4 Yalnipaxo yaꞌ Moisés tet anma Israel kutxaniko tuꞌ: «Haꞌ hunteqꞌan chejbꞌanile tiꞌ yal Komam tato yilal heyijeni; 5 cheyiweti sabꞌehal tet Komam; sunil mak chiꞌel yinh iskꞌul yaqꞌni issabꞌehal; chisje yiniti chꞌen oro, chꞌen plata maka chꞌen bronce; 6 maka qꞌap yax qꞌap, qꞌap kajmutzꞌmunhe, qꞌap kaj jilni, qꞌap lino kaw kꞌul, yebꞌ xil noꞌ chiw. 7 Cheyipaxti istzꞌumal noꞌ meꞌ hunteqꞌan kaj yelawil aykoj, yebꞌ hunteqꞌanxa istzꞌumal no noqꞌ kaw ay istohol, yebꞌ teꞌ aqꞌinteꞌ chiꞌel yinh teꞌ acacia. 8 Cheyipaxti teꞌ aceite chiꞌokniko yu ismujli chꞌen lámpara, cheyipaxti perfume chiꞌok xol teꞌ aceite chiꞌalaxayo yibꞌanh mak chiꞌok yinh inmunilan, yebꞌ chiꞌok xol teꞌ pom kaw xuqꞌkano sam. 9 Cheyipaxti chꞌen ónice, yebꞌ hunteqꞌanxa chꞌen kaw ay istohol, chiꞌok yibꞌanh ischaleko yaꞌ yahawil sacerdote yebꞌ yibꞌanh qꞌap chiꞌok istxamo iskꞌul yaꞌ.

10 »Sunil ebꞌnaj winaj ay ishelanil isnabꞌal tijabꞌ ebꞌnaj kat yok ebꞌnaj iswatxꞌeno sunil tzet halbꞌil yu Komam ta yilal iswatxꞌi. 11 Chiswatxꞌe ebꞌnaj bꞌay chiꞌeh Komam, huneꞌ yatut yinh qꞌap mantiado; chiswatxꞌe ebꞌnaj tzet chꞌahto yibꞌanh, yebꞌ isganchohal, yebꞌ teꞌ aqꞌinteꞌ chiꞌok yinh, yebꞌ isreglahil, yebꞌ yoyal, yebꞌ bꞌay chitzꞌonhi teꞌ oy. 12 Chiswatxꞌepaxo ebꞌnaj teꞌ Kaxha yet istrato Komam, yebꞌ te teꞌ chibꞌatxnikanh, yebꞌ ismajil teꞌ Kaxha tuꞌ, yebꞌ qꞌap qꞌap chꞌok yiktabꞌal Yatut Komam. 13 Chiswatxꞌepaxo ebꞌnaj teꞌ mexha yebꞌ te teꞌ chibꞌatxnikanh teꞌ, yebꞌ sunil ismunlabꞌal teꞌ mexha tuꞌ; yebꞌ ixim pan chiꞌay sata Komam. 14 Chiswatxꞌepaxo ebꞌnaj huneꞌ candelero bꞌay chiꞌahto cantil kat yok qꞌaꞌ yinh, yu ismujli. 15 Chiswatxꞌepaxo ebꞌnaj ismexhahil yet xahanbꞌal bꞌay chinhuslax teꞌ pom, yebꞌ te teꞌ chibꞌatxnikanh; yebꞌ teꞌ aceite chiꞌalaxayo yibꞌanh mak chiꞌok yinh ismunil Komam, yebꞌ teꞌ pom kaw xuqꞌkano sam, yebꞌ qꞌap qꞌap chiꞌok ismajilo istiꞌ ispultahil Yatut Komam Dios. 16 Chiswatxꞌepaxo ebꞌnaj ismexhahil yet xahanbꞌal bꞌay chinhuslax xahanbꞌal, yebꞌ istxayibꞌal, bronce chꞌen chꞌoki. Chiswatxꞌenpaxo te teꞌ chibꞌatxnikꞌoj yebꞌ sunil ismunlabꞌal ismexhahil yet xahanbꞌal tuꞌ; chiswatxꞌepaxo ebꞌnaj huneꞌ chꞌen pechꞌan yebꞌ yoj pechꞌan tuꞌ. 17 Yebꞌ qꞌap qꞌap chiꞌok yinh ishoyanil yamaqꞌil Yatut Komam, yebꞌ yoyal qꞌap, yebꞌ xeꞌ yoyal qꞌap tuꞌ, yebꞌ qꞌap qꞌap chiꞌok yinh istiꞌ ispultahil yamaqꞌil Yatut Komam. 18 Yebꞌ teꞌ estaca yebꞌ txꞌanh txꞌanh chiꞌok yinh istiꞌla Yatut Komam yebꞌ yinh istiꞌla yamaqꞌil. 19 Chiswatxꞌepaxo ebꞌnaj qꞌap xilqꞌape chembꞌil chiyako ebꞌnaj sacerdote yet chiꞌok ebꞌnaj yinh ismunil yul Yatut Komam, qꞌap kaw niman yelapno chako yaꞌ Aarón, yebꞌ xil isqꞌap ebꞌnaj iskꞌahol naj yet chiꞌok ebꞌnaj yinh ismunil yinh sacerdotehal,» xhi yaꞌ Moisés.

