3 »Nananta isxiw hunun mak tet ismiꞌ yebꞌ tet ismam. Yijewe istzꞌayikal xewilal. Yuto Komam Dios Yahawil, yebꞌ koDiosal, chihalni huneꞌ tiꞌ.

4 »Mach cheyako heyanma yinh ej tioxh, mach chewatxꞌepaxo chꞌen chꞌen hediosaloj. Yuto Komam Dios Jahawil yebꞌ koDiosal, chihalni huneꞌ tiꞌ.

5 »Hayet cheyaqꞌni hexahanbꞌal yet aqꞌankꞌulal tet Komam Dios, yilal hewatxꞌeni hakaꞌ yalni chejbꞌanile. 6 Haꞌ no noqꞌ cheyaqꞌ xahanbꞌalil tuꞌ, chekꞌux ischibꞌehal noꞌ yinh huneꞌ tzꞌayik tuꞌ yebꞌ yet hunxa tzꞌayik; yajaꞌ ta ayto noꞌ chibꞌe tuꞌ, chikankano yinh yox tzꞌayik, chenhusto noꞌ. 7 Tato chekꞌux noꞌ chibꞌe cheyaqꞌ hexahanbꞌalo tuꞌ yinh iskabꞌwihal, huneꞌ tuꞌ yahbꞌeta yul sat Komam, machi xin chischah Komam huneꞌ xahanbꞌal tuꞌ. 8 Haꞌ mak chikꞌuxni noꞌ yinh iskabꞌwihalxa tuꞌ, mach chitanh ismul tuꞌ yibꞌanh, yuto machi yelapno yul sat tzet ye tuꞌ yet Komam. Haꞌ huneꞌ mak tuꞌ, chikꞌaytzelaxilo texol.

9 »Hayet cheyinikanh sat hetzꞌunubꞌ sat hetxꞌotxꞌ, machi kaw kamo cheyikanh sat hetzꞌunubꞌ tuꞌ yinhla istiꞌlaj. Machi xin chexekꞌpaxo hesayaꞌ tato ayto iswiꞌ ixim trigo chikankano heyu xol istel. 10 Hayet cheyinikanh sat teꞌ uva, mach chexekꞌ hekutxbꞌakanh yinh iskayel ta ayto teꞌ chikankano heyu. Mach xin cheyipaxoka sat teꞌ aykꞌayna sat txꞌotxꞌ. Haꞌ hunteqꞌan sat tzꞌunubꞌ chikankano tuꞌ yet anma mebꞌaꞌ yehi, yebꞌ anma nan konhobꞌal ay texol. Komam Yahawil, koDiosal chihalni huneꞌ tiꞌ.

11 »Mach chexelqꞌawi, mach cheyal leqꞌtiꞌal. Mach cheyaqꞌ subꞌchaho heyet anmahil.

12 »Mach cheyaqꞌ bꞌinaho isbꞌi Komam Dios yinh leqꞌtiꞌal yinh tzet cheyala, yuto cheyilo ispixan isbꞌi Komam. Haꞌ Komam Yahawil chihalni huneꞌ tiꞌ.

13 »Mach cheyeta heyet anmahil, yebꞌ xin mach cheyelqꞌalo tzet aya. Hayet chimunla hunu naj teyintaj, mach cheyala tato hekalto chetohla istzꞌayik naj tuꞌ.

14 »Mach chetzꞌaktiꞌnhe mak majan istxikin. Mach cheyayo hunu tzet ye tuꞌ yul isbꞌeh mak mach chu yilni yunhe istxaqꞌmohi. Wal xin xiwanhwe tet Komam Dios. Haꞌ Komam Yahawil chihalni huneꞌ tiꞌ.

15 »Hayet chewatxꞌenayo hunu tzet ye tuꞌ, mach chewatxꞌe tzet mach toholoj. Mach cheyato hebꞌa yinh mak mebꞌaꞌ maka yinh mak kaw ay yelapno yehi, wal xin haꞌ istoholal chewatxꞌe yinh heyet anmahil.

16 »Machojabꞌ chexekꞌ halo qꞌumal xol heyet konhobꞌ. Mach cheyal hepotxꞌoꞌkamo hunu heyet anmahil. Hanin Yahawilintiꞌan chiwalan huneꞌ tiꞌ.

17 »Mach cheyah heyuxhtaj yul heyanma. Kachwahanhwej yinh heyet anmahil ta ay istxꞌojal chiswatxꞌe, hak tuꞌ xin maxhtaj hunex chewatxꞌe istxꞌojal tuꞌ.

18 »Machojabꞌ chepajtze istxꞌojal chiswatxꞌe hunu heyet anma teyinh, yebꞌ xin machojabꞌ cheyako howal yinh heyet konhobꞌ; wal xin xahan cheyil heyet anmahil hakaꞌ chu heyaꞌilnhen hebꞌa. Haꞌ Komam Yahawil chihalni huneꞌ tiꞌ.

19 »Yijewe chejbꞌanile chiwaqꞌan teyet tiꞌ.

»Mach cheyaqꞌ sajcho henoqꞌ yebꞌ hunuxa noꞌ nan noqꞌal.

»Mach somano cheyute heyinhat yet chexto hetzꞌunno sat hetxꞌotxꞌ.

»Mach cheyako xil heqꞌap soman ye istxꞌalil yebꞌ hunuxa majan txꞌal.

