4 »Makxanhetikꞌa hunu naj iskꞌahol yaꞌ Aarón ayko yabꞌil lepra yinh, maka ay tzet chiꞌel yinh iswinajil, mach chu islohni tzet haltebꞌil wetan, hato yet chissajnhe isbꞌa. Mach xin sajo chukano ebꞌnaj tato chistzabꞌ ebꞌnaj isnimanil hunu kamom, maka isnimanil hunu noꞌ kamom noqꞌ, maka chistzabꞌ hunu naj tonhe chiꞌel yinhatil yinh. 5 Mach xin sajo chupaxkanoj ebꞌnaj tuꞌ ta chistzabꞌ ebꞌnaj hunu no noqꞌ chishatxikꞌo iskꞌul sat txꞌotxꞌ, maka yet chistzabꞌni ebꞌnaj hunu naj mach sajoj yu hunu tzet ye tuꞌ. 6 Yet chistzabꞌni ebꞌnaj hunteqꞌan tuꞌ, mach sajo chukanoj, mach xin chisje islohni tzet haltebꞌil wetan, masanto yet chiqꞌejbꞌayoj yet xaꞌaxhni ebꞌnaj. 7 Haxa yet qꞌejbꞌiyal, sajxa yeh hunu mak tuꞌ, xaꞌisje islohni tzet haltebꞌil wettuꞌan, yuto yettikꞌa naj yehi. 8 Mach chu iskꞌuxnipaxo ebꞌnaj ischibꞌehal hunu noꞌ kamom noqꞌ, maka ischibꞌehal hunu noꞌ xitbꞌilkamo yu hunu noꞌ howla noqꞌ, yunhe machi yetato isbꞌa ebꞌnaj yet chiskꞌuxni noꞌ. Hanin Yahawintiꞌan chiwalan huneꞌ tiꞌ.

9 »Hal tet ebꞌnaj haxinwal chisyije ebꞌnaj chejbꞌanile chiwalkanojan, yunhe mach chitokano ismul ebꞌnaj yibꞌanh, tajka chismanhkꞌon ebꞌnaj, yunhe mach chikam ebꞌnaj. Hanin Yahaw hinan chiwalan huneꞌ tiꞌ.

10 »Hanhkꞌanhe ebꞌnaj sacerdote yebꞌ yuninal yebꞌ yixal ebꞌnaj sacerdote chu islohni tzet haltebꞌil wetan. Huneꞌ mak mach yetbꞌi isbꞌa yebꞌ ebꞌnaj sacerdote, maka mak chꞌekꞌ tukla iskꞌatanh, maka ebꞌnaj chimunlako iskꞌatanh ebꞌnaj, mach chu islohni tzet haltebꞌil wetan.

11 »Yajaꞌ ta chisloqꞌ naj sacerdote hunu ischejabꞌ, wal tuꞌ chisje islohni naj chejabꞌ tuꞌ tzet chihaltelax wetan. Hakpax tuꞌ yuninal naj chejabꞌ tuꞌ, chisje islohni ebꞌnaj tzet chislo naj sacerdote yinh tzet ye tuꞌ chihaltelax wetan.

12 »Taka chimohyi iskutzꞌin naj sacerdote yebꞌ hunu naj mach iskꞌaholo ebꞌnaj sacerdote, mach chu islohni ix tzet chꞌaqꞌlax tet ebꞌnaj sacerdote yinh tzet ye tuꞌ wetan yehi. 13 Yajaꞌ ta chikam yichamil ix maka chispoh isbꞌa ix yebꞌ yichamil tuꞌ, mach xin yunin ix, kat ismeltzo ix iskꞌatanh ismam, kat ye ix iskꞌatanh ismam hakaꞌtikꞌa yet qꞌopo ix; yinh hakaꞌ tuꞌ, chisje islohni ix tzet chislo ismam yinh tzet ye tuꞌ wetan yehi. Wal hunuxa komon anma xin mach chu islohni tzet chislo yaꞌ sacerdote tuꞌ.

14 »Ta ay hunu mak chiloni tzet chihaltelax wetan, mach xin yohtajoj ta wetan yehi, haꞌ huneꞌ mak tuꞌ, yilal yaqꞌni meltzo selel tet naj sacerdote, kat yaqꞌnipaxo naj howebꞌto selel yibꞌanhilo huneꞌ chabꞌil yu naj tuꞌ. 15 Mach komono chechah lolaxo tzet chiyaqꞌ ebꞌnaj Israel xahanbꞌalil wetan, 16 yunhe mach chitokano ismul ebꞌnaj yibꞌanh yet chisloni ebꞌnaj tzet ye tuꞌ wetan yehi. Hanin Yahawilintiꞌan sikꞌnhe hexiloj,» xhi Komam.

