3 »Lahwi tuꞌ, inwatxꞌenan huneꞌ kaxha, yinh yaqꞌinteꞌal teꞌ acacia. Inwatxꞌenpaxojan kabꞌebꞌ chꞌen chꞌen paqꞌpaqꞌ yehi, lahwi tuꞌ winahtojan chꞌen yinh iswiꞌ witz. 4 Istzꞌibꞌnheniko Komam Dios 10 (lahonhebꞌ) chejbꞌanile yinh chꞌen, hakaꞌtikꞌa yu istzꞌibꞌnheniko yet bꞌabꞌelal, yet istzotelayti Komam teyet xol qꞌa qꞌaꞌ yinh iswiꞌ witz yet kutxanexikoj, yaqꞌni Komam chꞌen wetan. 5 Lahwi tuꞌ, inpaxaytijan iswiꞌ witz tuꞌ, inkꞌubꞌantojan chꞌen yul teꞌ Kaxha, haꞌ bꞌey tuꞌ ay chꞌen tinanh hakaꞌ yalni Komam Jahawil wetan.

6 »(Lahwi tuꞌ, yel konhobꞌ Israel bꞌey Beerot-bene-jaacán, yapni bꞌey Mosera, bꞌay kam yaꞌ Aarón, haꞌ tuꞌ mujlax yaꞌ. Haxa xin yaꞌ Eleazar, yaꞌ iskꞌahol yaꞌ Aarón, okkano sacerdotehal selelo ismam. 7 Yel ebꞌnaj Israel bꞌey tuꞌ, yapni bꞌey Gudgoda, yel ebꞌnaj bꞌey Gudgoda tuꞌ, yapni bꞌey Jotbata bꞌay kaw ay ha haꞌ. 8 Haꞌ yinh huneꞌ tiempohal tuꞌ, issikꞌilo Komam anma titna yinh yaꞌ Leví yunhe haꞌ ebꞌnaj chiꞌinito isKaxhahil istrato Komam, yebꞌ yu aynhetikꞌako ebꞌnaj sata Komam yu isyijen tzet chiyala, yebꞌ yu isqꞌanni ebꞌnaj iskꞌulal Komam yibꞌanh anma Israel yinh isbꞌi Komam; haꞌ xin ismunil ebꞌnaj tinanh. 9 Yu huneꞌ tuꞌ, yuxin machi istxꞌotxꞌ yebꞌ ismajul ebꞌnaj levita tuꞌ xol ebꞌnaj Israel; yuto haꞌ Komam, haꞌ ayko ismajulo ebꞌnaj, hakaꞌtikꞌa yalni Komam.)

10 »Hayet wahtojan iswiꞌ witz tuꞌ, 40 (kawinaj) tzꞌayik yebꞌ 40 (kawinaj) aqꞌbꞌal kinehayojan bꞌey tuꞌ, hakaꞌtikꞌa yet bꞌabꞌelal. Yabꞌenpaxo Komam tzet inqꞌanan yuxin machi kexistanhtzeloj. 11 Wal xin yal Komam wetan hakaꞌ tiꞌ: “Ayanhtoj, watxꞌe habꞌa, yuto hach chaxhbꞌabꞌi sata konhobꞌ tiꞌ, kat heto heyaqꞌni howal, kat heqꞌoji yinh anma ay sat txꞌotxꞌ waltehan ta chiwaqꞌan tet heyichmam,” xhi Komam.

12 »Haꞌ tinanh xin, hex wet Israelal, ¿tzet chisqꞌan Komam Dios Jahawil? Wal xin ayojabꞌ yelapno Komam yul hesat, kat heyok tzujno yinta sunil tzet chala, kat heyochen Komam, kat heyijen tzet chala yinh sunil heyanma yebꞌ sunil hekꞌul. 13 Kat hekꞌubꞌan chejbꞌanile yaqꞌ Komam Jahawil, yebꞌ kuybꞌanile lanhan walnihan teyet tinanh, hak tuꞌ xin kꞌul chiꞌekꞌ heyilaꞌ. 14 Yet Komam Dios Jahawil ye satkanh yebꞌ tzet ay yibꞌanhahto satkanh; haꞌ txꞌo txꞌotxꞌ yebꞌ sunil tzet ay sat txꞌotxꞌ yet Komam yehi. 15 Yajaꞌ waxanhka yahaw Komam yinh tuꞌ, yaj kaw tzala Komam yinh ebꞌyaꞌ jichmam. Isxahannhen Komam ebꞌyaꞌ, konhissikꞌnilo hanhonh titna yinh jichmam xol ejla konhobꞌ, hak tuꞌ chu yijni isbꞌa tinanh.

16 »Aqꞌwe circuncidar heyanma, yebꞌ xin matxa chehipnhe hebꞌa. 17 Yuto Komam Dios Jahawil, ekꞌbꞌal yibꞌanh sunil tzet chihal-lax diosal. Yahaw Komam yibꞌanh ebꞌnaj chihal-lax yahawil. Kaw aykano yelapno Komam, kaw aykano yip yebꞌ kaw ay ismay. Machi hunu mak tiꞌ ekꞌbꞌal yelapno sata hunuxa yet anmahil yul sat Komam. Mach chisubꞌcha Komam yu hunu sabꞌehal chꞌaqꞌlax tet. 18 Haꞌ Komam chiwatxꞌen istoholal yinh mak machi ismam, machi ismiꞌ, yebꞌ yinh ebꞌix hunix. Xahan chiyil Komam anma nan konhobꞌal ayko texol, chiyaqꞌni Komam tzet chislo yebꞌ xil isqꞌap. 19 Yuxin hakojabꞌ tuꞌ cheyute, xahan cheyil anma mach Israelo ay texol, yuto hex tiꞌ nan konhobꞌal yu hebꞌeykꞌo xol anma Egipto yet heyekꞌ bꞌey tuꞌ.

20 »Hanhehojabꞌ Komam Dios Jahawil ay yelapno yul hesat, yebꞌ xin hanhehojabꞌ tet Komam cheyije, kat heyok tzujno yinh tzet chiyala, hanhe xin isbꞌi cheyawte yet chetaqꞌweniko hunu tzet ye tuꞌ teyibꞌanh. 21 Halwe Kꞌul-la tzotiꞌ yinh Komam, yuto Komam koDiosal watxꞌenhe sunil nimeta kꞌaybꞌalkꞌule yebꞌ tzetaj kaw ay yelapno yehi, hakaꞌ tzet ilbꞌil ju. 22 Hayet yapni ebꞌnaj jichmam bꞌey Egipto tuꞌ, 70 (lahonhebꞌ iskanhwinajnhe) isbꞌisil yinh sunil, yajaꞌ wal tinanh xapohchakanokanh kobꞌisil yu Komam Dios Jahawil, hakaꞌ isbꞌisil txꞌumel,» xhi yaꞌ Moisés.