20 »Ta ay hunu naj winaj chiway yebꞌ hunu ix chejabꞌ, yajaꞌ ta kꞌulxa ye ix yebꞌ hunu naj, yaj xin maxhto chitohlalax ix tet yahaw tuꞌ yebꞌ maxhto yeto isbꞌa ix ischukil, yinh hakaꞌ tuꞌ, mach chꞌaqꞌlaxkamo iskawanhil, tonhe chihatelaxi, yuto mach yeto isbꞌa ix tuꞌ ischukil. 21 Naj chako ismul tuꞌ, yilal yiniti naj hunu noꞌ winaj meꞌ yamaqꞌil Yatut Komam bꞌay iskutxbꞌa isbꞌa anma iskꞌatanh Komam kat yalten naj noꞌ xahanbꞌalil yu istohlan ismul. 22 Haꞌ xin naj sacerdote chipotxꞌnikamo noꞌ xahanbꞌalil yinh ismul naj, kat isqꞌanni naj nimankꞌulal yinh naj tet Komam, kat yaqꞌnikano Komam nimankꞌulal yinh ismul huneꞌ naj tuꞌ.^b

23 »Hayet chexapni sat txꞌo txꞌotxꞌ chiwaqꞌan teyet, chetzꞌun sunil teꞌ lobꞌehal, yajaꞌ yulbꞌal oxebꞌ habꞌil mach cheyilo sat teꞌ yebꞌ mach chelopaxo teꞌ. 24 Haxa yinh iskanh habꞌil yaqꞌni teꞌ sat xin, cheyiti sunil sat teꞌ lobꞌehal tuꞌ heyebꞌalqꞌabꞌoj, yu heyaqꞌni yuchꞌandiosal tet Komam. 25 Haxa yinh ishoꞌ habꞌil yaqꞌni teꞌ sat tuꞌ, xaꞌisje heloni sat teꞌ lobꞌehal tuꞌ. Ta cheyije hakaꞌ tuꞌ, kaw txꞌiꞌal sat sunil teꞌ lobꞌehal tuꞌ chiyaqꞌa. Hanin heYahawilintiꞌan yebꞌ heDiosal chiwalan huneꞌ tiꞌ.

26 »Mach chekꞌux noꞌ chibꞌe aytoko ischikꞌil yinh.

»Mach cheyako hebꞌa henabꞌalo tzotiꞌ, nitam chexok ahbꞌehal.

27 »Mach petano chiyu heyinilo xil hewiꞌ.

»Mach cheyilo istxam xil hetiꞌ.

28 »Mach cheyako islahwilal henimanil yu bꞌiskꞌulal yet ay hunu mak chikami. Mach cheyako hunu yechel tzet ye tuꞌ yinh henimanil. Komam Dios Yahawil chihalni huneꞌ tiꞌ.

29 »Mach cheyilo istxꞌixobꞌal hekutzꞌin yet chexto heyaqꞌnokano ix yinh winajloj. Mach cheyetato hekonhobꞌ yu hewatxꞌen hunteqꞌan istxꞌojal tuꞌ.

30 »Yijewe istzꞌayikal xewilal. Nimanojabꞌ yelapno ye Yatut Komam yul hesat. Komam Dios Jahawil chihalni huneꞌ tiꞌ.

31 »Mach cheqꞌambꞌe hebꞌa tet anma chisqꞌumla isbꞌa yebꞌ kamom. Mach cheqꞌambꞌepaxo hebꞌa tet anma ahbꞌe, hak tuꞌ xin mach cheyetato hebꞌa. Komam Dios Jahawil, koDiosal chihalni huneꞌ tiꞌ.

32 »Ayojabꞌ yelapno ebꞌnaj ichamta winaj yul hesat, ahanhwe linhno sata ebꞌnaj. Xiwanhwe tet Komam Dios heDiosal. Komam Dios Jahawil, chihalni huneꞌ tiꞌ.

33 »Mach cheyeta anma mach Israelo ay texol, 34 wal xin xahanojabꞌ cheyila hakaꞌ heyaꞌilnhen hebꞌa; xahanojabꞌ cheyila hakaꞌ heyilni heyet konhobꞌ, yuto hakexpax tuꞌ, kexekꞌlena nan konhobꞌal sat txꞌotxꞌ Egipto. Komam Dios Jahawil, yebꞌ koDiosal, chihalni huneꞌ tiꞌ.

35 »Machojabꞌ cheyeta hunu mak yinh tzet ye tuꞌ chetxonho, tzꞌajanojabꞌ hemalbꞌal cheyakoj; hakaꞌ yet chemalen hunu txꞌo txꞌotxꞌ, maka yet chemalen hunu tzet ye tuꞌ yinh isquintalil, maka yet chemalen hunu tzet ye tuꞌ, hakaꞌojabꞌ tuꞌ cheyute. 36 Tzꞌajanojabꞌ helibra maka heyalmu chiꞌokniko heyu, maka hunuxa hemalbꞌal. Komam Dios Jahawil, koDiosal konhinilo sat txꞌotxꞌ Egipto, chihalni huneꞌ tiꞌ.

37 »Wal xin yijewe ischejbꞌanil yebꞌ isley Komam Dios chiyalkano tiꞌ. Komam Dios Jahawil, chalni huneꞌ tiꞌ,» xhi Komam, kachi.