Istxolal hunteqꞌan qꞌinh kaw niman yelapno xol ebꞌnaj Israel
23
Istzotelpaxo Komam Dios tet yaꞌ Moisés, yalni Komam: 2 «Tzotelanh tet ebꞌnaj Israel kat hawalni tet ebꞌnaj hakaꞌ tiꞌ: Haꞌ hunteqꞌan qꞌinh tiꞌ, kaw niman yelapno cheyekꞌtze tet Komam bꞌay chekutxbꞌa hebꞌa yu heyinayo hebꞌa sata Komam.3 »Wajebꞌ tzꞌayik chexmunlahi, yajaꞌ wal yinh ishuj tzꞌayik, chexxewi, chekutxbꞌan hebꞌa yunhe heyinayo hebꞌa tet Komam. Huneꞌ tzꞌayik tuꞌ, yet Komam yehi, cheyije bꞌayejtuꞌwal ay hex.
4 »Haꞌ hunteqꞌan qꞌinh tiꞌ, kaw niman yelapnoj, yet Komam yehi bꞌay chekutxbꞌa hebꞌa yu heyinayo hebꞌa tet Komam yinh istzꞌayikal bꞌay halbꞌilkanoj.
5 »Yinh 14 (iskanhlahonhebꞌ) tzꞌayik yinh bꞌabꞌel ixahaw yinh qꞌejbꞌiyal chiꞌichiko qꞌinh pascua chꞌekꞌtzelax tet Komam.a
6 »Haxa yinh 15 (isholanhebꞌ) tzꞌayik yinh ixahaw tuꞌ, cheyekꞌtze qꞌinh yet chiwalax ixim pan machi yanhal aykoj, yu heyinayo hebꞌa tet Komam. Yulbꞌal hujebꞌ tzꞌayik chewah ixim pan machi yanhal aykoj.b 7 Yinh bꞌabꞌel tzꞌayik tuꞌ, chekutxbꞌa hebꞌa yu heyinayo hebꞌa tet Komam Dios, machi xin hunu munil chewatxꞌe. 8 Yulbꞌal hujebꞌ tzꞌayik tuꞌ, chenhus no noqꞌ xahanbꞌalil tet Komam, haxa yinh ishuj tzꞌayik xin chekutxbꞌapaxo hebꞌa yu heyinayo hebꞌa sata Komam, machi xin hunu munil chewatxꞌe yinh huneꞌ tzꞌayik tuꞌ,» xhi Komam tet yaꞌ Moisés.
Qꞌinh yinh bꞌabꞌel sat tzꞌunubꞌ
9 Istzotelpaxo Komam Dios tet yaꞌ Moisés, yalni Komam: 10 «Hal tet ebꞌnaj hawet Israelal hakaꞌ tiꞌ: Hayet ayexxa sat txꞌo txꞌotxꞌ chiwaqꞌan teyet, yet chexichiko hekꞌupnikanh hetrigo, haꞌ ixim bꞌabꞌel yachan chekꞌalah, haꞌ ixim tuꞌ cheyiti tet naj sacerdote, yuto ixim tuꞌ bꞌabꞌel sat hetzꞌunubꞌ. 11 Haxa yinh hunxa tzꞌayik yet chilahwi istzꞌayikal xewilal, chiyalten naj sacerdote ixim heyebꞌalqꞌabꞌ tuꞌ tet Komam. Chisbꞌatxnikanh naj sata Komam, hak tuꞌ xin chu ischahni Komam hesabꞌehal tuꞌ. 12 Hayet istzꞌayikal cheyalte ixim trigo heyebꞌalqꞌabꞌ cheyaqꞌnipaxo noꞌ meꞌ xahanbꞌalil tet Komam. Huneꞌ noꞌ meꞌ tuꞌ huneꞌ habꞌil, machi nino istzakaꞌil aykoj. 13 Cheyaqꞌnipaxo kanhebꞌ libra ixim harina kaw kꞌul sombꞌiliko aceite xol heyebꞌalqꞌabꞌoj, chinhuslaxto ixim heyebꞌalqꞌabꞌoj, kaw xin xuqꞌ chꞌapni sam huneꞌ tuꞌ sata Komam, kat hetꞌulnayo huneꞌ litro vino yibꞌanh heyebꞌalqꞌabꞌ tuꞌ.c 14 Mach chu hewahni ixim panil, mach chu hekꞌuxnipaxo ixim qꞌanbꞌinaj, maka ixim yaxla trigo bꞌolbꞌilxa yalanhto maxhto cheyaqꞌ heyebꞌalqꞌabꞌ tuꞌ tet Komam Dios. Huneꞌ tiꞌ, chejbꞌanile chukanoj teyet hex mame hex tiꞌ yebꞌ tet heyuninal bꞌajxanhetuꞌwal ay hex.
