»Tato ay hunu hex Israel hex tiꞌ, maka hunu mak mach Israelo ay texol chiyalte hunu yuninal xahanbꞌalil tet tioxh Moloc, haꞌ huneꞌ mak tuꞌ, yilal isqꞌojlaxkamo yu yet konhobꞌ. 3 Hanintiꞌan chiwako insatan yinh huneꞌ mak tuꞌ, yuxin maqꞌbꞌil winilojan xol konhobꞌ, yu chiyalte yuninal xahanbꞌalil tet tioxh Moloc, hak tuꞌ xin chu isbꞌakchato watutan yebꞌ chiyilo ispixan inbꞌihan kaw ay yelapnoj. 4 Ta inkonhobꞌtiꞌan chismutzꞌ sat yinh mule chiswatxꞌe hunu naj yet chaqꞌni naj yuninal yinh xahanbꞌalil tet tioxh Moloc, machi xin chimaqꞌlaxkamo naj, 5 yinh hakaꞌ tuꞌ, how wilnihan yinh naj yebꞌ yinh yixal, yebꞌ yinh yuninal, kat winilojan xol konhobꞌ, hakpax tuꞌ xin sunil mak chiꞌaqꞌni yuninal xahanbꞌalil tet tioxh Moloc.

6 »Haꞌ mak chisqꞌambꞌe isbꞌa tet anma ahbꞌelom yebꞌ tet anma tzꞌajan iskꞌul yalni, kat isyijen tzet chiyal ebꞌnaj tuꞌ, haꞌ hunteqꞌan anma tuꞌ chiyetato isbꞌa yinh hakaꞌ tuꞌ, yuxin how wilnihan yinh, hak tuꞌ xin chiwilojan xol yet konhobꞌ.

7 »Hunelnhehojabꞌ hepohnilo hebꞌa xol istxꞌojal, yuto hanintiꞌan heYahawil yebꞌ xin heDiosal. 8 Bꞌeybꞌalnhewe inchejbꞌanilan, kat heyijeni. Hanintiꞌan heYahawil, kexpohniloj yu heyokkano wetojan.

9 »Maknhetikꞌa chitzꞌaktiꞌnhen ismam maka ismiꞌ maqꞌbꞌil iskami. Huneꞌ mak tuꞌ, haꞌ chiꞌiniti kamikal yibꞌanh, yuto chistzꞌaktiꞌnhe ismam maka ismiꞌ.

10 »Ta ay hunu naj chiyixnhe yixal hunu yet anmahil, haꞌ huneꞌ naj tuꞌ, maqꞌbꞌil iskam naj yebꞌ ix.

11 »Makxanhetikꞌa chiway yebꞌ yixal ismam, yinh hakaꞌ tuꞌ, hakaꞌtanhe chistꞌilbꞌa naj ismam, chiyilo naj ispixan, yuxin maqꞌbꞌil iskam naj yebꞌ ix, haꞌ xin chiꞌiniti kamikal yibꞌanh yu haꞌ chute isbꞌa.

12 »Tato ay hunu naj chiway yebꞌ yixal iskꞌahol, maqꞌbꞌil iskam iskawanhil, yuto kaw txꞌoj huneꞌ tuꞌ, haꞌ chiyiti kamikal yibꞌanh.

13 »Tato ay hunu naj winaj chiyeta isbꞌa yebꞌ yet winajil, hakaꞌ chu isway yebꞌ yixal, maqꞌbꞌil iskam iskawanhil, yuto kaw txꞌoj huneꞌ tuꞌ. Haꞌtikꞌa xin chiꞌiniti kamikal yibꞌanh.^a

14 »Tato ay hunu naj chiyiqꞌ hunu ix ix, kat yiqꞌnipaxo naj ismiꞌ ix, huneꞌ tuꞌ kaw txꞌojkano yul sat Komam. Haꞌ huneꞌ naj tuꞌ, maqꞌbꞌil isnhuslaxtoj, yebꞌ ebꞌix kawanh, yaj yet itzitzto, haxinwal matxa mak chiwatxꞌen istxꞌojal tuꞌ texol.

15 »Ta ay hunu naj chiyeta isbꞌa yebꞌ hunu no noqꞌ, huneꞌ naj tuꞌ, maqꞌbꞌil iskam naj; hakpax tuꞌ noꞌ, wiyom iskam noꞌ.

16 »Ta ay hunu ix ix chiyeta isbꞌa yebꞌ hunu no noqꞌ, haꞌ huneꞌ ix tuꞌ, maqꞌbꞌil iskam ix yebꞌ noꞌ tuꞌ, haꞌtikꞌa xin chiꞌiniti kamikal yibꞌanh.

