Maxhtaj yu iskꞌulal anma Israel yuxin sikꞌlaxiloj
9
Yalnipaxo yaꞌ Moisés: «Abꞌewe hex Israel hex tiꞌ, tinanh maꞌapni yorahil heqꞌaxponikꞌto yibꞌanh haꞌ Jordán, kat heyok heyinolo anma yul ej konhobꞌ kaw nimejkanoj, yebꞌ ekꞌbꞌal yip tesataj, yebꞌ ekꞌbꞌal isbꞌisil teyibꞌanh. Hunteqꞌan konhobꞌ hoyaniko chꞌen kꞌubꞌ yinh, kaw nahat yekanokanh. 2 Hunteqꞌan anma ay yul hunteqꞌan konhobꞌ tuꞌ kaw nime anma ebꞌnaj, kaw xin nimejkano istel ebꞌnaj, haꞌ ton ebꞌnaj titna yinh naj Anac. Hex tiꞌ xaheyabꞌe isqꞌumal ebꞌnaj yet yal-lax hakaꞌ tiꞌ: “¿Mak hunu tiꞌ chiqꞌoji yinh ebꞌnaj titna yinh naj Anac? Mach maka,” xhi. 3 Wal tinanh ohtanheweloj tato Komam Dios Jahawil chibꞌabꞌi tesataj, lahan hakaꞌ qꞌa qꞌaꞌ chitanhtzenilo sunil tzet ye tuꞌ. Haꞌ Komam chitanhtzenilo hunteqꞌan konhobꞌ tuꞌ, kat yinayo isbꞌa tesataj, kat xin hetzumbꞌenilo bꞌey tuꞌ; kat xin hetanhtzenkanilo yinh islahobꞌal, hakaꞌtikꞌa yute yalni Komam.4 »Hayet xayilo Komam anma tuꞌ tesataj, mach cheyal hakaꞌ tiꞌ: “Yu kokꞌulal yuxin konhyiti Komam ehoyo sat txꞌotxꞌ tiꞌ,” tajka kexchi. Wal xin chilo Komam hunteqꞌan anma tuꞌ tesataj yu istxꞌojal tzet chiswatxꞌe sata Komam; 5 maxhtaj yu hekꞌulal yebꞌ yu istoholal heyanma, yuxin chexapni sat istxꞌotxꞌ anma tuꞌ, wal xin chiyilo Komam anma tuꞌ tesataj yu istxꞌojal chiswatxꞌe, yebꞌ yu yijni isbꞌa tzet yalte Komam tet yaꞌ Abraham, yaꞌ Isaac, yebꞌ yaꞌ Jacob, ebꞌyaꞌ jichmam. 6 Wal xin ohtanheweloj tato mach yu hekꞌulal, yuxin chaqꞌ Komam txꞌotxꞌ kaw kꞌul teyet kat heyehayo sat txꞌotxꞌ, wal xin, hex tiꞌ lahan hex yebꞌ anma kaw lutꞌ.
Yet yok anma Israel ismanhkꞌono tet Komam Dios bꞌey witz Horeb
7 »Taj chenahulnhetoj tato heyaqꞌtij ishowal Komam Dios Jahawil bꞌey txꞌotxꞌ desierto. Yettax konhyilo Komam bꞌey Egipto masanta bꞌay ayonh tiꞌ tinanh kaw manhkꞌomexnhetikꞌa tet Komam.a 8 Yet ayonh bꞌey witz Horeb kaw heyaqꞌtij ishowal Komam, kaw xin yoche Komam kexistanhtzeloj yu kaw tit ishowal teyinh. 9 Yet wahtojan yinh iswiꞌ witz inchahnojan chꞌen chꞌen paqꞌpaqꞌ yehi tet Komam, bꞌay tzꞌibꞌnhebꞌiliko chejbꞌanile yaqꞌ Komam jet, 40 (kawinaj) tzꞌayik yebꞌ 40 (kawinaj) aqꞌbꞌal kinkankanojan, machi xin kinwaꞌan, matzet wukꞌpaxojan. 10 Yaqꞌni Komam chꞌen kabꞌebꞌ chꞌen paqꞌpaqꞌ yehi wetan bꞌay tzꞌibꞌnhebꞌiliko tzotiꞌ yal Komam yinh iswiꞌ witz xol qꞌa qꞌaꞌ yinh istzꞌayikal yet kutxanexiko yich witz tuꞌ, haꞌ xin kaw Komam tzꞌibꞌnhenayo yinh chꞌen yu yiximal isqꞌabꞌ. 11 Yet lahwi yekꞌto 40 (kawinaj) tzꞌayik yebꞌ 40 (kawinaj) aqꞌbꞌal tuꞌ, yaqꞌni Komam chꞌen kabꞌebꞌ chꞌen paqꞌpaqꞌ yehi wetan bꞌay tzꞌibꞌnhebꞌilkanayo ischejbꞌanil Komam. 12 Yalni Komam wetan hakaꞌ tiꞌ: “Ahanhwanoj, ayanhto yinh anhe yuto hawet konhobꞌ hawilti bꞌey Egipto xayetato isbꞌa; kaw yinh anhe isbꞌejkano isyijen tzet halbꞌil wuhan, maswatxꞌe ebꞌnaj huneꞌ istioxh yinh chꞌen chꞌen uli xol qꞌa qꞌaꞌ,” xhi Komam.b
13 »Yalnipaxo Komam wetan hakaꞌ tiꞌ: “Kaw xawilan tato huneꞌ konhobꞌ tiꞌ kaw hipkanoj. 14 Hitzanhilo insatajan yuto chintohan intanhtzekanilojan ebꞌnaj yunhe matxa chibꞌina ebꞌnaj yul sat yibꞌanhqꞌinal tiꞌ; haxa tawinh chipohcha huneꞌ niman konhobꞌ wuhan, huneꞌ konhobꞌ kaw ay yip yebꞌ ekꞌbꞌal isbꞌisil yibꞌanh ebꞌnaj tiꞌ,” xhi Komam.