Qꞌinh chiꞌekꞌtzelax yet chilahwi hujebꞌ semanahil
15 »Haꞌ istzꞌayikal yet cheyinito ixim bꞌabꞌel yachan trigo heyebꞌalqꞌabꞌo tet Komam, haꞌ tzꞌayik tzujan yinta istzꞌayikal xewilal, chebꞌis hujebꞌ semana; 16 haxa hunxa tzꞌayik yinta istzꞌayikal xewilal tuꞌ chitzꞌajna 50 (lahonhebꞌ yoxkꞌal) tzꞌayik. Yet chitzꞌajna 50 (lahonhebꞌ yoxkꞌal) tzꞌayik tuꞌ, kat heyiniti hunuxa heyebꞌalqꞌabꞌ tet Komam, yinh ixim akꞌ trigo.d 17 Cheyipaxti kabꞌebꞌ ixim pan ayko yanhal watxꞌebꞌil yul heyatut yinh ixim harina kaw kꞌul, kanhkanh libra ixim harina chiꞌok yinh hunun ixim pan tuꞌ; kat isbꞌatxlaxkanh sata Komam heyebꞌalqꞌabꞌoj yinh ixim bꞌabꞌel sat tzꞌunubꞌ. 18 Yet cheyaqꞌni ixim pan yebꞌ vino, cheyaqꞌnipaxo hujkꞌonh noꞌ tzehla meꞌ huneꞌ habꞌil, machi istzakaꞌil aykoj; yebꞌ hunu noꞌ tzehla wakax, yebꞌ kakꞌonh noꞌ icham meꞌ chinhuslaxto xahanbꞌalil tet Komam. Hunteqꞌan tuꞌ yebꞌalqꞌabꞌe kaw xuqꞌ chꞌapni sam sata Komam.
19 »Cheyaltepaxo hunu noꞌ winaj chiw xahanbꞌalil yinh mule, yebꞌ kakꞌonh noꞌ meꞌ huneꞌ habꞌil xahanbꞌalo yet aqꞌankꞌulal. 20 Haꞌ xin naj sacerdote chihalten yebꞌalqꞌabꞌ tuꞌ tet Komam, chisbꞌatxnikanh naj ixim pan chꞌaqꞌlax yinh bꞌabꞌel sat tzꞌunubꞌ yebꞌ noꞌ kakꞌonh meꞌ. Hunteqꞌan tuꞌ chihaltelax tet Komam bꞌabꞌel, lahwi tuꞌ kat yokkano yu naj sacerdote.
21 »Yinh huneꞌ tzꞌayik tuꞌ, chekutxbꞌawe hebꞌa yu heyinayo hebꞌa tet Komam, machi xin hunu munil chewatxꞌe yinh huneꞌ tzꞌayik tuꞌ. Huneꞌ tiꞌ, chejbꞌanile chukano teyet yebꞌ tet heyuninal yinh sunilbꞌal tiempo bꞌajxanhetuꞌwal ay hex.
