—Watxꞌe kabꞌebꞌ chꞌen chꞌen paqꞌan chu sat, hakaꞌtikꞌa chꞌen kabꞌebꞌ bꞌabꞌelal, yunhe intzꞌibꞌnhenikojan yinh chꞌen, hunteqꞌan tzotiꞌ intzꞌibꞌnhekojan yinh chꞌen kabꞌebꞌ hapohtoj.^a 2 Kat hawatxꞌen habꞌa, yuto yet hekal, chachahti iswiꞌ witz Sinaí, kat hawok yinh insatan yinh iswiꞌ witz bꞌay kaw nahat yekanh. 3 Yajaꞌ machi hunu mak chawiti tawintaj, yebꞌ xin machi hunu mak chiꞌekꞌ yinh ishoyanil witz, machipaxo hunu noꞌ meꞌ maka noꞌ wakax chiꞌekꞌpaxo lowo satakꞌti witz tiꞌ, xhi Komam tet yaꞌ Moisés.

4 Iswatxꞌen yaꞌ Moisés kabꞌebꞌ chꞌen chꞌen paqꞌan yehi, hakaꞌtikꞌa chꞌen kabꞌebꞌ bꞌabꞌel. Haxa yinh hunxa tzꞌayik, kaw sahabꞌ to yaꞌ Moisés yinh iswiꞌ witz Sinaí, yinito yaꞌ chꞌen kabꞌebꞌ chꞌen tuꞌ, hakaꞌtikꞌa yu yalni Komam tet yaꞌ. 5 Yayilo Komam Dios xol huneꞌ moyan yibꞌanh iswiꞌ witz tuꞌ, yehayo Komam iskꞌatanh yaꞌ Moisés, yalni Komam Jahawil isbꞌi tet yaꞌ; 6 yekꞌto Komam sata yaꞌ Moisés, yalni Komam yinh kaw ip hakaꞌ tiꞌ:

—Hanintiꞌan Yahawil hinan, Yahawil inbꞌihan, kaw ay wipan; yebꞌ xin kaw kꞌul inkꞌulan, chitzꞌay inkꞌulan yinh anma, mach chitit inhowalan yinh anhe, wal xin hantanhe iskꞌulchꞌanil inkꞌulan, yebꞌpaxo xin isyelal chiwalan. 7 Haꞌ iskꞌulal inkꞌulan aynhetikꞌa yinh anma yebꞌ yinh yuninal yuninal anma, kat waqꞌni nimankꞌulalan yinh ismul, yinh ismanhkꞌomal yebꞌ yinh istxꞌojal anma. Yajaꞌ chiwayojan isyaꞌtajil yibꞌanh anma chiwatxꞌen istxꞌojal. Ta naj mame chiyako ismul wetan, chiwayojan isyaꞌtajil yibꞌanh naj, yibꞌanh iskꞌahol naj, yebꞌ yibꞌanh yuninal iskꞌahol naj, yebꞌ yibꞌanh iskanh majan yuninal naj, xhi Komam tet yaꞌ Moisés.

8 Wal yaꞌ Moisés tuꞌ, yinh anhe ay jahno yaꞌ, yay xulno yaꞌ sat txꞌotxꞌ, yinayo isbꞌa yaꞌ sata Komam Dios, 9 yalni hakaꞌ tiꞌ:

—Mam Wahawil, wal tinanh ta kaw yeli chachtzala winhan, okanh jetbꞌihojanh hanhonh Israelonh tiꞌanh. Haꞌ anma Israel tiꞌ, kaw lutꞌkano yanma, yajaꞌ aqꞌ nimankꞌulal yinh komulanh yebꞌ kotxꞌojalanh, kat konhachahnikojanh hakonhobꞌoj, xhi yaꞌ Moisés tet Komam.

10 Yalni Komam Dios tet yaꞌ Moisés:

«Wal tinanh, abꞌe tzet chiwalan, chintꞌinhbꞌakanojan intratohan yinh yakꞌtohal tawet sata sunil hawet konhobꞌ, chinwatxꞌehan nimeta kꞌaybꞌalkꞌule tesataj, hunteqꞌan kꞌaybꞌalkꞌule tuꞌ, maxhto bꞌay chiꞌil-lax yu hunu konhobꞌ ay sat txꞌo txꞌotxꞌ tiꞌ. Sunil anma bꞌay ayexayo tiꞌ chiyilaꞌ tzetaj chiyu inwatxꞌenan, yuto chinyehan nimeta kꞌaybꞌalkꞌule tawet yinh sata anma.