15 »Hayet waytijan yinh iswiꞌ witz tuꞌ bꞌay chiꞌah topla qꞌa qꞌaꞌ, iqꞌbꞌil chꞌen kabꞌebꞌ chꞌen paqꞌpaqꞌ ye wuhan bꞌay tzꞌibꞌnhebꞌilayo ischejbꞌanil Komam. 16 Yajaꞌ yet wilnihan tato heyako hemul yul sat Komam Dios Jahawil, hewatxꞌen huneꞌ yechel noꞌ tzehla wakax yinh chꞌen chꞌen uli xol qꞌa qꞌaꞌ, hebꞌejnikano bꞌeybꞌale halbꞌilkano teyet yu Komam ta cheyije. 17 Yet wilnihan huneꞌ tuꞌ inqꞌojnitojan chꞌen kabꞌebꞌ chꞌen paqꞌpaqꞌ yehi ayko yul inqꞌabꞌan, inpohnitojan chꞌen yinh hesat. 18 Way jahnojan sata Komam, hakaꞌ yet bꞌabꞌelal, 40 (kawinaj) tzꞌayik yebꞌ 40 (kawinaj) aqꞌbꞌal, machi xin kinwaꞌan, matzet wukꞌpaxojan yu hemul heyakoj; hewatxꞌen istxꞌojal sata Komam, heyaqꞌnitij ishowal. 19 Kaw xin kinxiwkanhan yu sunil ishowal Komam tit teyinh, yu kexistanhtzeniloj, yajaꞌ xin yabꞌeto Komam tzet inqꞌanan hunelxa. 20 Kaw xin titpaxo ishowal Komam yinh yaꞌ Aarón, yaꞌ wuxhtajan; yoche xin Komam istanhtzelo yaꞌ, yajaꞌ kinokan tzotelo yinh yaꞌ tet Komam. 21 Lahwi tuꞌ, wok tzabꞌnojan yinh huneꞌ yechel wakax hewatxꞌe, bꞌay heyako hemul. Inqꞌojnitojan chꞌen tuꞌ xol qꞌa qꞌaꞌ, lahwi tuꞌ inchejnihan kokꞌtzelaxoj, kaw pojoj elkanikoj. Wanaytojan ispojojal tuꞌ xol haꞌ nichꞌan haꞌ chiꞌekꞌ yojomal chitit yinh witz.
22 »Hakpax tuꞌ xin yet ayonh bꞌey Tabera yebꞌ bꞌey Masah, yebꞌpaxo bꞌey Kibrot-hataava, heyaqꞌnipaxo tij ishowal Komam Jahawil. 23 Hakpax tuꞌ xin yet jel yu Komam bꞌey Cades-barnea yet yalni jet hakaꞌ tiꞌ: “Ahanhwetoj kat heyehayo sat txꞌo txꞌotxꞌ waqꞌan teyet,” xhi Komam, kaw xin manhkꞌom heyute hebꞌa yinh tzet yala. 24 Kaw manhkꞌom heyute hebꞌa tet Komam Jahawil yettax kexwohtanhekanilojan.
25 »Kinay jahnojan sata Komam Jahawil; yinh 40 (kawinaj) tzꞌayik yebꞌ 40 (kawinaj) aqꞌbꞌal kinay jahnojan sata Komam yu yal Komam kexistanhtzeloj. 26 Kaw xin kinokan inqꞌanaꞌan tet Komam hakaꞌ tiꞌ: Mamin, mach chatanhtzelo huneꞌ konhobꞌ tiꞌ yuto hawet yehi. Huneꞌ konhobꞌ tiꞌ hakolilo yu hahelanil, hawinilti bꞌey Egipto yet hayeni hawip. 27 Wal xin nati hachejabꞌ Abraham, hachejabꞌ Isaac yebꞌ hachejabꞌ Jacob; mach chaxhoktꞌanhno yinh ishipal hunteqꞌan anma tiꞌ, yebꞌ istxꞌojal iswatxꞌe, yebꞌ mule. 28 Yunhe mach chal anma ay sat txꞌotxꞌ bꞌay konhhawiltijanh hakaꞌ tiꞌ: “Mach chu yu Komam yanikto anma tuꞌ sat txꞌotxꞌ yalte ta chiyaqꞌa,” xhi. Maka chiyalpaxo anma hakaꞌ tiꞌ: “Yu chiyahwa Komam yinh ebꞌnaj, yuxin yilo Komam ebꞌnaj bꞌey tiꞌ yu yaqꞌnikamo ebꞌnaj sat txꞌotxꞌ desierto,” xhim anma. 29 Wal xin haꞌ anma tuꞌ hakonhobꞌ, hawet yehi, hach hawilti bꞌey Egipto yinh sunil hawip, yebꞌ haqꞌabꞌ halebꞌato yibꞌanh ebꞌnaj,» kinchihan tet Komam.