20 Hayet lahwi yalni yaꞌ Moisés sunil tuꞌ sata anma Israel, ispaxto anma. 21 Sunil mak xin el yinh iskꞌul yaqꞌni, yiti issabꞌehal tet Komam Dios Jahawil, yu yokniko yinh iswatxꞌelax Yatut Komam bꞌay chischah isbꞌa yebꞌ ebꞌnaj, yebꞌ sunil tzet chiꞌokniko iswatxꞌebꞌaniloj, yebꞌ qꞌap xilqꞌape kaw niman yelapnoj. 22 Hul ebꞌnaj winaj yebꞌ ebꞌix ix, maktikꞌa el yinh iskꞌul hul yaqꞌaꞌkano issabꞌehal tet Komam; ay mak initi chꞌen cadena, chꞌen uwe, yebꞌ chꞌen jolqꞌabꞌe, yebꞌ chꞌen petpet yehi chꞌok yinh qꞌabꞌe, yebꞌ sunil tzet ye tuꞌ ay istohol watxꞌebꞌil yinh chꞌen oro; sunil mak xin aqꞌni tzet ye tuꞌ oro sabꞌehal tet Komam. 23 Sunil ebꞌnaj ay isqꞌap yax, yebꞌ qꞌap kajmutzꞌmunhe, yebꞌ qꞌap kaj, yebꞌ qꞌap lino kaw kꞌul, yebꞌ xil noꞌ chiw, yebꞌ istzꞌumal noꞌ meꞌ ayko kaj yelawiloj, yebꞌ hunteqꞌanxa istzꞌumal no noqꞌ kaw ay istohol, haꞌ yiti ebꞌnaj tet Komam. 24 Haxa mak el yinh iskꞌul yiniti chꞌen plata yebꞌ chꞌen bronce sabꞌehal tet Komam, haꞌ chꞌen yitij; haxa mak ay teꞌ acacia tet, haꞌ teꞌ yitij, yu yijni isbꞌa sunil tzet chiꞌokniko yinh Yatut Komam. 25 Haxa ebꞌix ix kaw helan ischemli, yiti ebꞌix qꞌap qꞌap ischem tuꞌ, qꞌap yax qꞌap, qꞌap kajmutzꞌmunhe, yebꞌ qꞌap kaj jilni, yebꞌ qꞌap lino kaw kꞌul. 26 Yebꞌ sunil ebꞌix ix kaw ay ishelanil isnabꞌal el yinh iskꞌul ebꞌix, isbꞌaynayo xil noꞌ chiw. 27 Haxa ebꞌnaj yahawil xol ebꞌnaj Israel, yiti ebꞌyaꞌ chꞌen ónice, yebꞌ hunteqꞌan chꞌen chꞌen kaw ay istohol, yu yok chꞌen yibꞌanh ischaleko yaꞌ yahawil sacerdote yebꞌ yinh qꞌap chiꞌok istxamo iskꞌul yaꞌ. 28 Yinipaxti ebꞌnaj anh kaw xuqꞌ sam, yebꞌ teꞌ aceite chiꞌokniko yu ismujli chꞌen lámpara, yebꞌ tzet chiꞌokniko iswatxꞌebꞌanil teꞌ aceite chiꞌalaxayo yibꞌanh mak chiꞌok yinh ismunil Komam, yebꞌ tzet chiꞌok xol teꞌ pom kaw xuqꞌkano sam.

29 Sunil konhobꞌ Israel, ebꞌnaj winaj yebꞌ ebꞌix ix, maktikꞌa el yinh iskꞌul iskolwahi yunhe yijni isbꞌa iswatxꞌi tzet ischej Komam iswatxꞌeꞌ yaꞌ Moisés; yiti anma tuꞌ issabꞌehal, yaj el yinh iskꞌul yaqꞌni tet Komam.

30 Yalni yaꞌ Moisés tet anma Israel: «Ilwekꞌanabꞌi, xol yikꞌal yaꞌ Judá, xaꞌissayilo Komam naj Bezaleel, iskꞌahol naj Uri, ismam icham naj Bezaleel tuꞌ ye naj Hur. 31 Yaqꞌni Komam yespíritu yinh naj, yaqꞌnipaxo Komam yitzꞌatil iswiꞌ naj, isnabꞌal naj, yebꞌ ishelanil naj yu iswatxꞌen sunil tzet ye tuꞌ. 32 Ishelanil naj iswatxꞌen yechel ej tzet ye tuꞌ, yebꞌ ismunla naj yinh chꞌen oro, chꞌen plata yebꞌ chꞌen bronce; 33 yebꞌ istzehni naj chꞌen chꞌen, yebꞌ yaniko naj yechel ej chꞌen chꞌen kꞌulchꞌan jilni; yebꞌ ismunla naj yinh ej te teꞌ, yebꞌ iswatxꞌen naj tzijxanhe munilal. 34 Yaqꞌ Komam ishelanil naj iskuywahi, hakpax tuꞌ xin naj Aholiab, iskꞌahol yaꞌ Ahisamac, yaꞌ yikꞌal yaꞌ Dan. 35 Xayaqꞌ Komam ishelanil isnabꞌal ebꞌnaj iswatxꞌen sunil ej tzet ye tuꞌ, istzehni ebꞌnaj chꞌen chꞌen, yebꞌ iswatxꞌen yechel sunil tzetaj ye tuꞌ; yebꞌ yaniko ebꞌnaj yelawil qꞌap yax qꞌap, qꞌap kajmutzꞌmunhe, yebꞌ qꞌap kaj yebꞌ qꞌap lino kaw kꞌul, yebꞌ ischemni ebꞌnaj ej qꞌap qꞌap chiꞌalaxiko yechel.