11 »Yije sunil tzet chiwalan tawet tinanh, haninan chiwilojan anma amorreo, anma cananeo, anma heteo, anma ferezeo, anma heveo yebꞌ anma jebuseo yinh hasat.

12 »Machi hunu tzet chetaqꞌwekano tet anma ay sat txꞌotxꞌ bꞌay chexokto, yunhe mach chexaykꞌay yul isqꞌabꞌ hunteqꞌan anma tuꞌ. 13 Wal xin cheyuchkꞌato bꞌay chaqꞌ isxahanbꞌal, kat hemaqꞌnipoho istioxh, yebꞌ yechel isdiosal, chiyij Asera.^b

14 »Mach chexay jahno sata hunuxa tzet chihal-lax diosal, yuto hanintiꞌan kaw Yahaw hinan teyinh. Mach chischah inwiꞌan ta cheyiyo habꞌa tet tioxh, yuto kaw xiwkilta inbꞌihan, yebꞌ xin kaw tzꞌeꞌ hinan.

15 »Mach chetꞌinhbꞌa hetzotiꞌ yebꞌ hunteqꞌan anma ay sat txꞌo txꞌotxꞌ bꞌay chexapni tuꞌ, kꞌuxantaxka cheyiyo hebꞌa yet chiyinayo isbꞌa ebꞌnaj tet istioxh, yebꞌ yet chiyaqꞌni isxahanbꞌal tet istioxh tuꞌ, hex hunex taxka chexwaꞌ yintaj ebꞌnaj yet chiskꞌuxni ebꞌnaj noꞌ xahanbꞌal chiyalte tet istioxh.^c 16 Yebꞌ xin kꞌuxantaxka chiqꞌkanh ebꞌnaj hekutzꞌin yebꞌ xin iskutzꞌin ebꞌnaj yebꞌ hekꞌahol. Yuxin hayet chiyinayo isbꞌa ebꞌix tet istioxh, kat yinipaxayo isbꞌa ebꞌnaj sataj, kat yaniko ismul ebꞌnaj wetan.

17 »Yuxin machi bꞌaqꞌinhal chewatxꞌe hetioxh yul molde,» xhi Komam Dios tet yaꞌ Moisés.

18 Yalnipaxo Komam tet yaꞌ Moisés: «Cheyekꞌtze qꞌinh yet chewani ixim pan machi yanhal aykoj, hakaꞌtikꞌa chejbꞌanile aqꞌbꞌil teyet wuhan; yulbꞌal hujebꞌ tzꞌayik chewah ixim pan machi yanhal. Hakaꞌ yu walnihan teyet yinh ixahaw Abib cheyekꞌtze qꞌinh tuꞌ, yuto yinh huneꞌ ixahaw tuꞌ kexel bꞌey Egipto.

19 »Sunil hebꞌabꞌel kꞌahol chipitzkꞌahi, wetan yehi, yebꞌ xin bꞌabꞌel yunin henoqꞌ winaj, noꞌ wakax, noꞌ meꞌ yebꞌ noꞌ chiw wetan yehi. 20 Haxa isbꞌabꞌel yunin heburro winaj chipitzkꞌahi, cheyaqꞌ hunu noꞌ nichꞌan meꞌ maka hunu noꞌ nichꞌan chiw selelo noꞌ, tato machi selel noꞌ cheyaqꞌ xin, yilal heqꞌahnito isnuqꞌ noꞌ nichꞌan burro tuꞌ. Hakpax tuꞌ yinh hebꞌabꞌel kꞌahol, yilal heyaqꞌni hunu noꞌ nichꞌan meꞌ isseleloj. Hayet chexhul insatajan yilal heyiniti hexahanbꞌal wetan.

21 »Yulbꞌal wajebꞌ tzꞌayik chexmunlahi, wal yinh ishuj tzꞌayik xin chexxewi, waxanhka istzꞌayikal hetzꞌunni hetzꞌunubꞌ, maka istzꞌayikal yet cheyinikanh sat hetzꞌunubꞌ.

22 »Cheyekꞌtze qꞌinh chihal-lax yet semanahil, yet cheyinikanh ixim trigo bꞌabꞌel chiqꞌanbꞌiloj, yebꞌpaxo yet cheyinikanh sat hetzꞌunubꞌ yinh islahobꞌal habꞌil cheyekꞌtze qꞌinh yet hetzꞌunubꞌ.

