Qꞌinh chiꞌekꞌtzelax yulbꞌal hunun habꞌil
16
»Hayet chiꞌayilo ixahaw Abib, cheyekꞌtzen qꞌinh pascua yu heyaniko ismay Komam Dios koDiosal, yuto yinh huneꞌ aqꞌbꞌalil yulbꞌal huneꞌ ixahaw tuꞌ konhyilo Komam bꞌey Egipto.2 »Yulbꞌal qꞌinh Pascua tuꞌ, cheyalte noꞌ wakax yebꞌ noꞌ meꞌ xahanbꞌalil tet Komam Dios Jahawil, yu heyaniko ismay bꞌay saybꞌililo yu Komam bꞌay chꞌehayo isbꞌi Komam.
3 »Haꞌ no noqꞌ cheyaqꞌ xahanbꞌalil tuꞌ, chekꞌux noꞌ, kat hewani ixim pan machi yanhal aykoj. Yulbꞌal hujebꞌ tzꞌayik chewah ixim pan mach sombꞌiliko yanhal xol, haꞌ ixim chinaniti isyaꞌtajil, yuto konhel yinh anhe sat txꞌotxꞌ Egipto. Yuxin yulbꞌal tiempo itzitz hex yul sat yibꞌanhqꞌinal tiꞌ chenaniti istzꞌayikal yet jel sat txꞌotxꞌ Egipto tuꞌ. 4 Yulbꞌal hujebꞌ tzꞌayik, machi bꞌay chekꞌubꞌa yanhal ixim pan. Haxa noꞌ chibꞌe cheyalte yinh xahanbꞌalil tet Komam yet qꞌejbꞌiyalil yinh bꞌabꞌel tzꞌayik tuꞌ, matxa noꞌ cheyakano yinh hunuxa tzꞌayik. 5 Mach bꞌajxanhetuꞌwal yul konhobꞌ chiyaqꞌ Komam Dios Jahawil teyet bꞌay cheyalte no noqꞌ xahanbꞌalo yet pascua tuꞌ. 6 Wal xin hanhe bꞌay chissayilo Komam bꞌay chiꞌah yatut, haꞌ tuꞌ cheyalte hexahanbꞌal. Cheyalte hexahanbꞌal tuꞌ yinh qꞌejbꞌiyalil yet chito tzꞌayik, yuto hak tuꞌ yorahil yet konhyinilo Komam sat txꞌotxꞌ Egipto. 7 Haꞌ noꞌ chibꞌe cheyalte yinh xahanbꞌalil tuꞌ, cheqꞌantze noꞌ, lahwi tuꞌ, kat hekꞌuxni noꞌ bꞌay chisayilo Komam yehobꞌal bꞌay ayko isbꞌi. Haxa yinh hunuxa tzꞌayik, sahabꞌ sakꞌayal, kat hepaxto bꞌay ay hex. 8 Yulbꞌal wajebꞌ tzꞌayik chewah ixim pan machi yanhal aykoj, haxa yinh ishuj tzꞌayik chekutxbꞌan hebꞌa, kat heyekꞌtzen qꞌinh yu heyaniko ismay Komam Dios Jahawil. Huneꞌ tzꞌayik tuꞌ, kaw ay yelapnoj; machi hunu munil chewatxꞌe yinh huneꞌ tzꞌayik tuꞌ.
9 »Hayet chiꞌichiko iskꞌuplaxkanh ixim trigo, kat yichiko hebꞌisni hujebꞌ semana. 10 Hayet chilahwi hujebꞌ semana tuꞌ, kat heyekꞌtzen qꞌinh bꞌay cheyiti sat hetzꞌunubꞌ cheyaqꞌni heyebꞌalqꞌabꞌ tet Komam, haꞌ heyebꞌalqꞌabꞌ chitit yinh hekꞌul, haꞌ cheyaqꞌa, hatatikꞌa hanta isyaxilal chiyayo Komam Dios Jahawil teyibꞌanh. 11 Kat heyaqꞌni tzalaho hekꞌul sata Komam Dios Jahawil yebꞌ heyixal, hekꞌahol, hakutzꞌin, yebꞌ ebꞌnaj hechejabꞌ yebꞌ ebꞌix hechejabꞌ, yebꞌ ebꞌnaj levita ay yul hekonhobꞌ, yebꞌ anma mach Israelo ay texol, yebꞌ unin machi ismam machi ismiꞌ, yebꞌ ebꞌix hunix. Chekutxbꞌa hebꞌa sata Komam Dios bꞌay sikꞌlebꞌil yu Komam bꞌay chiꞌehayoj, bꞌay ayko isbꞌi. 12 Yilal chenatij tato kexok chejabꞌo niman tiempo bꞌey Egipto, yuxin chiwalan teyet tato cheyije sunil chejbꞌanile chiwalan teyet tiꞌ.
