Iswatxꞌebꞌanil xil isqꞌap ebꞌnaj sacerdote
39
Haꞌ xil isqꞌap ebꞌnaj sacerdote chiyako yet chimunla ebꞌnaj yul Yatut Komam, watxꞌelax qꞌap tuꞌ yinh qꞌap yax qꞌap, qꞌap kajmutzꞌmunhe, qꞌap kaj; haktikꞌapax tuꞌ yu iswatxꞌelaxpaxo xil isqꞌap yaꞌ Aarón. Haꞌ xil isqꞌap yaꞌ chako yinh ismunil Komam watxꞌelax hakaꞌtikꞌa yu yalni Komam tet yaꞌ Moisés.2 Hayet iswatxꞌelax qꞌap chaleko, ok chꞌen oro yinh qꞌap, yebꞌ txꞌal yax, txꞌal kajmutzꞌmunhe, txꞌal kaj jilni, yebꞌ txꞌal lino bꞌatxꞌobꞌil. 3 Ischakꞌlax chꞌen oro yu chꞌen martillo yunhe ispaqꞌbꞌalax chꞌen hakaꞌ xaj hum eliko chꞌen, iskꞌuplaxayoj hakaꞌ txꞌal txꞌal. Ischemlaxto chꞌen xol txꞌal yax txꞌal, txꞌal kajmutzꞌmunhe, txꞌal kaj, yebꞌ txꞌal lino, kaw kꞌulchꞌan elikoj. 4 Yalaxiko kabꞌebꞌ istxꞌanhal qꞌap chaleko tuꞌ, chiꞌekꞌto yibꞌanh iswixikꞌ yaꞌ, chischah isbꞌa istxam qꞌap istel yichinh yaꞌ. 5 Hakaꞌ ye iswatxꞌebꞌanil qꞌap chaleko hak tuꞌ yepaxo qꞌap chikꞌalnayo chaleko tuꞌ. Huneꞌnhe yu iswatxꞌebꞌanil qꞌap yinh sunil yebꞌ yelawil; ok chꞌen oro xol qꞌap, yebꞌ txꞌal yax txꞌal, txꞌal kajmutzꞌmunhe, txꞌal kaj, yebꞌ txꞌal lino bꞌatxꞌobꞌil. Hakaꞌtikꞌa yu yalnikano Komam tet yaꞌ Moisés, hak tuꞌ elikoj.
6 Yalaxiko chꞌen ónice yibꞌanh chꞌen oro, istzꞌibꞌnhelaxiko isbꞌi ebꞌnaj iskꞌahol yaꞌ Israel yinh chꞌen, hakaꞌ chu yalaxiko istzꞌibꞌal hunu sello. 7 Yaniko naj chꞌen yibꞌanh istxꞌanhal qꞌap chaleko yinh iswixikꞌ, yunhe isnahlaxti ebꞌnaj iskꞌahol yaꞌ Israel tuꞌ, hakaꞌtikꞌa yu yalni Komam Dios tet yaꞌ Moisés.
8 Haxa qꞌap yet istxam iskꞌul, kaw kꞌul yu ischembꞌanil qꞌap, hakaꞌ qꞌap chaleko tuꞌ; ayko chꞌen oro yinh qꞌap yebꞌ txꞌal yax txꞌal, txꞌal kajmutzꞌmunhe, txꞌal kaj, yebꞌ txꞌal lino bꞌatxꞌobꞌil. 9 Qꞌap yet istxam iskꞌul tuꞌ, kaw pim qꞌap yebꞌ xin kanhebꞌ istxikin qꞌap; kabꞌ pajan ye qꞌap, 22 (kabꞌ iskawinaj) centímetro issat qꞌap, nueve pulgadapaxo issat qꞌap. 10 Ayko kanhebꞌ txol chꞌen nixhte chꞌen kaw kꞌulchꞌan jilni yibꞌanh qꞌap; yinh bꞌabꞌel txol ayko chꞌen sardio, chꞌen topacio yebꞌ chꞌen carbunclo. 11 Haxa chꞌen yinh iskabꞌ txol, ayko chꞌen esmeralda, chꞌen zafiro, chꞌen diamante. 12 Haꞌ chꞌen yinh yox txol, ayko chꞌen jacinto, chꞌen ágata, yebꞌ chꞌen amatista. 13 Haxa chꞌen yinh iskanh txol, ayko chꞌen berilo, chꞌen ónice yebꞌ chꞌen jaspe. Sunil chꞌen nixhte chꞌen tiꞌ, ayayto yul chꞌen oro. 14 Kabꞌlahonhebꞌ chꞌen, yuto kabꞌlahonhebꞌ isbꞌisil ebꞌyaꞌ iskꞌahol yaꞌ Israel; hakaꞌ yeko istzꞌibꞌal sello, hak tuꞌ yeko isbꞌi hunun ebꞌyaꞌ yinh hunun chꞌen, haꞌ ton ebꞌyaꞌ kabꞌlahonhebꞌ majan Israel.