23 »Sunil ebꞌnaj winaj, oxta el chul ebꞌnaj insatajan yulbꞌal habꞌil, hanin Yahawilintiꞌan, heDiosal hex Israel hex tiꞌ. 24 Sunil ej konhobꞌ chiwilojan tesataj, hak tuꞌ xin chichꞌibꞌto sat hetxꞌotxꞌ; machi xin hunu mak chiꞌocheniko hetxꞌotxꞌ tuꞌ yetoj yet chexhul insatajan oxel yul habꞌil.

25 »Hayet cheyaqꞌni no noqꞌ yinh xahanbꞌalil wetan, machojabꞌ cheyalte ischikꞌil noꞌ yebꞌ ixim pan ayko yanhal. No noqꞌ cheyaqꞌ wetan yinh xahanbꞌalil yinh pascua tuꞌ, machi hanikꞌoxa noꞌ cheyikano yinh hunuxa tzꞌayik.

26 »Haꞌ bꞌabꞌel sat hetzꞌunubꞌ kaw kꞌul cheyikanh sat hetxꞌotxꞌ yilal heyinito yul watutan, hanin Yahawil hinan yebꞌ heDiosal.

»Mach chetxik noꞌ nixhte chiw xol yal yim ismiꞌ,» xhi Komam.

27 Yalnipaxo Komam Dios tet yaꞌ Moisés: «Tzꞌibꞌnhe hunteqꞌan tzotiꞌ tiꞌ, yu hunteqꞌan tiꞌ chinwatxꞌehan intratohan yebꞌ hach yebꞌ anma Israel,» xhi Komam.

28 40 (Kawinaj) tzꞌayik yebꞌ 40 (kawinaj) aqꞌbꞌal kankano yaꞌ Moisés iskꞌatanh Komam, machi xin waꞌ yaꞌ, machi haꞌ yukꞌpaxo yaꞌ. Haꞌ bꞌey tuꞌ xin, istzꞌibꞌnhe yaꞌ istzotiꞌal tzet ye tuꞌ istꞌinhbꞌakano Komam Dios yebꞌ konhobꞌ Israel yibꞌanh chꞌen chꞌen paqꞌan yehi; haꞌ ton 10 (lahonhebꞌ) chejbꞌanile.

29 Lahwi tuꞌ xin, ispaxayti yaꞌ Moisés iswiꞌ witz Sinaí tuꞌ, iqꞌbꞌil xin chꞌen kabꞌebꞌ chꞌen yu yaꞌ bꞌay tzꞌibꞌnhebꞌiliko chejbꞌanile; yet yayti yaꞌ iswiꞌ witz tuꞌ. Machi xin yohta yaꞌ tato chitzejtzon sat yaꞌ yuto ispeto yaꞌ tzotelo tet Komam. 30 Hayet yilni yaꞌ Aarón yebꞌ ebꞌnaj Israel tato chitzejla sat yaꞌ Moisés, kaw xiwkanh ebꞌnaj, mach xin hitziko ebꞌnaj iskꞌatanh yaꞌ. 31 Yaj xin yawte yaꞌ Moisés ebꞌnaj, ishitziko yaꞌ Aarón yebꞌ ebꞌnaj yahawil konhobꞌ Israel tuꞌ iskꞌatanh yaꞌ, istzotel yaꞌ tet ebꞌnaj. 32 Lahwi tuꞌ xin, ishitziko anma Israel iskꞌatanh yaꞌ, yaqꞌni yaꞌ sunil chejbꞌanile yaqꞌ Komam tet yinh iswiꞌ witz Sinaí. 33 Haxa yet lahwi istzotel yaꞌ tet anma Israel tuꞌ xin, yaniko yaꞌ huneꞌ qꞌap qꞌap yenhelo sat.

34 Haxa yet chiꞌapni yaꞌ Moisés sata Komam xin, yet chitzotel yaꞌ yebꞌ Komam, chilo yaꞌ qꞌap qꞌap ayko yenhelo sat masanto yet chiꞌelti yaꞌ. Hayet chiꞌelti yaꞌ xin, kat yalni yaꞌ tet anma Israel chejbꞌanile chaqꞌ Komam tet yaꞌ. 35 Hayet chilni anma Israel tato chitzejla issat yaꞌ Moisés, kat yaniko yaꞌ qꞌap qꞌap tuꞌ yenhelo sat hunelxa, masanto yet chiꞌokto yaꞌ tzotelo tet Komam hunelxa, kat yinilo yaꞌ qꞌap.