan yebꞌ heDiosal, chiwalan huneꞌ tiꞌ,» xhi Komam.