15 Iswatxꞌelaxpaxo iscadenahil qꞌap yet istxam iskꞌul tuꞌ, oro huneꞌ cadena tuꞌ, halbꞌil chꞌen. 16 Iswatxꞌelaxpaxo kabꞌebꞌ chꞌen istzꞌonhobꞌal yebꞌ kabꞌebꞌ chꞌen oro, petan yehi. Yalaxiko chꞌen oro petan yehi yinh kabꞌebꞌal istxikin qꞌap yet istxam iskꞌul tuꞌ yinh yetkꞌulal iswixikꞌ. 17 Iskꞌal-laxiko chꞌen cadena oro tuꞌ yinh chꞌen kabꞌebꞌ oro petpet yehi. 18 Yok hunun istxam chꞌen cadena tuꞌ yibꞌanh chꞌen bꞌay tzꞌonhbꞌabꞌilayo chꞌen, iskꞌal-laxiko yibꞌanh istxꞌanhal iswiꞌ iswixikꞌ qꞌap chaleko iskawilal istxam iskꞌul. 19 Iswatxꞌipaxo kabꞌebꞌ chꞌen oro petkixhtanhe yehi, yalaxiko chꞌen yinh kabꞌebꞌ istxikin qꞌap yalanh istxam iskꞌul, yuto hun chuko yebꞌ qꞌap chaleko tuꞌ. 20 Iswatxꞌipaxo kabꞌebꞌ chꞌen oro petkixhtanhe yehi, yok chꞌen yinh istxꞌanhal chaleko yinh iswiꞌ iswixikꞌ, iskawilal istxam iskꞌul, hun yu iskankano bꞌay chiꞌapni istzꞌisbꞌanil yalanh, yibꞌanhahto qꞌap iskꞌalil yiktaj tuꞌ. 21 Hak tuꞌ xin yu ishuni qꞌap yet istxam iskꞌul yebꞌ qꞌap chaleko yu kanhebꞌ chꞌen oro petan yehi, haꞌ txꞌal yax txꞌal, haꞌ chiximleni, yunhe isximlen isbꞌa qꞌap yibꞌanh qꞌap txꞌambꞌale yet qꞌap chaleko, yunhe mach chispoh isbꞌa qꞌap chaleko yebꞌ qꞌap istxam iskꞌul tuꞌ, hakaꞌ yu yalni Komam Jahawil tet yaꞌ Moisés.
22 Watxꞌelax iskapahil qꞌap chaleko chemlax qꞌap yinh qꞌap yax qꞌap. 23 Haꞌ istiꞌ isholanil isnuqꞌ qꞌap kaw pim, pajtzobꞌil yunhe machi tzilmoto qꞌap, lahan hakaꞌ hunteqꞌan chaleko chiwatxꞌelax yinh noꞌ tzꞌum.a 24 Yalaxiko yelawil istxam istiꞌ qꞌap capa tuꞌ, alaxiko yechel teꞌ granada watxꞌebꞌil yinh qꞌap yax qꞌap, qꞌap púrpura, qꞌap kaj, qꞌap lino bꞌatxꞌobꞌil. 25 Iswatxꞌelaxpaxo nixhte campana oro; yalaxiko chꞌen campana tuꞌ xolbꞌal yechel teꞌ granada ayko yinh sunil istxam istiꞌ qꞌap capa tuꞌ. 26 Yuxin huneꞌ chꞌen campana, huneꞌ teꞌ granada, huneꞌxa chꞌen campana, huneꞌxa teꞌ granada, hak tuꞌ yeko yelawil yinh istxam istiꞌ qꞌap capa chiꞌokniko yinh ismunil Komam, hakaꞌtikꞌa yu yalnikano Komam Jahawil tet yaꞌ Moisés.
27 Hak tuꞌ xin yu ej qꞌap túnika chiꞌok yinh yaꞌ Aarón yebꞌ yinh ebꞌnaj iskꞌahol yaꞌ, chemlax qꞌap yinh qꞌap lino kaw kꞌul. 28 Hakpax tuꞌ qꞌap mitra yinh txꞌal lino kaw kꞌul chemlax qꞌap, yebꞌpaxo yelawil qꞌap tiara yinh txꞌal lino kaw kꞌul watxꞌebꞌil; hakpax tuꞌ qꞌap yul wexe yinh qꞌap lino watxꞌebꞌil qꞌap, qꞌap lino kotxkichtaj yeko yelawil. 29 Haxa qꞌap chikꞌalni yikta ebꞌnaj, yinh qꞌap lino kotxkixhtanhe yeko yelawil yebꞌ txꞌal yax txꞌal, yebꞌ txꞌal kajmutzꞌmunhe, yebꞌ txꞌal kaj tzꞌisbꞌil qꞌap yu mak kaw ay ishelanil, hakaꞌtikꞌa yu yalni Komam Dios tet yaꞌ Moisés.
