Iskꞌulal yilal iswatxꞌen ebꞌnaj sacerdote
21
Yalnipaxo Komam Jahawil tet yaꞌ Moisés: «Hal tet ebꞌnaj sacerdote, ebꞌnaj iskꞌahol yaꞌ Aarón tato machi hitziko ebꞌnaj iskꞌatanh hunu kamom ayiko yul iskonhobꞌ, yuto chꞌel ispixan ismunil ebꞌnaj yu. 2 Kachannhe ta chikam ismiꞌ maka ismam, maka iskꞌahol maka iskutzꞌin, maka hunu yuxhtaj, kꞌul yok iskꞌatanh. 3 Yebꞌpaxo hunu yanabꞌ ay iskꞌatanh maxhto yichamil, wal tuꞌ kꞌul ishitziko ebꞌnaj iskꞌatanh. 4 Mach chu ishitziko ebꞌnaj sacerdote iskꞌatanh hunu kamom ayto yu isbꞌa yixal ebꞌnaj yebꞌi, yuto chꞌel ispixan ismunil ebꞌnaj yu.5 »Mach chubꞌ yinilo ebꞌnaj sacerdote xil iswiꞌ yebꞌ xil istiꞌ. Mach chu yaniko ebꞌnaj lahwilal yinh isnimanil.a 6 Wal xin, yilal ishinni isbꞌa ebꞌnaj yinh ismunil Komam Dios, isDiosal. Machojabꞌ chiyal ebꞌnaj tzotiꞌ txꞌoj yinh inbꞌihan, yuto haꞌ ebꞌnaj chihalten xahanbꞌal chinhuslax wetan, yebꞌ ixim pan chꞌaqꞌlax yebꞌalqꞌabꞌeho wetan, yu huneꞌ tuꞌ yuxin kꞌulnhehojabꞌ chiyute isbꞌa ebꞌnaj.
7 »Mach chubꞌ ismoyipaxo ebꞌnaj sacerdote yebꞌ hunu ix ix txꞌoj ye iswiꞌ, maka yebꞌ hunu ix ix bꞌejbꞌilkano yu yichamil, yuto ebꞌnaj sacerdote tuꞌ ayiko ebꞌnaj yinh inmunilan. 8 Yuxin chepohilo hebꞌa yinh istxꞌojal, cheyalten ixim pan yebꞌalqꞌabꞌe wetan, wal xin ayojabꞌ yelapno ixim pan tuꞌ yul hesat, yuto hanin Yahawintiꞌan, machi istxꞌojal winhan, haninan chinwatxꞌekojan anma yinh iskꞌulal.
9 »Tato ay hunu iskutzꞌin naj sacerdote chiyetato isbꞌa kat yok winajloj, yinh hakaꞌ tuꞌ chiyilo ix ispixan ismam, haꞌ huneꞌ ix tuꞌ chinhuslaxtoj.
10 »Haꞌ naj iswiꞌehal sacerdote xol yuxhtaj, naj bꞌay alaxayo aceite yibꞌanh iswiꞌ yet yalaxkaniko yinh ismunil Komam Dios, aqꞌbꞌil yip naj yaniko qꞌap xilqꞌape kaw ay yelapnoj, yuxin mach chu yinilo naj yenhel iswiꞌ, yebꞌ mach chu istzilnhento naj xil isqꞌap yu isyeni naj bꞌiskꞌulal. 11 Yebꞌ xin mach chu ishitziko iskꞌatanh hunu kamom, waxanhka ismam maka ismiꞌ naj, yuto haꞌ ismunil Komam chu naj. 12 Mach chu yel naj yul watutan yu iskamikal hunu mak, yuto ayojabꞌ yelapno wehobꞌalan yul sat naj, hanin isDiosal naj, yuto alaxahto teꞌ aceite yibꞌanh iswiꞌ naj yet yalaxkaniko naj yinh ismunil yu isDiosal, Hanin Yahawilintiꞌan chiwalan huneꞌ tiꞌ.
13 »Hayet chissayni naj yixal, haꞌ hunu ix qꞌopo maxhto hunu winaj chiyiqꞌle, haꞌ chiyiqꞌ naj. 14 Mach chu yiqꞌni naj hunu ix ix kamnaxa yichamil, maka hunu ix ix bꞌejbꞌilkano yu yichamil, maka hunu ix tzetbꞌilto yu hunu winaj, maka hunu ix ix txꞌoj ye iswiꞌ. Wal xin haꞌ hunu ix ix yet konhobꞌ naj maxhto hunu winaj chiqꞌle, haꞌ chiyiqꞌkanh naj, 15 yunhe mach chiyilo naj istxꞌixobꞌal yuninal chipohchakanh yinh yul sat yet konhobꞌ; yuto hanin Yahawilintiꞌan insayikojan ebꞌnaj yinh inmunilan, kachi tet ebꞌnaj,» xhi Komam Jahaw tet yaꞌ Moisés.
16 Yalnipaxo Komam Dios tet yaꞌ Moisés: 17 «Hal tet yaꞌ Aarón hakaꞌ tiꞌ: Haꞌ tinanh yebꞌ yet bꞌaqꞌinh machojabꞌ hunu hakꞌahol mach tzꞌajano isnimanil chiꞌok yalteno ixim pan tet Komam, haDiosal. 18 Machojabꞌ hunu naj winaj mach tzꞌajano isnimanil chiꞌok yinh ismunil Komam yinh sacerdotehal, hakaꞌ hunu naj mach chu yilni, maka naj mach kꞌulo ye yoj, maka tzakaꞌ ye isnimanil 19 maka naj qꞌahnalto yoj, maka isqꞌabꞌ. 20 Maka naj kꞌonhan yehi maka naj ayko saj yinh isbꞌaqꞌ sat, maka naj txꞌaktanhe isnimanil, maka ayilti xobꞌ qꞌaꞌ yinh isnimanil, maka naj etaxnato iswinajil. 21 Machojabꞌ hunu yuninal yaꞌ sacerdote Aarón mach tzꞌajano isnimanil tuꞌ chisje isnhusni xahanbꞌal tet Komam Dios, Jahawil, yebꞌpaxo xin mach chu yalten ixim pan yebꞌalqꞌabꞌe tet Komam Dios. 22 Yajaꞌ chisje iswani naj ixim pan, ixim yebꞌalqꞌabꞌe aqꞌbꞌilxa tet Komam Dios, yebꞌ hunteqꞌan xahanbꞌal ay yelapno yet Komam yehi. 23 Yajaꞌ mach chu yokto naj yul qꞌap litxꞌaniko yinh istiꞌ Yatut Komam, yebꞌ mach chu ishitziko naj iskꞌatanh ismexhahil xahanbꞌal, yunhe mach chiꞌel ispixan yehobꞌal Komam yu naj, yuto Komam Yahawil ay yet hunteqꞌan tuꞌ,» kachi, xhi Komam tet yaꞌ Moisés.
24 Yalni yaꞌ Moisés sunil hunteqꞌan tuꞌ tet yaꞌ Aarón yebꞌ tet ebꞌnaj iskꞌahol yaꞌ, yebꞌ tet sunil ebꞌnaj Israel.