22 »Hayet chiꞌapni istzꞌayikal hekꞌupnikanh hetrigo bꞌey hetxꞌotxꞌ, mach kaw cheyikanh ixim istiꞌlaj, yebꞌ xin mach chexekꞌpaxo hekutxbꞌakanh ixim chikankano xol istel; yuto ixim tuꞌ yetxa anma mebꞌaꞌ yebꞌ yet anma mach Israelo ay texol ye ixim. Hanin Yahawilintiꞌan heDiosal, chiwalan huneꞌ tiꞌ,» xhi Komam tet yaꞌ Moisés.
Qꞌinh yet chiꞌoqꞌtzelax chꞌen trompeta
23 Istzotelpaxo Komam Dios tet yaꞌ Moisés, yalni Komam: 24 «Hal tet ebꞌnaj hawet Israelal hakaꞌ tiꞌ: Hayet bꞌabꞌel tzꞌayik yinh ishuj ixahaw, chexxewi, kat hekutxbꞌan hebꞌa yu heyinayo hebꞌa tet Komam, kat yoqꞌtzelax chꞌen trompeta yu henaniti iskꞌulal Komam. 25 Chenhusni xahanbꞌal tet Komam yinh huneꞌ tzꞌayik tuꞌ, machipaxo xin hunu munil chewatxꞌe,» xhi Komam.
Istzꞌayikal yet chiyaqꞌni nimankꞌulal Komam Dios yinh mule
26 Istzotelpaxo Komam Dios tet yaꞌ Moisés, yalni Komam: 27 «Yinh 10 (islahonhebꞌ) tzꞌayik yinhtikꞌa ishuj ixahaw tuꞌ, istzꞌayikal bꞌay chꞌaqꞌlax nimankꞌulal yinh mule, chekutxbꞌa hebꞌa, mach chexwaꞌi yu heyinayo hebꞌa wetan, kat henhusni yebꞌalqꞌabꞌe xahanbꞌalil wetan. 28 Machi hunu munil cheyu yinh huneꞌ tzꞌayik tuꞌ, yuto chiwaqꞌ nimankꞌulalan yinh hemul, hanin Yahawintiꞌan, heDiosal. 29 Makxanhetikꞌa mach chiyijen yijlen wahil yinh huneꞌ tzꞌayik tuꞌ, wiyom yilaxilo yul iskonhobꞌ.e 30 Yebꞌ maknhetikꞌa chimunla yinh huneꞌ tzꞌayik tuꞌ chintanhtzelojan xol yet konhobꞌ.
31 »Machi hunu munil cheyu yinh huneꞌ tzꞌayik tuꞌ. Kaw chejbꞌanile chukaniko huneꞌ tiꞌ teyet yebꞌ tet yuninal heyuninal yinh sunilbꞌal tiempo bꞌayxanhetuꞌwal ay hex. 32 Chexxew huneꞌ tzꞌayik tuꞌ, yaj mach chexwaꞌ yet qꞌejbꞌiyal yinh isbꞌalonhebꞌ tzꞌayik yinh ixahaw tuꞌ, masanto yinh huneꞌxa qꞌejbꞌiyal yinh hunxa tzꞌayik,» xhi Komam.
Qꞌinh Lexhpat
33 Istzotelpaxo Komam Dios tet yaꞌ Moisés, yalni Komam: 34 «Hal tet ebꞌnaj Israel hakaꞌ tiꞌ: Haꞌ yinh 15 (isholanhebꞌ) tzꞌayik yinhtikꞌa ishuj ixahaw tuꞌ, cheyekꞌtze qꞌinh Lexhpat yu heyaniko ismay Komam Dios, hujebꞌ tzꞌayik cheyekꞌtze huneꞌ qꞌinh tiꞌ. 35 Chekutxbꞌa hebꞌa yinh bꞌabꞌel tzꞌayik tuꞌ yu heyinayo hebꞌa tet Komam. Machi hunu munil chewatxꞌe yinh huneꞌ tzꞌayik tuꞌ. 36 Yulbꞌal hujebꞌ tzꞌayik tuꞌ, chenhus xahanbꞌal tet Komam, haxa yinh 8 (iswaxajebꞌ) tzꞌayik chekutxbꞌa hebꞌa yu heyinayo hebꞌa tet Komam, kat henhusni xahanbꞌal tet Komam. Yinh islahobꞌal tzꞌayik yinh qꞌinh tuꞌ chiꞌekꞌtzelax tet Komam, machi hunu mak chimunlahi.
