3 »Haꞌ xin ismajul ebꞌnaj sacerdote tuꞌ yinh xahanbꞌal chiyalte anma Israel yet chiyaqꞌni noꞌ wakax maka noꞌ meꞌ xahanbꞌalil, haꞌ ton hunteqꞌan tiꞌ: noꞌ istel yichinh, noꞌ iskelem, yebꞌ noꞌ istzukutz, 4 yebꞌ ixim bꞌabꞌel sat trigo, vino yebꞌ teꞌ aceite, yebꞌpaxo isbꞌabꞌel xil noꞌ meꞌ chiꞌilaxiloj, sunil tuꞌ chiꞌaqꞌlax tet Komam, 5 yuto haꞌ Komam Dios Jahawil sikꞌnhelo ebꞌnaj xol hunun majan, hanhonh Israelonh tiꞌ, yu yok ebꞌnaj munil yebꞌ iskꞌahol yinh yet Komam yinh sunilbꞌal tiempo.

6 »Tato ay hunu naj levita yul hunu konhobꞌ texol, chiꞌel yinh sunil yanma isto bꞌay saybꞌililo yu Komam bꞌay aya, bꞌay ayko isbꞌi, 7 chisje yok huneꞌ naj tuꞌ yinh ismunil Komam, hakaꞌ hunteqꞌanxa ebꞌnaj yet levitahil chimunla yinh ismunil Komam bꞌey tuꞌ. 8 Lahan xin ismalil tzet chislo naj chiꞌaqꞌlax tet hakaꞌ ismalil chischah ebꞌnaj levita chimunla bꞌey tuꞌ; nantikꞌapaxo ye ismajul naj chischah tet ismam.

9 »Hayet chexapni sat txꞌo txꞌotxꞌ chiyaqꞌ Komam Dios Jahawil teyet, mach cheyilto hewatxꞌen isyahbꞌetajil chiswatxꞌe hunteqꞌan anma ay bꞌey tuꞌ. 10 Mach chenhusto hekꞌahol yebꞌ hekutzꞌin xol qꞌa qꞌaꞌ xahanbꞌalil, hakaꞌ chiyu hunteqꞌan anma tuꞌ. Mach cheyako hebꞌa ahbꞌelomal, nawalil, 11 yebꞌ kunlumal, mach cheqꞌambꞌe hebꞌa tet hunteqꞌan anma tuꞌ, mach cheqꞌambꞌepaxo hebꞌa tet kamom. 12 Yuto chisyah Komam hunteqꞌan anma chiwatxꞌen hunteqꞌan tuꞌ, yuto yu hunteqꞌan istxꞌojal chiswatxꞌe, yuxin chistzumbꞌelo Komam anma tuꞌ tesataj. 13 Wal xin kꞌul cheyute hebꞌeybꞌal sata Komam Dios Jahawil. 14 Haꞌ hunteqꞌan anma ayayo sat txꞌo txꞌotxꞌ chiyaqꞌ Komam teyet tuꞌ, haꞌ tzet chiyal ebꞌnaj ahbꞌe yebꞌ ebꞌnaj kunlum haꞌ chiyabꞌetoj; wal hex tiꞌ xin, mach isje iskꞌul Komam Dios Jahawil ta chewatxꞌe.

15 »Haꞌ Komam chisikꞌnilo hunu jet Israelal ischejabꞌo texol hakaꞌ intiꞌan, yilal xin heyijen tzet chiyal huneꞌ ischejabꞌ Komam tuꞌ. 16 Haꞌ ton huneꞌ tuꞌ heqꞌan tet Komam Dios Jahawil yet ay hex bꞌey yich witz Horeb, yet istzꞌayikal yet kutxanexiko bꞌey tuꞌ, heyalni hakaꞌ tiꞌ: “Matxa chijochehanh chijabꞌehanh yul isnuqꞌ Komam Dios Jahawil, yebꞌ jilnihanh huneꞌ niman qꞌaꞌ tiꞌ, xin wal mach chonhkamanh,” kexchi. 17 Yal Komam Jahawil wetan: “Kꞌultikꞌa, hakaꞌ yalni ebꞌnaj tiꞌ,” xhi Komam. 18 Yuxin chinsikꞌlelojan xol heyet konhobꞌ tiꞌ, hunu inchejabꞌan hakaꞌ hach tiꞌ. Chiwaqꞌan intzotiꞌan tet naj, kat yalni naj teyet sunil tzet chinchejan hewatxꞌeꞌ. 19 Wal makxanhe machi abꞌen intzotiꞌan chiyal naj tuꞌ yinh inbꞌihan, hankawhinan, chiwilan tzet chiꞌelikoj. 20 Yajaꞌ tato ay hunu naj chisbꞌaliko isbꞌa inchejabꞌojan, chalni intzotiꞌan yalni, kat xin yalni naj tzet mach halbꞌilo wuhan, maka chaqꞌ bꞌinaho naj isbꞌi hunteqꞌanxa tzet chihal-lax diosal yu anma; huneꞌ naj tuꞌ yilal yaqꞌlax kamoj. 21 Yajaꞌ ta chetxum yul heyanma hakaꞌ tiꞌ: “¿Tzet xin chu johtanheniloj ta haꞌ tzet chal naj tiꞌ mach istzotiꞌo Komam?” ta kexchi. Wal xin yilal heyohtanhenilo huneꞌ chihal-lax tiꞌ: 22 “Tato mach chij isbꞌa tzet chiyal naj yinh isbꞌi Komam, chal yelapno tato maxhtaj Komam chalni tet naj, yul yet naj chitij yunhe yalaxiko ismay naj; wal xin mach chexxiw tet tzet chal naj,” xhi Komam,» xhi yaꞌ Moisés.