2 «Ilkꞌanabꞌi xol yikꞌal yaꞌ Judá xaꞌinsayilojan naj Bezaleel, naj iskꞌahol naj Uri, naj Uri tuꞌ iskꞌahol naj Hur. 3 Xawako Wespírituhan yinh naj, xawaqꞌan yitzꞌatil iswiꞌ naj, yebꞌ isnabꞌal naj, yebꞌ yohtanhen naj helanile iswatxꞌen sunil munil. 4 Ishelanil naj iswatxꞌen yelawil tzetaj ye tuꞌ, iswatxꞌen naj chꞌen oro, chꞌen plata, yebꞌ chꞌen bronce. 5 Ishelanil istzeni yebꞌ yaniko yelawil ej chꞌen chꞌen, yebꞌ ismunla yinh ej te teꞌ, yebꞌ iswatxꞌen naj tzijxanhe tzet munilal. 6 Xaꞌinsaypaxilojan naj Aholiab yunhe iskolwa naj yinh naj, naj iskꞌahol naj Ahisamac, naj yikꞌal naj Dan; yebꞌ xin ebꞌnaj kaw ay isnabꞌal, xawaqꞌan yaqꞌbꞌil isnabꞌal ebꞌnaj, yunhe iswatxꞌen ebꞌnaj sunil tzet inchejan hawatxꞌe. 7 Chiswatxꞌekanh ebꞌnaj Tabernáculo, bꞌay chinchah hinbꞌahan yebꞌ hach, yebꞌ teꞌ Kaxha yet intratohan, yebꞌ chiswatxꞌe ebꞌnaj ismajil teꞌ Kaxha tuꞌ. Chiswatxꞌepaxo ebꞌnaj sunil ismunlabꞌal watuttuꞌan; 8 teꞌ mexha yebꞌ ismunlabꞌal teꞌ, yebꞌ huneꞌ candelero oro bꞌay chiahto cantil, yebꞌ ismunlabꞌal, yebꞌ ismexhahil yet xahanbꞌal bꞌay chinhuslax teꞌ pom. 9 Kat iswatxꞌenpaxo ebꞌnaj huneꞌ mexha bꞌay chinhuslax xahanbꞌal wetan yebꞌ sunil ismunlabꞌal, yebꞌ huneꞌ chꞌen pechꞌan yebꞌ yoyal. 10 Kat iswatxꞌen ebꞌnaj qꞌap xilqꞌape chembꞌil kaw txahul chako yaꞌ sacerdote Aarón, yebꞌ isxil isqꞌap ebꞌnaj iskꞌahol yaꞌ Aarón yet chiꞌok yinh ismunil yinh sacerdotehal. 11 Chiswatxꞌepaxo ebꞌnaj teꞌ aceite chiꞌokniko yinh inmunilan, yebꞌ teꞌ pom kaw xuqꞌ sam chinhuslax yul watutan. Haꞌ ebꞌnaj tuꞌ chiwatxꞌen sunil hakaꞌtikꞌa chinchejan hawatxꞌeꞌ,» xhi Komam.

12 Ayto tzet yal Komam Dios tet yaꞌ Moisés hakaꞌ tiꞌ:

13 «Tzotelanh tet iskꞌahol yaꞌ Israel kat hawalni tet hakaꞌ tiꞌ: Yilal heyijen istzꞌayikal xewilal, yuto wetan yehi, haꞌ huneꞌ tiꞌ chiꞌok yechelo texol yebꞌ hinan yebꞌ xin tet yuninal yuninal ebꞌnaj Israel; yunhe yohtanhelaxiloj tato hanin Yahawintiꞌan kexinsikꞌilojan inkonhobꞌojan.

14 »Istzꞌayikal xewilal, haꞌ sábado, kaw niman yelapno yul hesat, yilal hexew yinh huneꞌ tzꞌayik tuꞌ. Haꞌ mak mach chiyijen huneꞌ tzꞌayik tuꞌ yilal yaqꞌlax kamoj; yebꞌ mak chimunla yinh huneꞌ tzꞌayik tuꞌ wihom yilaxilo xol inkonhobꞌan. 15 Yulbꞌal wajebꞌ tzꞌayik chexmunlahi, haxa yinh ishuj tzꞌayik, sábado xin, chexxewi, yuto huneꞌ tzꞌayik tuꞌ wetan yehi, hanin Yahawintiꞌan. Maktikꞌa chimunla yinh huneꞌ tzꞌayik tuꞌ chikami. 16 Yuxin sunil mak titna yinh yaꞌ Israel, yilal isyijen isxew yinh huneꞌ tzꞌayik tuꞌ, yuto haꞌ huneꞌ tiꞌ yechel intratohan yebꞌ hex. 17 Haꞌ chiꞌok yechelo xol yuninal yaꞌ Israel yebꞌ hinan yinh sunilbꞌal ej tiempo.

»Yuto hanin Yahawintiꞌan inwatxꞌehan satkanh yebꞌ txꞌo txꞌotxꞌ yinh wajebꞌ tzꞌayik, haxa yinh ishuj tzꞌayik xin inlinhbꞌan inmunlahan inxewan,» xhi Komam.

18 Hayet lahwi istzotel Komam Dios tet yaꞌ Moisés iswiꞌ witz Sinaí, yaqꞌnikano Komam tet yaꞌ kabꞌebꞌ chꞌen chꞌen paqꞌan yehi, bꞌay tzꞌibꞌnhebꞌiliko ley yu Komam Dios yu yiximal isqꞌabꞌ.