30 Iswatxꞌelaxpaxo chꞌen placa oro chiꞌok yinh qꞌap mitra, haꞌ chꞌen xin chihalniloj ta sacerdote ebꞌnaj; tzꞌibꞌnhebꞌiliko hunteqꞌan tzotiꞌ tiꞌ yinh chꞌen: Yet Komam Dios yehi, xhikoj. 31 Lahwi tuꞌ iskꞌal-laxiko chꞌen yu txꞌal yaxtzꞌantzꞌonhe yibꞌanh qꞌap mitra, qꞌap ayahto yinh iswiꞌ ebꞌnaj, hakaꞌtikꞌa yu yalnikano Komam Dios tet yaꞌ Moisés.
Lahwikano iswatxꞌi Yatut Komam Dios
32 Hak tuꞌ yu islahwi iswatxꞌelaxkano Yatut Komam Dios, watxꞌelax yinh qꞌap qꞌap bꞌay chiskutxbꞌa isbꞌa anma Israel yebꞌ Komam. Kaw hakaꞌtikꞌa yu yalnikano Komam Dios tet yaꞌ Moisés, hak tuꞌ yu iswatxꞌen ebꞌnaj Israel. 33 Yanikaniko ebꞌnaj yul isqꞌabꞌ yaꞌ Moisés; ischahnikano yaꞌ Yatut Komam Dios watxꞌebꞌil yinh qꞌap qꞌap. Ischahnipaxkano yaꞌ sunil tzet chiꞌokniko yul Yatut Komam tuꞌ, hakaꞌ chꞌen gancho, teꞌ aqꞌinteꞌ, teꞌ regla chiꞌekꞌto yul chꞌen oro petan yehi, teꞌ oy yebꞌ isxeꞌal; 34 yebꞌ istzꞌumal noꞌ meꞌ kaj yelawil aykoj, chiꞌahto yibꞌanh Yatut Komam tuꞌ; yebꞌ istzꞌumal no noqꞌ kaw labꞌan yebꞌ ay istohol, yebꞌ qꞌap velo ayko sata isKaxha Komam. 35 Ischahnipaxo yaꞌ teꞌ Kaxha yet istrato Komam Dios, yebꞌ te teꞌ chibꞌatxnikanh, yebꞌ ismajil Kaxha tuꞌ. 36 Yanipaxiko ebꞌnaj teꞌ mexha yul isqꞌabꞌ yaꞌ, yebꞌ sunil vaso, yebꞌ ixim pan chiꞌalaxayo sata Komam Dios, 37 yebꞌ chꞌen candelero nabꞌa oro, yebꞌ isnet aceite, yebꞌ teꞌ aceite chiꞌayto yul isnet tuꞌ yunhe ismujli, yebꞌ sunil tzet chiꞌokniko yinh candelero tuꞌ yunhe machi tanh qꞌaꞌ yinh. 38 Yalaxpaxiko ismexhahil yet xahanbꞌal nabꞌa oro yul isqꞌabꞌ yaꞌ, yebꞌ teꞌ aceite chiꞌalaxayo yibꞌanh mak chiꞌok yinh ismunil Komam, yebꞌ teꞌ pom kaw xuqꞌ sam; yebꞌ qꞌap cortina chiꞌok bꞌay chonhoknapno yul Yatut Komam. 39 Ischahnipaxo yaꞌ ismexhahil yet xahanbꞌal nabꞌa bronce yebꞌ istxayibꞌal broncepaxoj, yebꞌ te teꞌ chibꞌatxnikanh ismexhahil yet xahanbꞌal tuꞌ, yebꞌ sunil tzet chiꞌokniko yinh ismexhahil yet xahanbꞌal tuꞌ; yebꞌ chꞌen pechꞌan, yebꞌ yoj chꞌen pechꞌan tuꞌ. 40 Ischahnipaxo yaꞌ qꞌap cortina hoyaniko yinh yamaqꞌil Yatut Komam, yebꞌ yoyal yebꞌ xeꞌal oy tuꞌ; yebꞌ qꞌap cortina ayko yinh istiꞌ ispultahil yamaqꞌil Yatut Komam, yebꞌ txꞌanh lasu yebꞌ yestakahil yamaqꞌil Yatut Komam. Yebꞌ sunil tzet chiꞌokniko yul Yatut Komam watxꞌebꞌilayo yinh qꞌap qꞌap, bꞌay chiskutxbꞌa isbꞌa anma Israel yebꞌ Komam. 41 Ischahnipaxkano yaꞌ Moisés qꞌap xilqꞌape chembꞌil chiꞌok yinh yaꞌ Aarón yebꞌ ebꞌnaj iskꞌahol yet chimunla ebꞌnaj yul Yatut Komam Dios; hunteqꞌan xil isqꞌap ebꞌnaj tuꞌ yinhnhe yet Komam chiꞌokniko yu ebꞌnaj.