17 Istzotelpaxo Komam Dios tet yaꞌ Moisés, yalni Komam: 18 «Tzotelanh tet yaꞌ Aarón yebꞌ tet iskꞌahol yaꞌ yebꞌ tet sunil ebꞌnaj Israel, kat hawalni hakaꞌ tiꞌ: Tato ay hunu naj Israel maka hunu mak mach Israelo ay texol chiyaqꞌ hunu no noqꞌ chinhuslax xahanbꞌalil yu isyijen hunu tzet yalte tet Komam, maka tonhe chiꞌel yinh iskꞌul chiyaqꞌni xahanbꞌal tuꞌ, 19 yilal yaqꞌni hunu no noqꞌ winaj machi nino istzakaꞌil yunhe ischahni Komam huneꞌ xahanbꞌal tuꞌ. Chisje yaqꞌni hunu noꞌ winaj wakax, maka hunu noꞌ meꞌ, maka hunu noꞌ chiw. 20 Yajaꞌ maxhtaj noꞌ ay istzakaꞌil cheyalte tet Komam, yuto mach chischah Komam huneꞌ tuꞌ.

21 »Hakpax tuꞌ yet chiyaqꞌni anma Israel isxahanbꞌal yet aqꞌankꞌulal tet Komam yu isyijen hunu tzet xayalte tet Komam, maka tonhe chiꞌel yinh iskꞌul chiyaqꞌni xahanbꞌal tuꞌ; yilal yalten hunu noꞌ wakax maka hunu noꞌ meꞌ, machi xin nino istzakaꞌil noꞌ yunhe ischahni Komam huneꞌ xahanbꞌal tuꞌ. 22 Mach cheyalte noꞌ mach chu yilni tet Komam, maka noꞌ ayko islahwilal maka noꞌ qꞌahnatoj, maka noꞌ tzijxanhe yabꞌilal ayilti yinh isnimanil. Hunteqꞌan no noqꞌ tuꞌ, mach chinhuslax noꞌ xahanbꞌalil. 23 Haꞌ mak tonhe chiꞌel yinh iskꞌul chiyaqꞌni isxahanbꞌal tuꞌ, chisje yaqꞌni noꞌ wakax maka noꞌ meꞌ mach tzꞌajano istel yoj, yajaꞌ wal yet chiyaqꞌni isxahanbꞌal yu isyijen hunu tzet yalte tet Komam, mach chischah Komam noꞌ hakaꞌ tuꞌ. 24 Mach cheyaqꞌpaxo yinh hexahanbꞌal tet Komam no noqꞌ ayko islahwilal isbꞌaqꞌ, maka noꞌ maqꞌbꞌil isbꞌaqꞌ, maka noꞌ tzilbꞌililti isbꞌaqꞌ, maka noꞌ hosbꞌililti isbꞌaqꞌ. Mach cheyaqꞌ noꞌ tuꞌ xahanbꞌalo yet ay hex sat hetxꞌotxꞌ. 25 Mach chechahpaxo hunteqꞌan noꞌ tiꞌ tet anma mach Israelo ay texol, yu yok noꞌ xahanbꞌalil yebꞌ yu hekꞌuxni noꞌ, yuto mach tzꞌajano isnimanil noꞌ, haꞌ noꞌ tuꞌ, mach chischah Komam noꞌ, kachi,» xhi Komam. 26 Istzotelpaxo Komam Dios tet yaꞌ Moisés yalni Komam: 27 «Hayet chipitzkꞌa hunu noꞌ yunin wakax maka hunu noꞌ yunin meꞌ, maka yunin noꞌ chiw, yilal iskan noꞌ hujebꞌ tzꞌayik iskꞌatanh ismiꞌ; haxa yinh iswaxajebꞌ tzꞌayik, xayu isnhuslax noꞌ xahanbꞌalil tet Komam. 28 Hayet istzꞌayikal chepotxꞌkamo noꞌ miꞌe wakax maka noꞌ miꞌe meꞌ, xahanbꞌalil, mach chu hepotxꞌnipaxo yunin noꞌ yinhtikꞌa huneꞌ tzꞌayik tuꞌ. 29 Hayet cheyaqꞌni hexahanbꞌal yu heyaqꞌni yuchꞌandios tet Komam, hakaꞌojabꞌ yalni chejbꞌanile, hak tuꞌ chu heyalten noꞌ, haxinwal chischah Komam noꞌ. 30 Yinhtikꞌa xin huneꞌ tzꞌayik tuꞌ chekꞌux noꞌ, matxa xin noꞌ cheyakano yinh huneꞌxa tzꞌayik. Hanin Yahawilintiꞌan chiwalan huneꞌ tiꞌ.

31 »Bꞌeybꞌalnhewe chejbꞌanile chiwalkanotiꞌan, yijewej. Hanin Yahawilintiꞌan, chiwalan huneꞌ tiꞌ. 32 Mach cheyilo ispixan inbꞌihan, wal xin nimanojabꞌ welapnojan xol anma Israel. Hanin Yahawintiꞌan, pohbꞌilexilo wuhan wetojan. 33 Kexwilojan sat txꞌotxꞌ Egipto, yu wokan heDiosaloj. Hanin Yahawilintiꞌan, chiwalan huneꞌ tiꞌ,» xhi Komam.