2 »Tato ay hunu bꞌay yul konhobꞌ chiyaqꞌ Komam Dios Jahawil teyet cheyabꞌe isqꞌumal tato ay hunu naj winaj maka hunu ix ix chiwatxꞌen tzetaj chisyah Komam Dios, chismanhkꞌon istꞌinhanil istrato tet Komam, 3 chiyinayo isbꞌa tet tzetaj ye tuꞌ chihal-lax diosal, kat yay jahno sataj, hakaꞌ tet tzꞌayik maka ixahaw, maka txꞌumel; halbꞌilkano xin tato mach chu heyay jahno sataj. 4 Hayet cheyabꞌenilo isqꞌumal tuꞌ, yilal kaw kam cheqꞌambꞌeloj, ta xin yeli ay mak chiwatxꞌen hunteqꞌan istxꞌojal, chisyah Komam texol hex Israel hex tiꞌ, 5 yilal heyinilti huneꞌ mak tuꞌ yul ispultahil konhobꞌ, kat heqꞌojnikamo huneꞌ mak watxꞌen istxꞌojal tuꞌ, machi yok yinh ta winaj maka ix.

6 »Tato ay kawanh maka oxwanh mak ilnhe chihalnilo ismul huneꞌ mak tuꞌ, yilal yaqꞌlax kamoj, yajaꞌ ta huneꞌnhe mak ohtanhe, mach chu yaqꞌlax kamoj. 7 Haꞌ mak ilnhe ismul huneꞌ mak tuꞌ, haꞌ bꞌabꞌel chiꞌaqꞌni chꞌen qꞌojbꞌal yinh, tzujan tuꞌ xin, kat isqꞌojlaxkamo yu konhobꞌ, hak tuꞌ chu istanhilo istxꞌojal texol.

8 »Tato ay hunu tzet ye tuꞌ kaw yaꞌtaj, hakaꞌ hunu kamikal, maka howal, maka yet ay hunu mak aqꞌni lahwo isnimanil hunu yet anmahil, maka hunuxa tzet ye tuꞌ chiyu yul hekonhobꞌ, yilal heto bꞌay chissikꞌle Komam bꞌay chiꞌeyayoj, yebꞌ bꞌay ayko isbꞌi Komam, 9 kat heto heyalno tet ebꞌnaj sacerdote levita, maka tet naj ayko juesal yinh huneꞌ tiempohal tuꞌ, haꞌ xin ebꞌnaj chihalni teyet yinh tzet chiꞌeliko huneꞌ tuꞌ; 10 kat xin heyijen hakaꞌtikꞌa chu yalni ebꞌnaj juez teyet bꞌey bꞌay sikꞌlebꞌilxa yu Komam. Haꞌ isyaꞌtajil chiyal ebꞌnaj ta chiꞌay yibꞌanh mak ay ismul tuꞌ, haꞌ cheyayo hatatikꞌa yalni ebꞌnaj, 11 kat xin heyijen kuybꞌanile chiyal ebꞌnaj, yinh hantatikꞌa isyaꞌtajil chayo ebꞌnaj yibꞌanh huneꞌ mak tuꞌ. Mach chexto yinh hewatxꞌqꞌabꞌ, mach chextopaxo yinh hemekqꞌabꞌ yinh tzet chiyal ebꞌnaj. 12 Yajaꞌ tato ay hunu hex tiꞌ kaw aykanh cheyute hebꞌa, machi xin cheyije tzet chiyal naj sacerdote aqꞌbꞌiliko yinh ismunil yu Komam Dios, maka chismanhkꞌo tzet chiyal naj juez, haꞌ huneꞌ mak tuꞌ yilal iskami, hak tuꞌ chu yilaxilo istxꞌojal texol, hex Israel hex tiꞌ. 13 Hayet chiyabꞌen anma Israel huneꞌ tuꞌ chixiwi, hak tuꞌ xin chu isbꞌejni yinikanh isbꞌa.

14 »Hayet chexapni sat txꞌo txꞌotxꞌ chiyaqꞌ Komam Dios Jahawil teyet, kat yokkano txꞌotxꞌ heyu, hayet ay hexxa sat txꞌotxꞌ tuꞌ, kat heyalni hakaꞌ tiꞌ: “Jaqꞌaꞌweko hunu korey chonhijbꞌani, hakaꞌ hunteqꞌan nime konhobꞌ ayko kokawilal tiꞌ,” kexchimi. 15 Yinh kaw yeli haꞌ mak cheyako hereyaloj, haꞌ mak chisikꞌiko Komam Dios Jahawil. Haꞌ xin hunu ebꞌnaj jet konhobꞌ chiꞌok hereyaloj, mach chu heyaniko hunu naj mach Israelo heyahawiloj. 16 Haꞌ naj chiꞌok hereyalo tuꞌ, mach nimano isbꞌisil ischeh naj, mach chexischejto naj bꞌey Egipto iqꞌo cheh yunhe ischꞌibꞌ isbꞌisil ischeh naj tuꞌ; yuto haꞌ Komam halni jet hakaꞌ tiꞌ: “Matxa chexmeltzo yul isbꞌelal txꞌotxꞌ Egipto tiꞌ hunelxa,” xhikano jet. 17 Machojabꞌ xin txꞌiꞌalo yixal naj, yunhe mach chiꞌetaxto yanma naj yu ebꞌix; machojabꞌ xin chistenbꞌakanh naj chꞌen plata yebꞌ chꞌen oro yetoj.

18 »Hayet chiꞌok tzꞌonhno naj yul istzꞌonhobꞌal yet chiꞌok reyal, chischej naj tzꞌibꞌnhelaxo yul hunuxa hum sunil chejbꞌanile tiꞌ, chiꞌilaxkanh yul hum bꞌay bꞌabꞌel tzꞌibꞌnhebꞌilayoj ayko yul isqꞌabꞌ ebꞌnaj sacerdote levita. 19 Aynhetikꞌako xin huneꞌ hum tuꞌ yul isqꞌabꞌ naj, kat yilni naj hunun tzꞌayik, hak tuꞌ xin ay yelapno Komam Dios Jahawil yul sat naj, yebꞌ yu isyijen naj sunil chejbꞌanile yebꞌ kuybꞌanile ayayo yul hum tuꞌ. 20 Yebꞌ yunhe machi yikanh isbꞌa naj yibꞌanh yet konhobꞌ yebꞌ yunhe mach chishekꞌilo isbꞌa naj yinh iswatxꞌqꞌabꞌ maka yinh ismekqꞌabꞌ yinh chejbꞌanile tiꞌ. Hak tuꞌ xin chinahatli istiempo naj yok yinh reyal yinh konhobꞌ Israel, haktikꞌapax tuꞌ xin ebꞌnaj chipohchalto yinh naj, chinahatli istiempohal bꞌay chiꞌok ebꞌnaj yahawil.