13 »Hayet xalahwi hekꞌupni hetrigo yebꞌ heyatzꞌni yal teꞌ uva, cheyekꞌtzen qꞌinh Lexhpat yulbꞌal hujebꞌ tzꞌayik. 14 Kat heyaqꞌni tzalaho hekꞌul yinh huneꞌ qꞌinh tuꞌ yebꞌ hekꞌahol yebꞌ hekutzꞌin, yebꞌ ebꞌnaj hechejabꞌ, yebꞌ ebꞌix hechejabꞌ, yebꞌ ebꞌnaj levita, yebꞌ anma mach Israelo ay texol, yebꞌ nixhte unin machi ismam machi ismiꞌ, yebꞌ ebꞌix hunix mebꞌaꞌ ay yul hekonhobꞌ. 15 Cheyekꞌtze huneꞌ qꞌinh tuꞌ yulbꞌal hujebꞌ tzꞌayik, yu heyaniko ismay Komam Dios Jahawil. Cheyekꞌtze bꞌay sikꞌlebꞌil yehobꞌal Komam yu, yuto haꞌ Komam Dios, haꞌ chiꞌanayo isyaxil yibꞌanh hetzꞌunubꞌ yebꞌ yibꞌanh sunil tzet chewatxꞌe; hak tuꞌ xin kaw chextzala sikꞌlebꞌil.
16 »Sunil ebꞌnaj winaj, yilal oxel chitohikꞌo ebꞌnaj sata Komam Dios Jahawil yulbꞌal hunun habꞌil, bꞌay sikꞌlebꞌil yehobꞌal Komam yu. Yilal istohikꞌo ebꞌnaj yinh oxebꞌ qꞌinh tiꞌ: Yinh qꞌinh yet chiwalax ixim pan machi yanhal chiꞌalaxikoj, yebꞌ yinh qꞌinh yet chiꞌilaxto bꞌabꞌel sat tzꞌunubꞌ tet Komam, yebꞌ qꞌinh Lexhpat. Machi hunu mak chiꞌok sata Komam, ta matzet iqꞌbꞌil yu. 17 Wal xin hunun mak chiyito isyebꞌalqꞌabꞌ tet Komam, hatatikꞌa isyaxil chischah tet Komam Dios Jahawil.
Kuybꞌanile yinh iswatxꞌelax istoholal
18 »Chesayikꞌo ebꞌnaj juez yebꞌ ebꞌnaj alkal yul hunun konhobꞌ chiyaqꞌ Komam Dios Jahawil teyet xol hunun majan hex Israel hex tiꞌ; haꞌ ebꞌnaj xin chiꞌilni tzet chiꞌeliko anma texol yinh kaw kꞌul.a 19 Machojabꞌ chiskotxbꞌa ebꞌnaj yinh tzet ye anma, yu yok ebꞌnaj yetanto istoholal, machojabꞌ hunu mak ekꞌbꞌal yelapno sata hunuxa maka yul sat ebꞌnaj. Machojabꞌ chiyaqꞌ monte isbꞌa ebꞌnaj yu chꞌen melyu, yuto chiꞌetaxto isnabꞌal ebꞌnaj winaj ay ishelanil yu chꞌen, kat yanipaxiko ebꞌnaj tohol isbꞌeybꞌal, leqꞌtiꞌal yu chꞌen. 20 Wal xin, hanhkꞌanhe istoholal chewatxꞌe, haxinwal ay hekawil, kat heyehikꞌo sat txꞌotxꞌ chiyaqꞌ Komam Dios Jahawil teyet.