37 »Haꞌ hunteqꞌan qꞌinh tiꞌ kaw niman yelapno cheyekꞌtze tet Komam bꞌay chekutxbꞌa hebꞌa yu heyinayo hebꞌa tet Komam, yebꞌ yu henhusni heyebꞌalqꞌabꞌ tet Komam; chenhusni no noqꞌ yinh xahanbꞌalil, cheyaqꞌnipaxo heyebꞌalqꞌabꞌ yinh teꞌ vino. Cheyaqꞌni hunteqꞌan tiꞌ hakaꞌ istxolal yinh istzꞌayikal hakaꞌ halbꞌilkano teyet. 38 Nanyepaxo hunteqꞌan hexahanbꞌal cheyaqꞌ yinh istzꞌayikal xewilal tet Komam, yebꞌ hesabꞌehal cheyaqꞌ tet Komam, yebꞌ heyebꞌalqꞌabꞌ xaheyalte ta cheyaqꞌ tet Komam, yebꞌ heyebꞌalqꞌabꞌ tonhe chiꞌel yinh hekꞌul heyaqꞌni.
39 »Haxa yinh 15 (isholanhebꞌ) tzꞌayik yinh ishuj ixahaw tuꞌ, yet xaheyikanh sat hetzꞌunubꞌ, cheyekꞌtzen qꞌinh tet Komam yulbꞌal hujebꞌ tzꞌayik, yu heyaniko ismay Komam. Haꞌ bꞌabꞌel tzꞌayik, istzꞌayikal xewilal, yebꞌpaxo xin iswaxajebꞌ tzꞌayik aypaxo xewilal. 40 Yinh bꞌabꞌel tzꞌayik cheyiti sat teꞌ lobꞌehal kaw kꞌul, yebꞌ xaj teꞌ palma, yebꞌ isqꞌabꞌ te teꞌ how yeko xaj, yebꞌ xaj teꞌ sauce ayko istiꞌla ha haꞌ; kat heyaqꞌni tzalaho hekꞌul sata heYahawil, heDiosal yulbꞌal hujebꞌ tzꞌayik. 41 Hunun habꞌil yinh ishuj ixahaw, cheyekꞌtze huneꞌ qꞌinh tiꞌ yulbꞌal hujebꞌ tzꞌayik, yu heyinayo hebꞌa tet Komam. Huneꞌ tiꞌ, chejbꞌanile chukano teyet yebꞌ tet yuninal heyuninal yinh sunilbꞌal ej tiempo. 42 Yulbꞌal hujebꞌ tzꞌayik tuꞌ, sunil hex Israel hex tiꞌ yul lexhpat chexehikꞌoj, 43 yunhe yohtanhenilo heyuninal yet bꞌaqꞌinh tato hex Israel hex tiꞌ, yalanh lexhpat kexehikꞌoj yet lahwi kexyinilo Komam sat txꞌotxꞌ Egipto. Haꞌ Komam Jahawil, koDiosal, chihalni huneꞌ tiꞌ,» kachi, xhi Komam tet yaꞌ Moisés.f
44 Hak tuꞌ yu yaqꞌni yaꞌ Moisés yohtanhelo anma Israel istzꞌayikal qꞌinh kaw ay yelapno chiꞌekꞌtzelax tet Komam Dios, Jahawil.