17 »Tato ay hunu naj chꞌiqꞌnikanh iskutzꞌin ismam, maka yunin ismiꞌ, yinh hakaꞌ tuꞌ, yanabꞌ naj chiyiqꞌkanh, yuxin haꞌ kawanh tuꞌ, maqꞌbꞌil iskam yinh sat sunil konhobꞌ, yuto kaw txꞌixobꞌal huneꞌ tuꞌ. Haꞌ mak chiꞌuten huneꞌ tuꞌ, chiyikanto ismul tuꞌ yibꞌanh.^b

18 »Tato ay hunu naj chiway yebꞌ hunu ix ix yet chiyilni ix istxꞌawobꞌal, yinh hakaꞌ tuꞌ mach yelapno tzet ye ix tuꞌ yul sat naj, kat isyenipaxilo ix bꞌay chitit istxꞌawobꞌal tuꞌ, yuxin haꞌ kawanh tuꞌ chꞌilaxilo xol konhobꞌ.

19 »Machojabꞌ chaxhway yebꞌ hunu ix isnoh hamiꞌ, maka yebꞌ yanabꞌ hamam. Haꞌ mak chiꞌuten hakaꞌ tuꞌ, chitokano ismul yibꞌanh.

20 »Tato ay hunu naj chitꞌilbꞌan yixal yuxhtaj ismam yu isway yebꞌi, chiyilo naj ispixan yuxhta ismam. Haꞌ kawanh mak chiyako ismul tuꞌ, chiyikanto ismul yibꞌanh, machi xin hunu yuninal, kat iskamtoj.

21 »Ta ay hunu naj chiyilo yixal yuxhtaj kat yiqꞌni naj, yinh hakaꞌ tuꞌ chiyilo naj ispixan yuxhta tuꞌ; huneꞌ tuꞌ, kaw yahbꞌeta yul sat Komam, machi xin yuninal chiyila.

22 »Bꞌeybꞌalnhewe chejbꞌanile yebꞌ kuybꞌanile chiwakanojan tiꞌ, yijewe sunil, haxinwal mach chexisxayelo txꞌotxꞌ bꞌay chexwatojan tuꞌ. 23 Mach chebꞌeybꞌalnhe tzet chiswatxꞌe anma chiwilojan tesataj tuꞌ. Sunil hunteqꞌan istxꞌojal tuꞌ, haꞌ chiswatxꞌe hunteqꞌan anma tuꞌ, yuxin kaw matxa chitecha istxꞌojal tuꞌ wuhan. 24 Hanintiꞌan xawalan teyet tato chiwaqꞌan istxꞌotxꞌ hunteqꞌan anma tuꞌ teyet. Haꞌ txꞌo txꞌotxꞌ chiwaqꞌan teyet yu yokkano txꞌotxꞌ heyu, huneꞌ txꞌotxꞌ tuꞌ kaw kꞌul txꞌotxꞌ, kaw yax sat txꞌotxꞌ. Kaw ay noꞌ lech yebꞌ noꞌ kabꞌ sat txꞌotxꞌ.

»Hanin Yahawilintiꞌan, heDiosal, xakexinpohilojan xol ej konhobꞌ. 25 Yuxin yilal heyohtanheniloj bꞌaytet no noqꞌ saj, yebꞌ bꞌaytet no noqꞌ mach sajoj; yebꞌ bꞌaytet noꞌ chꞌik saj yebꞌ bꞌaytet noꞌ mach sajoj. Mach cheyetato hebꞌa yu hekꞌuxni no noqꞌ mach sajoj, maka yu noꞌ chꞌik mach sajoj, maka noꞌ chishatxikꞌo iskꞌul; noꞌ xawalan tato mach sajoj. 26 Pohwelo hebꞌa xol sunil txꞌoj, yuto hanin Yahawilintiꞌan, machi istxꞌojal winhan, kexinpohilojan xol ej konhobꞌ yu heyok inkonhobꞌojan.

27 »Tato ay hunu naj winaj maka hunu ix ix chisqꞌambꞌen isbꞌa tet kamom, maka chako isbꞌa ahbꞌehal, haꞌ hunteqꞌan mak tuꞌ, yilal isqꞌojlaxkamoj yu chꞌen chꞌen; haꞌ xin chiꞌiniti iskamikal yibꞌanh,» xhi Komam Dios tet yaꞌ Moisés.